Dapat Ka Bala Mangamuyo kay Jesus?

GINAKABIG sang iban nga nagakaigo ang mangamuyo kay Jesus. Sa Alemanya madamo ang gintudluan sang bata pa sila nga antes sila magkaon dapat nila tiklupon ang ila mga kamot kag magpasalamat kay Jesucristo.

Suno sa Biblia, si Jesus may yara mataas katama nga posisyon sa langit. Apang, nagakahulugan bala ina nga dapat kita mangamuyo sa iya? Ayhan isa ikaw sadtong, bangod sang gugma kay Jesus, nagapatuhoy sang mga pangamuyo sa iya, apang ano mismo ang panghunahuna ni Jesus sa sina nga mga pangamuyo?

Una, ngaa nag-utwas ining mga pamangkot? Bangod ang Biblia nagasiling nga si Jehova nga Dios amo ang “Nagapamati sang pangamuyo.” Indi makapakibot, nian, nga ang mga alagad sang Dios sang una nga panahon, subong sang mga Israelinhon, nangamuyo lamang kay Jehova nga Dios, ang Labing Gamhanan.​—⁠Salmo 5:​1, 2; 65:⁠2.

Nagbalhin bala ang kahimtangan sang si Jesus, nga Anak sang Dios, nagkari sa duta agod tubuson ang katawhan gikan sa kasal-anan kag kamatayon? Wala, ang mga pangamuyo ginpatuhoy gihapon kay Jehova. Sang yari pa sa duta si Jesus mismo masunson nga nangamuyo sa iya langitnon nga Amay, kag gintudluan niya ang iban nga himuon man ini. Hunahunaa lamang ang modelo nga pangamuyo, ginatawag kon kaisa nga Pangamuyo sang Ginuo ukon ang Amay Namon, nga isa sang labing bantog nga mga pangamuyo sa kalibutan. Si Jesus wala magtudlo sa aton nga mangamuyo sa iya; ginhatag niya sa aton ining modelo: “Amay namon sa mga langit, pakabalaanon ang imo ngalan.”​—⁠Mateo 6:​6, 9; 26:​39, 42.

Binagbinagon naton karon ini sing labi pa paagi sa pag-usisa kon ano gid ang pangamuyo.

Ano ang Pangamuyo?

Ang tagsa ka pangamuyo isa ka dagway sang pagsimba. Ginapalig-on ini sang The World Book Encyclopedia, nga nagasiling: “Ang pangamuyo isa ka dagway sang pagsimba nga sa diin ang isa ka tawo mahimo makahatag sing debosyon, pagpasalamat, pagtu-ad, ukon pag-ampo sa Dios.”

Sang isa ka bes si Jesus nagsiling: “Nasulat na, ‘Si Jehova nga imo Dios ang dapat mo simbahon, kag sa iya lamang maghimo ka sing balaan nga pag-alagad.’ ” Gintuman ni Jesus ang sadsaran nga kamatuoran nga ang pagsimba​—⁠busa ang pangamuyo man⁠—​dapat lamang ipatuhoy sa iya Amay, si Jehova nga Dios.​—⁠Lucas 4:8; 6:⁠12.

Pagkilala kay Jesus sa Aton mga Pangamuyo

Si Jesus napatay subong halad gawad para sa katawhan, ginbanhaw sang Dios, kag ginbayaw sa mataas gid nga posisyon. Subong sang mahimo mahunahuna mo, ini tanan nagpahanabo sang pagbalhin may kaangtanan sa kalahamut-an nga mga pangamuyo. Sa anong paagi?

Ginalaragway ni apostol Pablo ang daku nga impluwensia sang posisyon ni Jesus sa pangamuyo subong sang masunod: “Sa sini man nga rason ginbayaw sia sang Dios sa mataas gid nga posisyon kag may kalulo nga ginhatag sa iya ang ngalan nga labaw sa tanan nga ngalan, agod nga sa ngalan ni Jesus magpilo ang tagsa ka tuhod sadtong yara sa langit kag sadtong yara sa duta kag sadtong yara sa idalom sang duta, kag ang tagsa ka dila dayag nga magakilala nga si Jesucristo Ginuo sa himaya sang Dios nga Amay.”​—⁠Filipos 2:​9-11.

Ang mga pinamulong nga “sa ngalan ni Jesus magpilo ang tagsa ka tuhod” nagakahulugan bala nga mangamuyo kita sa iya? Indi. Ang Griegong prase nga gingamit diri “nagapakilala sang ngalan nga paagi sini yadtong nagpilo sang tuhod nahiusa, nga naghiusa sang tanan (πᾶν γόνυ) nga pagsimba. Ang ngalan nga ginbaton ni Jesus nagapahulag sa tanan sa nahiusa nga pagsimba.” (A Grammar of the Idiom of the New Testament, ni G. B. Winer) Sa pagkamatuod, agod ang isa ka pangamuyo mangin kalahamut-an, dapat ini himuon “sa ngalan ni Jesus,” apang ini, walay sapayan, ginapatuhoy kay Jehova nga Dios kag nagahimaya ini sa iya. Tungod sini nga rason, si Pablo nagsiling: “Sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay.”​—⁠Filipos 4:⁠6.

Subong nga ang isa ka banas nagapadulong sa isa ka destinasyon, si Jesus amo ang “dalan” nga nagapadulong sa Dios nga Labing Gamhanan. “Ako amo ang dalan kag ang kamatuoran kag ang kabuhi. Wala sing bisan sin-o nga makakadto sa Amay kundi paagi sa akon,” tudlo ni Jesus sa mga apostoles. (Juan 14:⁠6) Busa, dapat naton himuon ang aton mga pangamuyo sa Dios paagi kay Jesus kag indi direkta kay Jesus mismo.⁠a

‘Apang,’ mahimo ipamangkot sang iban, ‘wala bala nagasugid ang Biblia nga nasugilanon nanday disipulo Esteban kag apostol Juan si Jesus sa langit?’ Matuod ina. Apang, ini nga mga hitabo wala nagadalahig sa mga pangamuyo, kay nakita nanday Esteban kag Juan si Jesus sa palanan-awon kag nakigsugilanon sa iya sing direkta. (Binuhatan 7:​56, 59; Bugna 1:​17-19; 22:20) Dumduma nga ang pagpakigsugilanon lamang bisan sa Dios indi mismo isa ka pangamuyo. Si Adan kag si Eva nakigsugilanon sa Dios, naghatag sing mga balibad sa ila daku nga sala, sang ginhukman Niya sila pagkatapos sila magpakasala sa Eden. Ang ila pagpakigsugilanon sa iya sa sina nga paagi indi isa ka pangamuyo. (Genesis 3:​8-19) Gani, indi husto nga patuhuyan ang pagpakigsugilanon ni Esteban ukon ni Juan kay Jesus subong pamatuod nga dapat kita aktuwal nga mangamuyo sa iya.

Paano ‘Matawag’ ang Ngalan ni Jesus?

Nagapangduhaduha ka bala, nagakabig gihapon nga nagakaigo ang mangamuyo kay Jesus? Isa ka babayi ang nagsulat sa sanga talatapan sang Watch Tower Society: “Sing makapasubo, indi gihapon ako kombinsido nga ang unang mga Cristiano wala nangamuyo kay Jesus.” Nahunahuna niya ang mga pinamulong ni Pablo sa 1 Corinto 1:​2, diin ginsambit niya ang “tanan nga nagapanawag sa ngalan sang aton Ginuo, si Jesucristo.” Apang, dapat talupangdon sang isa nga sa orihinal nga pamulong, ang ekspresyon nga “pagpanawag” mahimo magkahulugan sa iban nga mga butang luwas sa pangamuyo.

Paano ang ngalan ni Cristo ‘gintawag’ sa tagsa ka duog? Ang isa ka paagi amo nga ang mga sumulunod ni Jesus sang Nasaret dayag nga nagkilala sa iya nga Mesias kag “Manluluwas sang kalibutan,” nga naghimo sing madamong milagruso nga mga buhat sa iya ngalan. (1 Juan 4:14; Binuhatan 3:6; 19:⁠5) Busa, ang The Enterpreter’s Bible nagasiling nga ang prase nga “pagpanawag sa ngalan sang aton Ginuo . . . nagakahulugan sang pagbaton sang iya pagkaginuo sa baylo nga mangamuyo sa iya.”

Ang pagbaton kay Cristo kag ang pagtuo sa iya ginpatulo nga dugo, nga nagapaposible sang kapatawaran sang mga sala, nagakinahanglan man sing “pagpanawag sa ngalan sang aton Ginuo, si Jesucristo.” (Ipaanggid ang Binuhatan 10:43 sa 22:16.) Kag literal naton nga ginasambit ang ngalan ni Jesus kon mangamuyo kita sa Dios paagi sa iya. Gani, samtang ginapakita nga mahimo kita makapanawag sa ngalan ni Jesus, wala ginapakita sang Biblia nga dapat kita mangamuyo sa iya.​—⁠Efeso 5:20; Colosas 3:⁠17.

Kon Ano ang Sarang Mahimo ni Jesus Para sa Aton

Si Jesus maathag nga nagsaad sa iya mga disipulo: “Kon magpangayo kamo sa akon sing bisan ano sa akon ngalan, ina himuon ko.” Nagakinahanglan bala ini sing pagpangamuyo sa iya? Indi. Ang pagpangayo ginapatuhoy kay Jehova nga Dios​—⁠apang sa ngalan ni Jesus. (Juan 14:​13, 14; 15:16) Ginapangabay naton sa Dios nga gamiton sang Iya Anak, nga si Jesus, ang iya daku nga gahom kag awtoridad tungod sa aton.

Paano nagapakigkomunikar si Jesus sa iya matuod nga mga sumulunod karon? Ang paglaragway ni Pablo sa kongregasyon sang hinaplas nga mga Cristiano mahimo magamit subong isa ka ilustrasyon. Ginpaanggid niya ini sa isa ka lawas kag si Jesucristo sa ulo. Ang “ulo” nagahatag sa mga katapo sang espirituwal nga lawas sang ila mga kinahanglanon paagi sa “mga lutalutahan kag mga lanit-lanit,” ukon sa mga pamaagi ukon mga kahimusan sa paghatag sa iya kongregasyon sing espirituwal nga pagkaon kag panuytoy. (Colosas 2:19) Sa kaanggid nga paagi, ginagamit karon ni Jesus ang mga “hiyas sa mga tawo,” ukon mga lalaki nga kalipikado sa espirituwal, sa pagpanguna sa kongregasyon, bisan sa pagpadapat sang pagsabdong kon kinahanglanon. Wala sing aman para sa mga katapo sang kongregasyon nga makigkomunikar sing direkta kay Jesus ukon mangamuyo sa iya, kundi dapat gid sila​—⁠huo, dapat⁠—​mangamuyo sa Amay ni Jesus, si Jehova nga Dios.​—⁠Efeso 4:​8-12.

Paano Mo Ginapadunggan si Jesus?

Nahanungod sa kaluwasan sang katawhan, importante gid katama ang bahin ni Jesus! Si apostol Pedro nagsiling: “Walay kaluwasan sa bisan kay sin-o nga iban, kay walay iban nga ngalan sa idalom sang langit nga ginhatag sa mga tawo nga paagi sa iya kinahanglan kita maluwas.” (Binuhatan 4:12) Nahibaluan mo bala ang pagkaimportante sang ngalan ni Jesus?

Paagi sa indi pagpatuhoy sang mga pangamuyo kay Jesus sing personal, wala naton ginapakanubo ang iya posisyon. Sa baylo, ginapadunggan si Jesus kon mangamuyo kita sa iya ngalan. Kag subong nga ginapadunggan sang mga kabataan ang ila mga ginikanan paagi sa pagkamatinumanon, ginapadunggan naton si Jesucristo paagi sa pagtuman sa iya mga sugo, ilabi na ang bag-ong sugo nga maghigugmaanay sa isa kag isa.​—⁠Juan 5:23; 13:⁠34.

Kalahamut-an nga mga Pangamuyo

Luyag mo bala makahimo sing kalahamut-an nga mga pangamuyo? Nian ipatuhoy ini kay Jehova nga Dios, kag himua ini sa ngalan sang iya Anak, si Jesus. Hibalua ang kabubut-on sang Dios, kag ipakita sa imo mga pangamuyo ina nga paghangop. (1 Juan 3:​21, 22; 5:14) Magkuha sing kusog gikan sa mga pinamulong sang Salmo 66:20: “Pakamaayuhon ang Dios, nga wala magsikway sang akon pangamuyo, ukon sang iya mahigugmaon nga kaluoy gikan sa akon.”

Subong sang nahangpan na naton, ang mga pangamuyo isa ka dagway sang pagsimba nga iya lamang sang Dios nga Labing Gamhanan. Paagi sa pagpatuhoy sang aton tanan nga pangamuyo kay Jehova nga Dios, ginapakita naton nga ginasunod naton sing hanuot ang sugo ni Jesus nga mangamuyo: “Amay namon sa mga langit.”​—⁠Mateo 6:⁠9.

[Footnote]