Pagsikway—Isa Bala ka Mahigugmaon nga Aman?
“BALAAN, balaan, balaan si Jehova nga Dios, ang Labing Gamhanan.” (Bugna 4:8) Nahisanto sa sinang paglaragway, si Jehova amo ang Ginhalinan sang balaan nga mga talaksan. Ginpahamtang ini sa “balaan nga mga sinulatan,” kag obligado ang mga Cristiano nga tumanon ining mga sulundan. Sa pagkamatuod, dapat nila likawan ang bisan anong butang nga dimatinlo sa mga mata ni Jehova.—2 Timoteo 3:15; Isaias 52:11.
Ang Biblia maathag nga nagasugo: “Nahisuno sa Balaan nga Isa nga nagtawag sa inyo, magpakabalaan man kamo gid sa tanan ninyo nga paggawi, kay nasulat na: ‘Magpakabalaan kamo, kay balaan ako.’ ” (1 Pedro 1:15, 16) Sugod sang nagluntad ang Cristianong kongregasyon sang nagligad nga 19 ka siglo, ang matuod nga mga Cristiano nakig-away sing lakas sa pag-amlig sini gikan sa espirituwal kag moral nga pagkadimatinlo.—Judas 3.
Kon Ngaa ang Pangamlig Kinahanglanon
Ang tanan nga mga alagad sang Dios nagaatubang sing hangkat nga magpabilin nga matinlo sa moral kag sa espirituwal. Bangod sina, tatlo ka makusog nga mga kaaway ang dapat batuan—si Satanas, ang iya kalibutan, kag ang aton makasasala undanon nga mga huyog. (Roma 5:12; 2 Corinto 2:11; 1 Juan 5:19) Ang kalibutan ni Satanas magasulay sa inyo nga magmangin imoral, magabuyok sa inyo nga batunon ang mga dalanon sini, kag magatanyag sa inyo sing materyal nga manggad, kabantugan, posisyon, kabansagan, kag gahom. Apang yadtong determinado sa pagsunod sa matuod nga pagsimba nagasikway sa ginatanyag ni Satanas kag nagapabilin nga “walay dagta gikan sa kalibutan.” Ngaa? Bangod luyag nila magpabilin sa idalom sang maamligon kag mahigugmaon nga pagtatap sang matinlo nga organisasyon ni Jehova.—Santiago 1:27; 1 Juan 2:15-17.
Si Jehova nag-aman sing bulig para kay bisan sin-o nga katapo sang Cristianong kongregasyon nga naganyat sa mga pagsulay ni Satanas bangod sang tawhanon nga kaluyahon. Ang kalipikado sa espirituwal nga mga gulang gintangdo sa pag-amlig sa kongregasyon kag sa pagbulig sing mahigugmaon sa mga nakasala nga maghinulsol sa ila sala kag maghimo sing mga pagbag-o nga kinahanglanon agod makapanumbalik sa normal nga kahimtangan. Ang bisan sin-o nga Cristiano nga nakahimo sing sala dapat mapailubon nga buligan sa paghinulsol kag sa pagbalhin sang iya mga dalanon.—Galacia 6:1, 2; Santiago 5:13-16.
Kon Paano ang Pagsikway Mahigugmaon
Ang bawtismado nga mga alagad ni Jehova nga hungod nga nagalakat sa malauton nga dalanon kag wala nagabalhin dapat tamdon subong dimahinulsulon kag sa amo dinagakabagay sa Cristianong pag-inupdanay. (Ipaanggid ang 1 Juan 2:19.) Inang mga indibiduwal indi mahimo tugutan nga magpabilin sa matinlo nga Cristianong kongregasyon kag sa sina nga paagi latnan ini. Dapat sila pahalinon.
Ang pagkanagakaigo sang pagpahalin sa sadtong nagahimo sing malauton nga mga buhat sarang mailustrar paagi sa masunod nga kahimtangan: Bangod sang pagdugang sang mga pagpanggubat kag masingki nga mga krimen batok sa mga estudyante, ginsunod sang iban nga mga eskwelahan ang pagsulundan nga “nagapatuman sang bug-os kabuhi nga pagsuspende sa mga estudyante nga nagagamit ukon nagapamahog sa paggamit sing mga hinganiban,” report sang The Globe and Mail, isa ka pamantalaan sa Toronto, Canada. Ang pagpahalin ginahimo agod amligan ang mga estudyante nga luyag makabenepisyo gikan sa programa sa pagtuon nga wala napaidalom sa masingki nga mga buhat.
Ngaa mahigugmaon nga pahalinon ang isa ka dimahinulsulon nga makasasala gikan sa kongregasyon? Isa ini ka pagpakita sing gugma kay Jehova kag sa iya mga dalanon. (Salmo 97:10) Ini nga buhat nagapakita sing gugma para sa mga nagalakat sa matarong nga dalanon bangod ginapahalin sa tunga nila ang isa nga nagaimpluwensia sa ila sing malain. Nagaamlig man ini sa kaputli sang kongregasyon. (1 Corinto 5:1-13) Kon ang daku nga imoralidad ukon espirituwal nga pagkadimatinlo gintugutan nga magpabilin sa kongregasyon, mahigkuan ini kag mangin dinagakaigo sa paghimo sing sagrado nga pag-alagad kay Jehova, nga balaan. Dugang pa, ang pagpahalin sa nakasala mahimo nga magabulig sa iya nga makita ang kabug-aton sang iya balingag nga dalanon, magahinulsol, kag magahimo sing kinahanglanon nga mga pagbalhin kag sa amo batunon liwat pasulod sa kongregasyon.
Ang Epekto sa Iban
Kon ang isa ka katapo sang kongregasyon nagahimo sing mabug-at nga sala, subong sang panglahi, wala niya ginapahalipay ang tagipusuon ni Jehova. (Hulubaton 27:11) Ang bisan sin-o nga Cristiano nga nakahimo sing seksuwal nga imoralidad pat-od gid nga wala nagahunahuna kaangay sang ginhimo ni Jose sang gintinguhaan sang asawa ni Potifar nga maghulid sia sa iya. Ang reaksion ni Jose amo: “Paano bala nian nga makahimo ako sining daku nga kalainan kag magpakasala batok sa Dios?” (Genesis 39:6-12) Gintahod ni Jose ang balaan nga mga talaksan ni Jehova kag nagpalagyo gikan sa makasululay nga kahimtangan. Sa pihak nga bahin, ang isa ka makihilahion daw nakulangan sing nagakaigo nga gugma sa Dios sa pagpugong nga indi paayawan ang iya undanon nga kailigbon.—Galacia 5:19-21.
Ang bawtismado nga tawo nga nagalapas sang mga sugo sang Dios wala nagapakita sing kabalaka nahanungod sa halit kag sakit nga pagahimuon niya sa iya tumuluo nga mga himata. Ang emosyonal nga epekto nagalabaw pa sa mabatas sang iban. Sa tapos matukiban nga ang iya anak nga lalaki imoral, ang isa ka Cristianong babayi nanalambiton: “Diutay lamang, kon may yara gid man, nga mga utod nga lalaki kag babayi ang daw nakahangop kon daw ano kasakit kag kasubo sa amon. . . . Nabuong ang amon tagipusuon.” Ang maayo nga ngalan sang bug-os nga pamilya mahimo nga pangduhaduhaan. Ang kapung-aw kag ang pagbatyag nga balasulon mahimo nga magatublag sa matutom nga mga katapo sang pamilya. Sa amo ang malaut nga dalanon sang nakasala nagadala sing kasakit sa pamilya.
Mahigugmaon nga Bulig Para sa mga Katapo sang Pamilya
Dapat dumdumon sang matutom nga mga katapo sang Cristianong pamilya sang ginpahalin nga mga indibiduwal nga ang pagsikway gikan sa kongregasyon (disfellowship) mahigugmaon kag maamligon. Ang tanan posible nga panikasog ginahimo agod buligan ang nakasala. Apang kon napamatud-an sia nga dimasinulundon sa Dios kag matig-a nga wala nagahinulsol, ang kongregasyon kinahanglan amligan kag wala na sing iban nga mahimo pa kundi ang magpanghikot subong sang ginasugo sang Pulong sang Dios: “Isikway ninyo ang tawo nga malaut sa tunga ninyo.” (1 Corinto 5:13) Subong sang ginsiling sang isa ka Saksi, “ang pagsikway pagkamainunungon kay Jehova.”
Kon ang isa ka katapo sang pamilya ginsikway gikan sa kongregasyon, ang Cristianong mga himata nagabatyag sing kasakit. Busa dapat himuon sang gintangdo nga mga gulang ang bug-os nila nga masarangan agod mangin makapapagsik sa espirituwal sa ila. (1 Tesalonica 5:14) Ang mga gulang mahimo makapangamuyo para sa ila kag kaupod nila. Sa masami mahimo duawon ining matutom nga mga Cristiano agod hambalan ang makapalig-on nga mga panghunahuna sa Kasulatan. Dapat gamiton sang mga manugbantay sang panong ang tanan nga kahigayunan agod pabakuron ining mga pinalangga sa espirituwal antes kag pagkatapos sang Cristianong mga miting. Ang dugang nga pagpalig-on sarang mahatag paagi sa pag-upod sa ila sa ministeryo sa latagon. (Roma 1:11, 12) Dapat pakitaan sang espirituwal nga mga manugbantay ining matutom nga mga alagad ni Jehova sing gugma kag igtalupangod nga nagakabagay sa ila.—1 Tesalonica 2:7, 8.
Ang makasasala nga dalanon sang isa ka tawo indi rason agod indi pagsapakon ang bisan sin-o sa iya pamilya nga nagapabilin nga matutom kay Jehova. Ang malaut nga si Hari Saul sang Israel ginsikway sang Dios, apang wala ini gintugutan ni David nga mag-upang sa iya kaugalingon nga pagpalangga sa anak ni Saul nga si Jonatan. Sa katunayan, ang higot sa ulot ni David kag ni Jonatan nangin tuman kabakod. (1 Samuel 15:22, 23; 18:1-3; 20:41) Gani ang tanan sa kongregasyon dapat mangin masinakdagon kag mahigugmaon sa mga Cristiano nga ang ila mga paryente nakasala batok kay Jehova.
Daw ano ka dimahigugmaon nga indi pagsapakon ukon tamdon sing malain inang mga matutom! Ang maunungon nga mga katapo sang pamilya pinasahi nga nagakinahanglan sing pagpalig-on. Ayhan nagabatyag sila nga nagaisahanon kag nabudlayan katama sa ila kahimtangan. Ayhan mapaambit ninyo sa ila ang isa ka espirituwal nga balita ukon makapalig-on nga balita paagi sa telepono. Kon ang tawo nga ginsikway sa kongregasyon ang makasabat sa telepono, pangabaya lamang sia nga mahambal ang Cristianong paryente. Mahimo ninyo maagda ang matutom nga mga katapo sa sinang panimalay sa isa ka sosyal nga pagtilipon ukon pagkaon sa inyo puluy-an. Kon makita ninyo sila samtang nagapamalaklon, mahimo ninyo gamiton inang okasyon para sa makapalig-on nga pag-updanay. Dumduma, ang maunungon nga mga Cristiano nga may na-disfellowship nga mga paryente bahin gihapon sang matinlo nga organisasyon ni Jehova. Madali nila ihamulag ang ila kaugalingon kag maluyahan sing buot. Busa, mangin alisto nga pakitaan sila sing kalulo kag gugma. Padayon sa paghimo sing maayo ‘ayon sa tanan nga may labot sa imo sa pagtuo.’—Galacia 6:10.
Apresyaha ang Aman ni Jehova
Daku gid ang aton pasalamat nga si Jehova nga Dios nagapakita sing mapinalanggaon nga kabalaka sa kada isa sa bug-os kalibutan nga panimalay sang iya mga sumilimba. Paagi sa iya organisasyon mahigugmaon sia nga nag-aman sing kahimusan sa pagbulig sa aton sa paglakat sa atubangan niya sa matarong nga paagi. Bisan kon ang isa ka katapo sang pamilya hungod nga nagabuhat sing sala kag dapat pahalinon gikan sa kongregasyon, may paagi nga makabalik kon magahinulsol gid sia. Ginailustrar ini sang masunod nga halimbawa:
Gintinguhaan sang mga gulang nga buligan ang isa ka babayi nga tawgon naton si Anna, apang nabuyo sia sa pagpanigarilyo, pag-inom, kag pagdroga. Indi sia mahinulsulon kag wala magpabilin sa kongregasyon. Apang, wala madugay, ginkahidlawan ni Anna ang mahigugmaon nga pag-ululupod sang matinlo nga kongregasyon ni Jehova kag nangamuyo sing bulig sa iya. Ginabaton niya nga wala niya mahangpan sing bug-os ang daku nga pag-ulikid sang mga gulang sa mga nagtalang. Nagtambong liwat sa mga miting si Anna, kag nagdul-ong ini sa paghinulsol. Pagkatapos sadto, ginbaton sia liwat sa mahigugmaon kag maamligon nga kongregasyon. Sa liwat, ginasakdag ni Anna ang mataas nga talaksan ni Jehova tuhoy sa moralidad. Nagapasalamat sia sa gugma nga ginpakita sang mga gulang kag nagkomento man: “Indi ninyo mahanduraw kon daw ano ka daku ang nabulig sa akon sang Cristianong mga publikasyon. Ginaatipan gid ni Jehova ang aton mga kinahanglanon.”
Huo, ang Dios nag-aman sing dalan pabalik para sa mga ginpahalin gikan sa kongregasyon apang naghinulsol sang ulihi. Nakita naton nga bisan ang pagsikway gikan sa kongregasyon mismo isa ka mahigugmaon nga aman. Apang daw ano pa kaayo nga likawan ining makahalanusbo nga inagihan paagi sa pagpabilin pirme sa matarong nga mga dalanon sang aton balaan nga Dios! Kabay nga pasalamatan naton pirme ang pribilehiyo nga madayaw si Jehova subong bahin sang iya matinlo, mahigugmaon, kag maamligon nga organisasyon.
[Retrato sa pahina 26]
Ginapakitaan mo bala sing gugma ang matutom nga mga himata sadtong ginpahalin gikan sa kongregasyon?