Report sang mga Manugbantala sang Ginharian
Si Jehova Mas Gamhanan Sangsa Iya mga Kaaway
ANG Yawa kag ang iya mga demonyo madugay na nga nagatinguha sa pag-upang sa pagbantala sing maayong balita paagi sa butig nga relihion kag espiritismo. Nagasugid ang Biblia nahanungod sa malaut nga tuyo ni Satanas sa 2 Corinto 4:4 nga nagasiling nga “ang dios sining sistema sang mga butang nagbulag sang mga painuino sang mga dimatinuuhon, agod nga indi sila makakita sang kapawa sang maayong balita sang himaya ni Cristo, nga amo ang larawan sang Dios.”
Apang si Jehova nga Dios mas gamhanan sangsa kay Satanas. Wala sing mahimo ang kaaway ni Jehova agod punggan ang katumanan sang iya balaan nga kabubut-on, nga amo nga “ang tanan nga tawo maluwas kag makadangat sa sibu nga ihibalo sang kamatuoran.” (1 Timoteo 2:4) Ang masunod nga mga report sang mga manugbantala sang Ginharian sa Australia nagapatalupangod sini.
◻ Sa tapos sang 20-anyos nga pagbiya sa relihion, ang isa ka babayi nagsugod sa pagbasa liwat sing Biblia. Ining napasag-uli nga interes sa Biblia nagpautwas sa iya sing madamo nga mga pamangkot, gani nangamuyo sia sa Dios nga buligan sia sa pagpangita sing mga sabat. Luyag gid niya masapwan ang kamatuoran, apang nahibaluan niya nga ang pagbalik sa iya anay una nga relihion indi makalubad sang iya problema. Sa baylo, nagsugod sia sa pagpanalawsaw paagi sa pagkadto sa balaligyaan sang segunda-mano nga mga libro kag namangkot kon may yara sila mga libro tuhoy sa relihion.
Ang tag-iya sang balaligyaan nakadumdom nga may yara sia libro tuhoy sa relihion, nga wala sa balaligyaaan, kundi didto sa iya puluy-an. Ang tig-ulo sadtong libro amo ang Mahimu Ka Mabuhi sing Dayon sa Paraiso sa Duta, nga ginbalhag sang mga Saksi ni Jehova. Malangkagon nga ginbasa sang babayi ang libro kag nasabat ang madamo niya nga palamangkutanon tuhoy sa Biblia. Sa tapos niya ginpangita ang mga Saksi ni Jehova sa direktoryo sang telepono, natawgan niya sila sing ulihi kag ginsugdan niya ang regular nga pagtuon sa Biblia
◻ Ang isa ka lamharon nga babayi nagsuhol sa serbisyo sang lokal nga pamantalaan sa pagpasayod sang iya ginabaligya nga anting-anting. Ang pasayod nagpatuhoy sa sini subong isa ka ‘anting-anting sang panahon sang edad media nga tuman gid ka gamhanan.’ Ang isa sang mga Saksi ni Jehova nakatalupangod sa pasayod. Gintawgan niya ang numero sang telepono nga ginhatag kag nagpakigsugilanon sia sa babayi nahanungod sa ginahalinan sang ginaangkon nga gahom sadtong anting-anting. Nagsunod ang paghambalanay tuhoy sa pagtamod sang Biblia sa hilikuton sang mga demonyo. Ang lamharon nga babayi nga may anting-anting nagsugid nga sang nagligad lang nga adlaw, nangamuyo sia sa Dios nga buligan sia sa iya problema sa mga demonyo. Ang Saksi naghimo sing kahimusan nga maghambalanay sila liwat sa telepono.
Sang nagtawag sia, wala sa puluy-an ang lamharon nga babayi. Ang iloy ang nakasabat sa telepono kag nagsiling: “Wala ako makahibalo kon ano ang imo ginhambal sa akon anak nga babayi, apang daw isa ka milagro ang natabo!” Ginsugid niya nga sa tapos sang una nga pagtawag, ginpanghaboy sang iya anak nga babayi ang tanan niya nga sataniko nga mga laragway kag mga libro kag nagsugod sa pagbasa sing Biblia.
Wala madugay sang ulihi, ginhimo ang kahimusan nga duawon sing personal ang lamharon nga babayi.Ginbaton niya gilayon ang isa ka regular nga pagtuon sa Biblia upod sa mga Saksi ni Jehova. Nagsugod man sia sa pagpakig-upod sa mga Saksi paagi sa pagtambong sa ila Cristianong mga miting. Sa liwat, ginlutos ni Jehova ang mga demonyo paagi sa pagpasilak sing sibu nga ihibalo sang kamatuoran sang Biblia.