Report sang mga Manugbantala sang Ginharian
Ang Dios Walay Ginapasulabi
KAPIN sa 1,900 ka tuig ang nagligad, nagpanaksi si apostol Pedro sa isa ka opisyal sang hangaway nga si Cornelio, nga nagasiling: “Matuod gid ginahantop ko nga ang Dios walay ginapasulabi, kundi sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.” (Binuhatan 10:34, 35) Nagpakita si Cornelio sing kahadlok sa Dios kag gugma sa pagkamatarong. Ginbaton niya ang pagpanaksi ni Pedro kag nangin Cristiano.
Amo man ang prinsipio sa karon—ang Dios walay ginapasulabi. Makita naton ini gikan sa isa ka eksperiensia sa Alemanya. Ang report nagasiling:
“Sa teritoryo sang amon kongregasyon, may isa ka daku nga mga kuwartel sang Ruso nga mga soldado. Sang 1989, wala madugay sa tapos mapukan ang Pader sang Berlin, namangkot ang mga gulang kon may mga manugbantala nga makahibalo maghambal sing Ruso nga hambal. Ang iban sa amon makahibalo sini, gani ginkadtuan namon ini nga teritoryo, nga nangin makalilipay gid. Ang masunod isa sang madamo nga eksperiensia.
“Upod ko ang isa ka dibawtismado nga manugbantala (nga sugod sadto nagpabawtismo na) sang makighambal kami sa isa ka komandante. Namati ang komandante sa amon dapat ihambal kag dayon gin-agda niya kami nga makighambal sa iya mga soldado. Nagsiling sia nga dapat man sila makabati tuhoy sa Dios kag sa Biblia, gani naghimo kami sing kasugtanan nga magbalik.
“Ginpangabay namon ang isa ka utod nga talunsay sa paghambal sing Ruso nga mag-upod sa amon subong manugbadbad. Sa hulot tilipunan sang mga kuwartel, nagplastar kami sing isa ka lamesa para sa libro kag nakahambal namon ang 68 ka soldado kag ginsabat ang ila mga pamangkot. Pagkatapos malipayon nga ginbaton nila ang 35 ka libro kag halos 100 ka magasin. Sang nagaguwa na kami sa hulot tilipunan, nakita namon ang diutay nga mga grupo nga nagahambalanay tuhoy sa mga libro.
“Nakigsugot kami nga magbalik sa Hulyo 4, 1992. Pag-abot namon sang alas 10:50 s.a., ginsugiran kami sang guwardia sang mga kuwartel nga ginapaabot kami sang mga soldado. Gindala kami sang medyor sa hulot tilipunan, kag nasapwan namon nga gin-anunsio sang isa ka babayi, nga nakakuha anay sa amon sing literatura para sa librarya, ang amon pag-abot paagi sa pagtakod sing mga plakard sa mga kuwartel. Tatlo ka utod nga lalaki ang naghatag sing malip-ot nga mga pamulongpulong nahanungod sa aton bug-os kalibutan nga hilikuton kag ginpakita nila kon ngaa masaligan naton ang Biblia. Dayon ginsabat namon ang mga pamangkot gikan sa tumalambong nga ginagamit ang Biblia. Lakip sa mga pamangkot amo, Ano ang tindog sang mga Saksi ni Jehova sa pag-alagad sa militar, kag may mga soldado bala sa ila? Naghatag ini sa dibawtismado nga manugbantala nga nag-upod anay sa akon sing kahigayunan nga ilaragway ang iya 25-ka-tuig nga karera sa militar sang Sidlangan nga Alemanya, ang katapusan nga mga tuig subong kapitan sang air force. Ginsaysay niya kon paano sia nakatuon tuhoy sa Dios kag sa Biblia kag karon luyag niya mangin isa sang mga Saksi ni Jehova. Nahamuot ang mga soldado sa ila nabatian. Sa sulod lamang sang mga minuto ang tanan nga literatura nga gindala namon yara na sa mga kamot sang mga soldado, kag madamo ang luyag makatigayon sing Biblia. Nakabakal kami sing pito ka Ruso nga Biblia sa isa ka balaligyaan sing mga libro, nga ila ginbaton sing mainapresyahon. Makalilipay gid ang paghatag sa sining mga gutom sa espirituwal sing impormasyon sa Biblia, kag nagalaum kami nga iaplikar nila ini.”
Sa pagkamatuod, ang Dios walay ginapasulabi. Paagi sa iya Pulong ginaganyat niya ang bunayag sing tagipusuon nga mga tawo bisan sin-o man sila kag bisan diin man sila. Ginaagda niya sila nga magtuon tuhoy sa iya kag sa iya Anak, si Jesucristo, kag madamo gikan sa tanan nga kahimtangan sa kabuhi ang nagahimo sina.—Juan 17:3.