“Dili Mahadlok, Diutay nga Panong”

“Dili mahadlok, diutay nga panong, kay nahamut-an sang inyo Amay ang paghatag sa inyo sang ginharian.”​—⁠LUCAS 12:⁠32.

1. Ano ang sadsaran para sa mga pinamulong ni Jesus: “Dili mahadlok, diutay nga panong”?

“PANGITAA sing padayon ang ginharian [sang Dios].” (Lucas 12:31) Sang ginsiling ni Jesus ining mga pulong sa iya mga disipulo, ginpabutyag niya ang prinsipio nga nagtuytoy sa panghunahuna sang mga Cristiano sugod sang iya adlaw tubtob sa aton. Ang Ginharian sang Dios dapat gid nga unahon sa aton kabuhi. (Mateo 6:33) Apang, sa kasaysayan ni Lucas, si Jesus nagpadayon sa paghambal sing mapinalanggaon kag sing nagapasalig nga mga pulong sa isa ka pinasahi nga grupo sang mga Cristiano. Sia nagsiling: “Dili mahadlok, diutay nga panong, kay nahamut-an sang inyo Amay ang paghatag sa inyo sang ginharian.” (Lucas 12:32) Subong ang Maayo nga Manugbantay, nahibal-an ni Jesus nga may mabudlay nga mga tion nga nagahulat sa iya suod nga mga disipulo. Apang wala sila sing rason nga magkahadlok kon padayon nila nga ginapangita ang Ginharian sang Dios. Gani, ang laygay ni Jesus indi isa ka matigdas nga sugo. Sa baylo, isa ini ka mahigugmaon nga saad nga nagapukaw sing pagsalig kag kaisog.

2. Sin-o ang nagahuman sa diutay nga panong, kag ngaa may pinasahi sila nga priblehiyo?

² Si Jesus nakighambal sa iya mga disipulo, kag gintawag niya sila nga “diutay nga panong.” Nakighambal man sia sa ila nga ‘pagahatagan [ni Jehova] sang ginharian.’ Kon ipaanggid sa dakung mga kadam-an nga magabaton kay Jesus sa ulihi nga mga tion, ini nga grupo sa pagkamatuod diutay sa kadamuon. Ginkabig man sila nga hamili bangod ginpili sila para sa isa ka tumalagsahon nga palaabuton, nga pagagamiton sa harianon nga pag-alagad. Ginatawag sang ila Amay, ang Dakung Manugbantay, nga si Jehova, ang diutay nga panong agod makabaton sila sing langitnon nga panublion may ­kaangtanan sa Mesianikong Ginharian ni Cris⁠to.

Ang Diutay nga Panong

3. Anong mahimayaon nga palanan-awon tuhoy sa diutay nga panong ang nakita ni Juan?

³ Sin-o, nian, ang nagahuman sa sining diutay nga panong nga may tumalagsahon nga paglaum? Ang mga sumulunod ni Jesucristo nga nakabaton sing paghaplas sang balaan nga espiritu. (Binuhatan 2:​1-4) Nakita sila subong langitnon nga mga manug-amba nga may mga arpa sa ila mga kamot, si apostol Juan nagsulat: “Nakita ko, kag, yari karon! ang Kordero nagatindog sa Bukid nga Sion, kag kaupod niya ang isa ka gatos kag kap-atan kag apat ka libo nga may ila sang iya ngalan kag sang ngalan sang iya Amay nga nasulat sa ila mga agtang. Ini sila amo ang wala magdagta sang ila kaugalingon sa mga babayi; sa katunayan, mga ulay sila. Sila amo ang padayon nga nagasunod sa Kordero bisan diin sia nagakadto. Sila amo ang ginbakal gikan sa mga tawo subong nahaunang mga bunga sa Dios kag sa Kordero, kag walay butig nga nasapwan sa ila baba; sila walay dagta.”​—⁠Bugna 14:​1, 4, 5.

4. Ano ang katungdanan karon sang diutay nga panong sa duta?

⁴ Kutob sang Pentecostes 33 C.E., ining mga hinaplas kag gin-anak sang espiritu nag-alagad subong mga embahador ni Cristo sa duta. (2 Corinto 5:20) Karon, nagkalabilin na lamang sa ila ang nabilin, nagaalagad sing tingob subong ang matutom kag mainandamon nga ulipon nga klase. (Mateo 24:45; Bugna 12:17) Kutob sang 1935 ilabi na, ginbuylugan sila sang “iban nga mga karnero,” ang mga Cristiano nga may dutan-on nga paglaum, nga nagadamo karon sing minilyon. Nagabulig sila sa pagbantala sang maayong balita sa bug-os nga duta.​—⁠Juan 10:⁠16.

5. Ano ang panimuot sang nagkalabilin sang diutay nga panong, kag ngaa indi sila dapat mahadlok?

⁵ Ano ang panimuot sang mga nagkalabilin sining diutay nga panong nga yari pa sa duta? Bangod nakahibalo sila nga magabaton sila sing ‘Ginharian nga indi matay-ug,’ ginahimo nila ang ila balaan nga pag-alagad nga may diosnon nga kahadlok kag pagtahod. (Hebreo 12:28) Mapainubuson nila nga ginakilala nga may yara sila daku gid nga pribilehiyo nga nagaresulta sa walay latid nga kalipay. Nakita nila ang “isa ka mutya nga bilidhon” nga ginpatuhuyan ni Jesus sang nagpamulong sia nahanungod sa Ginharian. (Mateo 13:46) Samtang nagahilapit ang dakung kapipit-an, ang mga hinaplas sang Dios nagapabilin nga walay kahadlok. Walay sapayan sang kon ano ang mahanabo sa kalibutan sang katawhan sa “daku kag mahimayaon nga adlaw ni Jehova,” wala sila sing makasiligni nga pagkahadlok sa palaabuton. (Binuhatan 2:19-21) Ngaa?

Ang Kadamuon Nagadiutay

6, 7. (a) Ngaa ang kadamuon sang diutay nga panong nga yari pa sa duta diutay lamang? (b) Paano dapat tamdon sang tagsa ka indibiduwal ang paglaum nga ginalauman niya?

⁶ Sining ulihi nga tinuig ang kadamuon sang diutay nga panong nga yari pa sa duta nagadiutay. Makita ini gikan sa report sang Memoryal sang 1994. Sa mga 75,000 ka kongregasyon sang katawhan ni Jehova sa bug-os nga kalibutan, 8,617 lamang ang nagpakita paagi sa pagpakigbahin sa mga emblema sang ila pagpangangkon nga katapo sang nagkalabilin. (Mateo 26:​26-30) Sa kabaliskaran, ang kabilugan nga nagtambong 12,288,917. Nahibaluan sang hinaplas nga mga Cristiano nga dapat gid ini paabuton. Si Jehova naghatag sing limitado nga kadamuon, ang 144,000, agod magahuman sa diutay nga panong, kag gintipon niya ini sugod sang Pentecostes 33 C.E. Sing makatarunganon, ang pagtawag sa diutay nga panong magahingapos kon ang kadamuon halos makompleto na, kag ang pamatuod amo nga ang kabilugan nga pagtipon sa sining mga ginpakamaayo sing pinasahi natapos sang 1935. Apang, ang iban nga mga karnero sa tion sang katapusan gintagna nga magadamo nga mangin “dakung kadam-an, nga walay tawo nga makaisip, gikan sa tanan nga pungsod kag kabikahan kag katawhan kag hambal.” Sugod sang 1935 ang kabilugan nga pagtipon ni Jehova amo ang para sa sining dakung kadam-an, nga ang ila paglaum amo ang kabuhi nga walay katapusan sa paraiso nga duta.​—⁠Bugna 7:9; 14:​15, 16; Salmo 37:⁠29.

⁷ Ang kalabanan sang diutay nga panong nga yari pa sa duta nagaedad na karon sing mga 70, 80, kag 90. Ang pila nakalampas na sa ila ika-100 nga tuig sang pagkabuhi. Sila tanan, ano man ang ila edad, nakahibalo nga paagi sa langitnon nga pagkabanhaw, mahiusa sila kay Jesucristo kag magagahom kaupod niya sa iya mahimayaon nga Ginharian. Ang dakung kadam-an mangin dutan-on nga mga sakop ni Cristo nga Hari. Tuguti ang kada isa sa pagkalipay sa kon ano ang ginatigana ni Jehova para sa mga nagahigugma sa iya. Indi para sa aton ang magpili kon anong paglaum ang paabuton. Si Jehova ang magapamat-od sini. Ang duha ka grupo mahimo magkalipay sa ila paglaum para sa malipayon nga palaabuton, sa langitnon nga Ginharian man ini ukon sa paraiso nga duta sa idalom sina nga Ginharian.​—⁠Juan 6:​44, 65; Efeso 1:​17, 18.

8. Tubtob san-o ang pagpat-in sa 144,000, kag ano ang mahanabo kon makompleto na ini?

⁸ Ang 144,000 nga diutay nga panong amo ang “Israel sang Dios,” nga nagbulos sa kinaugali nga Israel sa mga katuyuan sang Dios. (Galacia 6:16) Busa, ang nagkalabilin nagahuman sa nabilin nga bahin sinang espirituwal nga pungsod nga yari pa sa duta. Inang nagkalabilin ginapat-inan para sa katapusan nga kahamuot ni Jehova. Sa palanan-awon, nakita ni apostol Juan ini nga hitabo, kag sia nagreport: “Nakita ko nga nagakayab ang isa naman ka anghel gikan sa sidlangan, nga nagadala sang pat-in sang Dios nga buhi; kag nagsinggit sia sa mabaskog nga tingog sa apat ka anghel nga sa ila ginhatag ang gahom sa pagsamad sa duta kag dagat, nga nagasiling: ‘Dili ninyo pagsamara ang duta ukon ang dagat ukon ang kakahuyan, tubtob nga mapat-inan namon ang mga ulipon sang aton Dios sa ila mga agtang.’ Kag nabatian ko ang kadamuon sang mga napat-inan, isa ka gatos kag kap-atan kag apat ka libo, nga ginpamat-inan gikan sa tagsa ka kabikahan sang mga anak sang [espirituwal] nga Israel.” (Bugna 7:​2-4) Sanglit ining hilikuton sa pagpat-in sa espirituwal nga Israel maathag nga malapit na matapos, ang makakulunyag nga mga hitabo nga mahanabo sa dili madugay ginapatimaan. Isa pa, “ang dakung kapipit-an,” kon san-o ang apat ka hangin sang kalaglagan pagabuy-an sa duta, mahimo nga malapit na katama.​—⁠Bugna 7:⁠14.

9. Ano ang pagtamod sang diutay nga panong sa nagadugang nga kadamuon sang dakung kadam-an?

⁹ Ang natipon na nga dakung kadam-an nagadamo sing minilyon. Nagapahalipay gid ini sing daku sang tagipusuon sang nagkalabilin! Bisan pa nga ang kadamuon sang diutay nga panong nga yari pa sa duta padayon nga nagadiutay, ginhanas kag ginhanda nila ang kalipikado nga mga lalaki sang dakung kadam-an sa pag-uyat sing mga responsabilidad may kaangtanan sa nagasangkad nga organisasyon sang Dios sa duta. (Isaias 61:⁠5) Subong sang ginpakita ni Jesus, may mga makalampuwas sa dakung kapipit-an.​—⁠Mateo 24:⁠22.

“Dili Mahadlok”

10. (a) Anong pagsalakay ang pagahimuon sa katawhan sang Dios, kag sa ano ini magadul-ong? (b) Anong mga pamangkot ang ginapakiana sa tagsatagsa sa aton?

¹⁰ Si Satanas kag ang iya mga demonyo ginpaubos sa palibot sang duta. Sia kag ang iya kabon ginamaniobra sa paghimo sang ila bug-os nga pagsalakay sa katawhan ni Jehova. Ini nga pagsalakay, nga gintagna sa Biblia, ginalaragway subong pagsalakay ni Gog sang Magog. Kay sin-o ilabi na ginasentro sang Yawa ang iya pagsalakay? Indi bala sa katapusan nga mga katapo sang diutay nga panong, ang espirituwal nga Israel sang Dios, nga nagapuyo sing mahidaiton “sa tunga sang duta”? (Ezequiel 38:​1-12) Huo, apang ang nagkalabilin sang matutom nga hinaplas nga klase, lakip ang ila matutom nga mga kaupdanan, ang iban nga mga karnero, magasaksi kon paano ang pagsalakay ni Satanas magapahanabo sang dramatiko nga pagpanghikot ni Jehova nga Dios. Magapasilabot sia sa pagpangapin sa iya katawhan, kag pagatunaan ini sang pagsugod sang “daku kag makakulugmat nga adlaw ni Jehova.” (Joel 2:31) Karon, ang matutom kag mainandamon nga ulipon nagahimo sang isa ka importante, nagaluwas-kabuhi nga pag-alagad, nagapaandam nahanungod sining nagapakari nga pagpasilabot ni Jehova. (Malaquias 4:5; 1 Timoteo 4:16) Ginasupurtahan mo bala sing aktibo ina nga pag-alagad, nagapakigbahin sa pagbantala sang maayong balita sang Ginharian ni Jehova? Magapadayon ka bala sa paghimo sini subong isa ka walay kahadlok nga manugbantala sang Ginharian?

11. Ngaa ang maisugon nga panimuot kinahanglanon karon?

¹¹ Bangod sang kahimtangan karon sa kalibutan, sibu gid sa tion nga pamatian sang diutay nga panong ang mga pinamulong nga ginpatuhoy ni Jesus sa ila: “Dili mahadlok, diutay nga panong”! Inang maisugon nga panimuot kinahanglanon bangod sang tanan nga nagakahanabo karon suno sa katuyuan sang Dios. Sing indibiduwal, nahibaluan sang kada isa sang diutay nga panong ang kinahanglanon nga magbatas tubtob sa katapusan. (Lucas 21:19) Kon paano nga si Jesucristo, ang Ginuo kag Agalon sang diutay nga panong, nagbatas kag napamatud-an nga matutom tubtob natapos niya ang iya dutan-on nga kabuhi, ang kada isa man sang nagkalabilin dapat magbatas kag mapamatud-an nga matutom.​—⁠Hebreo 12:​1, 2.

12. Paano si Pablo, kaangay ni Jesus, naglaygay sa hinaplas nga mga Cristiano nga indi mahadlok?

¹² Ang tanan nga mga hinaplas dapat nga may panimuot kaangay ni apostol Pablo. Talupangda kon paano ang iya pinamulong subong isa ka hinaplas nga dayag nga manugbantala sang pagkabanhaw nagahisanto sa laygay ni Jesus nga indi mahadlok. Si Pablo nagsulat: “Panumduma nga si Jesucristo ginbanhaw gikan sa minatay kag naghalin sa binhi ni David, suno sa maayong balita nga ginwali ko; nga may kaangtanan sini nagaantos ako sing malain tubtob sa punto sang mga gapos sang bilangguan nga kaangay sang isa nga nagahimo sing malain. Apang, ang pulong sang Dios wala magapos. Bangod sini padayon ko nga ginaantos ang tanan nga butang tungod sa mga pinili, agod matigayon man nila ang kaluwasan nga nahiusa kay Cristo Jesus upod ang walay katapusan nga himaya. Matuod ang pinamulong: Pat-od gid nga kon napatay kita nga magkaupod, magakabuhi man kita nga magkaupod; kon padayon kita nga mag-antos, magagahom man kita nga magkaupod subong mga hari; kon kita magapanghiwala, ipanghiwala man niya kita; kon kita dimatutom, magapabilin sia nga matutom, kay indi niya mapanghiwala ang iya kaugalingon.”​—⁠2 Timoteo 2:​8-13.

13. Anong malig-on nga mga pagtuo ang ginahuptan sang diutay nga panong, kag ano ang ginapahulag sini sa ila nga himuon?

¹³ Kaangay ni apostol Pablo, ang nagkalabilin nga mga katapo sang hinaplas nga diutay nga panong handa magbatas sing kasakit samtang ginabantala nila ang gamhanan nga mensahe nga nasulat sa Pulong sang Dios. Ang ila malig-on nga mga pagtuo nagapanggamot sing madalom samtang padayon sila nga nagasalig sa diosnon nga mga saad sang kaluwasan kag sang pagtigayon nila sing “purongpurong sang kabuhi” kon mapamatud-an sila nga matutom tubtob kamatayon. (Bugna 2:10) Paagi sa pag-agom sang hinali nga pagkabanhaw kag pagbalhin, magahiusa sila kay Cristo, agod maggahom kaupod niya subong mga hari. Daw ano nga kadalag-an para sa ila nagahupot sing integridad nga dalanon subong mga mandadaug sang kalibutan!​—⁠1 Juan 5:​3, 4.

Isa ka Pinasahi nga Paglaum

14, 15. Paano ang paglaum nga pagkabanhaw sang diutay nga panong pinasahi?

¹⁴ Ang paglaum nga pagkabanhaw nga ginalauman sang diutay nga panong pinasahi. Sa anong mga paagi? Una, nagauna ini sa kabilugan nga pagkabanhaw sang “mga matarong kag mga dimatarong.” (Binuhatan 24:15) Sa pagkamatuod, ang pagkabanhaw sang mga hinaplas may sunod-sunod nga pagkaimportante, subong sang maathag nga ginapamatud-an sining mga pinamulong nga masapwan sa 1 Corinto 15:​20, 23: “Si Cristo ginbangon gikan sa minatay, ang pangunang mga bunga sadtong mga natulog sa kamatayon. Apang ang kada isa sa iya kaugalingon nga kahimtangan: si Cristo ang pangunang bunga, pagkatapos yadtong iya ni Cristo sa tion sang iya presensia.” Paagi sa pagpakita sing sahi sang pagbatas kag pagtuo nga ginpakita ni Jesus, nahibaluan sang diutay nga panong kon ano ang nagahulat sa ila kon matapos nila ang ila dutan-on nga dalanon, ilabi na sugod sang nagkari ang matuod nga Ginuo sa iya templo agod maghukom sadtong 1918.​—⁠Malaquias 3:⁠1.

¹⁵ Si Pablo nagahatag sa aton sing dugang nga rason agod tamdon ini nga pagkabanhaw subong pinasahi. Subong sang narekord sa 1 Corinto 15:​51-53, sia nagsulat: “Yari karon! Ginasugid ko sa inyo ang isa ka sagrado nga sekreto: Indi kita tanan magatulog sa kamatayon, kundi kita tanan pamayluhan, sa isa ka tion, sa isa ka pagpamisok, sa katapusan nga budyong. . . . Kay ang madinulunton kinahanglan magsuklob sang pagkadimadinulunton, kag ini nga mamalatyon kinahanglan magsuklob sang pagkadimamalatyon.” Ining mga pinamulong naaplikar sa diutay nga panong nga napatay sa tion sang presensia ni Cristo. Bangod indi kinahanglan nga magtulog sa malawig nga panag-on sang tion sa kamatayon, ginpanaptan sila sing pagkadimamalatyon, “sa isa ka tion, sa isa ka pagpamisok.”

16, 17. Nahanungod sa ila paglaum nga pagkabanhaw, paano karon ang hinaplas nga mga Cristiano ilabi na nga ginapakamaayo?

¹⁶ Sa kapawa sini nga paghangop, mahangpan naton ang kahulugan sang mga pinamulong ni apostol Juan nga masapwan sa Bugna 14:​12, 13. Sia nagsulat: “ ‘Diri nagakahulugan sang pagbatas para sa mga balaan, yadtong mga nagatuman sang sugo sang Dios kag sang pagtuo kay Jesus.’ Kag nabatian ko ang isa ka tingog halin sa langit nga nagasiling: ‘Isulat: Malipayon ang mga patay nga nagakamatay nga nahiusa sa Ginuo kutob sini nga panahon. Huo, siling sang espiritu, papahuwaya sila gikan sa ila mga pagpangabudlay, kay ang mga butang nga ginhimo nila magaupod sa ila.’ ”

¹⁷ Daw ano ka pinasahi nga padya ang nagahulat para sa nagkalabilin sang diutay nga panong! Ang ila pagkabanhaw magaabot sing madasig, pagkatapos mismo nga magatulog sila sa kamatayon. Daw ano ka talalupangdon nga pagbaylo ang maeksperiensiahan nila kon himuon nila ang ila asaynment sa espiritu nga duog! Bangod sang karon nga paghimaya sa diutay nga panong kag bangod sang nagahilapit nga bug-os nga katumanan sang dalagku nga mga tagna sa Biblia, ang katapusan nga nabilin nga mga katapo sang diutay nga panong dapat gid nga “dili mahadlok.” Kag ang ila pagkawalay kahadlok nagapalig-on sa dakung kadam-an, nga dapat magpalambo sing kaanggid nga panimuot sang pagkawalay kahadlok samtang ginapaabot nila ang kaluwasan gikan sa pinakadaku nga tion sang kagamo sa duta.

18, 19. Ngaa ang tion nga ginapuy-an naton hilingagawon? (b) Ngaa ang hinaplas kag diutay nga panong indi dapat mahadlok?

¹⁸ Ang pagdumdom sa mga hilikuton sang diutay nga panong nagabulig sa ila kag sa dakung kadam-an nga magpadayon sa pagkahadlok sa matuod nga Dios. Ang takna sang iya paghukom nag-abot na, kag ang maayo nga tion nga nabilin hamili. Limitado, sa pagkamatuod, ang tion para sa iban nga maghulag. Apang, wala kita nahadlok nga mapaslawan ang katuyuan sang Dios. Pat-od gid ini nga magamadinalag-on!

¹⁹ Ang mabaskog nga langitnon nga mga tingog nabatian na nga nagasiling: “Ang ginharian sang kalibutan nangin ginharian sang aton Ginuo kag sang iya Cristo, kag magagahom sia subong hari sa walay katubtuban.” (Bugna 11:15) Sa pagkamatuod, ginatuytuyan sang Dakung Manugbantay, si Jehova, ang tanan niya nga mga karnero sa “mga banas sang pagkamatarong tungod sa iya ngalan.” (Salmo 23:⁠3) Ang diutay nga panong walay kasaypanan nga ginatuytuyan padulong sa ila langitnon nga padya. Kag ang iban nga mga karnero pagaluwason sa dakung kapipit-an agod mag-agom sing dayon nga kabuhi sa dutan-on nga sakop sang mahimayaon nga Ginharian sang Dios sa idalom sang paggahom ni Cristo Jesus. Hanti, samtang ang mga pinamulong ni Jesus ginpatuhoy sa diutay nga panong, pat-od gid nga ang tanan nga mga alagad sang Dios sa duta may rason sa pagpamati sa iya mga pulong: “Dili mahadlok.”

Mapaathag Mo Bala?

◻ Ngaa mapaabot naton nga ang nabilin nga kadamuon sang diutay nga panong magadiutay?

◻ Ano ang kahimtangan sang hinaplas nga nagkalabilin karon?

◻ Ngaa indi dapat mahadlok ang mga Cristiano, walay sapayan sang nagahilapit nga pagsalakay ni Gog sang Magog?

◻ Ngaa ang paglaum nga pagkabanhaw sang 144,000 pinasahi, ilabi na karon?