Ano ang Paglaum Para sa mga Bulag?

GINSULAT ni John Milton ang iya dalayawon nga sugilanon nga Paradise Lost and Paradise Regained bisan pa nga sia isa ka bulag. Ang katunayan nga sia bulag kag bungol wala magpugong kay Helen Keller sa iya mga panikasog nga tudluan kag buligan yadtong may pisikal nga mga sablag. Huo, madamong bulag nga mga tawo ang nakalandas. Apang daw ano gid kuntani kaayo kon ang tanan may maayo nga panan-aw! Ilabi ka na gid nga magaugyon kon may yara ikaw isa ka hinigugma ukon abyan nga bulag ukon may mapigaw nga panan-aw.

Matuod, sa iban nga kadutaan ang rehabilitasyon nga mga programa nagatudlo sa mga tawo nga may mapigaw nga panan-aw sing lantip nga mga ikasarang nga sarang magamit sa adlaw-adlaw nga pagkabuhi. Ang ­Braille kag ang mga ido nga ginhanas sa pagtuytoy sa mga bulag nagabulig sa ila nga madipara ang madamo nila nga mga kinahanglanon. Walay sapayan sina, ginatamod sang madamo nga tawo ang pagkabulag subong ang labing ginakahadlukan nga sablag. Isa ka manunulat ang nagsiling: “Ang isa ka bulag nadulaan sing kahigayunan nga makita ang labing importante nga bahin sang aton mahantop nga kalibutan.” Sa amo man nga tion, madamong bulag ang labi nga nagasalig sa iban.

Ngaa, mahimo ipamangkot mo, tuman kalapnag ang pagkabulag? Ti, nabatian mo na bala ang tuhoy sa trachoma? Amo ini ang kabangdanan sang mga siam ka milyon ka kaso sang pagkabulag. Ang The New Encyclopædia Britannica nagasiling nahanungod sini: “Ang balatian makalalaton kag nagamuad kon diin nagaginutok ang populasyon sa mahigko nga mga palibot. Ang kakulang sing tubig nga inugpanghugas, kag ang linaksa ka langaw nga nagakaganyat sa higko sang tawo, nagaamot sa paglapnag sang balatian. Sa pila ka paagi ang trachoma isa gid ka problema sang katilingban sa baylo nga isa ka problema sang medisina; kon ang talaksan sang pagkabuhi sarang mapatin-ad, ang pagginutok mabuhinan, ang mga langaw matapna, kag ang bastante nga suplay sang tubig mapat-od, ang pagdamo sang trachoma madasig nga magabuhin.” Halos isa ka milyon ka tawo ang nagamasakit sing onchocerciasis, ukon river blindness. Ukon kamusta ang xerophthalmia? Bisan pa mabudlay ini sambiton, ang katunayan amo nga ini ang kinaandan nga ginatunaan sang pagkabulag. Ang diabetes, dipteria, tipdas, scarlet fev­er, kag mga balatian nga ginaliton paagi sa sekso mahimo man magdul-ong sa pagkabulag.

Samtang nagatigulang kita, ang aton panan-aw nagapigaw subong resulta sang mga balatian subong sang paghina sang macula lutea kag glaucoma, kag indi naton mahimo malimtan ang mga katarata. Ang The New Encyclopædia Britannica nagasiling: “Ang katarata ginatunaan gihapon sang madamo nga kaso sang pagkabulag sa madamong pungsod sa kalibutan, kag makapasubo gid ini bangod sang katunayan nga tuman ini kahapos bulngon paagi sa operasyon.”

Walay sapayan sang bag-ong mga tukib sa optalmolohiya, daw madugay pa madula ang pagkabulag. Ang amo gihapon nga ensiklopedia nagasiling: “Ang mga pag-uswag sa pagtapna kag pagbulong sa pagkabulag paagi sa medisina kag operasyon mangin bentaha lamang sa populasyon nga makasarang sa pagpabulong. Kon ang mga talaksan sa nutrisyon kag katinlo sa daku nga bahin sang populasyon sang kalibutan indi mapatin-ad, ang matapna kuntani nga pagkabulag padayon nga magadamo.”

Samtang ang mga antibiotic kag pagbusbos nagakaigo kag mapuslanon sa pagpakig-away batok sa pagkabulag, ang paglaum tuhoy sa permanente nga pagbulong may yara kahilabtanan sa kon ano ang natabo sang nagligad nga halos duha ka libo ka tuig.

Pag-ayo sa mga Bulag sang Panahon ni Jesus

Handurawa ang isa ka tawo nga mga treintahon ang edad nga nagalakat sa yab-ukon nga dalan. Sang pagkabati nga magalabay sia, ang duha ka bulag sa higad sang dalan nagsinggit: “Kaluuyi kami!” Bisan pa nga ginpahipos sila sang tumalan-aw, ang mga bulag nagsinggit sing mabaskog: “Kaluuyi kami!” Ang tawo malulo nga namangkot: “Ano bala ang buot ninyo nga buhaton ko sa inyo?” Malangkagon sila nga nagsabat: “Muklata ang amon mga mata.” Handurawa karon: Gintandog sang tawo ang ila mga mata, kag sa gilayon nakakita sila!​—⁠Mateo 20:​29-34.

Daw ano gid nga kalipay para sa sining anay mga bulag! Apang, ang pagkabulag lapnag katama. Isa lamang ini ka hitabo. Ngaa dapat naton ini talupangdon? Bangod si Jesus sang Nasaret amo ang malulo nga naghatag sa sadtong mga bulag sang ila panulok. Sa katunayan, luwas nga ‘ginhaplas sa pagwali sang maayong balita sa mga imol,’ si Jesus ‘ginpadala sa pagpasag-uli sang itululok sa mga bulag.’​—⁠Lucas 4:⁠18.

Nakibot ang mga tawo sa sadtong milagruso nga mga pagpang-ayo nga ginhimo paagi sa gamhanan nga balaan nga espiritu sang Dios. Aton mabasa: “Natingala ang kadam-an sang nakita nila nga naghambal ang mga apa kag naglakat ang piang kag nakakita ang mga bulag, kag ginhimaya nila ang Dios sang Israel.” (Mateo 15:31) Sa walay bisan ano nga bili ukon pagpadayawdayaw sang iya mga ikasarang ukon pagtinguha nga himayaon ang iya kaugalingon sa sina nga mga pagpang-ayo, ginpadaku ni Jesus ang gugma kag kaluoy ni Jehova nga Dios. Walay sapayan, nagkaluoy man si Jesus sa mga bulag kag sa walay inugpangapin nga mga tawo sa espirituwal nga “ginpanitan kag gintabog kaangay sang mga karnero nga wala sing manugbantay.”​—⁠Mateo 9:⁠36.

Walay sapayan nga makawiwili yadto nga maragtas, mahimo ipamangkot mo, Kamusta karon? Sanglit walay isa ang nagapang-ayo karon sa mga tawo kaangay sang ginhimo ni Jesus, yadto bala nga mga pagpang-ayo may kahulugan para sa aton? May paglaum gid bala para sa mga bulag? Basaha palihug ang masunod nga artiku⁠lo.

[Blurb sa pahina 4]

“Kon ang mga talaksan sa nutrisyon kag katinlo sa daku nga bahin sang populasyon sang kalibutan indi mapatin-ad, ang matapna kuntani nga pagkabulag padayon nga magadamo.”—The New Encyclopaedia Britanica