Isa Ka Hamili nga Bahandi nga Mapaambit

PANUGIRON NI GLORIA MALASPINA

Sang nadula na sa amon panulok ang baybayon sang Sic­i­ly, ginpatuhoy namon sang akon bana ang amon igtalupangod sa amon destinasyon, ang isla sang Mal­ta sa Med­ite­ra­neo. Daw ano ka makakulunyag nga pagduaw! Samtang nagatabok ang barko sa kalalawran, nadumduman namon ang eksperiensia ni apostol Pablo sadtong unang siglo sa Malta.—BINUHATAN 28:​1-10.

TUIG 1953 sadto, kag ang pagbantala nga hilikuton sang mga Saksi ni Jehova wala ginakilala sing legal sa Mal­ta. Sang nagligad nga tuig, naggraduwar kami sa Watchtower Bi­ble ­School of Gil­ead kag ginpadala sa Italya. Pagkatapos sang malip-ot lamang nga tion sang pagtuon sing Italyano, nalangkag kami nga makit-an kon ano ang nagahulat sa amon sa Mal­ta.

Paano ang isa ka pamatan-on nga babayi, nangin isa ka misyonera sa iban nga pungsod? Tuguti ako sa pagpaathag.

Ang Makapapagsik nga Huwaran sang Akon Iloy

Sang 1926, sang ang amon pamilya nagapuyo sa Fort Fran­ces, On­tar­io, Can­a­da, ginbaton sang akon iloy ang isa ka pulyeto nga Millions Now Living Will Never Die gikan sa isa ka Estudyante sa Biblia (subong amo anay ang pagtawag sa mga Saksi ni Jehova). Ginbasa niya ini upod ang daku nga interes, kag sadto mismo nga semana nagtambong sia sa isa ka grupo nga pagtinuon sa Biblia, nga nagagamit sing Watch Tower nga magasin. Si Nanay isa ka maukod nga bumalasa sang Biblia, kag ginbaton niya ang mensahe tuhoy sa Ginharian sang Dios subong ang manggad nga iya ginapangita. (Mateo 6:​33; 13:44) Walay sapayan sang masingki nga pagpamatok ni Tatay, kag bisan pa nga may tatlo sia ka magagmay nga kabataan nga babayi nga dapat atipanon, gintindugan niya ang kamatuoran.

Ang dimalingkang nga pagtuo ni Nanay sa sulod sang masunod nga 20 ka tuig naghimo sa akon kag sa akon duha ka magulang nga babayi nga sanday Thelma kag Viola, nga mahibaluan ang makadalayaw nga paglaum sang kabuhi nga walay katapusan sa isa ka bag-ong kalibutan sang pagkamatarong. (2 Pedro 3:13) Nakaatubang sia sing madamong mabudlay nga pagtilaw, apang wala gid namon ginpangduhaduhaan ang pagkamatarong sang iya ginpili nga dalanon.

Sang 1931, sang napulo pa lang ako ka tuig, nagsaylo kami sa isa ka uma sa naaminhan sang Min­ne­so­ta, E.U.A. Didto nauntat ang amon regular nga pagpakig-angot sa mga Saksi ni Jehova apang indi gikan sa Biblikanhon nga pagtuytoy ni Nanay. Ang iya debotado nga pag-alagad subong isa ka col­por­teur, ukon bug-os tion nga ministro, nagpapagsik sa akon nga magbuylog sa iya sa amo nga hilikuton. Sang 1938 ginsimbuluhan namon sang akon duha ka utod nga babayi ang amon pagdedikar kay Jehova paagi sa pagpabawtismo sa isa ka asambleya sa Du­luth, Min­ne­so­ta.

Pagkatapos nga nakagraduwar ako sa hayskul sang 1938, ginpalig-on ako ni Nanay nga mag-eskwela sa isa ka bokasyonal nga eskwelahan agod masakdag ko ang akon kaugalingon subong isa ka payunir (ang bag-o nga ngalan para sa col­por­teur). Nangin maayo ini nga laygay, ilabi na kay namat-od si Tatay nga biyaan kami kag busa dapat kami mangabuhi sing kamihanon lamang.

Pagpaambit sang Amon Mangggad sing Bug-os Tion

Sang ulihi nagsaylo kami sa Cal­i­for­nia, kag sang 1947, nagsugod ako sa pagpayunir nga hilikuton sa ­San Fran­cis­co. Samtang nagabulig sa hilikuton sa paghanda para sa “Pag-uswag sang Tanan nga Kapungsuran” nga Asambleya sa ­Los An­ge­les, nakilala ko si Fran­cis Ma­las­pi­na. Ang amon pareho nga tulumuron nga magmisyonero nagdul-ong sa pagsugod sang isa ka paghigugmaanay. Nagpakasal kami sang 1949.

Sang Septiembre 1951, gin-agda kami ni Fran­cis sa ika-18 nga klase sang Gil­e­ad. Sang adlaw sang gradwasyon, Pebrero 10, 1952, pagkatapos sang lima ka bulan sang maid-id nga paghanas, ginlawag sang presidente sang eskwelahan, si Nathan H. Knorr, ang mga pungsod nga amon pagakadtuan sing paagisod suno sa alpabeto. Sang nagsiling sia nga, “sanday Utod Malaspina, magakadto sa Italya,” ginhanduraw na namon ang amon pagbiyahe!

Pila ka semana sang ulihi, nagsakay kami sa isa ka barko halin sa New York para sa napulo ka adlaw nga pagpanakayon padulong sa Gen­oa, Italya. Sanday Gio­van­ni De­Cec­ca kag Max Lar­son, nga katapo sang ulong talatapan sang Brooklyn, nag-upod sa pagdul-ong sa amon sa pantalan. Sa Gen­oa ginsugata kami sang mga misyonero nga nakasunar sang masibod nga mga padugi sa imigrasyon.

Nalangkag sa tanan nga butang sa palibot namon, nagsakay kami sa isa ka tren padulong sa Bo­lo­gna. Ang talan-awon nga amon naabtan amo ang isa ka siudad nga gubaon gihapon bangod sang mga pagpamomba sang Inaway Kalibutanon II. Apang yara man ang madamong matahom nga mga butang, kaangay sang makagalana nga humot sang sinanlag nga kape nga nagapuno sa hangin kon aga kag ang saboroso nga baho sang manamit nga mga sarsa nga ginahanda para sa dimaisip nga sahi sang mga pasta.

Pagtuman sang Isa ka Tulumuron

Nagsugod kami sa pagministeryo paagi sa saulado nga presentasyon, kag ginasulitsulit namon ini tubtob nga may magbaton sang mensahe ukon may magtakop sang ganhaan. Ang handum nga mapabutyag ang amon kaugalingon amo ang nagpahulag sa amon nga tun-an ang lenguwahe sing maukod. Pagkatapos sang apat ka bulan, ginpadala kami sa isa ka bag-o nga balay sang mga misyonero sa Nap­les.

Ining daku nga siudad kilala sa iya matahom nga mga talan-awon. Naluyagan namon mag-alagad didto, apang pagkatapos sang apat naman ka bulan, gintangdo ang akon bana sa sirkito, ukon nagalakbay nga hilikuton nga nagaduaw sa mga kongregasyon gikan sa Roma tubtob sa Sic­i­ly. Kon kaisa, ginaduaw man namon ang Mal­ta kag bisan gani ang Lib­ya sa Aminhan nga Aprika.

Ang pagsakay sa tren gikan sa Nap­les padulong sa Sic­i­ly sadtong mga tinuig isa ka pagtilaw sa pisikal nga ikasarang. Nagasakay kami sa gutok nga tren kag nagatindog sa alagyan, kon kaisa sa sulod sang anom tubtob walo ka oras. Walay sapayan, naghatag ini sa amon sing maayo nga kahigayunan nga mapanilagan kag matun-an ang mga tawo sa palibot namon. Madamo nga beses nga ang isa ka daku nga galunan sang bino amo ang ginapungkuan sang tag-iya sini, nga kon kaisa nagainom sini agod maumpawan ang iya kauhaw sa tion sang malawig nga pagbiyahe. Masami kami ginatanyagan sang mainabyanon nga mga pasahero sang ila tinapay kag salami, isa ka maabiabihon, mainabyanon nga panimuot nga amon ginaapresyar.

Sa Sic­i­ly ginasugat kami sang mga kauturan nga nagabitbit sang amon mga maleta padulong sa bukid sa sulod sang tatlo ka oras kag tunga nga walay untat nga pagtaklad padulong sa kongregasyon sa ibabaw. Ang mainit nga pag-abiabi sang amon Cristianong mga kauturan naghimo sa amon nga malipatan ang amon kalapyo. Kon kaisa nagasakay kami sa mabakod sing tuhod nga mga mula, apang wala gid kami nagatulok sa madalom nga pil-as diin ang isa ka sayop nga pagtikang sang mula magakahulugan sang amon pagkahulog. Ang malig-on nga tindog sang aton mga kauturan sa kamatuoran sang Biblia walay sapayan sang ila mga kabudlayan amo ang nagpalig-on sa amon, kag ang gugma nga ila ginpakita sa amon naghimo sa amon nga mapinasalamaton nga makaupod sila.

Ang Malta kag Libya

Puno sing mga handumanan tuhoy sa aton mga kauturan sa Sic­i­ly, nagbiyahe kami padulong sa Malta. Si apostol Pablo nakasapo sing maayo nga mga tawo didto, kag amo man kami. Sang magbagyo sa Baybayon sang St. Paul, nahangpan namon ang katalagman nga gin-atubang sang magagmay nga mga barko sadtong unang siglo. (Binuhatan 27:​39-28:10) Ang masunod namon nga ginduaw amo ang Lib­ya. Ano ang amon masugata sa sining pungsod sang Aprika diin ginadumilian ang aton hilikuton?

Sa liwat naeksperiensiahan namon ang tuhay gid nga kultura. Ang mga talan-awon kag ang mga gahod sang siudad sang Tripoli nakakuha sang akon igtalupangod samtang nagalakat kami sa may mga haligi nga mga kalye sang dakbanwa. Ang mga lalaki nagasuksok sang hinabol nga buhok sang kamelyo agod maamligan ang ila kaugalingon gikan sa makapalaso nga init sang Sahara Desert sa adlaw kag gikan sa katugnaw sang kagab-ihon. Nahangpan namon kag gintahod ang paagi sang pagpasibu sang mga tawo sa nagabulubag-o nga klima sang ila duog.

Ang mahalungon nga kakugi sang mga kauturan nakatudlo sa amon sing daku tuhoy sa pagsalig sing hugot kay Jehova kag sa pagsunod sa mga panuytoy sadtong may kapin nga ihibalo tuhoy sa pagpanaksi sa idalom sang amo nga mga kahimtangan. Ang aton Cristianong mga kauturan ginahuman sang madamo nga nasyonalidad; apang nagapanghikot sila sing nahiusa sa ila pag-alagad kay Jehova.

Isa ka Bag-o nga Asaynment

Bangod sang pagpamatok sa aton pagbantala nga hilikuton, kinahanglan kami maghalin sa Italya, apang malipayon namon nga ginbaton ang isa ka bag-o nga asaynment sa Brazil sang 1957. Nagpasibu kami ni Francis sa kabuhi kag mga kinabatasan, kag sa tapos sang walo ka bulan, gin-agda si Francis sa sirkito nga pag-alagad. Nagbiyahe kami sakay sa bus, sa eroplano, kag sa pagpanglakaton. Ang pagbiyahe sa sining malapad, matahom nga pungsod nagtudlo sa amon sing leksion tuhoy sa geograpiya.

Ang amon una nga sirkito nagalakip sing napulo ka kongregasyon sa siudad sang São Paulo, subong man sing napulo ka magagmay suludlon nga banwa kag sa ubay sang nabagatnan nga baybayon sang estado sang São Paulo. Wala pa sing mga kongregasyon sa amo nga mga banwa sadto nga tion. Nagapangita kami anay sing madayunan, kag kon makakita na kami, nagapamalaybalay kami dala ang mensahe sang Ginharian. Nagabilin man kami sing mga imbitasyon sa mga tawo agod magtan-aw sing isa sang edukasyunal nga mga pelikula sang Watch Tower Society.

Ang pagsakay sa bus upod ang mga sintas, kamera, trans­form­er, mga rekord, literatura, mga imbitasyon, kag ang de-mano nga galamiton sa pag-estampa sang duog nga pagasalidahan sang pelikula sa mga imbitasyon indi mahapos nga hilikuton. Sa pagpaanggid, ang amon gamay nga maleta sang mga bayo indi tuman ka importante. Ang kamera kinahanglan hapinan sang kutson sa amon sabak agod indi ini mauyog kag magkalabungkag bangod sang pagbiyahe sa batsihon nga mga dalanon.

Sa tapos makakita sing isa ka duog agod pasalidahan sang pelikula, nagapamalaybalay kami kag nagabilin sing mga imbitasyon para sa pagpasalida sang pelikula. Kon kaisa makatigayon kami sing permiso sa pagpasalida sang pelikula sa isa ka restawran ukon hotel. Sa iban pa nga tion ginaladlad namon ang isa ka kobre-kama sa ulot sang duha ka poste sa guwa. Ang mainapresyahon nga mga tumalambong, kalabanan sa ila wala pa gid makakita sing isa ka nagahulag nga pelikula, nagatindog kag nagapamati sing maukod samtang ginabasa ni Francis ang nasulat nga dinalan. Pagkatapos, nagapanagtag kami sing mga literatura sa Biblia.

Agod malab-ot ang mga minuro, nagasakay kami sa bus. Ang pila ka mga suba wala sing taytay, gani ginapasakay ang bus sa isa ka daku nga balsa kag ginapatabok ini sa pihak nga pangpang sang suba. Ginasilingan kami nga manaug sa bus kag, kon makita namon nga nagadalus-os na ang bus sa suba, magalukso kami sa pihak nga bahin sang balsa agod indi kami mahulog sa tubig. Sing mapinasalamaton, wala namon maagihan nga malunod upod sa bus sa suba​—⁠maayo na lang, ilabi na bangod ang suba kilala nga ginapuy-an sang nagakaon sing unod nga isda nga piranha!

Sa tapos makatambong sa internasyonal nga kombension sa New York sang 1958, nagbalik kami sa Brazil, diin nakabalik kami dayon sa nagalakbay nga hilikuton. Ang amon distrito nagalakip sang dulunan sang Uru­guay sa nabagatnan, kag sang Par­a­guay sa nakatundan, ang estado sang Per­nam­bu­co sa naaminhan, kag ang Dagat Atlantiko sa nasidlangan nga bahin sang Bra­zil.

Ang Duog sang mga Aruon

Sang tunga-tunga sang katuigan 1960, ginbaton namon ang isa ka imbitasyon nga magpasalida sing isa sang mga pelikula sang Sosiedad sa duog sang mga aruon. Ginabaton ko nga daw hinadlukan ako. Wala kami sing nahibaluan tuhoy sa aro, magluwas sang amon nabasahan sa Biblia. Sa pagsulod namon sa com­pound, nga napinturahan sang puti, gintudlo kami sa isa ka daku nga awdituryom. Isa ka seksion ang gintunga paagi sa isa ka pisi para sa amon kag sa amon kagamitan.

Ang elektrisyan nga nagabulig sa amon 40-anyos na nga nagapuyo sa amo nga duog. Naupod na sing lubos ang iya mga kamot kag ang iban nga bahin sang iya lawas, nga nagpalaw-ay sang iya hitsura. Ginangidlisan ako sang primero, apang ang iya mainabyanon nga panimuot kag kaabtik sa paghimo sang iya hilikuton nakapaumpaw sa akon. Wala madugay nagasugilanon na kami tuhoy sa madamong butang pagkatapos nga nahimo namon ang kinahanglanon nga mga paghanda. Sa isa ka libo nga mga aruon nga nagapuyo sa pasilidad, kapin sa duha ka gatos ang nagtambong. Samtang nagakiangkiang sila sa pagsulod, natalupangdan namon ang nanuhaytuhay nga kagrabihon sang balatian nga ila ginaantos. Daw ano ka makapahulag, makatalandog nga eksperiensia para sa amon!

Nadumduman namon ang ginsiling ni Jesus sa nagpakitluoy nga aruon, “Ginuo, kon buot mo, ikaw makaayo sa akon.” Gintandog ang lalaki, ginpasalig sia ni Jesus, “Buot ako. Mag-ayo ka.” (Mateo 8:​2, 3) Pagkatapos sang programa, madamo ang nagpalapit sa amon agod magpasalamat sa amon pagkari, ang ila nahalitan nga mga lawas isa ka maathag nga pamatuod sang daku nga pag-antos sang tawo. Sang ulihi, gintun-an sa Biblia sang lokal nga mga Saksi yadtong luyag makatuon sing dugang pa.

Sang 1967 nagbalik kami sa Estados Unidos agod atipanon ang pila ka daku nga problema sa panglawas. Samtang padayon namon nga ginapakigbatuan ining mga problema sa panglawas, ginhatagan kami liwat sang pribilehiyo sa pag-alagad sa sirkito nga hilikuton. Sa masunod nga 20 ka tuig, nag-upod ako kay Francis sa nagalakbay nga hilikuton sa Estados Unidos. Sa sini nga tion nagtudlo man sia sa Kingdom Ministry School.

Daw ano nga tuburan sang pagpalig-on para sa akon nga makatigayon sang isa ka mahigugmaon nga bana kag matutom nga kaupod nga naghikot sang bisan anong asaynment nga ginhatag sa iya! Sing magkaupod nangin pribilehiyo namon nga ipaambit ang manggad sang kamatuoran sang Biblia sa mga bahin sang apat ka kontinente.

Ginsakdag sang Bahandi

Sang 1950, ginpamana ni Nanay si David Easter, isa ka matutom nga utod nga lalaki nga ginbawtismuhan sadtong 1924. Nag-alagad sila sing madamo nga tinuig sa bug-os tion nga ministeryo. Apang, sang nagatigulang na si Nanay, gindapuan sia sing balatian nga Alz­hei­mer’s dis­ease. Nagkinahanglan sia sing daku nga pagtatap bangod ginadula sang balatian ang iya panimuot. Gin-abaga sang akon masinakdagon nga mga utod nga babayi kag ni David ang mabug-at nga responsabilidad sa pag-atipan sa iya, bangod indi nila luyag nga bayaan namon ang amon pinasahi nga pribilehiyo sa bug-os tion nga pag-alagad. Ang matutom nga halimbawa ni Nanay tubtob sa iya kamatayon sang 1987 nakabulig sa amon sing daku sa pagdihon sang amon dalanon sa kabuhi, kag ang paglaum sang langitnon nga padya nga iya ginpakabahandi nakapaumpaw sa amon.

Sang 1989, natalupangdan ko nga si Francis indi na subong kapagsik sangsa nagligad. Wala namon matalupangdan nga ang ­snail fe­ver, isa ka balatian nga kilala sa madamo nga bahin sang kalibutan, nag-atake na sa iya. Sang 1990, ginkuha sia sining mapintas nga kaaway, kag nadula ko ang akon mahal nga tiayon nga nakaupod ko sa kapin sa 40 ka tuig nga pag-alagad kay Jehova.

Ang mga pagpasibusibu isa ka bahin sang kabuhi. Ang iban mahapos, kag ang iban mabudlay. Apang si Jehova, ang Manughatag sing hamili nga bahandi sang kamatuoran sang Biblia, nagsakdag sa akon paagi sa iya organisasyon kag sa gugma kag pagpalig-on sang akon pamilya. Nagabatyag gihapon ako sing pagkakontento samtang malangkagon ko nga ginapaabot ang katumanan sang tanan malig-on nga mga saad ni Jehova.

[Retrato sa pahina 23]

Sang nagaalagad kami sang akon bana subong misyonero sa Italya