Ang Adlaw nga “Nagadabdab Subong sang Hurno”
“Yari karon! magaabot ang adlaw nga nagadabdab subong sang hurno.” —MALAQUIAS 4:1.
1. Anong mga pamangkot ang nagautwas may kaangtanan sa Malaquias 4:1?
SA SINING katapusan nga mga adlaw, malipayon yadtong ang ila mga ngalan ginapakamaayo ni Jehova nga isulat sa iya tulun-an sang handumanan. Apang kamusta yadtong napaslawan nga makalipikar para sa sina nga pribilehiyo? Mga gumalahom man sila ukon kinaandan lamang nga katawhan, ano ang mahanabo sa ila kon tamayon nila ang mensahe sang Ginharian sang Dios kag ang mga nagabantala sini? Si Malaquias nagapamulong tuhoy sa isa ka adlaw sang paghusay. Sa kapitulo 4, bersikulo 1, aton mabasa: “ ‘Kay, yari karon! magaabot ang adlaw nga nagadabdab subong sang hurno, kag ang tanan nga bugalon kag ang tanan nga nagahimo sang pagkamalaut mangin ginalaban. Kag ang adlaw nga nagaabot magasunog sa ila,’ siling ni Jehova sang mga kasuldadusan, ‘agod nga indi ini magbilin sa ila sing gamot ukon sanga.’ ”
2. Anong buhi nga paglaragway sang paghukom ni Jehova ang ginahatag ni Ezequiel?
2 Ginpaanggid man sang iban nga mga manalagna ang paghukom ni Jehova sa mga pungsod sa makapalaso nga kainit sang hurno. Ang Ezequiel 22:19-22 nagakaigo gid nga naaplikar sa paghukom sang Dios sa mga sekta sang apostata nga Cristiandad! Ini mabasa: “Amo ini ang ginasiling sang Soberanong Ginuo nga si Jehova, ‘Bangod nga kamo tanan nangin buay, busa yari karon tipunon ko kamo . . . Subong sang pagtipon nila sang pilak kag saway kag salsalon kag tingga kag istanyo sa tunga sang hurno, nga mahuyop ini sang kalayo sa pagtunaw sini, sa amo tipunon ko kamo sa akon kaakig kag sa akon kasingkal, kag ibutang ko kamo didto kag tunawon kamo. Kag tipunon ko kamo kag huypon sang kalayo sang akon kasingkal, kag matunaw kamo sa tunga sini. Subong nga ginatunaw ang pilak sa tunga sang hurno, sa amo tunawon kamo sa tunga sini; kag makilala ninyo nga ako, si Jehova, nag-ula sang akon kasingkal sa inyo.’ ”
3, 4. (a) Ano ang salimpapaw nga ginpangangkon sang mga klerigo? (b) Ano ang mahigko nga rekord sang relihion?
3 Isa gid ka gamhanan nga ilustrasyon! Ang mga klero nga nagtinguha sa paglikaw sa paggamit sang ngalan ni Jehova, nga nagapasipala pa gani sinang balaan nga ngalan, dapat gid mag-atubang sina nga adlaw sang paghusay. Sing bugalon, nagapangangkon sila kag ang ila mga alyado sa politika nga tukuron nila ang Ginharian sang Dios sa duta, ukon sa bisan paano himuon ang duta nga isa ka nagakaigo nga duog para sa Ginharian.
4 Ang apostata nga mga Cristiano nagbuylog sa politikanhon nga mga gumalahom sa pagpakig-away sa makangilidlis nga mga inaway. Ginarekord sang maragtas ang mga Krusada sang edad-media, ang pilit nga mga pagpangumbertir sang Inkisisyon sang Espanya, ang Katluan ka Tuig nga Inaway nga naghapay sa Europa sang ika-17 nga siglo, kag ang Inaway Sibil sa Espanya sang katuigan 1930, nga gin-away sa tuyo nga maamligan ang kahimtangan sang Iglesia Katolika sa Espanya. Ang pinakamadamo nga dugo nga ginpatulo amo ang sa duha ka kalibutanon nga inaway sang aton siglo, sang ang mga Katoliko, mga Protestante, kag iban pa nag-iliniway, walay pili nga nagpatay sa mga masigkatumuluo kag sa katapo sang iban nga mga relihion. Sining karon lang, may makamamatay nga pag-ilinaway sa ulot sang mga Katoliko kag mga Protestante sa Ireland, sa ulot sang relihioso nga mga hubon sa India, kag sa ulot sang relihioso nga mga grupo sa anay Yugoslavia. Ang mga pahina sang maragtas sang relihion nadagtaan man sing dugo bangod sang pagpatay sa linibo ka matutom nga mga Saksi ni Jehova.—Bugna 6:9, 10.
5. Anong paghukom ang nagahulat sa butig nga relihion?
5 Maapresyar gid naton dayon ang hustisya sang nagapakari nga paglaglag ni Jehova sa Babilonia nga Daku, ang bug-os kalibutan nga emperyo sang butig nga relihion, upod sang mga sumalakdag sini. Ginalaragway ining paglaglag sa Bugna 18:21, 24: “Ang anghel nga gamhanan nagkuha sing bato nga kaangay sa dakung bato sang galingan kag gintagbong sa dagat, nga nagasiling: ‘Sa amo ang Babilonia nga dakung banwa igatagbong sing hinali, kag indi na gid makita. Huo, nasapwan sa iya ang dugo sang mga manalagna kag sang mga balaan kag sang tanan nga ginpatay sa duta.’ ”
6. (a) Sin-o ang mangin kaangay sing ginalaban, kag ngaa? (b) Ano ang pasalig para sa mga nagakahadlok kay Jehova?
6 Sang ulihi, ang tanan nga kaaway sang pagkamatarong, upod ang ila mga sumalakdag, “mangin kaangay sang ginalaban.” Ang adlaw ni Jehova magadabdab sa ila kaangay sang hurno. “Wala sing gamot ukon sanga nga mabilin sa ila.” Sa sinang adlaw sang paghusay, ang magagmay nga mga kabataan, ukon mga sanga, pakig-angutan sing makatarunganon suno sa pagtan-aw ni Jehova sa ila gamot, sa ila mga ginikanan, nga nagatatap sa sining mga kabataan. Wala na sing kaanakan nga magapadayon sang malaut nga mga buhat sang malauton nga mga ginikanan. Apang yadtong nagatuo sa mga saad sang Ginharian sang Dios indi mationg. Ang Hebreo 12:28, 29 nagalaygay: “Magpadayon kita sa pagtigayon sing dibagay nga kaluoy, nga paagi sini kalahamut-an kita nga makahimo sa Dios sing balaan nga pag-alagad nga may diosnon nga kahadlok kag kahalawhaw. Kay ang aton Dios nagalamon man nga kalayo.”
Si Jehova Bala Isa ka Mapintas nga Dios?
7. Paano ang gugma ni Jehova nalakip sa iya paghukom?
7 Nagakahulugan bala ini nga si Jehova isa ka mapintas kag matimaluson nga Dios? Indi! Sa 1 Juan 4:8, ginahatag sang apostol ang pangunang kamatuoran: “Ang Dios gugma.” Nian, sa bersikulo 16 ginadugang niya ang pagpadaku, nga nagasiling: “Ang Dios gugma, kag sia nga nagapabilin sa gugma nagapabilin nga nahiusa sa Dios kag ang Dios nagapabilin nga nahiusa sa iya.” Bangod sini nga gugma sa katawhan nga ginatuyo ni Jehova nga tinluan ining duta sang tanan nga kalautan. Ang aton mahigugmaon, maluluy-on nga Dios nagasiling: “Sa nagakabuhi ako, . . . wala ako sing kahamuot sa kamatayon sang malauton, kundi nga ang malauton magbiya sa iya dalanon kag magkabuhi. Biya kamo, biya kamo sa inyo malaut nga mga dalanon, kay ngaa bala nga magkalamatay kamo?”—Ezequiel 33:11.
8. Paano ginpadaku ni Juan ang gugma, apang ginpakita man ang iya kaugalingon nga Anak sang Daguob?
8 Mas masunson nga ginapatuhuyan ni Juan ang a·gaʹpe, ang gugma nga may prinsipio, sangsa paghinambit sang tatlo pa ka manunulat sang Ebanghelyo kon tingubon, apang sa Marcos 3:17, si Juan mismo ginlaragway subong ‘Anak sang Daguob.’ Paagi sa pag-inspirar ni Jehova nga ginsulat sining Anak sang Daguob ang apokaliptiko nga mga mensahe sang katapusan nga tulun-an sa Biblia, ang Bugna, nga nagalaragway kay Jehova subong ang Dios nga nagapatuman sing katarungan. Ining tulun-an puno sing mga ekspresyon sang paghukom, subong sang “dakung linasan sang kasingkal sang Dios,” “pito ka yahong sang kasingkal sang Dios,” kag “kasingkal sang Dios nga Labing Gamhanan.”—Bugna 14:19; 16:1; 19:15.
9. Ano ang ginsiling ni Jesus nahanungod sa mga paghukom ni Jehova, kag paano natuman ang iya mga tagna?
9 Ang aton Ginuong Jesucristo, nga amo ang “larawan sang dikitaon nga Dios,” masidla nga nagpahayag sang mga paghukom ni Jehova samtang yari sa duta. (Colosas 1:15) Halimbawa, pito ka kailo sa Mateo kapitulo 23 ang talangkod nga ginpahayag niya batok sa relihioso nga mga salimpapaw sang panahon niya. Ginhinakpan niya yadtong nagapakamalaut nga paghukom sa sining mga tinaga: “Jerusalem, Jerusalem, nga nagapatay sang mga manalagna kag nagabato sang mga pinadala sa iya,—makapila kuntani nga buot ko tipunon ang imo mga anak, subong sang isa ka munga nga nagatipon sang iya mga piso sa idalom sang iya mga pakpak! Apang indi mo ini luyag. Yari karon! Ang imo balay ginabayaan sa imo.” Katluan kag pito ka tuig sang ulihi, ang paghukom ginhimo sang Romanong hangaway sa idalom ni Heneral Tito. Isa yadto ka makakulugmat nga adlaw, nagatagna sa kon ano ang mangin labing makakulugmat nga adlaw sa bug-os nga pagkabuhi sang tawo—ang adlaw ni Jehova, nga magaabot sa dili madugay.
“Ang Adlaw” Nagasubang
10. Paano ang “adlaw sang pagkamatarong” nagadala sing kalipay sa katawhan sang Dios?
10 Ginasugid ni Jehova nga may mga makalampuwas sa iya adlaw. Ginpatuhuyan niya ini sa Malaquias 4:2, nga nagasiling: “Sa inyo nga nagakahadlok sa akon ngalan magasubang ang adlaw sang pagkamatarong, nga may pag-ayo sa iya mga pakpak.” Inang adlaw sang pagkamatarong wala sing liwan kundi si Jesucristo mismo. Sia ang espirituwal nga “kapawa sang kalibutan.” (Juan 8:12) Paano sia nagasubang? Nagasubang sia nga may pag-ayo sa iya mga pakpak—una ang espirituwal nga pag-ayo, nga mahimo naton maeksperiensiahan bisan karon, kag nian, sa bag-ong kalibutan nga magaabot, ang pisikal nga pag-ayo sang katawhan gikan sa tanan nga kapungsuran. (Mateo 4:23; Bugna 22:1, 2) Sing malaragwayon, subong sang ginsiling ni Malaquias, ang mga gin-ayo ‘magaguwa kag magalinumpat subong sang pinatambok nga mga tinday’ nga bag-o lang ginbuy-an sa bulukutan. Daw ano man nga kalipay ang maeksperiensiahan sang mga pagabanhawon nga may paglaum nga makatigayon sing tawhanon nga pagkahimpit!
11, 12. (a) Anong kapalaran ang nagahulat sa mga malauton? (b) Paano “gintapak [sang katawhan sang Dios] ang mga malauton”?
11 Apang, kamusta ang mga malauton? Aton mabasa sa Malaquias 4:3: “ ‘Tapakon ninyo ang mga malauton, kay sila mangin abo sa idalom sang mga dapadapa sang inyo mga tiil sa adlaw nga himuon ko,’ siling ni Jehova sang kasuldadusan.” Samtang nagabantay sa mga nagahigugma sa iya, tinluan sang aton Dios nga Hangaway ang duta sadtong mapiguson nga mga kaaway. Si Satanas kag ang iya mga demonyo pagagapuson.—Salmo 145:20; Bugna 20:1-3.
12 Ang katawhan sang Dios indi magapakigbahin sa paglaglag sa mga malauton. Paano nian, nga ‘gintapak nila ang mga malauton’? Sa malaragwayon ginahimo nila ini paagi sa pagpakigbahin sa isa ka daku nga pagsaulog sang kadalag-an. Ginalaragway sang Exodo 15:1-21 ang amo nga pagsaulog. Ginhimo ini pagkatapos malaglag si Paraon kag ang iya mga hangaway sa Mapula nga Dagat. Bilang katumanan sang Isaias 25:3-9, ang pagdula sa “mga mapiguson” pagasundan sang isa ka sinalusalo sang kadalag-an may kaangtanan sa saad sang Dios: “Ginlamon niya sang dayon ang kamatayon, kag pahiran sang Soberanong Ginuong Jehova ang luha sang tanan nga nawong. Kag ang kahuluy-an sang iya katawhan kuhaon niya sa bug-os nga duta, kay si Jehova nagpamulong sini. Kag sa sadto nga adlaw ang isa magasiling: ‘Yari karon! Ini amo ang aton Dios. . . . Ini amo si Jehova. Nagahulat kita sa iya. Magkalipay kita kag magkasadya sa iya kaluwasan.’ ” Masapwan sa sini nga pagkalipay, indi ang pagtimalos kag kahakog, kundi ang pagkalipay nga makita ang paghimaya sa ngalan ni Jehova kag nga ang duta natinluan agod puy-an sing mahidaiton sang nahiusa nga katawhan.
Isa ka Dakung Programa sa Pagtudlo
13. Anong pagtudlo ang mahanabo sa “bag-ong duta”?
13 Sa Malaquias 4:4, ang mga Judiyo ginlaygayan nga ‘dumdumon . . . ang kasuguan ni Moises.’ Gani dapat naton karon sundon ang “kasuguan ni Cristo,” subong sang ginsambit sa Galacia 6:2. Ang mga makalampuwas sa Armagedon pat-od gid nga pagahatagan sing dugang pa nga mga instruksion pasad sa sini, kag isulat ini sa “mga linukot” sang Bugna 20:12 nga pagabuksan sa tion sang pagkabanhaw. Daw ano ka makalilipay yadto nga adlaw samtang ang mga ginbanhaw gikan sa patay pagatudluan sa paglakat sa estilo sang pagkabuhi sang “bag-ong duta”!—Bugna 21:1.
14, 15. (a) Paano nakilala ang modernong-adlaw nga Elias? (b) Anong responsabilidad ang ginahimo sang Elias nga klase?
14 Mangin kasugpon ina sang hilikuton sa pagtudlo nga ginsiling ni Jehova, subong sang narekord sa Malaquias 4:5: “Yari karon! Ipadala ko sa inyo si Elias nga manalagna sa wala pa mag-abot ang daku kag makakulugmat nga adlaw ni Jehova.” Sin-o inang modernong-adlaw nga Elias? Subong sang ginapakita sa Mateo 16:27, 28, sa pagpatuhoy sang iya “pagkari sa iya ginharian,” si Jesus nagsiling: “Ang Anak sang tawo magakari sa himaya sang iya Amay upod sang iya mga anghel, kag ugaling magatumbas sia sa tagsa ka tawo suno sa iya binuhatan.” Anom ka adlaw sang ulihi, sa isa ka bukid kaupod nanday Pedro, Santiago, kag Juan, “nagbaylo-dagway sia sa atubangan nila, kag nagsilaw ang iya nawong subong sang adlaw, kag ang iya mga panapton nagputi subong sang kapawa.” Nagaisahanon bala sia sa sining palanan-awon? Indi, kay “yari karon! nagpakita sa ila si Moises kag si Elias, nga nagapakighambal sa iya.”—Mateo 17:2, 3.
15 Ano ang kahulugan sini? Ginpakita sini si Jesus subong ang Daku Pa nga Moises sa tion sang iya pagkari sa paghukom. (Deuteronomio 18:18, 19; Binuhatan 3:19-23) Nian magapakig-upod sia sa modernong-adlaw nga Elias sa paghimo sang importante nga hilikuton, nga amo ang pagbantala sining maayong balita sang Ginharian sa bug-os nga duta antes mag-abot ang daku kag makakulugmat nga adlaw ni Jehova. Nagalaragway sang hilikuton sining “Elias,” ang Malaquias 4:6 nagasiling: “Lisuon niya ang tagipusuon sang mga amay sa mga anak, kag ang tagipusuon sang mga anak sa mga amay; agod indi ako mag-abot kag sakiton ang duta sing pagpakamalaut.” Busa si “Elias” ginpakilala subong ang matutom kag mainandamon nga ulipon nga klase sang hinaplas nga mga Cristiano sa duta, nga gintugyanan sang Agalon, nga si Jesus, sang Iya tanan nga pagkabutang. Nagalakip ini sang pag-aman sa panimalay sang pagtuo sing kinahanglanon nga espirituwal nga “pagkaon sa nagakaigo nga tion.”—Mateo 24:45, 46.
16. Anong makalilipay nga mga resulta ang nahimo sang Elias nga klase?
16 Sa bug-os nga kalibutan karon, makita naton ang makalilipay nga mga resulta sinang programa sa pagpakaon. Ginabahaan sang Lalantawan nga magasin, nga may 16,100,000 nga naimprinta kada guwa sa 120 ka hambal, 97 sini ginabalhag sing dungan, ang duta ‘sining maayong balita sang ginharian.’ (Mateo 24:14) Ginagamit ang iban pa nga mga publikasyon sa madamo nga hambal sa nanuhaytuhay nga paagi sang pagbantala kag pagtudlo nga hilikuton sang mga Saksi ni Jehova. Ang Elias nga klase, ang matutom kag mainandamon nga ulipon, alisto sa pag-aman sing bugana para sa tanan nga “mahunahunaon sang ila espirituwal nga mga kinahanglanon.” (Mateo 5:3) Dugang pa, yadtong nagbaton sang paglaum sining Ginharian kag nagpanghikot suno sa sini ginahugpong sa makatilingala nga bug-os kalibutan nga paghiusa. Nagalakip ini sa dakung kadam-an “gikan sa tanan nga pungsod kag tribo kag katawhan kag hambal.” (Bugna 7:9) Kon mahimo na ining hilikuton sa kasangkaron nga ginakinahanglan ni Jehova, nian magaabot ang katapusan, sa daku kag makakulugmat nga adlaw ni Jehova.
17. San-o hinali nga magaabot ang makakulugmat nga adlaw ni Jehova?
17 San-o gid bala hinali nga magaabot sa aton inang makakulugmat nga adlaw? Si apostol Pablo nagasabat: “Ang adlaw ni Jehova magaabot nga kaangay gid sa makawat sa kagab-ihon. Kon magsiling sila [ayhan sa pinasahi nga paagi]: ‘Paghidait kag kalig-unan!’ nian sa hinali ang kalaglagan magaabot sa ila subong nga ang kasakit sa pag-anak nagaabot sa babayi nga nagadala; kag indi sila nga mas-a makalikaw.”—1 Tesalonica 5:2, 3.
18, 19. (a) Paano ginpahayag ang “paghidait kag kalig-unan”? (b) San-o makatigayon sing paumpaw ang katawhan ni Jehova?
18 Sin-o ang “sila” sa sining tagna? Sila amo ang mga lider sa politika nga nagapangangkon nga makasarang sila sa pagtukod sing isa ka nahiusa nga bag-ong kahimusan gikan sa napugdaypugday nga mga bahin sining masingki nga kalibutan. Ang ila daku nga mga produkto, ang Liga de Nasyones kag ang Nasyones Unidas, napaslawan sa pagtukod sini. Subong sang gintagna sang manalagna ni Jehova, bisan karon sila “nagasiling, ‘Paghidait! paghidait!’ nga wala sing paghidait.”—Jeremias 6:14; 8:11; 14:13-16.
19 Samtang, ginabatas sang katawhan ni Jehova ang mga pag-ipit kag mga paghingabot sining walay dios nga kalibutan. Apang sa dili madugay, subong sang ginasiling sang 2 Tesalonica 1:7, 8, makasapo sila sing paumpaw “sa pagpahayag ni Ginuong Jesus gikan sa langit kaupod sang iya gamhanan nga mga anghel sa nagadabdab nga kalayo, samtang nagatimalus sia sa mga wala nagakilala sa Dios kag sa mga wala nagatuman sang maayong balita sang aton Ginuong Jesus.”
20. (a) Ano ang gintagna ni Sofonias kag ni Habacuc nahanungod sa adlaw nga ‘nagadabdab kaangay sang hurno’? (b) Anong laygay kag pagpalig-on ang ginahatag sining mga tagna?
20 Daw ano ina kalapit? Madamo sa aton ang madugay na nga naghulat. Samtang, madamong mahagop nga makalampuwas ang nagasabat sa panawagan sa Sofonias 2:2, 3: “Pangitaa ninyo si Jehova . . . Pangitaa ang pagkamatarong, pangitaa ang pagkahagop. Ayhan malipdan kamo sa adlaw sang kaakig ni Jehova.” Nian, ang Sofonias 3:8 nagalaygay: “ ‘Busa hulata ninyo ako,’ siling ni Jehova, ‘tubtob sa adlaw nga magtindog ako sa inagaw, kay ang akon hudisyal nga desisyon amo ang pagtipon sang mga pungsod, agod nga matingob ko ang mga ginharian, sa pag-ula sa ila sang akon kaalipungot, ang bug-os kong mapintas nga kaakig; kay ang bug-os nga duta lamunon sang kalayo sang akon kakugi.’ ” Malapit na ang katapusan! Nahibaluan ni Jehova ina nga adlaw kag oras kag indi niya pagbag-uhon ang iya gintangdo nga tion. Dapat kita magbatas sing mapailubon. “Kay ang palanan-awon naigo pa sa pinat-ud nga tion, kag padayon ini nga nagadalidali sa katapusan, kag ini indi magbutig. Bisan magpalantang, padayon nga hulata ini; kay sa pagkamatuod magaabot ini. Indi ini magpalantang.” (Habacuc 2:3) Ang makakulugmat nga adlaw ni Jehova madasig nga nagahilapit sing labi pa. Dumduma, ina nga adlaw indi magpalantang!
Bilang Repaso:
◻ Kamusta ang mga gumalahom kag ang mga ginagamhan sa makakulugmat nga adlaw ni Jehova?
◻ Anong sahi sang Dios si Jehova?
◻ Anong sahi sang pagtudlo ang ginalaragway para sa katawhan sang Dios?
◻ Paano kita ginalaygayan sang mga manalagna sang Dios bangod sang pagkalapit sang katapusan?
[Retrato sa pahina 21]
Sadtong panahon sang Inkisisyon sang Espanya madamo ang napilitan nga makumbertir sa Katolisismo
[Credit Line]
The Complete Encyclopedia of Illustration/J. G Heck