Paskuwa—Cristiano Gid Bala Ini?

SUNO sa The World Book Encyclopedia, “ang Paskuwa amo ang adlaw nga ginasaulog sang mga Cristiano ang kaadlawan ni Jesucristo.” Apang, ang ensiklopedia nagasiling man: “Ang unang mga Cristiano wala nagsaulog sang pagkabun-ag [ni Jesus] bangod ginkabig nila ang pagsaulog sang pagkabun-ag ni bisan sin-o nga isa ka pagano nga kustombre.”

Ang The Making of the Modern Christmas, ni Golby kag ni Purdue, nagaugyon: “Ang unang mga Cristiano wala nagsaulog sang pagkabun-ag ni Cristo. Ang mga kaadlawan ginbuylog sa paganong mga kinabatasan; wala sing ginasiling ang mga Ebanghelyo nahanungod sa aktuwal nga petsa sang pagkabun-ag ni Cristo.”

Kon ang mga pagsaulog sang kaadlawan wala sing Cristiano nga ginhalinan, paano ang kaadlawan ni Cristo nangin kilala nga “Cristianong” kapiestahan?

Ang Pagano nga Ginhalinan sang “Paskuwa”

“Ang tanan nagsinalusalo kag nagkinasadya, ang trabaho kag negosyo lubos nga gin-untat sing umalagi sa isa ka tion, ang mga balay ginpunihan sing laurel kag ever­green, ang mga mag-alabyan nagduaway kag nagbayluhanay sing mga regalo, kag ang mga kliyente nanghatag sing mga regalo sa ila mga suki. Ang bug-os nga dag-on masadya kag makalilipay, kag ang mga tawo nagkalipay sa tanan nga sahi sang kalingawan.”​—⁠Paganism in Christian Festivals, ni J. M. Wheeler.

Nagahisanto bala ini nga paglaragway sa mga kapiestahan sang Paskuwa nga nahibaluan mo? Sing makapakibot indi ini ang Paskuwa! Sa baylo, isa yadto ka paglaragway sang Saturnalia​—⁠isa ka semana nga kapiestahan sang paganong Roma nga ginbuylog sa win­ter solstice (ginlaragway sa pihak nga pahina). Ang kaadlawan sang dimalupig nga adlaw ginsaulog sang Disiembre 25, ang labing importante nga adlaw sang kapiestahan sa Mitraiko nga relihion sang Roma.

Suno sa The New Encyclopædia Britannica, “ang Disiembre 25, nga kaadlawan ni Mithra, ang Iranian nga dios sang kapawa kag . . . ang adlaw nga ginpanungod sa dimalupig nga adlaw, subong man ang adlaw pagkatapos sang Saturnalia, ginbaton sing pormal sang simbahan subong Paskuwa, ang pagkabun-ag ni Cristo, agod dulaon ang mga epekto sining mga kapiestahan.” Gani ang paganong pagsaulog sang kaadlawan nagpadayon paagi sa isa ka simple nga pag-ilis sa mga ngalan, halin kay Mithra pakadto kay Cristo!

Apang, mahimo hunahunaon mo nga ang pagkabun-ag sang Anak sang Dios, si Jesus, isa ka butang nga espesyal, nga dapat dumdumon. Ang pag-usisa sa ginasugid sang Biblia nahanungod sini makahatag gid sing kasanagan.

Isa ka Makalilipay nga Hitabo

Ang ika-2 nga kapitulo sang Ebanghelyo ni Lucas nagahatag sing impormasyon nga makabulig sa aton nga mahangpan ang natabo. Si Lucas nagasugid sa aton kon ano ang reaksion sang langitnon nga mga anghel, sang kubos nga mga manugbantay, sang debotado nga mga alagad sang Dios, kag ni Maria mismo sa sining talalupangdon nga hitabo.

Binagbinaga una ang “mga manugbantay nga nagapuyo sa guwa” nga “nagapulaw sa kagab-ihon sa ila mga panong,” nga indi nila mahimo himuon sa tunga-tunga sang tigtulugnaw. Sang ang “anghel ni Jehova” nagpakita kag ang himaya sang Dios nagsilak sa palibot nila, ang mga manugbantay hinadlukan primero. Nadula ang ila kahadlok sang ang anghel nagpaathag: “Dili kamo mahadlok, kay, yari karon! ginatunda ko sa inyo ang maayong balita sang dakung kalipay nga mangin sa bug-os nga katawhan, kay natawo sa inyo karon nga adlaw ang Manluluwas, nga si Cristo nga Ginuo.” Sang hinali nga nagbuylog ang “isa ka kadam-an sang langitnon nga panong” sang mga anghel, nahibal-an sang mga manugbantay nga ini nga pagkabun-ag tuhay gikan sa iban. Sing makawiwili, wala sing gindala nga mga regalo ang mga anghel para sa bag-ong bun-ag nga lapsag. Sa baylo, gindayaw sang mga anghel si Jehova, nga nagasiling: “Himaya sa Dios sa kahitaasan, kag paghidait sa duta sa tunga sang mga tawo nga may maayong kabubut-on.”​—⁠Lucas 2:​8-14.

Natural lamang nga luyag mismo makita sang mga manugbantay ining lapsag, kay ginpahibalo ni Jehova ang makalilipay nga hitabo. Sang nakita nila ang lapsag nga nakulan sa pasungan, ginpahibalo nila sa mga ginikanan ang ginpamulong sang mga anghel. Nian naglakat ang mga manugbantay, “nga nagahimaya kag nagadayaw sa Dios,” indi sa lapsag.​—⁠Lucas 2:​15-18, 20.

Walay duhaduha nga si Maria, nga iloy ni Jesus, nagkasadya tungod sa madinalag-on nga pagkabun-ag sang iya panganay nga anak. Apang nakahimo man sia sing “mga pamat-od sa iya tagipusuon.” Nian, kaupod sang iya bana, nga si Jose, naglakbay sia sa Jerusalem bilang pagsunod sa Mosaikong Kasuguan. Indi yadto pagsaulog sang kaadlawan. Sa baylo, tion yadto agod iatubang ang lapsag sa Dios, “suno sa nasulat sa kasuguan ni Jehova: ‘Ang tagsa ka panganay nga lalaki tawgon nga balaan kay Jehova.’ ”​—⁠Lucas 2:​19, 22-24.

Sa templo sa Jerusalem, nakilala nanday Maria kag Jose si Simeon, nga ginlaragway ni Lucas subong “matarong kag mainampuon, nga nagahulat sang paglipay sang Israel.” Sa idalom sang inspirasyon, ginsilingan sia nga indi sia makaagom sing kamatayon sa wala pa niya makita “ang Cristo ni Jehova.” Ang masunod nga natabo yara man “sa idalom sang gahom sang espiritu [sang Dios].” Ginbaton ni Simeon sa iya mga butkon ang lapsag, indi, indi agod hatagan sia sing regalo, kundi, sa baylo, agod himayaon ang Dios, nga nagasiling: “Karon, Soberano nga Ginuo, pataliwana sa paghidait ang imo ulipon suno sa imo pulong; kay ang akon mga mata nakakita sang imo kaluwasan nga gin-aman mo sa atubangan sang tanan nga katawhan.”​—⁠Lucas 2:​25-⁠32.

Nian, ang tigulang nga manalagna nga babayi nga si Ana nagpalapit. Sia man “nagpasalamat sa Dios kag naghambal nahanungod sa bata sa tanan nga nagahulat sang pagtubos sang Jerusalem.”​—⁠Lucas 2:​36-38.

Sanday Maria, Simeon, Ana, ang mga manugbantay, subong man ang langitnon nga mga anghel, ang tanan nagkasadya sa pagkabun-ag ni Jesus. Apang, talupangda palihug, nga wala sila naghimo sing magansal nga sinalusalo para sa kaadlawan, ukon naghatagay sila sing regalo. Sa baylo, ginhimaya nila si Jehova, ang langitnon nga Manug-aman sang ila kaluwasan.

Apang, ang iban mahimo mangatarungan, ‘Pat-od gid nga indi malain ang maghatag sing regalo kon Paskuwa, kay indi bala nga ginpadunggan sang “tatlo ka maalam nga tawo” si Jesus sing mga regalo?’

Mga Regalo sa Paskuwa

Usisaon naton liwat ang kasaysayan sang Biblia. Mabasa mo ini sa Ebanghelyo ni Mateo, kapitulo 2. Wala ginsambit ang bisan anong pagsaulog sang kaadlawan, ukon ginhatag ang espesipiko nga tion, bisan pa maathag nga ini mga pila ka tion pagkatapos nabun-ag si Jesus. Sa bersikulo 1, ginatawag ni Mateo ang mga bisita nga “mga astrologo [Griego, maʹgoi] gikan sa mga sidlangan nga bahin,” kag busa mga pagano nga wala sing ihibalo nahanungod kay Jehova nga Dios. Ang bituon nga ginsundan sining mga lalaki nagdul-ong sa ila, indi sing direkta sa duog nga natawhan ni Jesus sa Betlehem, kundi sa Jerusalem, diin nagagahom si Hari Herodes.

Sang pagkabati sining malaut nga hari nga namangkot sila nahanungod sa “isa nga natawo nga hari sang mga Judiyo,” ginpamangkot niya ang mga saserdote agod masayod sing eksakto “kon diin matawo ang Cristo” agod mapapatay niya ang lapsag. Ang mga saserdote nagsabat paagi sa pagbalikwat sang tagna ni Miqueas nga nagsugid sang duog nga natawhan sang Mesias sa Betlehem. (Miqueas 5:⁠2) Salimpapaw nga ginsugo ni Herodes ang iya mga bisita: “Lakat kag pangitaon sing tul-id ang bata, kag kon inyo makita sia balitaan ako ninyo, agod makaduaw man ako kag magsimba sa iya.” Ang mga astrologo naglakat, kag ang bituon “nag-una sa ila, tubtob nga nagdulog ini sa ibabaw diin ang bata.” Talupangda nga ginlaragway sia subong isa ka “bata,” indi subong isa ka bag-ong bun-ag nga lapsag.​—⁠Mateo 2:​1-10.

Subong nagakaigo sa mga tawo nga kilala gikan sa Sidlangan nga nagaduaw sa isa ka hari, ang paganong mga astrologo nagyaub kag “naghalad [sa bata] sing mga dulot, bulawan kag incienso kag mirra.” Si Mateo nagadugang: “Apang, bangod ginhatagan sila sing halin sa Dios nga paandam sa damgo nga indi magbalik kay Herodes, nagpauli sila sa ila duta sa liwan nga dalan.”​—⁠Mateo 2:​11, 12.

Gikan sa sining malip-ot nga kasaysayan sa Biblia, ang iban nga mga tawo mahimo magatinguha nga makakita sing supurta para sa ila paghatag sing regalo kon Paskuwa. Walay sapayan, ang Discovering Christmas Customs and Folklore nagapaathag nga ang karon nga kinabatasan sang paghatag sing mga regalo naghalin sa mga regalo kon Saturnalia nga ginhatag sang mga Romano sa ila imol nga mga kaingod. “Ang unang simbahan . . . maalamon nga naghimo sang pagkaimportante sini sa isa ka ritwal nga paghinumdom sa mga dulot sang Magi.” Kabaliskaran gid ini sa matuod nga mga sumilimba​—⁠subong sang kubos nga mga manugbantay⁠—​nga nagdayaw lamang sa Dios sang natawo si Jesus!

Padunggi si Cristo Subong Hari!

Si Jesus indi na isa ka lapsag karon. Sia isa ka gamhanan nga Gumalahom, Hari sang langitnon nga Ginharian sang Dios, kag dapat sia padunggan subong amo sina.​—⁠1 Timoteo 6:​15, 16.

Kon ikaw isa na ka hamtong, nahuya ka bala sang, sa imo atubangan, ginpakita sang mga tawo ang imo mga retrato subong isa ka lapsag? Matuod, yadto nga mga retrato nagapahanumdom sa imo mga ginikanan sang ila kasadya sang nabun-ag ka. Apang karon nga may kaugalingon na ikaw nga identidad, indi bala nga sa masami ginapakamaayo mo nga makilala ka kon ano na ikaw? Sa kaanggid, hunahunaa kon daw ano nga dipagtahod kay Cristo Jesus kon yadtong nagapangangkon nga mga sumulunod niya mangin masako kada tuig sa paganong mga tradisyon sang Paskuwa kag sa pagpadungog sa isa ka lapsag sa bagay nga wala nila sia ginapadunggan subong Hari. Aba, bisan sadtong unang siglo, ang Cristianong si apostol Pablo nangatarungan tuhoy sa pagkanagakaigo sang paghunahuna kay Cristo kon ano na sia karon​—⁠isa ka Hari sa langit. Si Pablo nagsulat: “Bisan si Cristo nakilala namon suno sa unod, walay sapayan karon wala na kami nagakilala sa iya sing subong”!​—⁠2 Corinto 5:​16.

Si Cristo, subong Hari sang Ginharian sang Dios, magatuman sa dili madugay sang matagnaon nga saad nga dulaon ang kasakit, pag-antos, balatian, kag kamatayon. Sia amo ang Isa nga magagarantiya sing nagakaigo nga puluy-an kag makapaladya nga hilikuton para sa tanan sa idalom sang Paraiso nga mga kahimtangan diri sa duta. (Isaias 65:​21-23; Lucas 23:43; 2 Corinto 1:20; Bugna 21:​3, 4) Sa pagkamatuod, mga rason gid ini agod likawan nga dimapadunggan si Jesus!

Nagasunod sang halimbawa mismo ni Cristo, ang matuod nga mga Cristiano nagapanikasog sa paghatag sa ila mga isigkatawo sing isa sang labing daku nga mga regalo nga sarang mahatag sang isa​—⁠ang paghangop sa katuyuan sang Dios, nga makadul-ong sa kabuhi nga dayon. (Juan 17:⁠3) Ini nga sahi sang paghatag sing regalo nagadala sa ila sing daku nga kalipay, kay si Jesus nagsiling: “Mas daku ang kalipay sa paghatag sangsa pagbaton.”​—⁠Binuhatan 20:35; Lucas 11:​27, 28.

Ang mga Cristiano nga may yara matuod nga pag-ulikid sa isa kag isa wala mabudlayan sa kinaugali nga pagpakita sang ila gugma sa bisan ano nga tion sang tuig. (Filipos 2:​3, 4) Subong isa ka simple nga halimbawa, makalilipay gid ang makabaton sing isa ka drowing gikan sa Cristiano nga bata nga, pagkatapos makapamati sing pamulongpulong sa Biblia, nagdrowing sini subong pagpakita sing pasalamat! Makapalig-on man amo ang wala ginapaabot nga dulot halin sa isa ka himata subong tanda sang iya gugma. Subong man, ang Cristianong mga ginikanan makatigayon sing daku nga kalipay kon magapili sila sing nagakaigo nga mga okasyon sa bug-os nga tuig sa paghatag sing mga regalo sa ila mga anak. Ini nga sahi sang Cristianong pagkaalwan wala ginadagtaan sang obligasyon nga maghatag sing mga regalo sa mga adlaw sang selebrasyon ukon paganong tradisyon.

Bangod sini, kapin sa apat kag tunga ka milyon nga mga Cristiano gikan sa tanan nga kapungsuran ang wala karon nagasaulog sang Paskuwa. Sila amo ang mga Saksi ni Jehova, nga tayuyon nga nagasako sang ila kaugalingon sa paghatag sa ila mga isigkatawo sing panaksi nahanungod sa maayong balita sang Ginharian sang Dios. (Mateo 24:14) Mahimo mo sila makilala kon magaduaw sila sa imo puluy-an, ayhan sa dili madugay. Kabay nga ang imo malangkagon nga pagbaton sa ginadala nila magahatag sa imo pamilya sing daku nga kasadya, samtang ginatun-an ninyo kon paano dayawon si Jehova nga Dios sa tagsa ka adlaw sang tuig.​—⁠Salmo 145:​1, 2.

[Piktyur sa pahina 7]

Ang matuod nga mga Cristiano nagahatag sa ila mga isigkatawo sing isa sang labing daku nga mga regalo​—⁠ang paghangop sa katuyuan sang Dios nga nagadul-ong sa kabuhi nga dayon

[Credit Line sa pahina 4]

Culver Pictures