Malipayon nga Pagpasakop sa Awtoridad
“Nangin matinumanon kamo gikan sa tagipusuon.”—ROMA 6:17.
1, 2. (a) Ano nga espiritu ang dayag sa kalibutan karon, kag ano ang ginahalinan kag epekto sini? (b) Paano ginapakita sang dedikado nga mga alagad ni Jehova nga tuhay sila?
“ANG espiritu nga nagapanghikot karon sa mga anak sang pagkadimatinumanon” makapakibang nga dayag gid karon. Isa ini ka espiritu sang walay pagpugong nga pag-iyaiya, nga nagahalin kay Satanas, “ang manuggahom sang awtoridad sang hangin.” Ini nga espiritu, ini nga “hangin,” ukon nagapangibabaw nga panimuot sang kakagod kag paglalis, may “awtoridad,” ukon gahom, sa ibabaw sang kalabanan nga katawhan. Isa ini ka rason kon ngaa ang kalibutan may ginatawag nga krisis sa awtoridad.—Efeso 2:2.
2 Sing makalilipay, wala ginapuno sang dedikado nga mga alagad ni Jehova karon ang ila espirituwal nga mga baga sining mahigko nga “hangin,” ukon espiritu sang pagrebelde. Nahibaluan nila nga ‘ang kasingkal sang Dios magaabot sa mga anak sang pagkadimatinumanon.” Si apostol Pablo nagdugang: “Busa dili kamo mag-umalambit sa ila.” (Efeso 5:6, 7) Sa baylo, ang matuod nga mga Cristiano nagatinguha nga “mapuno sing espiritu [ni Jehova],” kag nagainom sila sing “kaalam gikan sa hitaas,” nga “putli, ugaling mahidaiton, makatarunganon, handa sa pagtuman.”—Efeso 5:17, 18; Santiago 3:17.
Kinabubut-on nga Pagpasakop sa Soberanya ni Jehova
3. Ano ang yabi sa kinabubut-on nga pagpasakop, kag anong daku nga leksion ang ginatudlo sa aton sang maragtas?
3 Ang yabi sa kinabubut-on nga pagpasakop amo ang pagkilala sa makatarunganon nga awtoridad. Ginapakita sang maragtas sang katawhan nga ang pagsikway sa soberanya ni Jehova wala nagadala sing kalipay. Ina nga pagsikway wala magdala sing kalipay kay Adan kag kay Eva, ukon sa manugsugyot sang ila pagrebelde, si Satanas nga Yawa. (Genesis 3:16-19) Sa iya karon manubo nga kahimtangan, si Satanas may “dakung kaakig” kay nahibaluan niya nga malip-ot na lang ang iya tion. (Bugna 12:12) Ang paghidait kag kalipay sang katawhan, huo, sang bug-os nga uniberso, nasandig sa bug-os uniberso nga pagkilala sa matarong nga soberanya ni Jehova.—Salmo 103:19-22.
4. (a) Ano nga sahi sang pagpasakop kag pagkamatinumanon ang luyag ni Jehova nga ipakita sang iya mga alagad? (b) Sa ano kita dapat kombinsido, kag paano ini ginpabutyag sang salmista?
4 Apang, bangod sang makadalayaw nga pagkatimbang sang iya mga kinaiya, indi kontento si Jehova sa pakulahaw nga pagkamatinumanon. Ah, huo, gamhanan sia! Apang indi sia diktador. Sia isa ka Dios sang gugma, kag luyag niya nga tumanon sia sang iya intelihente nga mga tinuga sing kinabubut-on, bangod sang gugma. Luyag niya nga magpasakop sila sa iya soberanya bangod bug-os tagipusuon nga ginapili nila nga ipahamtang ang ila kaugalingon sa idalom sang iya matarong kag makatarunganon nga awtoridad, kombinsido nga wala na sing maayo pa para sa ila sangsa tumanon sia sing dayon. Ang sahi sang tawo nga luyag ni Jehova sa iya uniberso nagaugyon sa mga balatyagon sang salmista nga nagsulat: “Ang kasuguan ni Jehova himpit, nga nagapahauli sang kalag. Ang pahanumdom ni Jehova masaligan, nga nagahimo sa walay eksperiensia nga maalamon. Ang mga mando gikan kay Jehova matarong, nga nagapasadya sa tagipusuon; ang mga sugo ni Jehova matinlo, nga nagapasanag sa mga mata. Ang kahadlok kay Jehova putli, nga nagapadayon sing dayon. Ang hudisyal nga mga desisyon ni Jehova matuod; napamatud-an sila tanan nga matarong.” (Salmo 19:7-9) Bug-os nga pagsalig sa pagkatadlong kag pagkamatarong sang soberanya ni Jehova—dapat amo sini ang aton panimuot kon luyag naton mabuhi sa bag-ong kalibutan ni Jehova.
Malipayon nga Pagpasakop sa Aton Hari
5. Paano si Jesus ginpadyaan sa iya pagkamatinumanon, kag ano ang aton kinabubut-on nga ginakilala?
5 Si Cristo Jesus mismo isa ka maayo gid nga huwaran sang pagpasakop sa iya langitnon nga Amay. Mabasa naton nga “nagpaubos sia sang iya kaugalingon kag nangin matinumanon tubtob sa kamatayon, huo, kamatayon sa usok sang pag-antos.” Si Pablo nagdugang: “Bangod sini gid nga rason ginbayaw sia sang Dios sa isa ka superyor nga posisyon kag maluluy-on nga ginhatagan sia sing ngalan nga labaw sa tanan nga ngalan, agod nga sa ngalan ni Jesus ang tagsa ka tuhod magluhod, sa langit kag sa duta kag sa idalom sang duta, kag ang tagsa ka dila magkilala sing dayag nga si Jesucristo Ginuo sa himaya sang Dios nga Amay.” (Filipos 2:8-11) Huo, malipayon kita nga nagaluhod sa atubangan sang aton Lider kag nagagahom nga Hari, si Cristo Jesus.—Mateo 23:10.
6. Paano ginpamatud-an ni Jesus nga sia isa ka saksi kag isa ka lider sa pungsudnon nga mga grupo, kag paano ang iya “prinsipenhon nga paggahom” magapadayon sa tapos sang dakung kapipit-an?
6 Tuhoy kay Cristo subong aton Lider, si Jehova nagtagna: “Yari karon! ginhatag ko sia subong saksi sa pungsudnon nga mga grupo, subong lider kag manugmando sa pungsudnon nga mga grupo.” (Isaias 55:4) Paagi sa iya dutan-on nga ministeryo kag paagi sa iya pagtuytoy sa pagbantala nga hilikuton gikan sa langit sa tapos sang iya kamatayon kag pagkabanhaw, ginpakita ni Jesus ang iya kaugalingon subong “matutom kag matuod nga saksi” sang iya Amay sa katawhan sang tanan nga mga pungsod. (Bugna 3:14; Mateo 28:18-20) Inang pungsudnon nga mga grupo ginatiglawas karon sang nagadugang nga kadamuon sang “dakung kadam-an,” nga makalampuwas sa “dakung kapipit-an” sa idalom sang pagkalider ni Cristo. (Bugna 7:9, 14) Apang ang pagkalider ni Jesus wala nagauntat dira. Ang iya “prinsipenhon nga paggahom” magalawig sing isa ka libo ka tuig. Para sa matinumanon nga mga tawo, panindugan niya ang iya ngalan nga “Makatilingala nga Manuglaygay, Gamhanan nga Dios, Dayon nga Amay, Prinsipe sang Paghidait.”—Isaias 9:6, 7; Bugna 20:6.
7. Kon handum naton nga tuytuyan kita ni Cristo Jesus padulong sa “mga tuburan sang tubig sang kabuhi,” ano ang dapat naton himuon sa walay langan, kag paano kita higugmaon ni Jesus kag ni Jehova?
7 Kon handum naton nga makabenepisyo gikan sa “mga tuburan sang tubig sang kabuhi” nga padulong sa amo, ginatuytuyan sang Kordero, nga si Cristo Jesus, ang matarong sing tagipusuon nga mga tawo, dapat naton pamatud-an sa walay langan paagi sa aton dalanon sang paghikot nga kita malipayon nga nagapasakop sa iya awtoridad subong Hari. (Bugna 7:17; 22:1, 2; ipaanggid ang Salmo 2:12.) Si Jesus nagsiling: “Kon ginahigugma ninyo ako, tumanon ninyo ang akon mga sugo. Ang nagahupot sang akon mga sugo kag nagatuman sa ila, sia amo ang nagahigugma sa akon. Nian sia nga nagahigugma sa akon higugmaon sang akon Amay, kag ako magahigugma sa iya.” (Juan 14:15, 21) Luyag mo bala nga higugmaon ka ni Jesus kag sang iya Amay? Nian mangin mapinasakupon sa ila awtoridad.
Ang mga Manugtatap Malipayon nga Nagatuman
8, 9. (a) Ano ang gin-aman ni Cristo para sa pagpalig-on sa kongregasyon, kag sa anong bahin dapat mangin mga huwaran ining mga lalaki sa panong? (b) Paano ang pagpasakop sang Cristianong mga manugtatap ginasimbulo sa tulun-an sang Bugna, kag paano sila dapat magtinguha sing isa ka “matinumanon nga tagipusuon” kon nagauyat sing hudisyal nga mga hulusayon?
8 “Ang kongregasyon nagapasakop kay Cristo.” Subong amo ang Manugtatap sini, nag-aman sia sing “dulot nga mga lalaki” para sa “pagpalig-on” sa kongregasyon. (Efeso 4:8, 11, 12; 5:24) Ining gulang sa espirituwal nga mga lalaki ginasugo nga ‘bantayan ang panong sang Dios nga gintugyan sa ila,’ wala “nagapakaginuo sa mga panublion sang Dios, kundi nga nagahimo sang inyo kaugalingon nga mga huwaran sa panong.” (1 Pedro 5:1-3) Ang panong iya ni Jehova, kag si Cristo amo ang “maayong manugbantay” sini. (Juan 10:14) Sanglit ang mga manugtatap nagakaigo lamang nga nagapaabot sing kinabubut-on nga kooperasyon gikan sa mga karnero nga gintugyan sa ila ni Jehova kag ni Cristo, sila mismo dapat mangin maayong mga huwaran sa pagkamapinasakupon.—Binuhatan 20:28.
9 Sang unang siglo, ang hinaplas nga mga manugtatap simbuliko nga ginlaragway subong nga yara “sa sulod,” ukon “sa ibabaw,” sang tuo nga kamot ni Cristo, nga nagakahulugan sang ila pagpasakop sa iya subong Ulo sang kongregasyon. (Bugna 1:16, 20; 2:1) Amo man sa karon, ang mga manugtatap sa sulod sang mga kongregasyon sang mga Saksi ni Jehova dapat magpasakop sa pagtuytoy ni Cristo kag ‘magpaubos sang ila kaugalingon sa idalom sang gamhanan nga kamot sang Dios.’ (1 Pedro 5:6) Kon pangabayon sa pag-uyat sing hudisyal nga mga butang, kaangay ni Solomon sa tion sang iya matutom nga mga tinuig, dapat sila mangamuyo kay Jehova: “Dapat ka maghatag sa imo alagad sing isa ka matinumanon nga tagipusuon sa paghukom sa imo katawhan, sa paghantop sa ulot sang maayo kag malaut.” (1 Hari 3:9) Ang isa ka matinumanon nga tagipusuon magapahulag sa isa ka gulang sa pagtinguha nga tamdon ang mga butang suno sa pagtamod ni Jehova kag ni Cristo Jesus sa sini agod nga ang desisyon nga mahimo sa duta nagaanggid tubtob mahimo sa desisyon nga ginahimo sa langit.—Mateo 18:18-20.
10. Paano ang tanan nga manugtatap dapat magtinguha sa pag-ilog kay Jesus sa iya pagtratar sa mga karnero?
10 Ang nagalakbay nga mga manugtatap kag ang mga gulang sa kongregasyon dapat man magtinguha nga ilugon si Cristo sa paagi nga gintratar niya ang mga karnero. Indi kaangay sang mga Fariseo, wala magpatuman si Jesus sing madamo nga pagsulundan nga mabudlay sundon. (Mateo 23:2-11) Sia nagsiling sa mga tulad-karnero: “Kari kamo sa akon, kamo tanan nga nagapangabudlay kag ginabug-atan, kag papreskuhan ko kamo. Itakod ang akon gota sa inyo kag magtuon kamo sa akon, kay ako malum-ok sing buot kag mapainubuson sa tagipusuon, kag makasapo kamo sing kapreskuhan para sa inyo mga kalag. Kay ang akon gota mahulas kag ang akon lulan mamag-an.” (Mateo 11:28-30) Samtang matuod nga ang tagsa ka Cristiano dapat “magdala sang iya kaugalingon nga lulan,” dapat dumdumon sang mga manugtatap ang huwaran ni Jesus kag buligan ang ila kauturan sa pagbatyag nga ang ila lulan nga Cristianong salabton “mahulas,” “mamag-an,” kag makalilipay dalhon.—Galacia 6:5.
Teokratiko nga Pagpasakop
11. (a) Paano matahod sang isa ka tawo ang pagkaulo kag sa gihapon mangin teokratiko gid? Iilustrar. (b) Ano ang buot silingon sang mangin matuod nga teokratiko?
11 Ang teokrasya isa ka paggahom sang Dios. Nadalahig sa sini ang prinsipio sang pagkaulo nga ginpabutyag sa 1 Corinto 11:3. Apang kapin pa sa sina ang kahulugan sini. Ang isa ka tawo mahimo nga daw nagapakita sing pagtahod sa pagkaulo apang mahimo nga indi teokratiko sa bug-os nga kahulugan sang tinaga. Paano ini matabo? Sa pag-ilustrar, ang demokrasya isa ka panguluhan sang katawhan, kag ang isa nga demokratiko ginlaragway subong “isa ka tawo nga nagapati sa mga panganinawan sang demokrasya.” Ang isa ka tawo mahimo mangangkon nga demokratiko, nagapakigbahin sa mga eleksion, kag isa pa gani ka aktibo nga politiko. Apang kon, sa iya kabilugan nga paggawi, ginasikway niya ang espiritu sang demokrasya kag ang tanan nga prinsipio nga nadalahig sa sini, masiling bala nga sia demokratiko gid? Sing kaanggid, agod mangin matuod nga teokratiko, dapat kapin pa ang himuon sang isa ka tawo sangsa magpasakop lamang sa pagkaulo sa isa ka indi maathag nga paagi. Dapat niya ilugon ang mga dalanon kag mga kinaiya ni Jehova. Dapat gid sia ginagamhan ni Jehova sa tagsa ka paagi. Kag sanglit gintugyanan ni Jehova ang iya Anak sing bug-os nga awtoridad, ang pagkateokratiko nagakahulugan man sing pag-ilog kay Jesus.
12, 13. (a) Ano, ilabi na, ang nadalahig sa pagkateokratiko? (b) Ang teokratiko nga pagpasakop nagadalahig bala sing pagtuman sa madamo nga pagsulundan? Iilustrar.
12 Dumduma, si Jehova nagapangayo sing kinabubut-on nga pagpasakop nga ginapahulag sang gugma. Amo ina ang iya paagi sang paggahom sa uniberso. Sia ang personipikasyon gid sang gugma. (1 Juan 4:8) Si Cristo Jesus amo “ang banaag sang iya himaya kag ang larawan gid sang iya kinaugali.” (Hebreo 1:3) Ginasugo niya ang iya matuod nga mga disipulo nga maghigugmaanay. (Juan 15:17) Gani ang mangin teokratiko nagadalahig indi lamang sing pagkamapinasakupon kundi sing pagkamahigugmaon man. Sarang mabilog ini nga butang subong sang masunod: Ang teokrasya isa ka paggahom sang Dios; ang Dios gugma; busa ang teokrasya isa ka paggahom sang gugma.
13 Ang isa ka gulang mahimo maghunahuna nga agod mangin teokratiko, ang kauturan dapat magtuman sang tanan nga sahi sang pagsulundan. Ang iban nga mga gulang naghimo sing mga pagsulundan pasad sa mga panugda nga ginahatag sa tion kag tion sang “matutom kag mainandamon nga ulipon.” (Mateo 24:45) Halimbawa, ginpanugda anay nga agod madali makilala ang kauturan sa kongregasyon, ayhan maayo nga indi pirme magpungko sa pareho nga pulungkuan sa Kingdom Hall. Gintuyo ini nga mangin isa ka praktikal nga panugda, indi isa ka dapat sundon nga pagsulundan. Apang ang iban nga mga gulang mahimo mahuyog nga himuon ini nga isa ka pagsulundan kag magbatyag nga ang mga wala nagasunod sa sini indi teokratiko. Apang, mahimo may madamo nga maayong rason kon ngaa ang isa ka utod nga lalaki ukon babayi mahimo magpasulabi nga magpungko sa isa ka naanaran nga duog. Kon ang isa ka gulang wala nagabinagbinag sini nga mga butang sing mahigugmaon, sia bala teokratiko gid? Agod mangin teokratiko, “Ang tanan nga ginahimo ninyo kabay nga mahanabo nga may gugma.”—1 Corinto 16:14.
Pag-alagad nga may Kalipay
14, 15. (a) Paano madingutan sang isa ka gulang ang pila ka kauturan nga lalaki ukon babayi sang ila kalipay sa pag-alagad kay Jehova, kag ngaa indi ini teokratiko? (b) Paano ginpakita ni Jesus nga ginaapresyar niya ang gugma nga ginpabutyag sang aton pag-alagad, sa baylo sang kadamuon? (c) Ano ang dapat binagbinagon sang mga gulang?
14 Ang mangin teokratiko nagakahulugan man sing pag-alagad kay Jehova nga may kalipay. Si Jehova amo “ang malipayon nga Dios.” (1 Timoteo 1:11) Luyag niya nga simbahon sia sang iya mga sumilimba sing malipayon. Dapat dumdumon sang mga maluyagon magpatuman sing mga pagsulundan nga sa tunga sang mga regulasyon nga dapat ‘mahalungon nga tumanon’ sang Israel amo ang masunod: “Dapat kamo magkalipay sa atubangan ni Jehova nga imo Dios sa tanan mo nga buluhaton.” (Deuteronomio 12:1, 18) Bisan ano man ang ginahimo naton sa pag-alagad kay Jehova dapat mangin makalilipay ini, indi kabug-atan. Daku ang mahimo sang mga manugtatap agod mangin malipayon ang kauturan sa paghimo sang masarangan nila sa pag-alagad kay Jehova. Sa kabaliskaran, kon ang mga gulang indi mahalungon, sarang nila madingot sa iban nga kauturan ang ila kalipay. Kon, halimbawa, maghimo sila sing mga pagpaanggid, ginadayaw ang mga nakalab-ot ukon nakalampas sa promedyo sang kongregasyon sa mga oras nga ginhinguyang sa pagpanaksi kag paagi sa pagpahangop ginmulay ang mga wala makalab-ot sini, ano ang batyagon sang mga utod nga ayhan may makatarunganon nga rason sa pagreport sing kubos nga oras? Indi ayhan ini makapabatyag sa ila nga may kakulangan sila kag magadingot sa ila sang ila kalipay?
15 Ang pila ka oras nga mahugod sang iban sa pagpanaksi sing dayag mahimo nga nagarepresentar sing mas daku nga panikasog sangsa madamo nga oras nga ginhinguyang sang iban sa pagbantala, bangod sang lamharon nga edad, mas maayong panglawas, kag iban pa nga mga kahimtangan. Sa sining bahin, indi sila dapat paghukman sang mga gulang. Sa pagkamatuod, si Jesus ang ginhatagan sang Amay sing “awtoridad sa paghukom.” (Juan 5:27) Ginmulay bala ni Jesus ang imol nga babaying balo bangod ang iya gin-amot kubos sangsa kinaandan? Indi, nahangpan niya kon ano ang bili sadtong duha ka diutay nga sensilyo sa babayi. Amo yadto ang ‘tanan niya, ang tanan niya nga inugpangabuhi.’ Daw ano ka tudok nga gugma kay Jehova ang ginpakita sini! (Marcos 12:41-44) Dapat bala mangin kubos ka mahinangpanon ang mga gulang sa mahigugmaon nga mga panikasog sang mga utod nga ang tanan nga masarangan nila kubos sangsa “promedyo”? Kon tuhoy sa gugma kay Jehova, mahimo nga ina nga mga panikasog labaw gid sa promedyo!
16. (a) Kon ang mga manugtatap maggamit sing mga numero sa ila pamulongpulong, ngaa dapat sila mangin mahinantupon kag timbang? (b) Paano ang kauturan mabuligan gid sa pagpauswag sang ila pag-alagad?
16 Dapat bala himuon ining mga komento nga isa ka bag-ong “pagsulundan” nga ang mga numero—bisan ang mga promedyo—indi gid dapat sambiton? Indi gid! Ang punto amo nga ang mga manugtatap dapat mangin timbang sa ulot sang pagpalig-on sa kauturan nga pasangkaron ang ila ministeryo kag buligan sila sa paghimo sang masarangan nila nga may kalipay. (Galacia 6:4) Sa ilustrasyon ni Jesus tuhoy sa mga talanton, gintugyan sang agalon ang iya mga pagkabutang sa iya mga ulipon “sa tagsatagsa suno sa iya ikasarang.” (Mateo 25:14, 15) Dapat man binagbinagon sang mga gulang ang mga posibilidad sang tagsa ka manugbantala sang Ginharian. Nagakinahanglan ini sing paghantop. Ayhan ang iban nagakinahanglan gid sing pagpalig-on nga maghimo sing kapin pa. Ayhan apresyahon nila ang bulig para sa mas maayo nga pag-organisar sang ila hilikuton. Kon ano man, kon mabuligan sila sa paghimo sang masarangan nila nga may kalipay, ina nga kalipay mahimo gid nga magapalig-on sa ila sa pagpasangkad sang ila Cristianong hilikuton kon posible.—Nehemias 8:10; Salmo 59:16; Jeremias 20:9.
Ang Paghidait nga Nagagikan sa Malipayon nga Pagpasakop
17, 18. (a) Paano ang malipayon nga pagpasakop makadala sa aton sing paghidait kag pagkamatarong? (b) Ano ang mangin aton kon sundon gid naton ang mga sugo sang Dios?
17 Ang malipayon nga pagpasakop sa makatarunganon nga soberanya ni Jehova nagadala sa aton sing dakung paghidait. Ang salmista nagsiling sa pangamuyo kay Jehova: “May bugana nga paghidait ang mga nagahigugma sang imo kasuguan, kag para sa ila wala sing kasandaran.” (Salmo 119:165) Sa pagtuman sa kasuguan sang Dios, nagabenepisyo kita. Ginsilingan ni Jehova ang Israel: “Amo ini ang ginsiling ni Jehova, ang imo Manunubos, ang Balaan nga Isa sang Israel: ‘Ako, si Jehova, ang imo Dios, ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga laktan mo. O kon pamatian mo lamang ang akon mga sugo! Nian ang imo paghidait mangin subong kuntani sang suba, kag ang imo pagkamatarong subong sang mga balod sang dagat.’ ”—Isaias 48:17, 18.
18 Ang halad nga gawad ni Cristo nagadala sa aton sing paghidait sa Dios. (2 Corinto 5:18, 19) Kon may pagtuo kita sa nagagawad nga dugo ni Cristo kag maukod nga magtinguha sa pagpakig-away batok sa aton mga kaluyahon kag himuon ang kabubut-on sang Dios, makasapo kita sing paumpaw gikan sa pagbatyag nga nakasala kita. (1 Juan 3:19-23) Ina nga pagtuo, nga ginasakdag sang mga buhat, nagahatag sa aton sing isa ka matarong nga tindog sa atubangan ni Jehova kag sing dalayawon nga paglaum nga maluwas sa “dakung kapipit-an” kag mabuhi sing dayon sa bag-ong kalibutan ni Jehova. (Bugna 7:14-17; Juan 3:36; Santiago 2:22, 23) Ini tanan mangin aton ‘kon sundon lamang naton ang mga sugo sang Dios.’
19. Sa ano nasandig ang aton kalipay karon kag ang aton ginalauman nga kabuhi nga walay katapusan, kag paano ginpabutyag ni David ang aton tinagipusuon nga pagtuo?
19 Huo, ang aton kalipay karon kag ang aton ginalauman nga kabuhi nga walay katapusan sa isa ka paraiso nga duta nasandig sa aton malipayon nga pagpasakop sa awtoridad ni Jehova subong Soberanong Ginuo sang uniberso. Kabay nga mag-ugyon kita sa mga balatyagon ni David, nga nagsiling: “Imo, O Jehova, ang pagkadaku kag ang gahom kag ang katahom kag ang pagkahalangdon kag ang kadungganan; kay ang tanan nga yara sa mga langit kag sa duta imo. Imo ang ginharian, O Jehova, ang Isa nga nagabayaw man sang imo kaugalingon subong pangulo labaw sa tanan. Kag karon, O amon Dios, nagapasalamat kami sa imo kag nagadayaw sang imo matahom nga ngalan.”—1 Cronica 29:11, 13.
Mga Punto nga Dapat Dumdumon
◻ Ano nga sahi sang pagpasakop kag pagkamatinumanon ang luyag ni Jehova nga ipakita sang iya mga alagad?
◻ Paano si Jesus ginpadyaan sa iya pagkamatinumanon, kag ano ang dapat naton pamatud-an paagi sa aton ginahimo?
◻ Paano dapat ilugon sang tanan nga manugtatap si Jesus sa iya pagtratar sa mga karnero?
◻ Ano ang nadalahig sa pagkateokratiko?
◻ Ano nga mga pagpakamaayo ang ginadala sa aton sang malipayon nga pagpasakop?
[Piktyur sa pahina 24]
Ginapalig-on sang mga gulang ang panong sa paghimo sing malipayon sang bisan ano nga masarangan nila
[Piktyur sa pahina 26]
Nagakalipay si Jehova sa mga nagatuman sa iya gikan sa tagipusuon