Mga Pamangkot Gikan sa mga Bumalasa

Si Maria nga nangin iloy ni Jesus nagamabdos na bala sang ginduaw niya ang iya himata nga si Elisabet?

Huo, nagamabdos na sia.

Sa Lucas, kapitulo 1, una naton nabasa ang nahanungod sa pagmabdos ni Elisabet, nga asawa sang saserdote nga si Zacarias, nga nag-anak kay Juan (Bautista). Sang si Elisabet yara sa “iya ikan-om nga bulan ang anghel nga si Gabriel” nagduaw kay Maria sa pagsugid sa iya nga magamabdos sia kag magabun-ag sa “Anak sang Labing Mataas.” (Lucas 1:​26, 30-33) Apang san-o nagmabdos si Maria?

Ang rekord ni Lucas nagapadayon sa pagsugid nga sa gilayon naglakbay si Maria sa Juda sa pagduaw sa iya nagamabdos nga himata nga si Elisabet. Sang nagkitaay ang duha ka babayi, ang lapsag (si Juan) nagkibo sa tiyan ni Elisabet. Ginhinambitan ni Elisabet ang ‘bunga sang tiyan ni Maria,’ kag gintawag si Maria nga “iloy sang akon Ginuo.” (Lucas 1:​39-44) Busa ang makatarunganon nga konklusion amo nga nagapanamkon na si Maria, nga nagamabdos na sia sang nagduaw sia kay Elisabet.

Ang Lucas 1:56 nagadugang: “Nian si Maria nagpabilin kaupod niya sing mga tatlo ka bulan, kag nagbalik sa iya kaugalingon nga puluy-an.” Ining bersikulo wala nagahatag sing sibu nga kalkulasyon tubtob sa eksakto nga adlaw sa kalendaryo. Ini nagasiling “sing mga tatlo ka bulan,” nga nagapakita nga yara na si Elisabet sa iya ikasiam nga bulan sang pagmabdos.

Sa tapos makapiyanpiyan kay Elisabet sa naulihi nga bahin sang iya pagmabdos, si Maria nagpauli sa Nasaret. Ayhan narealisar ni Maria nga kon makabata si Elisabet (kay Juan), madamo ang mga bisita, ang iban sa ila mga himata nila. Makasalaw-a ukon makahuluya ina para sa isa ka diminyo nga lin-ay nga nagamabdos mismo. Daw ano kadugay na nagamabdos si Maria sang maghalin sia sa Nasaret? Sanglit kaupod sia ni Elisabet “sing mga tatlo ka bulan,” mahimo nga si Maria manugtatlo ka bulan ukon sa ikaapat nga bulan sang iya pagmabdos sang nagbalik sia sa Nasaret.