Walay Sapayan nga Kita Gikan sa Yab-ok, Mangin Determinado sa Pagpadayon!

“Sia mismo nakahibalo sang pagkahuman sa aton, nagadumdom nga yab-ok kita.”​—⁠SALMO 103:⁠14.

1. Husto bala sa siensia ang Biblia sa pagsiling nga ang mga tawo gikan sa yab-ok? Ipaathag.

SA ISA ka pisikal nga paagi, yab-ok kita. “Ginhimo ni Jehova nga Dios ang tawo gikan sa yab-ok sang duta kag ginhuypan ang iya ilong sing ginhawa sang kabuhi, kag ang tawo nangin isa ka buhi nga kalag.” (Genesis 2:⁠7) Ining simple lamang nga paglaragway sa pagtuga sa tawo nagahisanto sa sientipiko nga kamatuoran. Ang kapin sa 90 ka elemento nga nagahuman sa lawas sang tawo masapwan sa “yab-ok sang duta.” Ang isa ka kemiko nagsiling anay nga ang lawas sang isa ka hamtong nga tawo may 65 porsiento nga oksiheno, 18 porsiento nga carbon, 10 porsiento nga hidroheno, 3 porsiento nga nitroheno, 1.5 porsiento nga calcium, kag 1 porsiento nga phos­porous, kag ang nabilin ginahuman sang iban pa nga mga elemento. Indi importante kon bala sibu gid ini nga mga pagbanta. Ang kamatuoran amo gihapon: “Yab-ok kita”!

2. Ano ang imo masiling sa paagi nga gingamit sang Dios sa pagtuga sa mga tawo, kag ngaa?

² Sin-o pa, luwas kay Jehova, ang makatuga sinang masibod nga mga tinuga gikan sa yab-ok lamang? Ang mga binuhatan sang Dios himpit kag wala sing kasawayan, gani indi dapat reklamuhon ang iya desisyon nga gintuga ang tawo sa sining paagi. Sa pagkamatuod, ang pagtuga sang Dungganon nga Manunuga sa tawo gikan sa yab-ok sang duta sa isa ka makapulunaw kag makatilingala nga paagi nagapadugang sang aton apresasyon sa Iya walay latid nga gahom, kalantip, kag praktikal nga kaalam.​—⁠Deuteronomio 32:​4, foot­note; Salmo 139:⁠14.

Isa ka Pagbag-o sang mga Kahimtangan

3, 4. (a) Sa pagtuga sa tawo gikan sa yab-ok, ano ang wala gintuyo sang Dios? (b) Ano ang ginapatuhuyan ni David sa Salmo 103:​14, kag paano ang konteksto nagabulig sa aton sa pagdangat sa sining konklusion?

³ May mga limitasyon ang mga tinuga gikan sa yab-ok. Apang, wala gid gintuyo sang Dios nga mangin lulan ini ukon sobra ka limitado. Wala ini gintuyo nga magtuga sing pagluya sang buot ukon magresulta sa kasubo. Walay sapayan sini, subong ginapakita sang konteksto sang mga pulong ni David sa Salmo 103:​14, ang mga limitasyon sang mga tawo nagapaluya sang buot kag nagaresulta sa kasubo. Ngaa? Sang ginlalis ni Adan kag ni Eva ang Dios, ginbag-o nila ang kahimtangan para sa ila palaabuton nga pamilya. Ang pagkahuman sa yab-ok nakatigayon sing bag-o nga mga kahulugan.⁠a

⁴ Nagahambal si David, indi nahanungod sa kinaugali nga mga limitasyon nga ginahuptan bisan sang himpit nga mga tawo gikan sa yab-ok, kundi nahanungod sa mga kasal-anan sang tawo bangod sang ginpanubli nga pagkadihimpit. Kon indi subong sini, wala kuntani sia magsiling tuhoy kay Jehova: “Sia nga nagapatawad sang tanan mo nga kalautan, nga nagaayo sang tanan mo nga balatian, nga nagatubos sang imo kabuhi gikan sa buho, [nga] wala maghisayo sa aton suno sa aton mga sala; ukon nagbalos sa aton suno sa aton mga kalautan.” (Salmo 103:​2-4, 10) Walay sapayan nga gikan sa yab-ok, kon nagpabilin lamang nga matutom ang himpit nga mga tawo, wala gid kuntani sila magpakalaut, magpakasala, agod magkinahanglan sing kapatawaran; ukon wala kuntani sila magbalatian nga nagakinahanglan sing pag-ayo. Labaw sa tanan, indi na kuntani sila dapat magpanaug sa buho sang kamatayon nga gikan diin sarang sila matubos paagi lamang sa pagkabanhaw.

5. Ngaa wala kita nabudlayi sa paghangop sang mga pulong ni David?

⁵ Subong dihimpit, naeksperiensiahan naton tanan ang mga butang nga ginhambal ni David. Nahibaluan naton pirme ang aton mga limitasyon bangod sang pagkadihimpit. Nagakasubo kita kon ini nga mga limitasyon kon kaisa nagahalit sang aton kaangtanan kay Jehova ukon sa aton Cristianong kauturan. Ginakasubo naton nga ang aton mga pagkadihimpit kag ang mga pag-ipit sang kalibutan ni Satanas nagapapung-aw sa aton kon kaisa. Sanglit ang paggahom ni Satanas madasig nga nagahingapos, dugang pa nga ginaipit sang iya kalibutan ang katawhan sa kabilugan kag ilabi na ang mga Cristiano.​—⁠Bugna 12:⁠12.

6. Ngaa nagaluya ang iban nga mga Cristiano, kag paano ini mahimo himuslan ni Satanas?

⁶ Ginabatyag mo bala nga nagabudlay kag nagabudlay ang pagkabuhi subong Cristiano? Ang iban nga mga Cristiano nabatian nga nagkomento nga samtang nagadugay sila sa kamatuoran nagadugang ang ila pagkadihimpit. Apang, mahimo gid nga ang kabangdanan amo nga narealisar nila sing dugang pa ang ila kaugalingon nga mga dikahimpitan kag ang ila diikasarang sa pagsunod sa himpit nga mga talaksan ni Jehova sa paagi nga luyag nila. Ang matuod, mahimo nga resulta ini sang padayon nga pag-uswag sa ihibalo kag apresasyon sa matarong nga mga kasuguan ni Jehova.Importante nga indi gid naton pagtugutan ining pagkarealisar nga magpaluya sa aton tubtob sa punto nga himuon naton ang luyag sang Yawa nga himuon naton. Sa sulod sang mga siglo sulit-sulit nga nagtinguha sia nga gamiton ang pagluya sang buot nga magtiklod sa mga alagad ni Jehova nga biyaan ang matuod nga pagsimba. Walay sapayan, ang matuod nga gugma sa Dios, subong man ang “bug-os nga dumot” sa Yawa, nagpugong sa kalabanan sa ila sa paghimo sini.​—⁠Salmo 139:​21, 22; Hulubaton 27:⁠11.

7. Sa anong bahin nga kita mahimo nga kaangay ni Job kon kaisa?

⁷ Sa gihapon, mahimo nga kon kaisa magaluya ang buot sang mga alagad ni Jehova. Mahimo nga ang rason man sini amo nga indi kita kontento sa aton mga nahimuan. Mahimo nga nadalahig ang pisikal nga mga butang ukon indi maayo nga relasyon sa mga katapo sang pamilya, mga abyan, ukon mga kaupod sa trabaho. Nagluya gid ang buot sang matutom nga si Job amo kon ngaa nakiluoy sia sa Dios: “O kabay pa kuntani nga taguon mo ako sa Sheol, nga matago mo ako kuntani tubtob nga magtaliwan ang imo kasingkal, nga tangduan mo ako kuntani sing pinat-od nga tion kag madumduman ako!” Karon, kon si Job nga isa ka “tawo nga himpit kag matarong, mahadlukon sa Dios kag nagalikaw sa malaut,” ginluyahan sing buot bangod sang mabudlay nga mga kahimtangan, indi katingalahan nga mahimo man ini matabo sa aton.​—⁠Job 1:​8, 13-19; 2:​7-9, 11-13; 14:⁠13.

8. Ngaa ang pagluya sang buot isa ka positibo nga tanda kon kaisa?

⁸ Makapaumpaw gid ang mahibaluan nga si Jehova nagatan-aw sang tagipusuon kag wala nagakalipat sa maayong mga motibo! Indi gid niya pagsikwayon ang mga sinsero nga nagatinguha sing bug-os sa pagpahamuot sa iya. Sa kamatuoran, ang pagluya sang buot kon kaisa, mahimo nga isa ka positibo nga tanda nga wala naton ginapasapayanan ang aton pag-alagad kay Jehova. Gikan sa sini nga pagtamod, ang isa nga wala gid nagapakig-away batok sa pagluya sang buot mahimo nga sa espirituwal wala makarea­lisar sang iya mga kaluyahon. Dumduma: “Ang nagahunahuna nga nagatindog sia mag-andam nga indi sia mapukan.”​—⁠1 Corinto 10:12; 1 Samuel 16:7; 1 Hari 8:39; 1 Cronica 28:⁠9.

Gikan Man Sila sa Yab-ok

9, 10. (a) Kay sin-o pagtuo ang dapat ilugon sang mga Cristiano? (b) Ano ang nangin reaksion ni Moises sa iya tulumanon?

⁹ Ang Hebreo kapitulo 11 nagalista sing pila ka mga Saksi ni Jehova sang wala pa ang Cristianong panahon nga nagpakita sing malig-on nga pagtuo. Amo man ang ginhimo sang mga Cristiano sang unang siglo kag sang modernong mga tion. Bilidhon gid ang mga leksion nga matun-an gikan sa ila. (Ipaanggid ang Hebreo 13:⁠7.) Halimbawa, kay sin-o pagtuo ang mailog sang mga Cristiano nga mas maayo pa sa iya ni Moises? Ginsugo sia nga ibantala ang mga mensahe sang paghukom sa labing gamhanan nga manuggahom sa kalibutan sang iya panahon, si Paraon sang Egipto. Sa karon, ang mga Saksi ni Jehova dapat man magpahayag sing kaanggid nga mga mensahe sang paghukom batok sa butig nga relihion kag sa iban pa nga mga organisasyon nga nagapamatok sa natukod na nga Ginharian ni Cristo.​—⁠Bugna 16:​1-15.

¹⁰ Ang pagtuman sa sini nga sugo indi isa ka mahapos nga tulumanon, subong ginpakita ni Moises. “Sin-o ako nga magkadto ako kay Paraon kag paguwaon ko ang mga anak sang Israel gikan sa Egipto?” pamangkot niya. Mahangpan naton ang iya pagbatyag sing pagkadisangkol. Nabalaka man sia kon ano ang himuon sang iya mga masigka-Israelinhon: “Pananglit indi sila magpati sa akon kag indi mamati sa akon tingog?” Nian ginpaathag sa iya ni Jehova kon paano niya mapamatud-an ang iya awtoridad, apang may isa pa ka problema si Moises. Nagsiling sia: “Pasayluha ako, Jehova, apang indi ako talunsay nga manughambal, bisan tubtob karon ukon antes sina ukon kutob sang pagpamulong mo sa imo alagad, kay nagautol-utol ako kon maghambal.”​—⁠Exodo 3:11; 4:​1, 10.

11. Kaangay ni Moises, ano mahimo ang mangin reaksion naton sa teokratiko nga mga obligasyon, apang paagi sa pagpakita sing pagtuo, ano ang masaligan naton?

¹¹ Mahimo nga kon kaisa pareho kay Moises ang ginabatyag naton. Bisan pa ginakilala naton ang aton teokratiko nga mga obligasyon, mahimo nga nagapalibog kita kon paano naton matuman ini. ‘Sin-o ako nga magpalapit sa mga tawo, nga ang iban sa ila kilala sa katilingban, manggaranon, ukon mataas sing tinun-an, kag magtudlo sa ila sang mga dalanon sang Dios? Ano ang mangin reaksion sang akon espirituwal nga kauturan kon magkomento ako sa Cristianong mga miting ukon magpasundayag sing presentasyon gikan sa plataporma sa Teokratikong Eskwelahan sa Pagministro? Indi bala nila makita ang akon mga pagkadisangkol?’ Apang dumduma, gin-updan ni Jehova si Moises kag ginsangkapan sia para sa iya tulumanon bangod nagpakita si Moises sing pagtuo. (Exodo 3:12; 4:​2-5, 11, 12) Kon ilugon naton ang pagtuo ni Moises, si Jehova mangin kaupod naton kag magasangkap man sa aton para sa aton hilikuton.

12. Paano ang pagtuo ni David makapalig-on sa aton walay sapayan sang pagluya sang buot bangod sang mga sala ukon mga kakulangan?

¹² Ang bisan sin-o nga nagabatyag sing kalugaw-an ukon nagluya ang buot bangod sang mga sala ukon mga kakulangan pat-od gid nga makahangop kay David sang magsiling sia: “Kay ginakilala ko ang akon mga paglalis, kag ang akon sala yara pirme sa atubangan nakon.” Nagapakiluoy kay Jehova, nagsiling man si David: “Lipdi ang imo nawong gikan sa akon mga sala, kag panasa ang tanan ko nga kalautan.” Apang, wala gid niya pagtuguti ang pagluya sang buot nga dulaon ang iya handum sa pag-alagad kay Jehova. “Dili ako pag-isikway gikan sa atubangan mo; kag dili pagkuhaa sa akon ang imo balaan nga espiritu.” Si David maathag nga “yab-ok,” apang wala sia pagsikwaya ni Jehova, kay nagpakita si David sing pagtuo sa saad ni Jehova nga indi niya pagtamayon ang “buong kag nadugmok nga tagipusuon.”​—⁠Salmo 38:​1-9; 51:​3, 9, 11, 17.

13, 14. (a) Ngaa indi kita dapat mangin mga sumulunod sang mga tawo? (b) Paano ang mga halimbawa ni Pablo kag ni Pedro nagapakita nga sila man gikan sa yab-ok?

¹³ Apang, talupangda nga bisan pa dapat naton tamdon ining “tama kadaku nga panganod sang mga saksi” subong isa ka pagpalig-on sa ‘pagdalagan nga may pagbatas sang dalaganon nga ginabutang sa aton atubang,’ wala kita ginasugo nga mangin mga sumulunod nila. Ginasugo kita nga sundon ang mga tikang sang “Punong Ahente kag Manughimpit sang aton pagtuo, si Jesus,” indi ang dihimpit nga mga tawo​—⁠indi bisan ang matutom nga mga apostoles sang unang siglo.​—⁠Hebreo 12:​1, 2; 1 Pedro 2:⁠21.

¹⁴ Si apostol Pablo kag si apostol Pedro, nga mga haligi sang Cristianong kongregasyon, nasandad kon kaisa. “Ang maayo nga luyag ko wala ko ginahimo, apang ang malaut nga indi ko luyag amo ang ginahimo ko,” sulat ni Pablo. “Kailo ako nga tawo!” (Roma 7:​19, 24) Kag si Pedro, bangod sang sobra nga pagsalig sa kaugalingon, nagsiling kay Jesus: “Kon ang tanan masandad sa imo, ako indi gid masandad!” Sang ginpaandaman ni Jesus si Pedro nga ipanghiwala niya Sia sing makatlo, matinaastaason nga ginpamatukan ni Pedro ang iya Agalon, nga nagapabugal: “Bisan kinahanglan ako mapatay kaupod nimo, indi ko gid ikaw pag-ipanghiwala.” Apang ginpanghiwala matuod niya si Jesus, isa ka sala nga nagpahibi sa iya sing mapait. Huo, si Pablo kag si Pedro gikan sa yab-ok.​—⁠Mateo 26:​33-35.

15. Walay sapayan sang kamatuoran nga kita gikan sa yab-ok, ano ang pagpalig-on sa aton nga mangin determinado sa pagpadayon?

¹⁵ Apang, walay sapayan sang ila mga sala, si Moises, si David, si Pablo, si Pedro, kag ang iban pa kaangay nila nangin madaugon. Ngaa? Bangod nagpakita sila sing malig-on nga pagtuo kay Jehova, bug-os nga nagsalig sa iya, kag nag-unong sa iya walay sapayan sang mga balagbag. Nagsandig sila sa iya sa paghatag sa ila sing “gahom nga labaw sa kinaugali.” Kag ginhimo niya matuod, wala gid sila pagtuguti nga matumba nga indi na makabangon. Kon padayon kita nga magpakita sing pagtuo, mapat-od naton nga kon ihatag ang paghukom sa aton kaso, magahisanto ini sa mga pulong: “Ang Dios indi dimatarong nga malipat sang inyo binuhatan kag sang gugma nga ginpakita ninyo para sa iya ngalan.” Daw ano ini nga pagpalig-on sa aton nga mangin determinado sa pagpadayon walay sapayan sang kamatuoran nga kita gikan sa yab-ok!​—⁠2 Corinto 4:7; Hebreo 6:⁠10.

Ano ang Kahulugan Para sa Aton sing Indibiduwal nga Kita Gikan sa Yab-ok?

16, 17. Kon tuhoy sa paghukom, paano ginaaplikar ni Jehova ang prinsipio nga ginpaathag sa Galacia 6:⁠4?

¹⁶ Ang eksperiensia nagtudlo sa madamo nga ginikanan kag mga manunudlo sing kaalam sa paghukom sa kabataan ukon mga estudyante suno sa ila indibiduwal nga ikasarang, indi pasad sa mga pagpaanggid sa ila mga utod ukon mga masigkabumulutho. Nagahisanto ini sa isa ka prinsipio sang Biblia nga ginapasunod sa mga Cristiano: “Pamatud-an sang tagsatagsa kon ano ang iya kaugalingon nga binuhatan, kag nian may kabangdanan sia sa pagpabugal may kaangtanan sa iya lamang, kag indi kon ipaanggid sa iban nga tawo.”​—⁠Galacia 6:⁠4.

¹⁷ Nahisanto sa sining prinsipio, bisan pa nagapakig-angot si Jehova sa iya katawhan subong isa ka organisado nga grupo, ginahukman niya sila subong mga indibiduwal. Ang Roma 14:12 nagasiling: “Ang tagsatagsa sa aton magahatag sing husay para sa iya kaugalingon sa Dios.” Nahibaluan sing maayo ni Jehova ang genetiko nga pagkahuman sang tagsatagsa sang iya mga alagad. Nahibaluan niya ang ila pisikal kag mental nga pagkahuman, ang ila mga ikasarang, ang ila pinanubli nga mga kusog kag mga kaluyahon, ang ila mga posibilidad, subong man ang kasangkaron nga ila ginahimuslan ining mga posibilidad sa pagpatubas sing Cristianong mga bunga. Ang mga komento ni Jesus nahanungod sa babaying balo nga naghulog sing duha ka diutay nga sensilyo sa bahandian sang templo kag ang iya ilustrasyon tuhoy sa binhi nga ginsab-ug sa maayo nga duta makapalig-on nga mga halimbawa para sa mga Cristiano nga ayhan ginapung-awan bangod dimaalamon nga ginapaanggid nila ang ila kaugalingon sa iban.​—⁠Marcos 4:20; 12:​42-44.

18. (a) Ngaa dapat naton hibaluon kon ano ang kahulugan sa aton sing indibiduwal nga kita gikan sa yab-ok? (b) Ngaa indi kita dapat magkasubo sa prangka nga pag-usisa sa aton kaugalingon?

¹⁸ Importante nga hibaluon naton kon ano ang kahulugan sa aton sing indibiduwal nga kita gikan sa yab-ok agod nga makaalagad kita tubtob sa aton pinakabug-os nga masarangan. (Hulubaton 10:4; 12:24; 18:9; Roma 12:⁠1) Makapabilin lamang kita nga alisto sa kinahanglanon kag sa mga posibilidad sang pag-uswag kon hibaluon gid naton kon ano ang aton personal nga mga kasal-anan kag mga kaluyahon. Sa aton pag-usisa sa aton kaugalingon, indi gid naton pagkalimtan ang gahom sang balaan nga espiritu sa pagbulig sa aton sa pag-uswag. Paagi sa sini, gintuga ang uniberso, ginsulat ang Biblia, kag, sa tunga sang nagatagumatayon nga kalibutan, ginpaluntad ang isa ka mahidaiton nga bag-ong kalibutan nga katilingban. Gani may gahom gid ang balaan nga espiritu sa paghatag sa mga nagapangabay sini, sing kaalam kag kusog nga kinahanglanon sa paghupot sing integridad.​—⁠Miqueas 3:8; Roma 15:13; Efeso 3:⁠16.

19. Indi balibad para sa ano nga kita gikan sa yab-ok?

¹⁹ Makapaumpaw gid ang mahibaluan nga ginadumdom ni Jehova nga yab-ok kita! Apang, indi gid kita mangatarungan nga isa ini ka makatarunganon nga balibad sa pagpauyaya ukon ayhan sa paghimo sing sayop. Indi gid! Ang pagdumdom ni Jehova nga yab-ok kita isa ka pagpakita sang iya dibagay nga kaayo. Apang indi naton luyag mangin “didiosnon nga mga tawo, nga nagahimo sang dibagay nga kaayo sang aton Dios nga mangin balibad para sa maulag nga paggawi kag nagahimutig sa aton lamang nga Tag-iya kag Ginuo, si Jesucristo.” (Judas 4) Indi balibad para sa pagkadidiosnon nga kita gikan sa yab-ok. Ginatinguhaan sang isa ka Cristiano nga pamatukan ang sayop nga mga huyog, ginasakit ang iya lawas kag ginaulipon ini, agod malikawan nga ‘mapasubo ang balaan nga espiritu sang Dios.’​—⁠Efeso 4:30; 1 Corinto 9:⁠27.

20. (a) Sa anong duha ka bahin may yara kita “bugana nga hilimuon sa hilikuton sang Ginuo”? (b) Ngaa may rason kita nga mangin malaumon?

²⁰ Ang tion karon sang nagahingapos nga mga tinuig sang bug-os kalibutan nga sistema ni Satanas indi tion sa pagpauyaya​—⁠indi kon tuhoy sa aton pagbantala sang Ginharian kag indi kon tuhoy sa pagpalambo sing dugang pa sang mga bunga sang espiritu sang Dios. Sa sining duha ka bahin, may “bugana [kita] nga hilimuon.” Karon na ang tion nga mangin determinado sa pagpadayon bangod nahibaluan naton nga ang aton “pagpangabudlay indi nga walay pulos.” (1 Corinto 15:58) Sakdagon kita ni Jehova, kay tuhoy sa iya si David nagsiling: “Indi gid sia magtugot nga malingkang ang matarong.” (Salmo 55:22) Makalilipay gid ang mahibaluan nga ginatugutan kita ni Jehova sing personal nga makigbahin sa pinakadungganon nga hilikuton nga gintangdo sa dihimpit nga tawhanon nga mga tinuga​—⁠kag ini walay sapayan nga kita gikan sa yab-ok!

[Footnote]

Mapaathag Mo Bala?

◻ Paano nagakatuhay ang Genesis 2:7 kag ang Salmo 103:14 sa pagpatuhoy sa mga tawo subong gikan sa yab-ok?

◻ Ngaa tuburan sang pagpalig-on para sa mga Cristiano karon ang Hebreo kapitulo 11?

◻ Ngaa maalamon kita kon iaplikar naton ang prinsipio sa Galacia 6:⁠4?

◻ Paano ang Hebreo 6:10 kag 1 Corinto 15:58 makabulig sa pagpugong sang pagluya sang buot?

[Piktyur sa pahina 10]

Ginailog sang mga Cristiano ang pagtuo sang mga masigkasumilimba, apang ginasunod nila ang Manughimpit sang ila pagtuo, si Jesus