Mga Pamangkot Gikan sa mga Bumalasa

Nalipay kami sa pagtuon sa mga tagna ni Daniel nga ginbinagbinag sa “Ang Lalantawan.” Apang, ngaa tuhay ang mga petsa para sa tatlo kag tunga ka mga tion sang Bugna 11:3 sangsa “Revelation Climax” nga libro?

Huo, Ang Lalantawan sang Nobiembre 1, 1993 naghatag sing diutay nga pagbag-o sa petsa sang moderno nga katumanan sang Bugna 11:⁠3. Ngaa?

Aton anay tan-awon ang Bugna 11:​2, ang katapusan sini nagahinambit sing “apat ka pulo kag duha ka bulan.” Mapadayon kita sa bersikulo 3: “Kag ihatag ko sa akon duha ka saksi ang gahom sa pagpanagna sing isa ka libo kag duha ka gatos kag kan-uman ka adlaw nga napanaptan sing panapton nga sako.” San-o ina naaplikar?

Ti, madugay na nahangpan sang mga Saksi ni Jehova nga ini nga tagna natuman sa hinaplas sang espiritu nga mga Cristiano sang katapusan sang “panag-on sang mga pungsod” (ang panag-on sang mga Gentil) sang 1914. (Lucas 21:24; 2 Corinto 1:​21, 22) Nagakomento sa sini, ang Revelation​—⁠Its Grand Climax At Hand! (1988) nagasiling sa pahina 164: “May yara gintandaan nga hut-ong sang tatlo kag tunga ka mga tuig sang ang mabudlay nga mga eksperiensia sang katawhan sang Dios nangin kaanggid sa mga hitabo nga gintagna diri​—⁠kutob sang pagdabdab sang unang inaway kalibutanon sa ulihi nga bahin sang 1914 kag padayon sa maaga nga bahin sang 1918.”

Talupangda nga ang petsa nga ginhatag amo ang “pagdabdab sang unang inaway kalibutanon sa ulihi nga bahin sang 1914 [tubtob] sa maaga nga bahin sang 1918.” Kaanggid ini sa petsa nga masami ginapresentar subong sang yara sa “Then Is Finished the Mystery of God,” mga pahina 261-4, (1969).⁠a

Apang, Ang Lalantawan nagtalupangod sa mga tagna ni Daniel, isa ka tulun-an nga makaduha maghinambit sing isa ka hut-ong nga kaanggid sa ginhinambit sang ulihi sa Bugna​—⁠3 1/2 ka tuig, ukon 42 ka bulan. Sa espisipiko, ang Daniel 7:25 nagasiling nga ang mga balaan sang Dios pagasakiton “sa isa ka tion, kag mga tion kag tunga sa tion,” ukon 3 1/2 ka tion. Sang ulihi, ang Daniel 12:7 nagtagna sang “gintangdo nga tion, gintangdo nga mga tion kag tunga,” ukon 3 1/2 ka tion, nga pagatapuson sa “katapusan nga pagdugmok sang gahom sang balaan nga katawhan.”

Gani may yara kita mga tagna nga nagahinambit sa magkaanggid nga hut-ong sa Daniel 7:​25, Daniel 12:​7, kag Bugna 11:​2, 3, subong man sa Bugna 13:⁠5. Ginpakita sa amon mga publikasyon nga ini tanan natuman sang 1914-18 nga panahon. Apang kon ginabinagbinag ining mga tagna sing magkatuhay, ang mga petsa sa umpisa kag katapusan nagakatuhay sing diutay.

Apang, Ang Lalantawn nga Nobiembre 1, 1993, nagapamangkot: “Paano ining magkaanggid nga mga tagna natuman?” Huo, ang mga tagna sang 3 1/2 ka mga tion nga ginhinambit sa Daniel 7:​25, Daniel 12:​7, kag Bugna 11:3 ginkilala subong “pareho nga mga tagna.” Gani, magkatulad sila sa ila ginsuguran kag sa ila katapusan.

Tuhoy sa katapusan, ginpakita sang magasin kon paano ang pagsakit sa mga hinaplas sang Dios (Daniel 7:25) natapos sang Hunyo 1918 sang si J. F. Rutherford kag ang iban nga direktor sang Watch Tower Bible and Tract Society “ginpamatbatan sa butig nga mga panumbungon sa malawig nga pagkabilanggo.” Ina nga mga hitabo amo gid ang “ang katapusan sang pagdugmok sang gahom sang balaan nga katawhan,” subong ginpakita sa Daniel 12:⁠7.

Ang pag-isip pabalik sugod sang Hunyo 1918 magadul-ong sa aton sa Disiembre 1914 subong ang panugod sang 3 1/2 ka mga tion. Sa sadtong hingapusan nga bulan sang 1914, natun-an sang mga hinaplas sang Dios sa duta ang tema nga kasulatan para sa masunod nga tuig: “Makainom bala kamo sa Akon tagayan?”​—⁠Mateo 20:​20-23. Ang artikulo nga nagapahibalo sini nagpaandam: “Sin-o ang nakahibalo nga mahimo may yara pila ka pinasahi nga pagtilaw, tagayan sang pag-antos ukon kahuy-anan, para sa matutom nga mga sumulunod sang Kordero sang 1915!” Subong gintagna sang Daniel 7:25 tuhoy sa sining hut-ong sang 3 1/2 ka mga tion, ‘ang pagsakit magasugod kag magapadayon batok sa mga balaan sang Isa nga Supremo.’ Ang mga pungsod mainit nga nadalahig sa Inaway Kalibutanon I, nagapahapos para sa ila sa paghimo sing dimakatarunganon nga pagpanakit. Ang katapusan amo: Ang tatlo ka magkaanggid nga mga tagna​—⁠Daniel 7:​25, 12:​7, kag Bugna 11:3​—⁠natuman sa 3 1/2 ka mga tuig, ukon 42 ka bulan, sugod sang Disiembre 1914 tubtob sang Hunyo 1918.

Amo sini kon ngaa may diutay nga pagbag-o sa pagpetsa sang panahon sa katumanan sang Bugna 11:⁠3. Ini nga pagbag-o butang nga dapat naton tandaan samtang ginatun-an naton kag ginagamit ang Revelation Climax nga libro sa palaabuton.

[Footnote]