Pagtan-aw nga May Apresasyon sa “Balay sang Dios”
“ISA ka butang ang ginpangabay ko kay Jehova—ini ang pangitaon ko, nga makapuyo ako sa balay ni Jehova sa tanan nga adlaw sang akon kabuhi, sa pagtan-aw sang katahuman ni Jehova kag sa pagtan-aw nga may apresasyon sa iya templo.”—Salmo 27:4.
Ang mainapresyahon nga si Hari David nagatan-aw nga may kahamuot, ukon kalipay, sa templo ni Jehova. Amo man bala sina ang imo balatyagon sa mga sentro sang matuod nga pagsimba karon? Ang kapin sa 95 ka puluy-an Bethel sa mga sanga sang Watch Tower Society amo ang pila sa mga pasilidad nga ginabuylog sa pagsimba kay Jehova sa panahon naton.
“Ang pagbalikid sa akon madamong tinuig sang pag-alagad sa Bethel nagapuno sa akon sing tudok nga pagpasalamat kag daku nga apresasyon, nga nagadugang tuig-tuig,” paathag ni Helga, nga nagsugod sa pagpangabudlay sa puluy-an Bethel sa Alemanya sang 1948. Si Helga isa sang 13,828 ka malipayon nga mga manugpangabudlay sa Bethel sa bug-os nga kalibutan nga sang 1993 nga tuig sa pag-alagad ‘nagtan-aw sa katahuman ni Jehova.’ Ano gid ang kahulugan sang ngalan nga Bethel? Paano ang kada isa sa mga Saksi ni Jehova, nagaalagad man sa Dios sa sulod sang Bethel ukon sa guwa, makatan-aw nga may apresasyon sa sining kahimusan?
Ang Ngalan nga Nagakinahanglan sing Debosyon
Ang “Bethel” amo ang labing nagakaigo nga ngalan, kay ang Hebreong tinaga nga Behth-ʼElʹ nagakahulugan sing “Balay sang Dios.” (Genesis 28:19, footnote) Huo, ang Bethel kaangay sang isa ka organisado sing maayo nga balay, ukon ‘panimalay nga ginpatindog sa kaalam,’ nga ang sentro sang igtalupangod amo ang Dios kag ang iya kabubut-on. (Hulubaton 24:3) “Kaangay ini sang isa ka pamilya. May yara kami organisado sing maayo nga adlaw-adlaw nga rutina,” siling ni Herta sing mainapresyahon. Nag-alagad sia sa amo man nga Bethel subong ni Helga sa kapin sa 45 ka tuig. Ang tagsa ka katapo sining daku nga panimalay may kaugalingon nga hilikuton kag kaugalingon nga duog, nga nagatugot sa iya sa pagbatyag nga malipayon kag malig-on. Nahisanto sa ngalan nga Bethel, ang maayo nga kahimusan kag organisasyon makita sa tagsa ka departamento. Nagapasanyog ini sang paghidait, nagahimo nga epektibo sang pagbantala sang maayong balita, kag nagahatag sa mga kongregasyon sing maayo nga mga rason agod tamdon ang “Balay sang Dios” nga may pinakadaku nga pagtahod.—1 Corinto 14:33, 40..
Ngaa ina nga mga pasilidad kinahanglanon? Ini nga magasin, halimbawa, gin-imprinta sa imprintahan sa Bethel. Ang pagbantala sang mensahe sang Ginharian kag ang pagpanagtag sang espirituwal nga pagkaon, nga lunsay nakita na nga daan ni Jesucristo, nagahimo sang mga kahimusan sa organisasyon kaangay sang Bethel nga kinahanglanon gid—nga ginasakdag sang kinabubut-on nga mga manugpangabudlay kag ginatahod sing daku sang tanan nga mga sumilimba ni Jehova.—Mateo 24:14, 45.
Luyag bala ninyo mahibaluan ang dugang pa nahanungod sa adlaw sang pagtrabaho nga rutina diri? Sa ginapuy-an nanday Helga kag Herta, isa ka malulot nga tunog ang nagaragingring sa bug-os nga residence building sa alas 6:30 s.a., bisan pa nga madamo sa kapin sa 800 ka regular nga mga manugpangabudlay ang nagabugtaw sing temprano sa paghanda para sa adlaw. Pagkaalas 7:00 s.a., Lunes tubtob Sabado, ang pamilya nagatipon sa mga hulot kalan-an agod hambalan ang adlaw-adlaw nga teksto, ukon pagsimba sa aga. Nagasunod ang masustansia nga pamahaw. Ang tagsa ka adlaw nga pagtrabaho nagasugod sa alas 8:00 s.a. kag nagalawig sing walo ka oras, nga may pahuway sa tigpalanyaga. (Ang pamilya kinaandan nga nagatrabaho sing tunga sa adlaw kon Sabado.) Sa kusina man, sa imprintahan, sa lalabhan, sa mga opisina, sa mga talyer, bookbindery, ukon sa bisan anong iban pa nga departamento, madamo sing hilimuon.
Sa mga gab-i ukon sa mga talipuspusan sang semana, ang mga katapo sang panimalay nagapakig-upod sa lokal nga mga kongregasyon sa mga miting kag sa dayag nga pagbantala. Madamo nga kauturan nga lalaki sa Bethel ang mga gulang ukon ministeryal nga mga alagad sa sining mga kongregasyon. Ginaapresyar gid sang lokal nga mga Saksi ini nga kooperasyon, ang duha ka grupo nahiusa nga nagapangabudlay nga magkaupod subong isa ka hubon, nga may pagtahod kag paghangop. (Colosas 2:19) Ang tagsa ka manugpangabudlay sa Bethel nakahibalo nga ang iya asaynment sa “Balay sang Dios” amo ang prioridad sa iban pa nga mga hilikuton. Apang, ang kapagsik sa pagbantala kag kakugi sa kongregasyon, lakip ang timbang nga panimuot, nagapabakod sa espirituwalidad sang manugpangabudlay sa Bethel, nagadugang sang iya kalipay, kag nagahimo sa iya nga mas mapatubason nga katapo sang pamilya. Kinahanglanon gid ini nga mga kinaiya kon nagapangabudlay sa “balay” nga ang ngalan naangot sa bug-os kalag nga debosyon!
Paghimo sang Pag-alagad sa Bethel nga Isa ka Kadalag-an
Ano ang nakabulig sa dimaisip nga mga Saksi ni Jehova sa paghimo sa pag-alagad sa Bethel nga isa ka kadalag-an? Ang mga katapo sang panimalay Bethel sa Pransya nga may madamong tinuig nga eksperiensia nagkomento subong sang masunod: “Ang gugma kay Jehova. Ang determinasyon sa pagpadayon kon diin niya kita ginabutang; pagpaubos, pagpasakop, kag pagtuman sa panuytoy nga ginahatag sa aton sang Sosiedad.” (Denise) “Nakita ko kon daw ano ka importante nga tahuron ang prinsipio nga ginsambit ni Pablo sa Roma 12:10: ‘Sa pagpakita sing dungog sa isa kag isa manguna.’ Ginapakita sa aton sini nga kasulatan ang importansia sang indi pagpilit sang aton personal nga opinyon nga batunon kundi, sa baylo, sang pagpatugsiling sa opinyon sang iban. Sa iban nga hambal, wala nagapangita sing importansia.” (Jean-Jacques) “Ang aton pagtahod sa pag-alagad sa Bethel mahimo nga mapierde kon tamdon naton ang mga butang gikan sa undanon, tawhanon nga pagtamod,” siling ni Barbara, “kay mahimo ini magadul-ong sa aton nga malipat sa katunayan nga ginatuytuyan ni Jehova ang iya organisasyon. Ina nga pagtahod mahimo nga madula kon masandad kita sa mga pagkadihimpit sang iban.”
Ang tagsatagsa sa Bethel dihimpit, gani ang pagpakig-upod nagakinahanglan sing mahalungon nga panghunahuna. Ang mga pamatan-on ukon mga bag-o nag-abot mas maayo nga indi lamang maglatid sang ila pagpakig-upod sa ila mga katubotubo. Ang mga nagapakita sing huyog sa pagreklamo ukon sa paghunahuna sing negatibo indi makapalig-on nga kaupdanan sa Bethel ukon sa kongregasyon. Sa pihak nga bahin, ang pag-ilog sa “kaalam gikan sa hitaas,” nga ginlaragway sa Santiago 3:17, nagadala sing mga pagpakamaayo. Ini “una sa tanan matinlo, nian mahidaiton, makatarunganon, handa sa pagtuman, puno sing kaluoy kag maayong mga bunga, wala nagahimo sing may nadampigan nga pagbinahinbahin, indi salimpapaw.” Ina nga mga kinaiya, upod sang pagkamabinatason kag kalulo, talalupangdon sa “Balay sang Dios,” nga nagahimo sang pagtener sang isa didto nga makalilipay kag makapapagsik. Bisan ang indi Saksi nga mga bisita masunson nga nagapabutyag sing pagdayaw tungod sa maayo nga paggawi, pagkamainabyanon, kag malipayon nga espiritu sang mga manugpangabudlay.
Si Anny, nga kapin na sa 70 ka tuig ang edad kag katapo sang panimalay Bethel sa Alemanya sugod sang 1956, nagapaathag kon paano niya nahuptan ang iya kahanda sa pag-alagad: “Para sa akon espirituwal nga kaayuhan, ginapanikasugan ko gid ang magdungan sa mga publikasyon sang Sosiedad, ang pagtambong sa mga miting sing tayuyon, kag ang pagpakigbahin sing regular sa pagbantala. Ginatinguhaan ko man ang magpabilin nga maayo sing panglawas paagi sa pag-ehersisyo kada aga, paagi sa indi paggamit sa elebeytor sa kalabanan nga tion, kag paagi sa paglakat sing masunson kon mahimo, ilabi na sa pag-alagad sa latagon.”
Madamong eksperiensiado sa pangabuhi sa Bethel ang magaugyon kay Anny. Wala gid sila nagauntat sa pagtuon, wala gid nagauntat sa pagpangabudlay. Ang pisikal nga kapagros nagakinahanglan nga may yara sila bastante nga tulog kag diutay nga ehersisyo kag magpakita sing paghaganhagan sa pagkaon kag pag-inom. Labing importante sa tanan, wala nila ginapatumbayaan ang personal nga pangamuyo kag pagtuon sa Biblia.
Mataas nga Pagtamod sa Balaan nga Pag-alagad sa Bethel
“Diin ka nagatrabaho?” amo ang kinaandan nga ginapamangkot sa mga katapo sa Bethel. Lainlain ang mga asaynment nga trabaho, apang ang tagsa nagakabagay nga tamdon sang tanan nga may daku nga pagtahod. Ngaa? Bangod ang tagsa ka asaynment—pag-uyat man sang makina nga nagaimprinta sang espirituwal nga pagkaon, paglaba sing mga panapton, pagluto kag pagtinlo para sa panimalay, ukon pagtrabaho sa opisina—nagakahulugan sing balaan nga pag-alagad. Subong sang ginsambit kaina, ang mga Cristiano tululupong. Dumduma nga ang tanan nga kinahanglanon nga mga katungdanan nga ginhimo sang mga saserdote kag mga Levinhon sa templo, sa mga luwang sini kag sa mga hulot kalan-an, tanan ginkabig nga balaan nga pag-alagad kay Jehova. Naglakip yadto sa pag-ihaw kag paghanda sa mga sapat para sa halad, pagbutang sing lana sa mga lampara, bisan sa pagtinlo kag pagbuhat sang mga katungdanan sang mga bantay. Subong man, ang kada asaynment sa Bethel isa ka makaalayaw kag mapuslanon nga aktibidad sa “buluhaton sang Ginuo,” busa isa ka tumalagsahon nga pribilehiyo.—1 Corinto 15:58.
Binagbinaga sa makadali ang isa ka kinaiya nga nagaupang sa pagtan-aw naton nga may apresasyon sa “Balay sang Dios.” Ang mga Cristiano sa Bethel kag sa guwa sang Bethel dapat magbantay batok sa kahisa kag kaimon, nga “kaduluntan sa mga tul-an.” (Hulubaton 14:30) Wala sing rason ang isa nga magkahisa sa mga pribilehiyo sa pag-alagad sang mga manugpangabudlay sa Bethel. Isa pa, wala sing duog sa sulod sang panimalay Bethel para sa kahisa, nga isa sang mga buhat sang unod. Maghulat sing mapainubuson—amo ina ang maayo nga laygay para sa isa nga daw napasapayanan samtang ang iban ginhatagan sing daku pa nga mga pribilehiyo. Dugang pa, ang mga tawo nga may daku nga kinatuhayan sa pinansial nga mga kahimtangan nagapuyo sing suod nga magkaupod sa Bethel. Daw ano ka makabalang-aw kon tamdon sang isa ang iya mga sirkunstansia “kaanggid sa iban”! Ang mangin kontento nga may “pagkaon kag panapton” nakabulig sa madamo sa pagpadayon sing matutom sa sulod sang mga dekada sa “Balay sang Dios.”—Galacia 5:20, 26; 6:4; 1 Timoteo 6:8.
Ang mga Saksi ni Jehova kag ang minilyon pa nga iban nakatigayon sing daku nga benepisyo gikan sa wala sing bayad nga mga serbisyo nga ginahimo sa Bethel—buluhaton nga ginhimo nga walay kakagod bangod sang gugma sa Dios kag sa isigkatawo. Ang mga puluy-an Bethel kag mga imprintahan sang Watch Tower Society, kaangay sang iban pa nga teokratikong mga pasilidad, ginagastuhan paagi sa boluntaryo nga mga amot. (2 Corinto 9:7) Kaangay ni Hari David kag sang mga prinsipe kag mga pangulo sa Israel, mapakita naton ang aton pagtahod kag pag-apresyar sa “Balay sang Dios” paagi sa paghatag sing moral kag pinansial nga pagsakdag sa Sosiedad. (1 Cronica 29:3-7) Tan-awon naton karon kon paano ‘matan-aw ang katahuman ni Jehova’ sa Bethel.
Mga Pagpakamaayo sa “Balay sang Dios”
Kon nagatambong sa asambleya, nabatyagan mo bala ang tudok nga pagkakontento, kay ginapalibutan ka sang malipayon nga mga sumilimba ni Jehova? Handurawa lamang, ang isa ka manugpangabudlay sa Bethel may pribilehiyo nga maalagad si Jehova sa tunga sang isa ka grupo sang mga kauturan kada adlaw! (Salmo 26:12) Daw ano ka tumalagsahon nga paglaum sa pagtubo sa espirituwal ang ginahatag sina! Ang isa ka utod nga lalaki nagkomento nga mas madamo ang natun-an niya nga nagbulig sa iya sa pagdihon sang iya personalidad sa sulod sang isa ka tuig sa Bethel sangsa tatlo ka tuig niya sa iban nga lugar. Ngaa? Bangod walay iban na nga lugar nga may kahigayunan sia nga makita kag mailog ang pagtuo sang madamo gid nga hamtong nga Cristianong mga personalidad.—Hulubaton 13:20.
Sa Bethel ang isa ka tawo ginapalibutan sang eksperiensiado nga mga manuglaygay, kon hambalon pa. Dugang pa, yara ang bentaha nga makapamati sing nahanda sing maayo nga mga komento nga ginahatag sa tion sang pagsimba sa aga kag sa Pagtinuon sa Lalantawan sang panimalay Bethel kag kon nagapamati sing mga lektyur kon Lunes sang gab-i. Ang mga bag-uhan nga nag-alabot nagatigayon sing panudlo sa Bethel Entrants’ School kag ginahatagan sing asaynment nga basahon ang bug-os nga Biblia sa sulod sang nahaunang 12 ka bulan.
Ang mga report kag mga eksperiensia sang mga bisita halin sa iban nga mga pungsod nagahatag sing dugang nga pagpalig-on. Dugang pa, ang mga katapo sang Nagadumala nga Hubon ukon ang ila mga tiglawas nagaduaw sa mga sanga talatapan. “Bisan madamo sila sing hilikuton,” panaysayon ni Helga, “ang mga utod pirme may tion para sa mainabyanon nga pulong ukon yuhum.” Daw ano ka makapalig-on nga makita sing personal ang makapapagsik kag maugdang nga paggawi sinang matutom nga mga lalaki!
Makita sing maayo sang isa ilabi na sa Bethel kon paano nagapanghikot ang organisasyon sang Dios kag kon paano ginapukaw sang iya balaan nga espiritu ang kinabubut-on nga mga tagipusuon kag mga kamot sa pagpanghikot. “Sa Bethel ang isa nagabatyag nga mas malapit sa sentro sang hilikuton,” paathag sang isa ka utod nga lalaki, nga nagaalagad sa Bethel sa Pransya sugod sang 1949. Sia nagapadayon: “Makasiling gid ako nga para sa akon ang Bethel amo ang dagway sang bug-os tion nga pag-alagad nga nagatugot sa akon sa paghinguyang sang pinakamadamo nga tion kag kusog sa pag-alagad kay Jehova kag sa pinakamadamo nga mga kauturan.” Kag indi bala nga amo sina ang aton tunay nga katuyuan sa kabuhi—ang himuon ang kabubut-on sang Dios? Sa Bethel ang isa mahimo “makahatag sing pagdayaw sa bug-os nga adlaw.” Daw ano nga pagpakamaayo!—Salmo 44:8.
Subong sang nasapwan namon, ang isa nga nagapangabudlay sa puluy-an Bethel mahimo makatan-aw sang katahuman ni Jehova kag makasapo sing madamo nga pagpakamaayo. (Hebreo 6:10) Ang pag-alagad bala sa “Balay sang Dios” butang nga mapuslanon para sa imo? Ang mga Saksi ni Jehova nga sa dimagkubos 19 ka tuig ang edad, nga may yara maayo nga espirituwal kag pisikal nga kapagros, kag nga, kaangay ni Timoteo, “may maayo nga report gikan sa mga kauturan” mahimo nga makaaplay sa pag-alagad sa Bethel. (Binuhatan 16:2) Madamo ang naghimo sang pag-alagad sa Bethel nga ila buluhaton sa kabuhi, kaangay sang mga ginbalikwat sa ibabaw. Para sa ila ang tudok nga ginakahidlawan sang salmista—ang ‘magpuyo sa balay ni Jehova sa tanan nga adlaw sang iya kabuhi—nangin katunayan.
Ang mga Saksi may daku nga pagtahod sa nagasakripisyo sang kaugalingon nga espiritu nga ginapakita sang ila mga utod nga lalaki kag babayi sa Bethel, nga nagabuhat sang mga asaynment sing kinabubut-on kag malipayon. Nagaalagad man kita kay Jehova sa Bethel ukon sa iban nga lugar, ang kada isa sa aton may maayong rason sa pagbatyag kaangay ni Hari David—sa pagtan-aw nga may apresasyon, ukon kalipay, sa “Balay sang Dios.”
[Piktyur sa pahina 31]
Ining mga Cristiano nalipay sa balaan nga pag-alagad sa Bethel sa Alemanya sa mga dekada