Report sang mga Manugbantala sang Ginharian
“Sumpunga ang Yawa, kag Magapalagyo Sia sa Inyo”
ISA ka grupo sang mga debotado sa “salamangka” sa Efeso sang unang siglo ang nagsunod sa Cristianong mensahe paagi sa dayag nga pagtutod sang ila mga libro sa salamangka. (Binuhatan 19:19) Ginabulubanta nga mga 50,000 ka bilog nga pilak ang bili sadtong mga libro. Kon ang ginapatuhuyan sang Biblia amo ang denaryo, isa ka Romano nga pilak nga sensilyo, mahimo yadto magabili sing mga $37,000!
Madamo sa karon nga nagapanag-iya anay sing literatura tuhoy sa okulto apang nagpakita sing determinasyon nga kaanggid sa sadtong dumaan nga mga taga-Efeso. Binagbinaga ang masunod nga eksperiensia gikan sa Canada.
Mga lima ka tuig na ang nakaligad, isa sang mga Saksi ni Jehova ang nagabantala sa kabalayan sang aktuwal nga ginbutong sia sang isa ka babayi nga ginahingadlan Nora pasulod sa iya balay. Sa sulod sang madamong tinuig sang espirituwal nga pagpanalawsaw, nakatipon si Nora sing ginatos ka relihioso kag espiritistiko nga mga libro, apang luyag niya mahibaluan kon ano ang ginasiling sang Biblia tuhoy sa paglaum sang mga patay. Gintanyagan sia sang Saksi sing tract nga Ano ang Paglaum sang Napatay nga mga Hinigugma? Nasabat ang mga pamangkot ni Nora, kag nagbaton sia sing suskripsion sang Lalantawan kag Magmata! nga mga magasin.
Sang ulihi nagsaylo sia sing puluy-an kag wala na makapakig-angot sa mga Saksi ni Jehova. Apang, padayon nga ginabaton niya ang mga magasin paagi sa koreo sa iya bag-o nga direksion. Nag-order man sia sing pila ka pasad sa Biblia nga mga publikasyon nga ginsambit sa mga magasin. Pagligad sang pila ka tion, isa sang mga Saksi ni Jehova ang nagduaw sa iya puluy-an. Nakadayaw bangod direkta nga ginsabat sang Saksi halin sa Biblia ang iya mga pamangkot, ginpasulod sia ni Nora kag gin-agda nga magbalik para sa dugang nga paghambalanay.
Apang, ginbudlayan ang Saksi sa pagpakig-angot liwat kay Nora. Sulitsulit sia nga nagduaw sa lainlain nga tion sa adlaw kag sa lainlain nga tion sang semana apang wala sila magkit-anay. Sang ulihi, ginpadyaan ang iya pagkamapinadayunon, kag nakaani sing maayo nga mga resulta. Isa ka regular nga pagtuon sa Biblia ang nasugdan, nga sa pangabay ni Nora pirme ini ginahiwat sing tatlo ka beses sa isa ka semana. Ginpahulag sia sang mga butang nga iya natun-an nga isugid ini sa iya mga abyan kag mga katapo sang pamilya, nga nagresulta nga ang tatlo sa ila nagpangabay sing pagtuon sang Biblia upod sa mga Saksi ni Jehova.
Paagi sa iya pagtuon natun-an ni Nora nga may madamo sing butig nga relihion kag butig nga mga manalagna apang may isa lamang ka dalan nga nagapadulong sa kabuhi. Sa sulod sang madamo nga tinuig ginpangita niya ang mga sabat sa iya mga pamangkot tuhoy sa butig nga mga relihion, apang pagkatapos nga natun-an ang ginasiling sang Biblia tuhoy sa mga demonyo, nanghikot sia kaangay sang dumaan nga mga taga-Efeso nga ginsambit sang Binuhatan 19:19. Gintinluan niya ang iya librarya kag, sa sulod sang pila ka adlaw, ginsunog niya ang kapin sa isa ka libo nga libro nga may kahilabtanan sa okulto kag sa butig nga relihiosong mga panudlo. Lakip sa mga publikasyon nga iya ginsunog amo ang isa ka set sang apat ka libro nga nagabili sing sobra sa $800!
Pat-od nga naugot sa ginhimo ni Nora, ginsalakay sia sang mga demonyo sa sulod sang mga duha ka semana. Apang, wala sia mapunggan sining malauton nga mga espiritu sa pagpadayon sang iya pagtuon sa Biblia kag sang iya pagpakig-upod sa modernong-adlaw nga organisasyon ni Jehova.
Ginalaragway sina nga mga eksperiensia ang kamatuoran sang mga pinamulong sang Biblia: “Busa, magpasakop kamo sa Dios; sumpunga ang Yawa, kag magapalagyo sia sa inyo.”—Santiago 4:7.