Mga Benepisyo sang Pagkahadlok sa Matuod nga Dios
“Ako, si Jehova, amo ang imo Dios, ang Isa nga nagatudlo sa imo sa pagbenepisyo sang imo kaugalingon, ang Isa nga nagatuytoy sa imo sa dalanon nga laktan mo.” —ISAIAS 48:17.
1. Anong mga kalamidad ang mahimo kuntani nga nalikawan bangod sang diosnon nga kahadlok?
KON ginpalambo ni Adan ang diosnon nga kahadlok, nagpugong ini kuntani sa iya sa paghimo sang sala nga nagdul-ong sa iya kaugalingon nga dayon nga kamatayon kag sa linibo ka tuig nga kalisdanan sa iya kaanakan. Kon ginpamatian sang dumaan nga pungsod sang Israel ang laygay ni Jehova nga kahadlukan sia kag higugmaon sia, yadto nga pungsod wala kuntani nadala nga bihag sa Babilonya, ukon wala nila kuntani ginsikway ang Anak sang Dios kag nakasala sing pagpaagay sang iya dugo. Kon ang kalibutan sa karon nagkahadlok sa Dios, wala kuntani sing kagarukan sa gobierno ukon sa negosyo, wala sing krimen, wala sing inaway.—Hulubaton 3:7.
2. Walay sapayan sang mga kahimtangan sa kalibutan sa aton palibot, ngaa dapat naton palambuon ang kahadlok kay Jehova?
2 Apang, walay sapayan sang ginahimo sang kalibutan sa palibot naton, kita subong mga indibiduwal, subong mga pamilya, kag subong mga kongregasyon sang mga alagad ni Jehova makabenepisyo gikan sa pagpalambo sing kahadlok sa matuod nga Dios. Nahisanto ini sa pahanumdom nga ginhatag ni Moises sa pungsod sang Israel: “Ano bala ang ginakinahanglan sa imo ni Jehova nga imo Dios kundi ang pagkahadlok kay Jehova nga imo Dios, ang paglakat sa tanan niyang dalanon kag ang paghigugma sa iya kag ang pag-alagad kay Jehova nga imo Dios sa bug-os mong tagipusuon kag sa bug-os mong kalag; ang pagbantay sang mga sugo ni Jehova . . . tungod sa imo kaayuhan?” (Deuteronomio 10:12, 13) Ano ang pila sa mga benepisyo nga magaabot sa aton kon nagakahadlok kita kay Jehova, ang matuod nga Dios?
Kaalam—Hamili Pa sa Bulawan
3. (a) Ano ang labing panguna nga benepisyo nga mabaton naton? (b) Ano ang kahulugan sang Salmo 111:10?
3 Ang labing panguna nga benepisyo amo ang matuod nga kaalam. Ang Salmo 111:10 nagasiling: “Ang kahadlok kay Jehova amo ang pamuno sang kaalam.” Ano ang buot silingon sina? Ang kaalam amo ang ikasarang sa paggamit sang ihibalo sing madinalag-on sa paglubad sang mga problema, sa paglikaw sang katalagman, kag sa pagtigayon sang mga tulumuron. Nagalakip ini sang maayo nga pagdesisyon. Ang pamuno, ang nahauna nga bahin, ang sadsaran sina nga kaalam, amo ang kahadlok kay Jehova. Ngaa? Bangod ang tanan nga tinuga binuhatan sang iya mga kamot. Nasandig ini sa iya. Ginhatagan niya ang katawhan sing hilway nga pagbuot apang indi sing ikasarang nga tuytuyan ang iya kaugalingon nga mga tikang sing hilway gikan sa iya panuytoy. (Josue 24:15; Jeremias 10:23) Kon ginaapresyar lamang naton yadtong pangunang mga katunayan sa kabuhi kag magkabuhi nahisuno sa sini nga matigayon naton ang mapinadayunon nga kadalag-an. Kon ang aton ihibalo kay Jehova nagahatag sa aton sing dimationg nga pagtuo nga ang kabubut-on sang Dios pat-od gid nga magamadinalag-on kag nga ang iya saad kag ikasarang sa pagpadya sang pagkatutom sigurado, nian ang diosnon nga kahadlok magapahulag sa aton agod magpanghikot sing maalamon.—Hulubaton 3:21-26; Hebreo 11:6.
4, 5. (a) Ngaa ang edukasyon sa unibersidad sang isa ka lamharon nga lalaki wala naghatag sa iya sing matuod nga kaalam? (b) Paano natigayon sang ulihi sining lalaki kag sang iya asawa ang matuod nga kaalam, kag sa anong paagi ini nagbalhin sang ila kabuhi?
4 Binagbinaga ang isa ka halimbawa. Sang nagligad nga mga pila ka dekada, isa ka lamharon nga lalaki ang nag-eskwela sa Unibersidad sang Saskatchewan, sa Canada. Nalakip sa kurikulum amo ang biolohiya, kag gintudluan sia sing ebolusyon. Pagkatapos sang gradwasyon, nag-espesyalisar sia sa pisika atomika, nakabaton sing scholarship agod padayunon ang iya pagtuon sa Unibersidad sang Toronto. Samtang nagatuon sia, nakita niya ang makatilingala nga pamatuod sang kahim-ong kag desinyo sang atomiko nga pagkahuman. Apang wala sing sabat ang ginhatag sa mga pamangkot: Sin-o ang nagdesinyo sining tanan? San-o? Kag ngaa? Kon wala yadtong mga sabat, mahimo bala niya magamit sing maalamon ang iya ihibalo sa isa ka kalibutan nga sadto nga tion nagainaway? Ano ang magatuytoy sa iya? Ang nasyonalismo? Ang handum para sa materyalistiko nga mga padya? Sa pagkamatuod, natigayon bala niya ang matuod nga kaalam?
5 Wala madugay pagkatapos sang iya gradwasyon, yadtong lamharon nga lalaki kag ang iya asawa nagsugod sa pagtuon sing Biblia upod sa mga Saksi ni Jehova. Gikan sa Pulong sang Dios mismo, natigayon nila ang mga sabat nga wala nila sadto mahibalui. Nakilala nila ang Manunuga, si Jehova nga Dios. Sa pagtuon nila nahanungod kay Moises sa Dagat nga Mapula kag nahanungod kay Daniel kag sa iya mga kaupdanan sa Babilonya, natun-an nila ang importansia sang pagkahadlok indi sa tawo kundi sa Dios. (Exodo 14:10-31; Daniel 3:8-30) Yadtong diosnon nga kahadlok nga ginaupdan sing matuod nga gugma kay Jehova nagsugod sa pagpahulag sa ila. Sang ulihi ang bug-os nga pagkabuhi nila nagbag-o. Nakilala gid man sang ulihi sang lamharon nga lalaki ang Isa nga ang iya binuhatan gintun-an niya sa biolohiya. Nasugdan niya nga mahangpan ang katuyuan sang Isa nga ang iya kaalam nakita niya nga ginbanaag sa iya pagtuon sang pisika. Sa baylo nga gamiton ang iya ikasarang sa paghimo sing mga instrumento nga magalaglag sang iya isigkatawo, luyag niya subong man sang iya asawa buligan ang iban nga mahigugma ang Dios kag ang ila isigkatawo. Nagpalista sila sa bug-os tion nga pag-alagad subong mga manugbantala sang Ginharian sang Dios. Sang ulihi, nag-eskwela sila sa Watchtower Bible School of Gilead kag ginpadala subong mga misyonero.
6. Kon may kaalam kita nga nanggamot sa kahadlok kay Jehova, anong umalagi nga mga paghimud-os ang pagalikawan naton, kag sa baylo ano ang pagahimuon naton?
6 Sa pagkamatuod, indi tanan mahimo mangin misyonero. Apang kita tanan makatigayon sing kaalam nga nanggamot sa kahadlok kay Jehova. Kon ginapalambo naton ina nga kaalam, indi kita malangkagon nga magatuon sang mga pilosopiya sang mga tawo nga nagapakotpakot lamang kon tuhoy gid sa ano ang kabuhi. Hatagan naton sing suod nga igtalupangod ang pagtuon sang Biblia, nga gin-inspirar sang Tuburan sang kabuhi, si Jehova nga Dios, ang isa nga makahatag sa aton sing kabuhi nga dayon. (Salmo 36:9; Colosas 2:8) Sa baylo nga mangin mga ulipon sang komersial nga sistema nga sa iya kaugalingon mahuyang kag yara na sa bibi sang pagkapukan, pagapamatian naton ang laygay ni Jehova nga magmangin kontento sa kalan-on kag panapton, samtang ginahimo ang aton kaangtanan sa Dios subong ang labing panguna nga butang sa kabuhi. (1 Timoteo 6:8-12) Sa baylo nga magpanghikot subong nga daw ang aton palaabuton nasandig sa pagtigayon sing manggad sa sining kalibutan, patihan naton ang Pulong ni Jehova nga nagasugid sa aton nga ang kalibutan nagataliwan kag amo man ang handum sini, apang sia nga nagahimo sang kabubut-on sang Dios magapabilin sing dayon.—1 Juan 2:17.
7. (a) Paano ang Hulubaton 16:16 nagabulig sa aton nga matigayon ang timbang nga mga prinsipio? (b) Anong mga padya ang matigayon paagi sa paghimo sang kabubut-on sang Dios nga sentro nga bahin sang aton kabuhi?
7 Ang Hulubaton 16:16 nagapalig-on sa aton paagi sa pagsiling sing matinuuron: “Daw ano kaayo pa ang pagkuha sing kaalam [ang kaalam nga nagasugod sa kahadlok kay Jehova] sangsa bulawan! Kag ang pagkuha sing paghangop maayo pa nga pilion sangsa pilak.” Ina nga kaalam kag paghangop magapahulag sa aton nga kabigon ang paghimo sang kabubut-on sang Dios nga mangin sentro nga bahin sang aton kabuhi. Kag anong buluhaton ang gintugyan sang Dios sa iya mga Saksi para sa sining panag-on sang tawhanon nga maragtas? Ang pagbantala nahanungod sa iya Ginharian kag ang pagbulig sa mga bunayag sing tagipusuon nga mangin matuod nga mga disipulo ni Jesucristo. (Mateo 24:14; 28:19, 20) Ini ang buluhaton nga nagapatubas sing mga padya sang matuod nga kaayawan kag daku nga kalipay. Upod ang maayong rason, nian, ang Biblia nagasiling: “Malipayon ang tawo nga nakakita sing kaalam.”—Hulubaton 3:13.
Pangamlig Batok sa Paghimo sing Sala
8. (a) Ihatag ang ikaduha nga benepisyo nga matigayon gikan sa pagkahadlok sa Dios. (b) Gikan sa anong kalainan kita ginaamligan? (c) Paano ang diosnon nga kahadlok mangin isa ka gamhanan nga nagapahulag nga puwersa?
8 Ang ikaduha nga benepisyo sang pagkahadlok sa Dios amo nga ginaamligan kita batok sa paghimo sing malain. Yadtong nagatahod sing tudok sa Dios wala nagapamat-od para sa ila kaugalingon kon ano ang maayo kag kon ano ang malain. Wala nila ginatamod nga malain ang ginasiling sang Dios nga maayo, ukon ginakabig nila nga maayo ang mga butang nga ginasiling sang Dios nga malain. (Salmo 37:1, 27; Isaias 5:20, 21) Dugang pa, ang tawo nga ginpahulag sang diosnon nga kahadlok wala nagadulog sa paghibalo lamang kon ano ang ginasiling ni Jehova nga maayo kag kon ano ang ginasiling niya nga malain. Ginahigugma sina nga tawo ang ginahigugma ni Jehova kag ginadumtan ang ginadumtan ni Jehova. Subong resulta, nagapanghikot sia nahisanto sa mga talaksan sang Dios. Busa, subong sang ginasiling sa Hulubaton 16:6, “tungod sa kahadlok kay Jehova ang isa nagatalikod sa malaut.” Inang diosnon nga kahadlok mangin isa ka gamhanan nga nagapahulag nga puwersa agod matigayon ang indi mahimo sang isa ka tawo sa iya kaugalingon nga kusog.
9. Paano ang daku nga handum nga pahamut-an ang Dios nag-impluwensia sa desisyon sang isa ka babayi sa Mexico, kag ano ang resulta?
9 Bisan pa nga ang diosnon nga kahadlok nagasugod pa lamang nga maglambo sa isa ka tawo, mahimo ini magapabakod sa iya nga likawan ang paghimo sang butang nga pagahinulsulan niya sa bug-os niya nga kabuhi. Halimbawa, ginpamangkot sang isa ka nagamabdos nga babayi sa Mexico ang isa sang mga Saksi ni Jehova nahanungod sa aborsion. Ginbasa sang Saksi ang pila ka kasulatan sa babayi kag nian nangatarungan: “Para sa Manunuga, ang kabuhi tuman ka importante, bisan ang kabuhi sadtong wala pa mabun-ag.” (Exodo 21:22, 23; Salmo 139:13-16) Ginapakita sang pag-usisa sa klinika nga ang iya lapsag mahimo nga indi mangin normal. Apang karon, napahulag sang nakita niya sa Pulong sang Dios, ang babayi namat-od nga buhion ang iya lapsag. Ang iya doktor nagdumili nga makita sia liwat, kag ang iya bana namahog nga bayaan sia, apang nagpakalig-on sia. Sang ulihi, nagbun-ag sia sing isa ka bata nga babayi—normal, mapagros, kag matahom. Bilang pagpasalamat, ginpangita niya ang mga Saksi, kag nagsugod sila sa pagtuon sing Pulong sang Dios upod sa iya. Sa sulod sang isa ka tuig sia kag ang iya bana ginbawtismuhan. Pagligad sang pila ka tuig sa isa ka distrito nga kombension, nalipay sila nga makita liwat ang Saksi nga una niya nga nakilala kag ginpakilala nila sa iya ang ila matahom nga apat-ka-tuig ang edad nga anak nga babayi. Ang nagakaigo nga pagtahod sa Dios kag ang daku nga handum nga pahamut-an sia may gamhanan gid nga mga impluwensia sa kabuhi sang isa.
10. Ang diosnon nga kahadlok makapalig-on sa tawo nga mahilway gikan sa anong mga dagway sang sala?
10 Ang diosnon nga kahadlok nagapabakod sa aton batok sa madamo nga sala. (2 Corinto 7:1) Kon ginapalambo sing nagakaigo, makabulig ini sa isa ka tawo nga untaton ang tago nga mga sala, nga sila lamang ni Jehova ang nakahibalo. Makabulig ini sa iya nga mahilway gikan sa pagkaulipon sa abuso sang alkohol kag abuso sang droga. Ang isa ka anay nagiyan sa droga sa South Africa nagpaathag: “Samtang nagakuha ako sing ihibalo nahanungod sa Dios, napalambo ko man ang kahadlok nga saklawon ukon paakigon sia. Nahibal-an ko nga nagatan-aw sia, kag handum ko nga mangin kalahamut-an sa iya itululok. Nagpahulag ini sa akon nga ihaboy ang mga droga nga ginapanag-iyahan ko paagi sa paghulog sini sa kasilyas.” Ang diosnon nga kahadlok nagbulig sa linibo pa sa kaanggid nga mga paagi.—Hulubaton 5:21; 15:3.
Pangamlig Batok sa Pagkurog sa mga Tawo
11. Batok sa anong kinaandan nga siod makaamlig sa aton ang maayo nga kahadlok kay Jehova?
11 Ang maayo nga kahadlok sa Dios nagaamlig man sa aton batok sa kahadlok sa tawo. Ang kalabanan nga mga tawo may daku ukon diutay nga kahadlok sa tawo. Bisan ang mga apostoles ni Jesucristo nagbiya sa iya kag nagpalagyo sang gindakop sia sang mga soldado sa katamnan sang Getsemane. Sang ulihi, sa luwang sang mataas nga saserdote, nadulaan sing pagkatimbang kag nahugakom sing kahadlok, ginpanghiwala ni Pedro nga sia isa sang mga disipulo ni Jesus kag nga kilala pa gani niya sia. (Marcos 14:48-50, 66-72; Juan 18:15-27) Apang ang mga apostoles nabuligan agod matigayon liwat ang espirituwal nga pagkatimbang. Sa pihak nga bahin, sang mga adlaw ni Hari Joaquim, si Urias nga lalaking anak ni Semaya nadaug gid sang kahadlok nga ginbayaan niya ang iya pag-alagad subong manalagna ni Jehova kag nagpalagyo sa pungsod, apang nadakpan kag ginpatay sia.—Jeremias 26:20-23.
12. (a) Anong pangamlig batok sa kahadlok sa tawo ang ginatudlo sang Hulubaton 29:25? (b) Paano mapalambo ang pagsalig sa Dios?
12 Ano ang makabulig sa isa ka tawo agod madaug ang kahadlok sa tawo? Sa tapos magpaandam nga “ang pagkurog sa mga tawo nagadala sing siod,” ang Hulubaton 29:25 nagadugang: “Sia nga nagasalig kay Jehova pagaamligan.” Ang pagsalig kay Jehova amo ang yabi. Ina nga pagsalig ginapasad sa ihibalo kag eksperiensia. Paagi sa pagtuon sang iya Pulong, makita naton ang pamatuod sang pagkamatarong sang mga dalanon ni Jehova. Mangin pamilyar kita sa mga hitabo nga nagapakita sang iya pagkamasaligan, sang pagkapat-od sang iya mga saad (lakip ang tuhoy sa pagkabanhaw), sang iya gugma kag labing gamhanan nga gahom. Nian kon magapanghikot kita sa sina nga ihibalo, nagahimo sang mga butang nga ginasugo ni Jehova kag malig-on nga ginasikway ang ginapaandam niya, personal nga maeksperiensiahan naton ang iya mahigugmaon nga pag-atipan kag ang iya pagkamasaligan. Makita naton sing personal nga ang iya gahom nagapanghikot agod matuman ang iya kabubut-on. Ang aton pagsalig sa iya nagatubo kag, upod sa sini, ang aton gugma para sa iya kag ang aton hanuot nga handum nga pahamut-an sia. Ina nga pagsalig ginatukod sa malig-on nga sadsaran. Pangamlig ini batok sa kahadlok sa tawo.
13. Paano ang diosnon nga kahadlok makabulig sa aton sa aton sekular nga palamugnan, puluy-an, kag eskwelahan?
13 Ang aton pagsalig kay Jehova, nga ginaupdan sing diosnon nga kahadlok, magabulig sa aton nga maglig-on sa kon ano ang husto kon ang aton ginatrabahuan magapahog sa aton nga madula naton ang aton trabaho kon mangindi kita sa pagpakigbahin sa dibunayag nga mga buhat sa negosyo. (Ipaanggid ang Miqueas 6:11, 12.) Inang diosnon nga kahadlok nagabulig sa madamong linibo ka Cristiano nga magpadayon sa matuod nga pagsimba sa atubangan sang pagpamatok gikan sa ditumuluo nga mga katapo sang pamilya. Nagahatag man ini sing kaisog sa mga pamatan-on nga nagaeskwela nga mapakilala ang ila kaugalingon subong mga Saksi ni Jehova, kag nagapalig-on sa ila nga maatubang ang pagyaguta gikan sa mga kabutho nga nagayubit sang mga talaksan sang Biblia. Busa, ang isa ka tin-edyer nga Saksi nagsiling: “Indi importante kon ano ang ila ginahunahuna. Ang importante amo ang ginahunahuna ni Jehova.”
14. Paano nagamadinalag-on ang mga alagad ni Jehova bisan pa nga ang ila kabuhi yara sa katalagman?
14 Ina man nga pagtuo nagapabakod sa matuod nga mga Cristiano nga magpabilin sing malig-on sa mga dalanon ni Jehova bisan pa nga ang ila kabuhi yara sa katalagman. Nahibaluan nila nga dapat nila paabuton ang paghingabot gikan sa kalibutan. Narealisar nila nga ang mga apostoles ginbunal kag nga si Jesucristo mismo ginsakit kag ginpatay sang malauton nga mga tawo. (Marcos 14:65; 15:15-39; Binuhatan 5:40; ipaanggid ang Daniel 3:16-18.) Apang ang mga alagad ni Jehova nagasalig sing bug-os nga sarang niya sila mapabakod agod makabatas; nga sa bulig sang Dios magamadinalag-on sila; nga pat-od gid nga padyaan ni Jehova yadtong mga matutom—kon kinahanglanon paagi sa pagkabanhaw sa kabuhi sa iya bag-ong kalibutan. Ang ila gugma sa Dios nga ginaupdan sang diosnon nga kahadlok gamhanan nga nagapahulag sa ila nga likawan ang paghimo sing bisan ano nga wala nagapahamuot sa iya.
15. Ano ang nagbulig sa mga Saksi ni Jehova agod mahuptan ang ila integridad sa mga kampo konsentrasyon sang mga Nazi?
15 Ini nga motibasyon nagbulig sa mga Saksi ni Jehova nga makatindog sing malig-on sa mga kakugmat sang mga kampo konsentrasyon sang mga Nazi sadtong katuigan 1930 kag 1940. Gindumdom nila ang laygay ni Jesus nga masapwan sa Lucas 12:4, 5: “Nagasiling ako sa inyo, mga abyan, Dili kamo mahadlok sa mga nagapatay sang lawas kag sa tapos sini wala na sila sing sarang mahimo. Apang nagapaandam ako sa inyo kon sin-o ang kahadlukan ninyo: Kahadluki sia nga sa tapos makapatay may awtoridad sa pagpilak sa Gehenna. Huo, nagasiling ako sa inyo, kahadluki ninyo ining Isa.” Busa, si Gustav Auschner, isa ka Saksi nga nabilanggo sa kampo konsentrasyon sa Sachsenhausen, nagsulat sang ulihi: ‘Gintiro sang mga SS si August Dickmann kag namahog nga tiruhon kami tanan kon indi namon pagpirmahan ang isa ka dokumento nga nagasikway sang amon pagtuo. Wala sing isa sa amon ang nagpirma. Mas nahadlok kami nga indi mapahamut-an si Jehova sangsa ila mga bala.’ Ang kahadlok sa tawo nagadul-ong sa pagkompromiso, apang ang kahadlok sa Dios nagahimo sa isa nga malig-on sa kon ano ang matarong.
Ang Pag-amlig sa Kabuhi
16. Ano ang nagbulig kay Noe agod mahuptan ang husto nga dalanon mga dekada tubtob sang Anaw, kag ano ang resulta para sa iya kag sa iya panimalay?
16 Si Noe nagkabuhi sa katapusan nga mga adlaw sang antes sang anaw nga kalibutan. Namat-od si Jehova nga laglagon ang malauton nga kalibutan sadto nga tion bangod sang kalainan sang tawo. Walay sapayan, si Noe nagakabuhi sa sadtong kalibutan nga puno sing kasingki, daku nga imoralidad, kag dipagsapak sa diosnon nga kabubut-on. Walay sapayan sang pagbantala ni Noe sing pagkamatarong, “wala sila nagtalupangod tubtob nga nag-abot ang anaw kag nagdaldal sa ila nga tanan.” (Mateo 24:39) Apang wala sing nakapugong kay Noe sa hilikuton nga ginhatag sa iya sang Dios. Sia naghimo “suno sa tanan nga ginsugo sang Dios sa iya. Amo ang ginhimo niya.” (Genesis 6:22) Ano ang nagbulig kay Noe sa paghupot sing nagakaigo nga dalanon sang pagpanghikot sa mga tinuig tubtob sang Anaw? Ang Hebreo 11:7 nagasabat: “Bangod sa pagtuo si Noe, sa tapos napaandaman sang Dios nahanungod sa mga butang nga wala pa makita, nagpakita sing diosnon nga kahadlok.” Subong resulta, sia kag ang iya asawa kag mga anak nga lalaki kag ang ila mga asawa gin-amligan sa Anaw.
17. (a) Walay sapayan sang ginahimo sang iban nga mga tawo, ano ang dapat naton himuon? (b) Ngaa yadtong nagakahadlok kay Jehova malipayon gid nga mga tawo?
17 Nagakabuhi kita sa panag-on nga kaanggid sa madamo nga bahin sadtong adlaw ni Noe. (Lucas 17:26, 27) Sa liwat ang paandam ginahatag. Ang Bugna 14:6, 7 nagasugid nahanungod sa isa ka anghel nga nagalupad sa tunga sang langit nga nagalaygay sa mga tawo sang tagsa ka pungsod kag kabikahan kag dila nga ‘kahadlukan ang Dios kag hatagan sia sing himaya.’ Walay sapayan sang ginahimo sang kalibutan sa imo palibot, pamatii yadtong mga pulong, kag nian palab-uta ang pangagda sa iban. Kaangay ni Noe, magpanghikot sa pagtuo kag magpakita sing diosnon nga kahadlok. Magadul-ong ina sa pag-amlig sang imo kabuhi kag sang kabuhi sang madamo pa nga iban. Samtang ginapamalandungan naton ang mga benepisyo nga natigayon sadtong nagakahadlok sa matuod nga Dios, magaugyon gid kita sa inspirado nga salmista nga nag-amba: “Malipayon ang tawo nga nagakahadlok kay Jehova, nga nagakalipay sing daku sa iya mga sugo.”—Salmo 112:1.
Paano Mo Sabton?
◻ Ano ang pila ka tumalagsahon nga mga benepisyo sang pagkahadlok sa matuod nga Dios?
◻ Paano nagaamlig sa aton ang kaalam nga nanggamot sa diosnon nga kahadlok?
◻ Ngaa ang diosnon nga kahadlok nagapahilayo sa aton sa malaut?
◻ Paano ang diosnon nga kahadlok nagaamlig sa aton gikan sa kahadlok sa tawo?
◻ Ano ang kahilabtanan sang diosnon nga kahadlok sa aton palaabuton nga mga paglaum sa kabuhi?
[Mga retrato sa pahina 16, 17]
“Malipayon ang tawo nga nagakahadlok kay Jehova, nga nagakalipay sing daku sa iya mga sugo.” —Salmo 112:1