Isa ka Dakung Kadam-an nga Nagahatag sing Balaan nga Pag-alagad

“Nagahatag sila sa iya sing balaan nga pag-alagad sa adlaw kag gab-i sa templo.”​—⁠BUGNA 7:⁠15.

1. Anong pagbag-o sa espirituwal nga paghangop ang natigayon sang 1935?

SANG Mayo 31, 1935, nalipay gid sing daku ang mga delegado sa isa ka kombension sang Mga Saksi ni Jehova sa Washington D.C. Didto sa una nga tion, maathag nga nakilal-an ang dakung kadam-an sang Bugna 7:​9 nahisanto sa iban pa nga tulun-an sang Biblia kag suno sa mga hitabo nga nahanabo na.

2. Ano ang nagapakita nga madamo ang nakahibalo nga wala sila gintawag sang Dios sa langitnon nga kabuhi?

² Mga anom ka semana antes sadto, sang ginsaulog ang Panihapon sang Ginuo sa mga kongregasyon sang mga Saksi ni Jehova, 10,681 sang mga nagtambong (mga 1 sa kada 6) ang wala makig-ambit sa tinapay kag alak nga mga emblema, kag 3,688 sa ila ang aktibo nga manugbantala sang Ginharian sang Dios. Ngaa nagdumili sila sa pag-ambit sa mga emblema? Bangod pasad sa ila natun-an sa Biblia, narealisar nila nga wala sila gintawag sang Dios sa langitnon nga kabuhi kundi nga magapakigbahin sila sa mahigugmaon nga mga aman ni Jehova sa lain nga paagi. Gani sa amo nga kombension, sang ang humalambal nangabay nga: “Mahimo bala magtindog yadtong may paglaum nga mabuhi sing dayon sa duta,” ano ang natabo? Linibo ang nagtilindog, nga ginsundan sing malawig nga paghinugyaw sang mga tumalambong.

3. Ngaa ang pagkakilala sa dakung kadam-an nakahatag sing bag-o nga kapagsik sa ministeryo sa latagon, kag ano ang ginbatyag sang mga Saksi tuhoy sini?

³ Ang natun-an sang mga delegado sa amo nga kombension nakahatag sing bag-o nga kapagsik sa ila ministeryo. Ila nahangpan nga sa karon, antes sang katapusan sang daan nga sistema, indi lamang pila ka libo kundi isa ka dakung kadam-an sang katawhan ang hatagan sing kahigayunan nga makasulod sa kahimusan ni Jehova sa pagluwas sang kabuhi, nga nagapaabot sing kabuhi nga dayon sa paraiso nga duta. Daw ano ka makapapagsik nga mensahe para sa mga mahigugmaon sang kamatuoran! Narealisar sang mga Saksi ni Jehova nga may yara dakung hilikuton nga dapat himuon​—⁠isa ka makalilipay nga hilikuton. Mga tinuig sang ulihi, si John ­Booth, nga nangin katapo sang Nagadumala nga Hubon, naghinumdom: “Yadto nga asambleya naghatag sa amon sing daku nga kalipay.”

4. (a) Daw ano kasangkad ang aktuwal nga pagpanipon sa dakung kadam-an kutob sang 1935? (b) Sa anong paagi ang dakung kadam-an nagahatag sing pamatuod nga buhi ang ila pagtuo?

⁴ Sang masunod nga mga tinuig, ang kadamuon sang mga Saksi ni Jehova nag-uswag sing daku. Walay sapayan sang masunson masingki nga paghingabot nga ila gin-antos sadtong Inaway Kalibutanon II, ang ila kadamuon nagdugang sing halos tatlo ka pilo sa sulod sang isa ka dekada. Kag ang 56,153 ka manugbantala nga nagapanaksi sadtong 1935 nag-uswag sang 1994, tubtob sa kapin sa 4,900,000 ka manugbantala sang Ginharian sa kapin sa 230 ka kadutaan. Ang kalabanan sa ila malangkagon nga nagapaabot nga malakip sa sadtong pagahatagan ni Jehova sing himpit nga kabuhi sa paraiso nga duta. Kon ipaanggid sa diutay nga panong, nangin isa matuod sila ka dakung kadam-an. Indi sila ang sahi sang mga tawo nga nagasiling nga may pagtuo apang wala nagabuhat sini. (Santiago 1:​22; 2:​14-17) Sila tanan nagapaambit sa iban sing maayong balita tuhoy sa Ginharian sang Dios. Isa ka bala sa sinang malipayon nga kadam-an? Ang mangin isa ka aktibo nga Saksi isa ka importante nga tanda, apang labi pa ang nadalahig.

“Nagatindog sa Atubangan sang Trono”

5. Ano ang ginapakita sang katunayan nga ang dakung kadam-an “nagatindog sa atubangan sang trono”?

⁵ Sa palanan-awon nga ginhatag kay apostol Juan, nakita niya sila nga “nagatindog sa atubangan sang trono kag sang Kordero.” (Bugna 7:9) Ang ila pagtindog sa atubangan sang trono sang Dios, subong sang ginalaragway sa sini nga konteksto, nagapakita nga ginakilala nila sing bug-os ang pagkasoberano ni Jehova. Madamo ang nalakip sa sini. Halimbawa: (1) Ginakilala nila ang kinamatarong ni Jehova sa pagpamat-od para sa iya mga alagad kon ano ang maayo ukon malain. (Genesis 2:​16, 17; Isaias 5:​20, 21) (2) Ginapamatian nila si Jehova samtang nagahambal sia sa ila paagi sa iya Pulong. (Deuteronomio 6:​1-3; 2 Pedro 1:​19-21) (3) Ginaapresyar nila ang importansia sang pagpasakop sa mga gintugyanan ni Jehova sa pagdumala. (1 Corinto 11:​3; Efeso 5:​22, 23; 6:​1-3; Hebreo 13:17) (4) Walay sapayan nga dihimpit, ginatinguhaan nila sing hanuot nga sundon ang teokratiko nga panuytoy, nga indi sa paganot, kundi sing kinabubut-on, sing tinagipusuon. (Hulubaton 3:​1; Santiago 3:​17, 18) Yara sila sa atubangan sang trono sa paghatag sing balaan nga pag-alagad kay Jehova, nga ginatahod nila sing daku kag ginahigugma sing tudok. Sa bahin sining dakung kadam-an, ang “pagtindog” nila sa atubangan sang trono nagapakita nga ang Isa nga nagalingkod sa trono nahamuot sa ila. (Ipaanggid ang Bugna 6:​16, 17.) Nahamuot pasad sa ano?

“Napanaptan sing Malaba nga Panapton nga Maputi”

6. (a) Ano ang buot silingon nga ang dakung kadam-an “napanaptan sing malaba nga panapton nga maputi”? (b) Paano ang dakung kadam-an nakatigayon sing matarong nga tindog sa atubangan ni Jehova? (c) Tubtob sa anong kasangkaron nga ang pagtuo sa ginpatulo nga dugo ni Cristo nakaimpluwensia sa kabuhi sang dakung kadam-an?

⁶ Ginasiling sang paglaragway ni apostol Juan nga iya nakit-an ang mga katapo sining dakung kadam-an nga “napanaptan sing malaba nga panapton nga maputi.” Inang malaba nga panapton nga maputi nagasimbulo sa ila matinlo, matarong nga tindog sa atubangan ni Jehova. Paano nila natigayon ang amo nga tindog? Nakit-an naton nga sa palanan-awon ni Juan nagatindog sila sa “atubangan sang Kordero.” Ginakilala nila si Jesucristo subong “ang Kordero sang Dios nga nagakuha sang sala sang kalibutan.” (Juan 1:29) Nabatian ni Juan ang isa sang mga tigulang, nga sa palanan-awon, didto sa trono sang Dios nga nagapaathag: “Ginlabhan nila ang ila mga panapton nga malaba kag ginapaputi ini sa dugo sang Kordero. Amo kon ngaa yara sila sa atubangan sang trono sang Dios.” (Bugna 7:​14, 15) Sing malaragwayon, ginlabhan nila ang ila mga panapton paagi sa pagtuo sa nagatubos nga dugo ni Cristo. Wala lamang sila nagaugyon sa panudlo sang Biblia tuhoy sa gawad. Ang pag-apresyar sa sini nagaapektar sang ila nasulod nga pagkatawo; sa amo, nagatuo sila sing “tinagipusuon.” (Roma 10:​9, 10) May daku nga epekto ini sa kon ano ang ila ginahimo sa ila kabuhi. Sa pagtuo, ginadedikar nila ang ila kaugalingon kay Jehova pasad sa halad ni Cristo, ginasimbuluhan ina nga pagdedikar paagi sa pagpatugmaw sa tubig, nagakabuhi sing tunay nahisuno sa ila dedikasyon, kag busa nagatigayon sing nahamut-an nga kaangtanan sa Dios. Daw ano kaayo nga pribilehiyo​—⁠isa nga dapat bantayan sing mahalungon!​—⁠2 Corinto 5:​14, 15.

7, 8. Paano ang organisasyon ni Jehova nakabulig sa dakung kadam-an nga mahuptan nga matinlo ang ila mga panapton?

⁷ Upod ang mahigugmaon nga pag-ulikid sa ila dayon nga kaayuhan, sulit-sulit nga ginapatalupangod sang organisasyon ni Jehova ang mga panimuot kag batasan nga makamusing, ukon makadagta, sa nagapakilala nga panapton nga, walay sapayan sang mga pagpangangkon sa guwa, ang isa ka tawo wala gid nagahisanto sa matagnaon nga paglaragway sang Bugna 7:​9, 10. (1 Pedro 1:​15, 16) Sa pagsakdag sa una nga ginbalhag, sulit-sulit nga ginpakita sang The Watchtower, sang 1941 kag pagkatapos, nga indi gid nagakaigo ang magbantala sa iban kag pagkatapos, kon wala na sa ministeryo, nagahimo sing mga buhat subong sang panghilawas ukon panghilahi. (1 Tesalonica 4:​3; Hebreo 13:4) Sang 1947 ginpadaku nga ang mga talaksan ni Jehova sa pag-asawahay sang mga Cristiano naaplikar sa tanan nga pungsod; walay sapayan kon ano ang ginakahamut-an sang lokal nga kinabatasan, ang nagapadayon nga nagahimo sing poligamya [pagtigayon sing kapin sa isa ka tiayon] indi mahimo mangin mga Saksi ni Jehova.​—⁠Mateo 19:​4-6; Tito 1:​5, 6.

⁸ Sang 1973, ginpakita sa mga Saksi ni Jehova sa bug-os nga kalibutan nga dapat sila maglihi sing bug-os sa makapahigko nga mga buhat, subong sang pag-abuso sa tabako, sa bisan diin man nga duog​—⁠indi lamang sa Kingdom Hall ukon kon nagaalagad sa latagon kundi subong man sa sekular nga trabaho ukon sa mga duog nga malayo sa publiko. (2 Corinto 7:1) Sang 1987 sa distrito nga mga kombension sang mga Saksi ni Jehova, ang Cristianong mga pamatan-on mabaskog nga ginlaygayan nga agod mahuptan nila ang isa ka matinlo nga tindog sa atubangan sang Dios, dapat sila magbantay batok sa doble-kara nga pagkabuhi. (Salmo 26:​1, 4) Sa liwat kag liwat, ang The Watchtower nagpaandam batok sa nanuhaytuhay nga bahin sang espiritu sang kalibutan bangod “ang putli nga pagsimba kag walay dagta sa atubang sang aton Dios kag Amay” nagalakip sing paghupot sa kaugalingon nga “walay dagta sang kalibutan.”​—⁠Santiago 1:⁠27.

9. Sin-o ang aktuwal nga magatindog nga nahamut-an sa atubangan sang trono sang Dios pagkatapos sang dakung kapipit-an?

⁹ Yadtong ginapahulag sang ila pagtuo nga magkabuhi sa paagi nga nakapabilin sila nga matinlo sa espirituwal kag sa moral ang padayon nga “makatindog sa atubangan sang trono” subong nahamut-an nga mga alagad sang Dios sa tapos sang dakung kapipit-an. Amo ini ang mga tawo nga wala lamang magsugod sa Cristianong pagkabuhi kundi matutom nga nagapadayon sa sini.​—⁠Efeso 4:⁠24.

“Mga Paklang sang Palma sa Ila mga Kamot”

10. Ano ang kahulugan sang mga paklang sang palma nga nakita ni Juan sa kamot sang dakung kadam-an?

¹⁰ Isa sa talalupangdon nga mga bagay sa dakung kadam-an, subong sang nakita ni apostol Juan, amo nga “may mga paklang sang palma sa ila mga kamot.” Ano ang kahulugan sini? Walay duhaduha nga ginpahanumdom sadtong mga paklang sang palma kay Juan ang Judiyong kapiestahan sang mga kayangkayang, ang pinakamalipayon nga kapiestahan sa Hebreong kalendaryo, nga ginahiwat pagkatapos sang ani sa tig-ilinit. Nahisanto sa Kasuguan, ang mga paklang sang palma, upod sa mga sanga sang iban nga mga kahoy, ginagamit sa paghimo sing mga kayangkayang nga amo ang ginapuy-an sa tion sang kapiestahan. (Levitico 23:​39-40; Nehemias 8:​14-18) Ginawagayway man ini sang mga sumilimba sa templo sa tion sang pag-amba sang Hallel (Salmo 113-118). Ang pagwagayway sang mga paklang sang palma sang dakung kadam-an pat-od nga nagpahanumdom man kay Juan sa okasyon sang nagsulod si Jesus sa Jerusalem samtang ang dakung kadam-an sang mga sumilimba malipayon nga nagwagayway sang mga paklang sang palma kag nagsinggit: “Pagdayawon ang nagakari sa ngalan ni Jehova, ang hari sang Israel!” (Juan 12:​12, 13) Gani ginapakita sang pagwagayway sang mga paklang sing palma ang malipayon nga pag-abiabi sang dakung kadam-an sa Ginharian ni Jehova kag sa iya hinaplas nga Hari.

11. Ngaa ang mga alagad sang Dios nakasapo gid sing kalipay sa pag-alagad kay Jehova?

¹¹ Amo ini ang malipayon nga espiritu nga ginapakita bisan sa karon sang dakung kadam-an samtang nagaalagad sila kay Jehova. Wala ini nagakahulugan nga wala sila sing ginaatubang nga mga kabudlayan ukon nagaeksperiensia sing kasubo ukon kasakit. Apang ang kaayawan nga resulta sang pag-alagad kag pagpahamuot kay Jehova nagabulig nga mapahaganhagan ining mga butang. Busa, ang isa ka misyonera nga nag-alagad upod sa iya bana sa 45 ka tuig sa Gua­te­ma­la nagasugid tuhoy sa mabudlay nga mga kahimtangan nga ila naagihan, ang lakas nga pagpangabudlay kag makatalagam nga pagbiyahe nga nangin bahin sang ila kabuhi samtang gintinguhaan nila nga mapaambitan ang mga minuro sang mga Indian sing mensahe sang Ginharian. Sia naghinakop: “Amo yadto ang pinakamalipayon nga tion sa amon kabuhi.” Walay sapayan nga ginaatubang niya ang mga epekto sang katigulangon kag balatian, ang isa sang ulihi nga mga butang nga nasulat sa iya dia­ry amo ang mga tinaga: “Isa yadto ka maayo nga pagkabuhi, tuman ka makapaladya.” Amo man sina ang nabatyagan sang mga Saksi ni Jehova sa bug-os nga kalibutan tuhoy sa ila ministeryo.

“Balaan nga Pag-alagad sa Adlaw kag Gab-i”

12. Sa adlaw man ukon sa gab-i, ano ang nakita ni Jehova diri sa duta?

¹² Ining malipayon nga mga sumilimba nagahatag kay Jehova sing “balaan nga pag-alagad sa adlaw kag gab-i sa iya templo.” (Bugna 7:15) Sa bug-os nga globo, minilyon ang nagapakigbahin sa sining balaan nga pag-alagad. Kon kagab-ihon sa iban nga mga pungsod kag ang mga tawo nagakatulog didto, sa iban naman nga mga pungsod nagabutlak ang adlaw kag ang mga Saksi ni Jehova masako sa pagpanaksi. Samtang nagatiyog ang kalibutan, sing dalayon, adlaw kag gab-i, nagaamba sila sing mga pagdayaw kay Jehova. (Salmo 86:9) Apang ang adlaw-gab-i nga pag-alagad nga ginapatuhuyan sa Bugna 7:​15 labi pa ka personal.

13. Ano ang ginapakita sang Kasulatan tuhoy sa kahulugan sang pag-alagad sa “adlaw kag gab-i”?

¹³ Ang mga indibiduwal nga nagahuman sang dakung kadam-an nagahatag sing balaan nga pag-alagad sa adlaw kag gab-i. Nagakahulugan bala ini nga ang tanan nila nga ginahimo ginakabig subong balaan nga pag-alagad? Matuod bisan ano man ang ila ginahimo, natun-an nila ini nga himuon sa paagi nga nagapadungog kay Jehova. (1 Corinto 10:​31; Colosas 3:23) Apang, ang “balaan nga pag-alagad” naaplikar lamang sa talangkod nga nagadalahig sa pagsimba sang isa sa Dios. Ang pagpanghikot sa “adlaw kag gab-i” nagapahangop sing pagkaregular ukon sing pagkamapinadayunon subong man sing hanuot nga panikasog.​—⁠Ipaanggid ang Josue 1:​8; Lucas 2:​37; Binuhatan 20:​31; 2 Tesalonica 3:⁠8.

14. Ano ang magahimo sa aton personal nga pag-alagad sa latagon nga magahisanto sa paglaragway sang “adlaw kag gab-i” nga pag-alagad?

¹⁴ Samtang nagaalagad sila sa dutan-on nga luwang sang dakung espirituwal nga templo ni Jehova, yadtong nagahuman sang dakung kadam-an nagapanikasog nga makapakigbahin sing tayuyon kag sing mapinadayunon sa ministeryo sa latagon. Madamo ang nagpahamtang sing tulumuron nga makapakigbahin sa ministeryo sa latagon kada semana. Ang iban nagapanikasog nga makaalagad subong regular ukon auxiliary nga mga payunir. Masami sila nga masako sa pagpanaksi sa mga dalanon kag sa mga balaligyaan sing aga pa. Sa pagtatap sa mga interesado, ang iban nga mga Saksi nagadumala sing mga pagtuon sa Biblia sing gab-i na. Nagapanaksi sila kon nagapamalaklon, kon nagabiyahe, sa tion sang tigpalanyaga, kag paagi sa mga telepono.

15. Luwas sa ministeryo sa latagon, ano ang nalakip sa aton balaan nga pag-alagad?

¹⁵ Ang pagpakigbahin sa mga miting sa kongregasyon bahin man sang balaan nga pag­alagad; subong man ang hilikuton sa pagtukod kag pag-atipan sa mga duog sang Cristianong asambleya. Lakip sa sini ang panikasog nga palig-unon kag buligan ang Cristianong mga kauturan nga lalaki kag babayi, sa espirituwal kag materyal, agod makapabilin sila nga mapagsik sa pag-alagad kay Jehova. Nagalakip ini sang hilikuton sang aton Hospital Liai­son Com­mit­tee. Ang pag-alagad sa Bethel sa tanan nanuhaytuhay nga porma sini, subong man ang boluntaryo nga pag-alagad sa aton mga kombension, tanan balaan nga pag-alagad. Sa pagkamatuod, kon ang aton kabuhi nasentro sa aton kaangtanan kay Jehova, napun-an ini sing balaan nga pag-alagad. Subong sang ginasiling sang kasulatan, ang katawhan ni Jehova “nagahatag sing balaan nga pag-alagad sa adlaw kag gab-i,” kag nakasapo sila sing daku nga kalipay sa paghimo sini.​—⁠Binuhatan 20:​35; 1 Timoteo 1:⁠11.

‘Gikan sa Tanan nga Pungsod, mga Tribo, Katawhan, kag Hambal’

16. Daw ano ka matuod nga ang dakung kadam-an “naggikan sa tanan nga pungsod”?

¹⁶ Ang dakung kadam-an nagikan sa tanan nga pungsod. Ang Dios walay pinilian, kag ang gawad nga aman paagi kay Jesus bastante na sa paghatag sang kaayuhan nila tanan. Sadtong una nga nakilala sing Makasulatanhon ang dakung kadam-an sang 1935, ang mga Saksi ni Jehova aktibo sa 115 ka kadutaan. Sang katuigan 1990, ang pagpangita sa mga tulad karnero naglab-ot sa kapin sa duha ka pilo nga kadamuon sang mga kadutaan.​—⁠Marcos 13:⁠10.

17. Ano ang ginhimo sa pagbulig sa katawhan sang tanan nga ‘tribo, katawhan, kag hambal’ nga malakip sa dakung kadam-an?

¹⁷ Sa pagpangita sa mga katapo sang dakung kadam-an, gintalupangod sang mga Saksi ni Jehova indi lamang ang pungsudnon nga mga grupo kundi subong man ang mga tribo kag katawhan kag minoriya nga grupo sang mga tawo sa sulod sing amo nga mga pungsod. Agod malab-ot ini nga mga tawo, ang mga Saksi nagbalhag sing kapin sa 300 ka hambal nga mga literatura sa Biblia. Nagalakip ini sing paghanas kag pagsakdag sa mga grupo sang kalipikado nga mga manugbadbad, sing pag-aman sing kompyuter nga magamit sa pagproseso sining mga hambal, kag subong man sing aktuwal nga pag-imprinta. Sa sulod lamang sang nagligad nga lima ka tuig, 36 ka hambal, nga ginapamulong sang mga 98,000,000 ka tawo, ang gindugang sa mga hambal nga ginabadbad. Dugang pa, ginatinguhaan sang mga Saksi nga duawon sing personal ini nga mga tawo agod buligan sila nga mahangpan ang Pulong sang Dios.​—⁠Mateo 28:​19, 20.

“Pagguwa sa Dakung Kapipit-an”

18. (a) Sa pag-abot sang dakung kapipit-an, sin-o ang pagaamligan? (b) Ano nian ang malipayon nga pahayag nga pagahimuon?

¹⁸ Kon buhian sang mga anghel ang mga hangin sang kalaglagan nga ginpatuhuyan sa Bugna 7:​1, indi lamang ang hinaplas nga “mga ulipon sang aton Dios” ang makaeksperiensia sing mahigugmaon nga pag-amlig ni Jehova kundi pati man ang dakung kadam-an nga nagbuylog sa ila sa matuod nga pagsimba. Subong sang ginsiling kay apostol Juan, ang dakung kadam-an amo ang ‘magaguwa sa dakung kapipit-an’ subong mga nakalampuwas. Daw ano nga singgit sang pagpasalamat kag pagdayaw ang ila nian igahatag samtang nagasiling sila: “Ang kaluwasan utang namon sa aton Dios, nga nagalingkod sa trono, kag sa Kordero”! Kag ang tanan nga matutom nga alagad sang Dios sa langit magabuylog sa pagsiling: “Amen! Ang pagpakamaayo kag himaya kag kaalam kag pagpasalamat kag dungog kag gahom kag kusog iya sang aton Dios tubtob sa walay katubtuban. Amen.”​—⁠Bugna 7:​10-14.

19. Sa anong makalilipay nga hilikuton may kapagsik nga makapakigbahin ang mga makalampuwas?

¹⁹ Daw mangin ano ka malipayon nga tion ina! Ang tanan nga nagakabuhi mangin mga alagad sang lamang matuod nga Dios! Ang pinakadaku nga kalipay sa sining tanan mangin amo ang pag-alagad kay Jehova. Madamo sing hilikuton nga pagahimuon.​—⁠makalilipay nga hilikuton! Ang duta himuon nga isa ka Paraiso. Minilyon ka mga patay ang pagabanhawon kag pagatudluan sa mga dalanon ni Jehova. Daw ano ka makalilipay nga pribilehiyo ang makigbahin sa sini!

Ano ang Komento Mo?

◻ Ano ang epekto sang mga hitabo sang 1935 sa pagministeryo sa latagon sang mga Saksi ni Jehova?

◻ Ano ang ginapakita sang katunayan nga ang dakung kadam-an nakit-an nga “nagatindog sa atubangan sang trono”?

◻ Paano ang pag-apresyar sa dugo sang Kordero nagaapektar sang aton pagkabuhi?

◻ Ano ang ginapahangop sang pagwagayway nila sang mga paklang sang palma?

◻ Paano ang dakung kadam-an nagahimo sing balaan nga pag-alagad sa adlaw kag gab-i?

[Mga retrato sa pahina 16, 17]

Ang ila balaan nga pag-alagad nagapabanaag sing pagkatayuyon, kapisan, kag hanuot nga panikasog