Ang Inyo Napatay nga mga Hinigugma—Makita Ayhan Ninyo Sila Liwat?

SIAM ka tuig lamang si John sang napatay ang iya iloy. Sang ulihi, gin-asoy niya ang natabo sa punerarya: “Nagdrowing ako sing larawan niya kag ginsulatan ini sing malip-ot nga nagapangabay sa iya nga hulaton niya kami tanan sa langit. Ginhatag ko ini kay Daddy agod ibutang niya sa lungon ni Mommy, kag bisan patay na sia, luyag ko hunahunaon nga nabaton niya ang akon katapusan nga mensahe.”​—⁠How It Feels When a Parent Dies, ni Jill Krementz.

Wala sing duhaduha nga palangga gid ni John ang iya iloy. Sa tapos malaragway ang iya maayong mga kinaiya, sia nagsiling: “Ayhan indi ko lang luyag dumdumon ang malain nga mga kinaiya, apang wala gid ako sing mahunahuna nga malain nahanungod sa iya. Sia ang pinakamatahom nga babayi nga nakita ko sa akon bug-os nga kabuhi.”

Kaangay ni John, madamo ang may matahom nga mga handumanan sa ila napatay nga hinigugma kag nagabaton sang emosyonal nga kinahanglanon nga makita sila liwat. Si Edith, nga ang iya 26-anyos nga anak nga lalaki napatay bangod sa kanser, nagsiling: “Dapat ako magpati nga ang akon anak nagaluntad sa iban nga lugar apang wala ako makahibalo kon diin. Makita ko bala sia liwat? Ambot lang apang nagalaum ako nga makita ko sia liwat.”

Sa pagkamatuod, nahibaluan sang mahigugmaon nga Manunuga sang tawo ining kinaandan nga tawhanon nga handom. Amo ina kon ngaa nagsaad sia nga magaabot ang tion nga ang minilyon mahiusa liwat sa ila napatay nga mga hinigugma. Ang Pulong sang Dios nagaunod sang madamong pagpatuhoy sa sining saad nahanungod sa pagbanhaw sa patay.​—⁠Isaias 26:19; Daniel 12:​2, 13; Oseas 13:14; Juan 5:​28, 29; Bugna 20:​12, 13.

Sin-o ang Banhawon Pa Langit?

Binagbinagon naton ang paglaum ni John nga ang iya hinigugma nga iloy nagahulat sa iya sa langit. Madamong nagasimba ang may amo sini nga paglaum ukon pagpati. Sa panikasog nga supurtahan ina nga mga pagtamod, gin-aplikar sing sayop sang mga klerigo kag sang pila ka social worker ang mga teksto gikan sa Biblia.

Halimbawa, ang isa ka eksperto sa pagbulig sa namatyan, nga si Dr. Elisabeth Kübler-Ross, nagsiling sa iya libro nga On Children and Death: “Ang kamatayon nagakahulugan lamang nga ginahaboy naton ang aton lawas kaangay sa paghaboy naton sa daan kag gision na nga kunop, ukon sa pagsaylo sa pihak nga hulot. Sa Manugwali 12:​8, aton mabasa: ‘Kag ang yab-ok nagabalik sa duta subong nga amo sia anay; kag ang espiritu nagabalik sa Dios nga naghatag sa iya.’ Si Jesus nagsiling: ‘Magalakat ako sa paghanda sang duog para sa inyo agod nga kon diin ako didto man kamo.’ Kag sa makawat sa krus: ‘Karon nga adlaw mangin kaupod ko ikaw sa paraiso.’ ”

Ang mga teksto sa ibabaw nagakahulugan gid bala nga ang aton napatay nga mga hinigugma nagakabuhi karon kag nagahulat sa aton sa langit? Binagbinagon naton sing maayo pa ining mga teksto, nagasugod sa Manugwali 12:⁠7. Sing maathag, ang maalam nga tawo nga nagsulat sadto nga mga pulong wala sing tuyo nga supakon ang ginsiling na sa amo man nga tulun-an sa Biblia: “Ang buhi nakahibalo nga mapatay sila; apang nahanungod sa patay, wala sila makahibalo sang bisan ano.” (Manugwali 9:⁠5) Ginahambalan niya ang kamatayon sang katawhan sa kabilugan. Makatarunganon bala patihan nga ang tanan nga nagapangangkon nga mga ateista kag batinggilan nga mga kriminal magabalik sa Dios pagkapatay nila? Indi gid. Sa katunayan, indi masiling nga ang bisan sin-o sa aton nagabalik sa Dios, bisan man ginakabig naton ang aton kaugalingon nga maayo ukon malain. Sanglit wala sing isa sa aton ang nangin kaupod sang Dios sa langit, paano masiling nga nagabalik kita sa iya?

Ano, nian, ang buot silingon sang manunulat sang Biblia paagi sa pagsiling nga sa kamatayon, ‘ang espiritu nagabalik sa matuod nga Dios’? Sa paggamit sang Hebreong tinaga nga ginbadbad nga “espiritu,” wala niya ginapatuhuyan ang isa ka butang nga tumalagsahon nga nagapatuhay sa isa ka tawo gikan sa isa. Sa baylo, sa Manugwali 3:​19, ang amo gihapon nga inspirado nga manunulat sang Biblia nagapaathag nga ang tawo kag mga sapat “tanan may isa ka espiritu.” Maathag nga ang buot silingon niya nga ang “espiritu” amo ang puwersa sang kabuhi sa mga selula nga nagahuman sa pisikal nga mga lawas sang tawo kag mga sapat. Wala naton mabaton ini nga espiritu sing direkta halin sa Dios. Ginliton ini sa aton sang aton tawhanon nga mga ginikanan sang ginpanamkon kita kag sang ulihi ginbun-ag. Dugang pa, ining espiritu wala nagalakbay sing literal sa espasyo kag nagabalik sa Dios sa kamatayon. Ang ekspresyon, ‘ang espiritu nagabalik sa matuod nga Dios,’ isa ka paagi sang hambalanon nga nagakahulugan nga ang palaabuton nga paglaum sa kabuhi sang patay nga tawo nasandig karon sa Dios. Sia ang mamat-od kon sin-o ang iya dumdumon kag banhawon sa ulihi. Talupangda kon paano ini maathag nga ginapakita sang Biblia sa Salmo 104:​29, 30.

Gintuyo ni Jehova nga Dios nga ang limitado nga kadamuon sang matutom nga mga sumulunod ni Cristo, nga may kabug-usan nga 144,000 lamang, pagabanhawon sa langitnon nga kabuhi subong espiritu nga mga anak sang Dios. (Bugna 14:​1, 3) Sila ang nagahuman sa langitnon nga panguluhan kaupod ni Cristo para sa kabulahanan sang katawhan sa duta.

Ang nahauna nga nakahibalo nahanungod sini amo ang matutom nga mga apostoles ni Jesus, nga sa ila sia nagsiling: “Sa balay sang akon Amay may madamong hulot. Kon wala, kuntani ginsugid ko sa inyo, bangod nagakadto ako sa pag-aman sa inyo sing duog. Subong man, kon ako makakadto kag makaaman sa inyo sing duog, magabalik ako kag dalhon ko kamo kaupod nakon, agod nga kon diin ako didto man kamo.” (Juan 14:​2, 3) Yadtong mga apostoles kag ang iban pa nga unang mga Cristiano napatay kag kinahanglan nga maghulat nga wala sing hinalung-ong sa kamatayon tubtob sa pagkari ni Jesus agod padyaan sila sing langitnon nga pagkabanhaw. Amo ina kon ngaa aton mabasa nga ang nahaunang Cristianong martir, nga si Esteban, “nagtulog sa kamatayon.”​—⁠Binuhatan 7:60; 1 Tesalonica 4:⁠13.

Pagkabanhaw sa Kabuhi sa Duta

Apang kamusta ang saad ni Jesus sa kriminal nga napatay sa tupad niya? Kaangay sang madamong Judiyo sadto nga panahon, ini nga tawo nagpati nga ang Dios magapadala sing isa ka Mesias nga magapatindog sing ginharian kag magapasag-uli sang paghidait kag kalig-unan sa Judiyong pungsod sa duta. (Ipaanggid ang 1 Hari 4:​20-25 sa Lucas 19:11; 24:21 kag Binuhatan 1:⁠6.) Dugang pa, ang malaut nagpabutyag sing pagtuo nga si Jesus amo gid ang Isa nga pinili sang Dios nga mangin Hari. Apang, sadto nga higayon, ang nagahilapit nga kamatayon ni Jesus subong isa ka tawo nga ginpakamalaut daw nagahimo sini nga imposible. Amo ina kon ngaa ginpasalig ni Jesus ang kriminal paagi sa pagsugid sa nahauna nga tion sang Iya saad paagi sa sining mga tinaga: “Sa pagkamatuod ginasiling ko sa imo karon nga adlaw, Mangin kaupod ko ikaw sa Paraiso.”​—⁠Lucas 23:​42, 43.

Ang mga manugbadbad sang Biblia nga nagsal-ot sing kudlit antes sa tinaga nga “karon nga adlaw” nagatuga sing problema sa mga tawo nga luyag makahangop sang mga pinamulong ni Jesus. Si Jesus wala magkadto sa bisan diin nga paraiso sadto gid nga adlaw. Sa baylo, nahamyang sia nga wala sing hinalung-ong sa kamatayon sa tatlo ka adlaw tubtob ginbanhaw sia sang Dios. Bisan pagkatapos sang pagkabanhaw kag pagkayab sa langit ni Jesus, naghulat sia sa tuo nga kamot sang iya Amay tubtob sa pag-abot sang tion nga magagahom sia subong Hari sa ibabaw sang katawhan. (Hebreo 10:​12, 13) Sa dili madugay, ang paggahom sang Ginharian ni Jesus magadala sing paumpaw sa katawhan kag magahimo sa bug-os nga duta nga isa ka paraiso. (Lucas 21:​10, 11, 25-31) Nian tumanon niya ang iya saad sa sadto nga kriminal paagi sa pagbanhaw sa iya sa kabuhi sa duta. Kag si Jesus mangin kaupod sang tawo sa kahulugan nga magabulig Sia sa tanan nga mga kinahanglanon sang tawo, lakip ang kinahanglanon nga ipahisanto ang iya estilo sang pagkabuhi sa matarong nga mga kasuguan sang Dios.

Pagkabanhaw sang Madamo

Kaangay sadtong mahinulsulon nga kriminal, ang pagkabanhaw sang kalabanan nga mga tawo mahanabo diri sa duta. Nahisanto ini sa katuyuan sang Dios sa pagtuga sa tawo. Ang nahaunang lalaki kag babayi ginbutang sa isa ka paraiso nga katamnan kag ginsugo nga gahuman ang duta. Kon nagpabilin sila nga matinumanon sa Dios, wala sila kuntani magtigulang kag napatay. Sa gintalana nga tion sang Dios, ang bug-os nga duta gingamhan kuntani, ginhimo nga tugob-globo nga paraiso ni Adan kag sang iya himpit nga mga kaliwat.​—⁠Genesis 1:28; 2:​8, 9.

Apang, bangod sanday Adan kag Eva hungod nga nagpakasala, nagdala ini sa ila kag sa ila palaabuton nga mga kaanakan sing kamatayon. (Genesis 2:​16, 17; 3:​17-19) Amo ina kon ngaa ang Biblia nagasiling: “Paagi sa isa ka tawo [si Adan] nagsulod ang sala sa kalibutan kag paagi sa sala ang kamatayon, kag gani ang kamatayon naglaton sa tanan nga tawo kay ang tanan nakasala.”​—⁠Roma 5:⁠12.

Isa lamang ang natawo nga hilway sa napanubli nga sala. Sia amo ang himpit nga Anak sang Dios, nga si Jesucristo, nga ang iya kabuhi ginliton halin sa langit pakadto sa taguangkan sang isa ka Judiya nga ulay, nga si Maria. Si Jesus nagpabilin nga wala sing sala kag indi nagakabagay nga patyon. Gani, ang iya kamatayon may yara nagagawad nga balor tungod sa “sala sang kalibutan.” (Juan 1:29; Mateo 20:28) Amo ina kon ngaa si Jesus makasiling: “Ako ang pagkabanhaw kag ang kabuhi. Ang nagatuo sa akon, bisan mapatay sia, magakabuhi.”​—⁠Juan 11:⁠25.

Gani, huo, mahunahuna mo ang palaabuton nga mahiusa liwat sa imo napatay nga hinigugma, apang nagakinahanglan ini nga magpakita ka sing pagtuo kay Jesus subong ang imo Manuggawad kag tumanon sia subong ang gintangdo nga Hari sang Dios. Sa dili madugay pagadulaon sang Ginharian sang Dios ang tanan nga kalainan sa sining duta. Ang tanan nga mga tawo nga nagapangindi sa pagpasakop sa pagginahom sini pagalaglagon. Apang, ang mga sakop sang Ginharian sang Dios makalampuwas kag mangin masako sa paghimo sini nga duta nga isa ka paraiso.​—⁠Salmo 37:​10, 11; Bugna 21:​3-5.

Nian magaabot ang makalilipay nga tion para magsugod ang pagkabanhaw. Mangin yara bala ikaw sa pag-abiabi sa mga napatay? Nagadepende ini sa kon ano ang ginahimo mo sa karon. Ang makalilipay nga mga pagpakamaayo nagahulat sa tanan nga nagapasakop karon sa pagginahom sang Ginharian ni Jehova paagi sa iya Anak, nga si Jesucristo.