Nagbag-o na ang Panahon
DAW ano gid siguro ka makalilipay ang pagkabuhi anay sa dumaan nga Israel sa idalom sang mahimayaon nga paggahom sang matutom nga si Hari Solomon! Isa yadto ka dag-on sang kalinong, kahamungayaan, kag kalipay. Sa sulod sang tion nga si Solomon matutom nga nagsakdag sang matuod nga pagsimba, bugana nga ginpakamaayo ni Jehova ang pungsod. Kay Hari Solomon, wala lamang maghatag ang Dios sing dakung manggad kundi man sing “maalam kag mahinangpanon nga tagipusuon” agod makagahom si Solomon sa pagkamatarong kag gugma. (1 Hari 3:12) Ang Biblia nagasiling: “Ang tanan nga hari sang duta naghimulat sa pagpakigkita kay Solomon sa pagpamati sang iya kaalam, nga ginbutang sang matuod nga Dios sa iya tagipusuon.”—2 Cronica 9:23.
Sa katawhan, naghatag si Jehova sing kalig-unan, kalinong, kag kabuganaan sa maayong mga butang. Ang Pulong sang Dios nagasiling: “Ang Juda kag Israel madamo subong sang balas nga yara sa baybayon sang dagat sa kadamuon, nga nagakaon kag nagainom kag nagapangalipay.” Sing literal kag malaragwayon, ang katawhan “padayon nga nagpuyo nga may kalig-unan, ang tagsa ka tawo sa idalom sang iya ubas kag sa idalom sang iya higuera . . . sa tanan nga adlaw ni Solomon.”—1 Hari 4:20, 25.
Nagbag-o na ang panahon. Ang kabuhi karon tuhay gid sa makalilipay nga mga adlaw sang una. Dikaangay sang tion ni Solomon, ang daku nga problema karon amo ang kaimulon. Bisan gani sa manggaranon nga mga pungsod, may yara kaimulon. Halimbawa, sa Estados Unidos kag sa European Union, halos 15 porsiento sang katawhan ang nagakabuhi sa kaimulon, siling sang Development Program sang Nasyones Unidas.
Tuhoy sa kahimtangan sa bug-os nga globo, ang The State of the World’s Children 1994, isa ka report sang UNICEF (United Nations Children’s Fund), nagasiling nga ikalima nga bahin sang populasyon sang kalibutan ang nagakabuhi sa daku gid nga kaimulon, kag nagadugang pa nga ang kabuhi para sa kalabanan nga imol sang kalibutan “dugang kag dugang pa nga nagabudlay kag walay paglaum.”
Sa pila ka pungsod, ang mga kabudlayan sang mga imol ginadugangan pa sang nagatimbuok nga implasyon. Ang isa ka babayi sa isa ka pungsod sa Aprika nagsiling: “May makita ikaw sa tiendahan, kag siling mo sa imo kaugalingon, ‘OK, mapauli ako kag magkuha sing kuwarta agod baklon ini.’ Nagabalik ka pagligad sang isa ka oras kag singganan ka lang nga kulang ang imo kuwarta kay ang prisyo bag-o lang magsaka. Ano ang himuon sang isa ka tawo? Makaulugot gid.”
Ang isa pa ka babayi didto nagsiling: ‘Agod mabuhi, wala na namon ginasapak ang iban nga mga kinahanglanon. Ang ginakabalak-an lang namon karon amo kon paano makabakal sing kalan-on.’
Suno sa Nasyones Unidas, ang palaabuton madulom. Halimbawa, ginabulubanta sang UNICEF nga kon magpadayon ang karon nga kadasigon sang pagdamo sang populasyon, ang kadamuon sang imol nga katawhan sa bug-os nga kalibutan magadugang sing apat ka pilo “sa sulod sang isa lamang ka kalawigon sang kabuhi.”
Apang, walay sapayan sang nagalain nga mga kahimtangan sa pangabuhi kag sa katilingban, may rason ang mga alagad sang Dios nga magmalaumon. Bisan pa nagapuyo sila sa tunga sang mga tawo nga nagakadulaan sing paglaum sa palaabuton, ginatulok sang mga alagad sang Dios ang palaabuton nga may kalipay kag pagsalig. Ang masunod nga artikulo magausisa sang mga rason kon ngaa.
[Credit Line sang retrato sa pahina 3]
De Grunne/Sipa Press