Isa Ka May Katuyuan nga Dalanon sang Pagkabuhi

PANUGIRON NI MELVA A. WIELAND

Sang Marso 1940, pila ka bulan pagkatapos ako nabawtismuhan, ang akon manghod nga babayi nga si Phyl­lis nagkadto sa akon kag namangkot: “Ngaa indi ka magpayunir?” “Magpayunir?” pamangkot ko. “Buot mo silingon magbantala sing bug-os tion, halos adlaw-adlaw?”

‘PAANO ako mangin isa ka payunir,’ hunahuna ko, ‘limitado ang akon ihibalo sa Biblia kag mas limitado ang akon deposito sa bangko?’ Walay sapayan, ang pamangkot ni Phyl­lis nagpahunahuna sa akon. Nagpangamuyo man ako sing tuman tuhoy sini.

Sang ulihi nangatarungan ako, ‘Ngaa indi ako makasalig sa Dios samtang nagasaad sia sa pag-atipan sa aton kon pangitaon naton sing una ang iya Ginharian?’ (Mateo 6:33) Gani sang Hunyo 1940, nagpahibalo ako sa pagbiya sang akon trabaho subong modista. Nian nagsulat ako sa sanga talatapan sang Watch Tower Society sa Aus­tra­lia, nga nagapangayo sing isa ka teritoryo nga akon mapanghikutan subong payunir.

Ang Akon Bug-os Kabuhi nga Tulumanon

Duha ka semana sang ulihi, nakabaton ako sing isa ka sabat, nga nagapahibalo sa akon nga hatagan ako sing asaynment pagkatapos nga magtambong ako sa kombension nga pagahiwaton sa palibot sang talatapan sang Mga Saksi ni Jehova sa Strath­field, malapit sa Syd­ney, ang pinakadaku nga siudad sang Aus­tra­lia. Sang aga pagkatapos sang kombension, nagreport ako sa opisina sa pagkuha sang akon asaynment.

Ang tawo sa opisina nagpaathag: “Masako kami karon sa departamento sang pagpanglaba. Mahimo ka bala magpabilin anay kag magbulig sing duha ka semana?” Agosto 1940 pa sadto​—⁠kag nagatrabaho gihapon ako sa departamento sang pagpanglaba! Sadto nga tion 35 lamang ang mga katapo sang pamilya sang talatapan; karon may yara 276.

Apang mahimo matingala ka kon ngaa ginakabig ko nga “isa ka may katuyuan nga dalanon sang pagkabuhi,” ang pagtrabaho sa panglabahan, ilabi na nga amo sini ang akon obra sa kapin 50 na ka tuig karon. Antes ako magpaathag, tuguti ako nga isugid kon ano anay ang akon ginakawilihan.

Ang Isport Nangin Isa ka Dalanon sang Kabuhi

Natawo ako sa Mel­bourne sang Enero 1, 1914, ang panganay sang lima ka anak. May mahigugmaon kami nga mga ginikanan nga nagakabuhi sa halangdon nga mga prinsipio kag nagahatag sing disiplina kon kinahanglanon. Ang relihioso nga pagpadaku sa amon isa ka pasapayan, bangod ang amon mga ginikanan indi palasimba. Walay sapayan, ginapilit nila kami nga magtambong sa Sunday ­school sang Simbahan sang En­gland.

Sang nagbiya ako sa eskwelahan sang 1928 kag nagtrabaho subong isa ka mananahi, nagdesisyon ako nga ihinguyang ang akon kalabanan nga hilway nga tion sa paghampang sing mga isport, bangod nagapati ako nga makabulig ini sa akon sa paglandas sang akon pagkamahuluy-on. Nag-entra ako sa isa ka ten­nis club kag naghampang sa bug-os nga tuig. Sa tion sang tigtulugnaw nagahampang man ako sing bas­ket­ball kag base­ball, kag sa tig-ilinit nagahampang ako sa crick­et ­team nga ginatapuan sang mga babayi. Nanamian gid ako sa crick­et, kag nagtinguha ako sing lakas agod mahimpit ang akon abilidad subong isa ka madasig nga bowl­er, agod mangin kalipikado sa mga hampang sa ulot sang mga ­team sang nagkalainlain nga estado.

Isa ka Katuyuan nga Tuhay sa Isport

Sang gamay pa ako natublag na ako sa panudlo nga ang isa ka Dios sang gugma may isa ka duog nga ginatawag impierno diin ang nagahimo sing malaut nga mga butang pagapaantuson sing walay katapusan. Daw indi ini makatarunganon para sa akon. Gani hunahunaa lamang ang akon kalipay sang wala ginapaabot natun-an ko gikan sa Biblia ang matuod nga kahulugan sang “impierno.” Amo ini ang natabo:

Ang akon utod nga babayi nga si Phyl­lis, nga manghod sa akon sing lima ka tuig, mahuyugon man sa isport, kag magkaupod kami sa crick­et team. Sang 1936 ang isa namon ka upod nagpakilala kay Phyl­lis sa isa ka lamharon nga lalaki nga si Jim nga kilala nga tuman ka relihioso. Sa gilayon nagsugod si Jim sa pagsugid kay Phyl­lis tuhoy sa mga panudlo sang Biblia. Nagpukaw ini sang iya interes. “Lohiko gid ini ka tama kag makatarunganon,” panugid niya sa akon.

Sadto nga tion magkaupod kami ni Phyl­lis sa isa ka hulot sa balay, kag nagtinguha sia nga pukawon ang akon interes sa mga ginasugid sa iya ni Jim tuhoy sa Ginharian sang Dios. “Himuon sini ang napaslawan nga himuon sang tawhanon nga panguluhan,” panugid niya sa akon nga may kakunyag. Apang, nakigbais ako sa iya, nagasiling nga isa lang ini sa pila ka relihion nga nagapagumon sa aton kag nga wala gid sing nakahibalo tuhoy sa palaabuton. Apang determinado si Phyl­lis kag nagabutang sia sing mga literatura sa pila ka bahin sang hulot, nagalaum nga basi basahon ko ini.

Gusto ko mahibaluan kon ngaa nakunyag gid si Phyl­lis sa sining bag-o nga pagpati, gani isa ka adlaw ginkuha ko ang isa ka polyeto. May makapulukaw ini nga titulo nga Hereafter. Napukaw ang akon interes sang ginbukad ko ang mga pahina kag nakita ang tinaga nga “impierno.” Sa akon katingala, natun-an ko nga ang tinaga sa Biblia nga “impierno” sa katunayan napatuhoy sa kinaandan nga lulubngan sang katawhan kag ang maayo kag malain nga mga tawo nagakadto didto. Natun-an ko man nga ang impierno indi isa ka duog sang pag-antos; ang patay wala sing pangalibutan kag wala sing mabatyagan.​—⁠Manugwali 9:​5, 10; Salmo 146:​3, 4.

Nag-athag ini sa akon, ilabi na gid sang ginpaathag sang polyeto nga ang isa ka mahigugmaon kag gamhanan nga Dios nagasaad nga buhion liwat ang mga patay paagi sa isa ka milagro nga ginatawag pagkabanhaw. (Juan 5:​28, 29) Karon luyag ko mahibaluan sing dugang ang mga butang nga ginasugid ni Jim kay Phyl­lis. Nasapwan ko ang gamay nga King James Version nga ginhatag sa akon sang akon amay sang bata pa ako kag gintan-aw ang mga kasulatan nga nalista sa polyeto. Ginpamatud-an sini ang ginasiling tuhoy sa impierno kag kahimtangan sang patay.

Ang isa pa ka makagalanyat nga sorpresa sa akon amo ang paghibalo nga ang Dios may personal nga ngalan, nga Jehova. (Salmo 83:18) Nahangpan ko man nga ang Dios may katuyuan, ukon rason, sa tanan nga butang nga ginhimo niya ukon ginpahanugutan nga matabo. Gani namangkot ako sa akon kaugalingon, ‘Ano gid ang akon katuyuan sa kabuhi?’ Sugod sadto naghunahuna ako kon bala mapuslanon gid sa akon ang mangin tuman ka serioso sa isport​—⁠tubtob sa kasangkaron nga ang iban pa nga butang sa kabuhi ginapasapayanan.

Pagpanghikot Suno sa mga Determinasyon

Wala mahibaluan ni Jim kag ni Phyl­lis nga nagbag-o na ang akon pagtamod sa kabuhi, apang nahibal-an nila ini sang gin-agda ang amon pamilya sa sinalusalo sang isa ka abyan. Sadto nga mga adlaw, sa amo sini nga okasyon ang tanan nga presente nagatindog, kag ginahimo ang isa ka ­toast para sa Hari sang Inglatera, kag ang tanan nagaalsa sang ila mga baso sa pag-inom para sa kadungganan sang hari. Apang nagpabilin ako nga nagapungko upod kay Jim kag kay Phyl­lis. Indi sila makapati sang nakita nila ako nga nagapungko pa gihapon! Sa pagkamatuod, indi namon tuyo nga mangin dimatinahuron, apang subong mga Cristiano nabatyagan namon nga dapat kami mangin walay nadampigan kag indi magpakigbahin sa sining nasyonalistiko nga mga seremonya.​—⁠Juan 17:⁠16.

Walay sapayan, ang akon mga ginikanan kag ang iban pa nga pamilya kinulbaan. Nagsiling sila nga kami indi matutom, ukon mga buang​—⁠ukon nga dimatutom kag buang! Nian, sang magtambong kami ni Phyl­lis sa tuigan nga presentasyon sang crick­et team sang mga babayi, kaangay man nga butang ang natabo sa tion sang nasyonalistiko nga seremonya. Nagresulta ini sa amon pagbiya sa team. Indi ini tuman ka budlay subong sang ginahunahuna ko, kay narealisar ko nga ang akon pag-unong kag pagkatutom yara kay Cristo Jesus, ang Hari sang langitnon nga Ginharian sang Dios.

Ginpaathag ni Phyl­lis nga kinahanglan magtambong ako sa mga miting sang mga Saksi ni Jehova sing regular agod mapalig-on ang akon pagtuo sa dugang nga ihibalo sa Biblia. Sadto nga tion may yara lamang isa ka kongregasyon sa Mel­bourne, gani nagsugod ako sa pagtambong sa mga miting didto tagsa ka hapon sang Domingo. Sa gilayon nakombinsi ako nga amo ini ang matuod dutan-on nga organisasyon sang Dios.

Wala madugay, gin-agda ako sa pagpakig-ambit sa pamalaybalay nga pagbantala nga hilikuton sang kongregasyon. Sang primero nagapangalag-ag ako, apang sang isa ka aga sang Domingo namat-od ako nga mag-upod agod ­lamang magtan-aw kon paano ini ginahimo. Nalipay ako sang ginpaupod ako sa isa ka eks­periensiado nga Saksi nga naghambal sing masinaligon sa una nga ganhaan kag nakatigayon sing maayo nga pagbaton gikan sa tagbalay. Naghunahuna ako, ‘Bueno, indi ini tuman kabudlay, apang nagakinahanglan ako sing madamo pa nga pag-ensayo antes ko mahimo ina.’ Gani handurawa ang akon katingala sang, pagkatapos sadtong una nga ganhaan, ang Saksi nagsiling sa akon, “Makabantala ka na sa imo kaugalingon.”

“Ako lang?” pamangkot ko, nga may kakibot! “Nagalahog ka lang! Ano ang isiling ko kon may mamangkot kag indi ko mahibaluan ang sabat?” Apang ang akon kaupod nagpamilit. Gani, nagakurog gid, nagpadayon ako sa akon kaugalingon samtang sia nagpadayon sa pagpanaksi sa mga tawo sa pihak sang kalye. Walay sapayan nalampuwasan ko yadtong una nga aga.

Kutob sadto nagpakigbahin ako sa pagbantala nga hilikuton tagsa ka aga sang Domingo. Kon may mamangkot sa akon sa mga ganhaan nga indi ko masabat, nagasiling ako, “Pangitaon ko pa ini kag magabalik ako sa imo.” Sing makalilipay, padayon si Jehova nga nagahatag sa akon sing kusog kag kaisog sa pagpadayon sa akon bag-o kag may katuyuan nga dalanon sang pagkabuhi. Gindedikar ko ang akon kabuhi sa iya, kag sang Oktubre 1939, ginbawtismuhan ako sa publiko nga palaliguan sang Mel­bourne. Sa gilayon pagkatapos sadto si Phyl­lis, nga napangasawa na ni Jim, nagpamangkot kon ngaa indi ako magpayunir.

Pag-alagad sa Sanga Talatapan

Sang Enero 1941, sa gilayon pagkatapos ako nagtrabaho sa Beth­el, subong amo ang pagtawag sa sanga talatapan, gindumilian ang hilikuton sang mga Saksi ni Jehova sa Aus­tra­lia. Pagkatapos sadto, gin-agaw sang militar ang Puluy-an Beth­el sa Strath­field, kag ginpadala ako sa uma sang Sosiedad sa In­gle­burn, mga 48 kilometros sa guwa sang siudad. Sang Hunyo 1943 ginhilway sang korte ang Watch Tower Society kag ginkuha ang pagdumili. Pagkatapos sadto nga tuig, 25 sa amon ang gin-agda pabalik sa Strath­field Bethel. Didto padayon ako nga nagtrabaho sa panglabahan, subong man sa iban pa nga hilikuton sa puluy-an.

Ang masunod nga dekada madali nga naglipas. Nian sang 1956, napamana ko si Ted Wie­land, isa ka masigkamanugpangabudlay sa Beth­el. Si Ted isa ka tuman ka kalmado, mapailubon nga tawo, kag nalipay kami sang mabaton namon ang pahanugot nga magpadayon kami sa pagpuyo sa Beth­el subong mag-asawa. Ginpakabahandi namon nga duha ang amon may katuyuan nga dalanon sang pagkabuhi, malipayon tungod sa pribilehiyo sang pag-alagad sa sanga talatapan sang Aus­tra­lia. Siempre, dugang sa amon hilikuton sa Beth­el, may kalipay kami sa pagbulig sa iban nga mangin disipulo ni Cristo. Subong isa ka halimbawa, mabasa mo ang tuhoy sa pamilya ­Weekes sa Oktubre 22, 1993, nga guwa sang Awake!

Ang padayon nga pag-uswag sang pagbantala sang Ginharian nagkinahanglan sing pagdugang sing 10 ukon 12 ka tawo lamang sa amon talapuanan sa panahon sang akon una nga 30 ka tuig sa Beth­el. Apang ang kahimtangan nagbalhin sing madasig sang katuigan 1970 sang magsugod kami sa pag-imprinta sing Watchtower kag Awake! nga magasin diri. Ang pagtukod sing isa ka bag-o nga imprintahan nagsugod sang Enero 1972. Wala madugay ang isa ka 40 tonelada nga makina sa pag-imprinta nag-abot halin sa Hapon, kag sang 1973 nagaimprinta kami sing halos 700,000 ka magasin tagsa ka bulan. Ang amon pamilya Beth­el nagsugod man sa pagdugang.

Ang katuigan 1970 nagdala man sing personal nga kasubo sa akon. Una, ang akon palangga nga bana, si Ted, napatay sang 1975 sa edad nga 80. Dayon, wala gani matuigi ang akon tigulang na nga amay nagtulog man sa kamatayon. Nagkuha ako sing paumpaw gikan kay Jehova kag sa iya Pulong, ang Biblia, kag gikan sa akon espirituwal nga mga utod nga lalaki kag babayi. Nakabulig man sing daku ang akon pagpabilin nga masako sa Beth­el sa akon may katuyuan nga hilikuton sa sining tuman kasubo nga panahon sang akon kabuhi.

Walay sapayan, ang kabuhi nagapadayon, kag liwat ako nga nakaeksperiensia sing kaayawan kag mga pagpakamaayo, sa karon subong isa ka balo. Sang 1978, nagtambong ako sa kombension sa London, En­gland, kag pagkatapos nagbisita sa ulong talatapan sang Watch Tower Society sa Brooklyn, New York. Ang pagkakita sa ginatos sang akon mga utod nga lalaki kag babayi nga malipayon nga nagapangabudlay didto sa Brook­lyn Beth­el nagpabilin nga isa ka inspirasyon sa akon tubtob karon.

Samtang nagahingapos ang katuigan 1970, nahibaluan namon nga ang dugang nga pagpasangkad ginaplano para sa Beth­el com­plex sang Aus­tra­lia. Apang, ang pagpasangkad indi mahanabo sa Strath­field, bangod kulang kami sing lugar. Sa baylo, isa ka bag-o, mas daku nga com­plex ang pagatukuron sa amon propiedad sa In­gle­burn, diin nagtrabaho ako sa tion sang pagdumili sang temprano sang katuigan 1940.

Ang Nagapadayon nga May Katuyuan nga Dalanon sang Pagkabuhi

Makakulunyag gid sang magsaylo kami sa amon bag-o nga mga pasilidad sang Enero 1982! Matuod, sang primero may yara diutay nga kasubo sa pagbiya sang naandan na nga palibot, apang wala magdugay nakunyag kami sa amon bag-o nga puluy-an nga may 73 ka matahom nga hulot-tululugan. Karon sa baylo nga magtulok kami sa tisa nga mga dingding kag mga kalye sang siudad, makita namon ang berde nga mga latagon kag kakahuyan, nagaharab nga mga baka, kag ang matahom nga mga pagbutlak kag pagtunod sang adlaw​—⁠isa ka makalilipay gid nga danyag.

Sang Marso 19, 1983, makalilipay nga gindedikar ang amon bag-o nga com­plex sa isa ka tion sang tigragas nga matahom ang silak sang adlaw. Si ­Lloyd Bar­ry sang Nagadumala nga Hubon sang mga Saksi ni Jehova naghatag sing isa ka makapahulag nga pamulongpulong sa dedikasyon. Personal nga gin-apresyar ko ang iya pagtambong kag sang iya asawa sa programa sang dedikasyon, bangod magkaupod kami nga nagtrabaho sa Strath­field Bethel sang mga lamharon pa kami.

Ang padayon nga pag-uswag sang pagbantala sang Ginharian nga hilikuton nagkinahanglan sing dugang pa nga pagpasangkad sang amon mga pasilidad diri sa In­gle­burn. Sang 1987 ginpadaku ang opisina. Nian, sang Nobiembre 25, 1989, gindedikar ang gindugang nga isa ka bag-o lima ka panalgan nga puluy-an kag isa ka bag-o tatlo ka panalgan nga pabrika. Daku gid ang amon pag-uswag​—⁠kutob sa wala gani sa 4,000 ka mga ministro sa Aus­tra­lia sang ginsuguran ko ang akon ministeryo, tubtob sa mga 59,000!

Sining karon lang ang sanga sa Aus­tra­lia ginhimo nga isa sang tatlo ka Re­gion­al En­gi­neer­ing Office sang Sosiedad, upod sa Hapon kag Alemanya. Nagkinahanglan ini sing dugang pa nga pagpasangkad sang Beth­el com­plex. Isa pa ka tatlo ka panalgan nga opisina ang natapos na, kag malapit na lang matapos ang isa ka lima ka panalgan nga puluy-an, nga may yara 80 ka dugang nga hulot agod puy-an sang padayon nga nagadaku gihapon nga pamilya.

Madamo kami sa panglabahan sa pag-atipan sang trabaho diri, apang pirme ko madumduman yadtong adlaw sang Agosto sang 1940 sang gin-agda ako nga magbulig sa sining departamento sa duha ka semana. Nagapasalamat gid ako sing daku nga yadtong duha ka semana naglab-ot sa kapin sa 50 ka tuig kag si Jehova nagtuytoy sang akon mga tikang sa sinang may katuyuan nga dalanon sang pagkabuhi.

[Piktyur sa pahina 21]

Sang 25 anyos ako

[Piktyur sa pahina 23]

Ang adlaw sang amon kasal sang 1956

[Mga piktyur sa pahina 24]

Sang 1938 kami sang akon utod nga babayi nadalahig sa isport, apang ang akon kabuhi karon tuman ka mas mabungahon