Pagpanaksi sa “Tanan nga Pungsod”

“Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag ugaling magaabot ang katapusan.”​—⁠MATEO 24:⁠14.

1. Ngaa ang pinamulong ni Jesus nga narekord sa Mateo 24:14 mahimo nga nagpakibot sa iya mga sumulunod?

MAHIMO nga nakibot gid ang Judiyong mga disipulo ni Jesus sa iya mga pinamulong sa ibabaw! Ang ideya mismo tuhoy sa pagpakighambal sang ginputli nga mga Judiyo sa “dimatinlo” nga mga Gentil, “ang katawhan sang mga pungsod,” indi kilala sa isa ka Judiyo, makangilil-ad pa gani.⁠a Ti, ang matarong nga Judiyo indi magahunahuna sa pagsulod sa isa ka Gentil nga puluy-an! Yadtong Judiyong mga disipulo madamo pa sing dapat mahibaluan nahanungod kay Jesus, sa iya gugma, kag sa iya hilikuton. Kag madamo pa sila sing dapat mahibaluan nahanungod sa pagkawalay ginapasulabi ni Jehova.​—⁠Binuhatan 10:​28, 34, 35, 45.

2. (a) Daw nangin ano kaid-id ang ministeryo sang mga Saksi? (b) Anong tatlo ka pangunang mga butang ang nag-amot sa pag-uswag sang mga Saksi?

² Ginbantala sang mga Saksi ni Jehova ang maayong balita sa mga pungsod, lakip sa modernong-adlaw nga Israel, kag ginabantala ini karon sa mas madamo pa nga pungsod sangsa nagligad. Sang 1994 kapin sa apat kag tunga ka milyon ka Saksi ang nagabantala sa mga 230 ka kadutaan. Nagadumala sila sing mga apat kag tunga ka milyon ka pagtuon sa Biblia upod sa mga interesado. Ginahimo ini walay sapayan sang bug-os kalibutan nga pag-ihig-ihig, sa masami bangod sang pagkawalay hinalung-ong sa mga panudlo kag mga motibo sang mga Saksi. Subong sang ginsiling sa unang mga Cristiano anay, masiling man ini karon sa ila: “Sa pagkamatuod kon nahanungod sini nga sekta nahibaluan namon nga bisan diin ginapakamalain ini.” (Binuhatan 28:22) Nian sa ano naton mapatungod ang ila madinalag-on nga ministeryo? May yara sa dimagkubos tatlo ka butang nga nagaamot sa ila pag-uswag​—⁠pagsunod sa mga panuytoy sang espiritu ni Jehova, pag-ilog sa praktikal nga mga paagi ni Cristo, kag paggamit sang nagakaigo nga mga instrumento para sa epektibo nga komunikasyon.

Ang Espiritu ni Jehova kag ang Maayong Balita

3. Ngaa indi kita makapabugal sa kon ano na ang nahimo?

³ Ginapabugal bala sang mga Saksi ni Jehova ang ila kadalag-an, subong nga daw bangod ini sa ila pinasahi nga mga ikasarang? Wala, kay ang mga pinamulong ni Jesus naaplikar: “Kon nahimo ninyo ang tanan nga ginsugo ko sa inyo, magsiling kamo, ‘Mga ulipon kami nga walay pulos. Ginhimo lamang namon ang dapat namon himuon.’ ” Subong dedikado kag bawtismado nga mga Cristiano, ginbaton sing boluntaryo sang mga Saksi ni Jehova ang katungdanan nga alagaron ang Dios, bisan ano man ang ila personal nga mga kahimtangan. Para sa iban, nagakahulugan ina sang bug-os tion nga pag-alagad subong mga misyonero ukon subong mga boluntaryo sa mga sanga talatapan kag mga imprintahan sang Cristianong mga publikasyon. Para sa iban inang Cristiano nga pagkahanda nagadala sa ila sa pagpatindog sang relihioso nga mga tinukod nga hilikuton, sa bug-os tion nga pagbantala subong payunir nga mga ministro, ukon sa part-time nga pagbantala subong mga manugbantala sang maayong balita sa lokal nga mga kongregasyon. Wala sing isa sa aton ang makatarunganon nga makapabugal nahanungod sa paghimo sang aton katungdanan, ‘sang dapat naton himuon.’​—⁠Lucas 17:10; 1 Corinto 9:⁠16.

4. Paano nalandas ang bug-os kalibutan nga pagpamatok sa Cristianong ministeryo?

⁴ Ang bisan ano nga kadalag-an naton sarang mapatungod sa espiritu, ukon aktibo nga kusog, ni Jehova. Makatarunganon ini nga isiling karon subong nga amo man anay sang panahon ni manalagna Zacarias: “Ini amo ang pulong ni Jehova kay Zorobabel, nga nagasiling, ‘Indi sa kusog militar, ukon sa gahom, kundi sa akon espiritu,’ siling ni Jehova sang kasuldadusan.” Sa amo, ang bug-os kalibutan nga pagpamatok sa pagbantala nga hilikuton sang mga Saksi nadaug, indi paagi sa tawhanon nga panikasog, kundi paagi sa panuytoy kag pangamlig ni Jehova.​—⁠Zacarias 4:⁠6.

5. Anong papel ang ginatungod ni Jehova sa paglapnag sang mensahe sang Ginharian?

⁵ Tuhoy sa sadtong nagapamati sa mensahe sang Ginharian, si Jesus nagsiling: “Nasulat na sa mga Manalagna, ‘Kag tudluan sila tanan ni Jehova.’ Ang tagsatagsa nga nakapamati gikan sa Amay kag nakatuon nagakari sa akon. . . . Wala sing bisan sin-o ang makakari sa akon kon indi ini ihatag sang Amay sa iya.” (Juan 6:​45, 65) Sarang mabasa ni Jehova ang mga tagipusuon kag mga painoino, kag nahibaluan niya yadtong mahimo nga magahulag sa iya gugma bisan pa nga wala pa nila sia makilala. Ginagamit man niya ang iya mga anghel sa pagtuytoy sa sining pinasahi nga ministeryo. Amo ina kon ngaa sa palanan-awon nakita ni Juan ang pagpakigbahin sang anghel kag nagsulat: “Nakita ko ang isa na man ka anghel nga nagalupad sa tunga sang langit, kag may maayong balita sia nga dayon nga ibantala sa mga nagapuyo sa duta, kag sa tagsa ka pungsod kag kabikahan kag hambal kag katawhan.”​—⁠Bugna 14:⁠6.

Mahunahunaon sa Espirituwal nga Kinahanglanon

6. Anong sadsaran nga panimuot ang ginakinahanglan para magahulag ang isa ka tawo sa maayong balita?

⁶ Ang isa pa ka butang sa paghatag ni Jehova sa isa ka tawo sing kahigayunan nga mabaton ang maayong balita amo ang ginpabutyag ni Jesus: “Malipayon yadtong mga mahunahunaon sa ila espirituwal nga kinahanglanon, kay ila ang ginharian sang langit.” (Mateo 5:⁠3) Ang tawo nga kontento na sa kaugalingon ukon ang isa nga wala nagapangita sang kamatuoran indi mangin mahunahunaon sa espirituwal nga kinahanglanon. Nagahunahuna lamang sia sa materyal, undanon nga mga paagi. Ang pagkanaayawan sa kaugalingon mangin sablag. Busa, kon madamo sa aton masugilanon samtang nagapamalaybalay ang nagasikway sang mensahe, dapat naton ­binagbinagon ang tanan nga lainlain nga mga rason sang mga tawo tungod sang ila reaksion.

7. Ngaa madamo ang wala nagahulag sa kamatuoran?

⁷ Madamo ang wala nagapamati bangod dimationg sila nga matutom sa relihion nga ila napanubli kag indi handa nga makigsugilanon. Ang iban naganyat sa isa ka relihion nga nagakabagay sa ila personalidad​—⁠ang pila maluyag sing mistisismo, ang iban nagakatandog sang emosyonalismo, ang iban pa interesado lamang sa sosyal nga mga aktibidad sa ila simbahan. Madamo karon ang nagpili sang estilo sang pagkabuhi nga supak sa mga talaksan sang Dios. Ayhan nagapangabuhi sila sing imoral, nga amo ang ila rason sa pagsiling, “Indi ako interesado.” Apang ang iban, nga mahimo nagapangangkon nga edukado kag sientipiko, nagasikway sang Biblia subong simple kaayo.​—⁠1 Corinto 6:​9-11; 2 Corinto 4:​3, 4.

8. Ngaa indi dapat mabuhinan ang aton kakugi sang pagsikway? (Juan 15:​18-20)

⁸ Ang pagsikway sang kalabanan dapat bala magbuhin sang aton pagtuo kag kakugi sa nagaluwas-kabuhi nga ministeryo? Mahimo kita makakuha sing paumpaw gikan sa mga pinamulong ni Pablo sa mga taga-Roma: “Ano, kon amo, ang kahimtangan? Kon ang iban wala magpabutyag sing pagtuo, mapawalay pulos bala sang ila pagpakakulang sing pagtuo ang pagkatutom sang Dios? Kabay nga indi gid kuntani ina mahanabo! Kundi masapwan kuntani nga matuod ang Dios, walay sapayan nga ang tagsa ka tawo masapwan nga butigon, subong sang nasulat na: ‘Agod mapamatud-an ka nga matarong sa imo mga pulong kag magdaug kon ikaw ginahukman.’ ”​—⁠Roma 3:​3, 4.

9, 10. Ano ang pamatuod nga ang pagpamatok nalandas sa madamong kadutaan?

⁹ Makakuha kita sing pangpalig-on gikan sa madamo nga halimbawa sa palibot sang kalibutan sang mga pungsod nga daw wala gid nagapamati apang, sang ulihi, napamatud-an nga kabaliskaran gid. Nahibaluan ni Jehova kag sang mga anghel nga may yara maayo sing tagipusuon nga mga tawo nga masapwan​—⁠apang ang mga Saksi ni Jehova dapat mangin mapinadayunon kag mabinatason sa ila ministeryo. Binagbinaga, halimbawa, ang pila ka pungsod diin ang Katolisismo daw dimalandas anay nga sablag sang nagligad nga 50 ka tuig​—⁠Argentina, Brazil, Colombia, Espanya, Ireland, Italya, Mexico, kag Portugal. Diutay lamang ang mga Saksi sadtong 1943, 126,000 lamang sa bug-os nga kalibutan, kag 72,000 sini ang yara sa Estados Unidos. Ang pagkawalay hinalung-ong kag pag-ihig-ihig sa mga Saksi daw kaangay sang isa ka tisa nga pader nga indi maguba. Apang, sa karon ang pila sang labing madinalag-on nga mga resulta sa pagbantala yari sa sining mga pungsod. Amo man ini sa madamong anay Komunista nga mga pungsod. Sang 1993 ang pagbawtismo sa 7,402 sa isa ka kombension sa Kiev, Ukraine, nagahatag sing pamatuod sa sini.

¹⁰ Ano bala nga mga paagi ang gingamit sang mga Saksi agod mapaalinton ang maayong balita sa ila mga isigkatawo? Gingamit bala nila ang materyal nga panghaylo agod makapangumbertir sila, nga amo ang ginakunokuno sang iban? Ginduaw lamang bala nila ang mga imol kag mga walay tinun-an, subong sang ginapangangkon sang iban?

Madinalag-on nga mga Paagi sa Pagpaalinton sang Maayong Balita

11. Anong maayo nga halimbawa ang ginapahamtang ni Jesus sa iya ministeryo? (Tan-awa ang Juan 4:​6-26.)

¹¹ Si Jesus kag ang iya mga alagad naghatag sing sulundan nga ginasunod sang mga Saksi karon nga adlaw sa ila nagahimo-sing-disipulo nga hilikuton. Si Jesus nagkadto kon diin may mga tawo, manggaranon ukon imol​—⁠sa mga puluy-an, sa publiko nga mga duog, sa higad sang mga linaw, sa kilid sang mga bukid, bisan sa mga sinagoga.​—⁠Mateo 5:​1, 2; 8:14; Marcos 1:16; Lucas 4:⁠15.

12, 13. (a) Paano si Pablo naghatag sing sulundan para sa mga Cristiano? (b) Paano ginsunod sang mga Saksi ni Jehova ang halimbawa ni Pablo?

¹² Nahanungod sa iya kaugalingon nga ministeryo, si apostol Pablo makatarunganon nga makasiling: “Kamo gid nakahibalo kon paano kutob sang nahaunang adlaw nga nagtapak ako sa distrito sang Asia kaupod ninyo ako sa bug-os nga tion, nga nagapaulipon para sa Ginuo . . . , samtang wala ako mag-isol sa pag-asoy sa inyo sang bisan ano nga mapuslanon kag sa pagtudlo sa inyo sa dayag kag sa pamalaybalay.”​—⁠Binuhatan 20:​18-20.

¹³ Ang mga Saksi ni Jehova kilala sa bug-os nga kalibutan bangod sang pagsunod nila sa sulundan sang mga apostoles, ang pamalaybalay nga ministeryo. Sa baylo nga magkonsentrar sa mahal, manabaw, kag indi personal nga ministeryo sa TV, ang mga Saksi nagaduaw sa mga tawo, manggaranon kag imol, kag nagapakigsugilanon sa ila sing personal. Nagapanikasog sila nga makapakigsugilanon nahanungod sa Dios kag sa iya Pulong.⁠b Wala sila nagatinguha sa paghimo sing rice Christians (mga tawo nga nangin Cristiano bangod nakabaton sila sing pagkaon kag materyal nga mga benepisyo), nagapangumbertir paagi sa pagpanghatag sing walay bayad nga mga butang. Sa sadtong handa sa pagpangatarungan, ginapakita nila nga ang lamang matuod nga solusyon sa mga problema sang tawo amo ang paggahom sang Ginharian sang Dios, nga magabaylo sang kahimtangan sa aton duta nga mas maayo pa.​—⁠Isaias 65:​17, 21-25; 2 Pedro 3:13; Bugna 21:​1-4.

14. (a) Paano ginpasad sang madamong misyonero kag payunir ang isa ka malig-on nga sadsaran? (b) Ano ang matun-an naton gikan sa eksperiensia sang mga Saksi ni Jehova sa Japan?

¹⁴ Agod matuman ang hilikuton sa mas madamo nga kadutaan kon mahimo pa, ang mga misyonero kag mga payunir nagtukod sing kuta sa madamong kapungsuran. Sila ang nagpasad sing sadsaran, kag ugaling ang lokal nga mga Saksi ang nanguna. Busa, wala ini magkinahanglan sing dalagku nga kadamuon sang dumuluong nga mga Saksi sa pagpadayon sang pagbantala kag sa paghupot sini nga organisado sing maayo. Ang isa ka tumalagsahon nga halimbawa amo ang iya sang Japan. Sadto anay sang 1949, Australasian kag Britaniko nga mga misyonero lamang ang nagkadto didto, nagtuon sang hambal, nagpasibu sa daw primitibo nga mga kahimtangan sadtong pagkatapos sang inaway nga dag-on, kag nagsugod sa pagpanaksi sa balay-balay. Sang Inaway Kalibutanon II, ang mga Saksi gindumilian kag ginhingabot sa Japan. Gani diutay lamang nga aktibo nga Hapon nga mga Saksi ang naabtan sang mga misyonero. Apang sa karon nagadamo sila sing tubtob sa kapin sa 187,000 sa kapin sa 3,000 ka kongregasyon! Ano ang sekreto sang ila una nga kadalag-an? Ang isa ka misyonero nga nag-alagad didto sing kapin sa 25 ka tuig nagsiling: “Labing importante nga tun-an ang makigsugilanon sa mga tawo. Paagi sa pagtuon sa ila hambal, nangin posible nga makilala kami upod sa ila, nga mahangpan kag maapresyar ang ila dalanon sang kabuhi. Dapat namon ipakita nga ginahigugma namon ang mga Hapones. Gintinguhaan namon sing mapainubuson nga mangin bahin sang lokal nga komunidad nga wala, sa pagkamatuod, nagakompromiso sang amon Cristianong mga prinsipio.”

Ang Cristianong Paggawi Isa Man ka Panaksi

15. Paano ginpakita sang mga Saksi ang Cristianong paggawi?

¹⁵ Walay sapayan, ang mga tawo wala nagahulag sa mensahe sang Biblia lamang. Nakita man nila ang Cristianismo nga nagapanghikot. Nakita nila ang gugma, paghiusa, kag paghangpanay sang mga Saksi bisan sa idalom sang labing mabudlay nga mga kahimtangan, subong sang mga inaway sibil, mga binangig sa tribo, kag etniko nga mga kaawayon. Ginhuptan sang mga Saksi ang maathag nga tindog sang Cristianong pagkawalaynadampigan sa tanan nga mga sinuay kag gintuman ang pinamulong ni Jesus: “Ginahatagan ko kamo sing bag-o nga sugo, nga maghigugmaanay kamo sa isa kag isa; subong nga ginhigugma ko kamo, higugmaa man ninyo ang isa kag isa. Paagi sini mahibaluan sang tanan nga mga alagad ko kamo, kon maghigugmaanay kamo.”​—⁠Juan 13:​34, 35.

16. Anong eksperiensia ang nagailustrar sang praktikal nga Cristianong gugma?

¹⁶ Ang gugma sa isigkatawo gin-ilustrar sa kaso sang isa ka tigulang nga tawo nga nagsulat sa lokal nga pamantalaan nahanungod kay “G. kag Gng. Mabuot.” Ginpaathag niya nga ang iya mga kaingod nangin mabuot sa iya sang nagatagumatayon ang iya asawa. “Sugod sang nagtaliwan sia . . . kabuot gid sa ila,” sulat niya. “Sugod sadto ‘gin-ayop’ nila ako . . . , naghimo sang tanan nga sahi sang buluhaton kag nagbulig sa paglubad sang mga problema sang isa ka 74-anyos nga retirado. Ang labing dikinaandan pa sa sini amo nga mga itom sila, puti ako. Mga Saksi ni Jehova sila, ako nag-untat nga Katoliko.”

17. Anong dalanon ang dapat naton likawan?

¹⁷ Ini nga eksperiensia nagailustrar nga mahimo kita makahatag sing panaksi sa madamo nga paagi, lakip sa aton adlaw-adlaw nga paggawi. Sa katunayan, kon ang aton pagginawi indi kaangay kay Cristo, ang aton ministeryo mangin kaangay sang mga Fariseo, wala sing epekto. Indi naton luyag nga mangin kaangay sadtong ginlaragway ni Jesus: “Ang tanan nga butang nga ginasiling nila sa inyo, buhata kag tumana, apang indi ninyo paghimua ang suno sa ila mga buhat, kay nagasiling sila apang wala nagahimo.”​—⁠Mateo 22:​37-39; 23:⁠3.

Ang Ulipon nga Klase Nagahatag sing Nagakaigo nga mga Instrumento

18. Paano kita ginasangkapan sang mga literatura sa Biblia agod buligan ang bunayag sing tagipusuon nga mga tawo?

¹⁸ Ang isa pa ka importante nga butang sa pagbantala sang maayong balita sa tanan nga pungsod amo ang pagtigayon sang mga literatura sa Biblia nga ginbalhag sang Watch Tower Bible and Tract Society. May yara kita mga libro, brosyur, tract, kag mga magasin nga mahimo makapaayaw sa halos tanan nga sinsero nga mga nagapamangkot. Kon masugilanon naton ang isa ka Muslim, Hindu, Budhista, Taoista, ukon Judiyo, sarang naton magamit ang libro nga Mankind’s Search for God ukon ang lainlain nga mga tract kag polyeto sa pagsugod sang isa ka paghambalanay kag kon mahimo pa sang isa ka pagtuon sa Biblia. Kon ang isa ka ebolusyunista magapamangkot nahanungod sa pagpanuga, sarang naton magamit ang libro nga Life​—⁠How Did It Get Here? By Evolution or by Creation? Kon ang isa ka pamatan-on magapamangkot, ‘Ano ang katuyuan sang kabuhi?’ mahimo naton mapatuhoy ang iya igtalupangod sa libro nga Questions Young People Ask​—⁠Answers That Work. Kon ang isa naapektuhan sing daku sang personal nga mga problema​—⁠kapung-aw, pagkalapyo, panglugos, diborsio⁠—​may yara kita mga magasin nga nagahinun-anon sa sina nga mga topiko sa praktikal nga paagi. Sa pagkamatuod, ang matutom nga ulipon nga klase nga gintagna ni Jesus nga magaaman sing “pagkaon sa nagakaigo nga tion” nagatuman sang iya katungdanan.​—⁠Mateo 24:​45-47.

19, 20. Paano nagdasig ang hilikuton sang Ginharian sa Albania?

¹⁹ Apang agod malab-ot ang mga pungsod, nangin kinahanglanon nga ibalhag ining mga literatura sa madamo nga hambal. Paano nabadbad ang Biblia kag ang Makasulatanhon nga mga literatura sa kapin sa 200 ka hambal? Ang malip-ot nga pagbinagbinag sa isa ka halimbawa, ang Albania, nagailustrar kon paano napasanyog sang matutom kag mainandamon nga ulipon ang maayong balita walay sapayan sang daku nga mga kabudlayan kag nga wala sing modernong Pentecostes sa paghatag sing gilayon nga paagi sa paglab-ot sa mga hambal.​—⁠Binuhatan 2:​1-11.

²⁰ Sang nagligad nga pila ka tuig lamang, ang Albania ginatamod pa gihapon subong ang lamang atiesta gid nga Komunista nga pungsod. Ang magasin nga National Geographic nagsiling sang 1980: “Ginadumili sang Albania [ang relihion], nagapahayag sang iya kaugalingon sang 1987 nga ‘ang nahaunang atiesta nga estado sa kalibutan.’ . . . Atiesmo lamang ang nahibaluan sang bag-o nga kaliwatan sang Albania.” Karon nga nag-ugdaw ang Komunismo, ang mga taga-Albania nga nakahantop sang ila espirituwal nga kinahanglanon nagahulag sa pagbantala nga ginahimo sang mga Saksi ni Jehova. Isa ka diutay nga grupo sa pagbadbad nga ginakatapuan sang lamharon nga mga Saksi nga makahibalo sing Italyano kag Ingles ang gin-organisar sa Tiranë sang 1992. Gintudluan sila sang sangkol nga mga kauturan nga lalaki nga nagduaw halin sa iban nga kadutaan sa paggamit sing laptop (ginasabak) nga mga kompyuter sa pagmakinilya sini sa Albanian. Nagsugod sila paagi sa pagbadbad sing mga tract kag sing Lalantawan nga magasin. Sang nakatigayon na sila sing eksperiensia, ginbadbad nila ang iban pa nga hamili nga mga publikasyon sa Biblia. Sa karon may yara mga 200 ka aktibo nga mga Saksi sa sinang diutay nga pungsod (populasyon 3,262,000), kag 1,984 ang nagtambong sa Memoryal sang 1994.

Kita Tanan May Katungdanan

21. Sa ano nga sahi sang panag-on kita nagakabuhi?

²¹ Ang mga hitabo sa kalibutan nagapadulong na sa talipuspusan. Sa pagdugang sang krimen kag kasingki, pagpamatay kag panglugos sa lokal nga mga inaway, paglapnag sang pagpatumbaya sa moralidad kag sang bunga sini nga mga balatian nga ginpaliton paagi sa sekso, dipagtahod sa makatarunganon nga awtoridad, ang kalibutan daw nangin magamo, dimagamhan. Yara kita sa panag-on nga kaanggid sa antes-sang-Anaw nga panahon nga ginalaragway sa Genesis: “Nakita ni Jehova nga ang pagkamalaut sang tawo daku sa duta kag nga ang tagsa ka huyog sang mga painoino sang iya tagipusuon malaut gid sing dalayon. Kag nagpakalisud ini kay Jehova nga nahimo niya ang tawo sa duta, kag nagpasakit ini sa iya tagipusuon.”​—⁠Genesis 6:​5, 6; Mateo 24:​37-39.

22. Ano ang Cristianong katungdanan sang tanan nga Saksi ni Jehova?

²² Kaangay sang panahon ni Noe, si Jehova magapanghikot. Apang sa iya katarungan kag gugma, luyag niya nga ibantala anay ang maayong balita kag ang nagapaandam nga mensahe sa tanan nga pungsod. (Marcos 13:10) Sa sini nga bahin ang mga Saksi ni Jehova may katungdanan​—⁠agod makita yadtong takus sang paghidait sang Dios kag matudluan sila sang iya mga dalanon sang paghidait. Sa dili madugay, sa gintalana nga tion sang Dios, ang pagbantala nga hilikuton matapos sing madinalag-on. “Ugaling magaabot ang katapusan.”​—⁠Mateo 10:​12, 13; 24:14; 28:​19, 20.

[Mga footnote]

Madumduman Mo Bala?

◻ Ano ang kadalag-an sang modernong-adlaw nga mga Saksi sa ila ministeryo?

◻ Ngaa ginasikway sang madamo ang Cristianong mensahe?

◻ Anong paagi sang mga apostoles sa pagbantala ang ginagamit sang mga Saksi?

◻ Ano ang aton mga instrumento para sa epektibo nga ministeryo?

◻ Ano ang dapat naton tanan nga himuon nahisuno sa Marcos 13:⁠10?

[Kahon sa pahina 19]

PUNGSOD MGA SAKSI NGA AKTIBO SANG 1943 SANG 1993

Argentina 374 102,043

Brazil 430 366,297

Chile 72 44,668

Colombia ?? 60,854

France Inaway Kalibutanon II-wala sing rekord 122,254

Ireland 150? 4,224

Italya Inaway Kalibutanon II-wala sing rekord 201,440

Mexico 1,565 380,201

Peru Walay rekord sang hilikuton 45,363

Pilipinas Inaway Kalibutanon II-wala sing rekord 116,576

Poland Inaway Kalibutanon II-wala sing rekord 113,551

Portugal Walay rekord sang hilikuton 41,842

Espanya Walay rekord sang hilikuton 97,595

Uruguay 22 9,144

Venezuela Walay rekord sang hilikuton 64,081

[Piktyur sa pahina 17]

Ang mga Saksi ni Jehova nagadamo sa madamong Katoliko nga mga pungsod, subong sang Espanya

[Piktyur sa pahina 18]

Ang mga Saksi ni Jehova aktibo sa mga pungsod sa bug-os nga globo