Daw Ano Kadugay ang Hulaton sang mga Imol?

“Kon ang isa ka hilway nga kalibutan indi makabulig sa kadam-an nga imol, indi ini makaluwas sa pila lamang nga manggaranon.”​—⁠John F. Kennedy.

“LUYAG ko nga ang palaabuton mangin masanag para sa tanan​—⁠wala sing kaimulon, wala sing bisan sin-o nga nagatulog sa parke, isa ka paraiso!” Amo sina ang ginhambal sang isa ka 12-anyos nga bata nga lalaki nga taga-São Paulo, Brazil. Apang posible bala nga dulaon ang kaimulon? Daw ano kadugay ang hulaton sang mga imol?

Ginakabig sang iban ang ila kaugalingon nga imol bangod indi nila mabakal ang mga butang nga naluyagan nila. Apang, hunahunaa ang makapasubo nga kahimtangan sang matuod gid nga mga imol. Mahanduraw mo bala ang daku gid nga kabudlayan kag kasubo sina nga mga tawo? Ang iban dapat makig-agaw sa mga pispis kag mga ilaga samtang ginabaluskay nila ang mga basura agod may makaon! Daw ano kadugay magapaantos ina nga kaimulon sa katawhan? Nagakaigo gid ang pakiluoy ni Federico Mayor, direktor-heneral sang ­UNESCO (Uni­ted Na­tions Educa­tional, Scien­tific, and Cul­tural Organi­zation), “Biyaan naton inang dinagakaigo nga pagkamatinuguton nga nagahimo sa aton nga tugutan ang indi matugutan​—⁠ang kaimulon, ang gutom kag ang pag-antos sang minilyon ka tawo.”

Matuman ayhan ang ginadamgo nga kaayo sa bug-os nga kalibutan? Ano ang paglaum sang mga imol?

Ano ang mga Kahigayunan sang mga Imol?

Ang mainulikdon nga mga lider nagapanugda sing dugang pa nga mga trabaho, mas mataas nga mga sweldo, napauswag nga mga programa para sa katilingban, kag reporma sa duta. Mahimo nga nagaugyon sila sa anay presidente sang E.U. nga si John F. Kennedy: “Kon ang isa ka hilway nga katilingban indi makabulig sa kadam-an nga imol, indi ini makaluwas sa pila lamang nga manggaranon.” Apang, indi lamang maayong mga katuyuan ang kinahanglan sa pagdula sang kaimulon. Halimbawa, makabulig bala ang pag-uswag sang ekonomiya sa mga imol sa kabilugan? Indi sing bug-os. Ang anay lider sang India nga si Jawaharlal Nehru nagsiling: “Ang puwersa sang isa ka kapitalista nga katilingban, kon indi pagpunggan, magahimo sa manggaranon nga magmanggaranon pa gid kag sa mga imol nga mag-imol pa gid.” Apang, luwas sa kabudlayan kag kinawad-on, ang pagbatyag sing pagkawalay pulos dugang pa nga nagapabug-at sa mga imol. Mabuligan bala sang tawhanon nga mga lider ang mga imol agod malandas ang pagbatyag sing pagkawalay mahimo kag pagkawalay paglaum?

Ang matuod, madamo sang desperado nga mga imol ang nakatuon sa pagbatas sang kaimulon kag sa paglandas sang ginabatyag nga manubo nga pagtahod sa kaugalingon sa atubangan sang daku nga mga kabudlayan, subong sang nagatimbuok nga implasyon kag pagkawalay palamugnan. Dugang pa, ang tiggulutom, pagkawalay puluy-an, kag ang pag-antos pat-od gid nga madula sing bug-os. Nakibot ka bala sa sini? Ginaagda namon ikaw nga basahon ang masunod nga artikulo: “Sa Indi Na Lang Madugay, Wala Na sing Imol!”