Ang mga Padya sang Pagkamapinadayunon

ISA sia ka Griegong babayi nga nagapuyo sa Fenicia sang tuig 32 C.E. Ang iya anak nga babayi nagamasakit sing malubha, kag ang babayi wala pasingadtuan agod mabulong ang iya anak. Nakabati tuhoy sa isa ka dumuluong nga nagaduaw sa iya rehiyon​—⁠isa ka dumuluong nga kilala nga may gahom sa pag-ayo sa masakiton​—⁠determinado sia nga makita sia kag mangayo sang iya bulig.

Sang nakita niya sia, nagluhod sia, nga nagapakitluoy: “Kaluuyi ako, Ginuo, Anak ni David. Ang akon anak nga babayi ginasakit sing tama sang yawa.” Sa sinang paagi, ang Griegong babayi nakitluoy kay Jesus agod bulngon ang iya anak nga babayi.

Mahanduraw mo bala ang kaisog kag pagkamapainubuson nga ginkinahanglan sa iya bahin sa paghimo sini? Si Jesus isa ka awtorisado nga persona nga may gahom kag reputasyon, kag ginpahibalo niya antes sini nga indi niya luyag mahibal-an ni bisan sin-o kon sa diin sia. Gindala niya ang iya mga apostoles sa Fenicia agod makapahuway sing maayo, indi agod magbantala sa ditumuluo nga mga Gentil. Dugang pa, si Jesus isa ka Judiyo kag sia isa ka Gentil, kag walay duhaduha nga nahibal-an niya ang tuhoy sa paglikaw sang mga Judiyo sa pagpakig-angot sa gintamay nga katawhan sang mga pungsod. Walay sapayan, malig-on sia sa iya tinutuyo nga mabulong ang iya anak.

Si Jesus kag ang iya mga apostoles nagtinguha sa pagpalas-ay sa babayi sa pagpangayo sing bulig sa sadto nga tion. Sang primero, wala nagpakighambal si Jesus sa iya. Apang, bangod sang iya sulit-sulit, padayon nga pagsinggit, ang natak-an nga mga apostoles nagsiling kay Jesus: “Pahalina sia; kay nagasinggit sia sa aton ulihi.”

Apang indi sia mag-untat tubtob nga sabton ang iya ginapangabay.

Sa baylo, nagyaub sia sa tiilan ni Jesus, nga nagasiling: “Ginuo, tabangi ako!”

Ginapatalupangod ang iya panguna nga responsabilidad sa mga anak sang Israel kag, sa amo man nga tion, ginatilawan ang iya pagtuo kag determinasyon, ginpaathag ni Jesus sing maawaon sa iya: “Indi nagakaigo nga kuhaon ang tinapay sang mga anak [sang Israel] kag ipilak sa mga ido [mga Gentil].”

Sa baylo nga maakig sa negatibo nga pagpalahidlahid sa iya rasa, mapainubuson sia nga nagpadayon sa iya tinutuyo paagi sa pagsabat: “Matuod, Ginuo; walay sapayan ang mga ido nagakaon sing mga usik nga nagakahulog gikan sa latok sang ila mga agalon.”

Ginpadyaan ni Jesus ang pagkamapinadayunon sang Griegong babayi paagi sa pagdayaw sang iya pagtuo kag ginsabat ang iya mga pag-ampo. Handurawa ang iya kalipay sang nagpauli sia nga nakita ang iya anak nga nag-ayo sing bug-os!​—⁠Mateo 15:​21-28; Marcos 7:​24-30.

Kaangay sadtong babayi sang unang siglo, kinahanglan naton nga mangin mapinadayunon sa aton mga panikasog nga pahamut-an si Jehova kag tigayunon ang iya kahamuot. Subong sa kaso sang Griegong babayi, ginapasalig sa aton sang Biblia nga ang aton pagpadayon “sa paghimo sing maayo” pagapadyaan.​—⁠Galacia 6:⁠9.

Ano ang pagkamapinadayunon? Ngaa kinahanglanon ini? Anong mga butang ang mahimo bangdan nga mawasi naton ining kinaiya, nga mag-untat ukon mag-ampo? Anong mga padya ang sarang naton mapaabot nga batunon kon kita karon mapinadayunon sa pag-alagad sa aton Manunuga kag Amay, si Jehova?

Ang isa ka diksionaryo nagapaathag sang berbo nga “magpadayon” subong “magpanguyapot sing malig-on kag mabakod sa pila ka katuyuan, kahimtangan, ukon plano, walay sapayan sang mga balagbag, mga paandam, ukon mga kapaslawan. . . . magpadayon sa pagluntad; magpabilin.”

Ang Biblia sulitsulit nga nagapalig-on sa mga alagad ni Jehova nga magpadayon sa paghimo sang iya kabubut-on. Halimbawa, ginasilingan kita nga “magpadayon, nian, nga pangitaon anay ang ginharian,” ‘huptan ang maayo,’ “magpadayon sing malig-on sa pangamuyo,” kag dili “magpakaluya” sa paghimo sing maayo.​—⁠Mateo 6:​33; 1 Tesalonica 5:​21; Roma 12:​12; Galacia 6:⁠9.

Sa adlaw-adlaw nga pagkabuhi, ang pagkamapinadayunon isa ka kinaiya nga dapat naton tanan maangkon kag palambuon agod makalampuwas. Kon wala ini indi naton sarang matigayon ang bisan ano nga matuod, nagapadayon nga kabilihanan. Binagbinaga ang halimbawa sang isa ka lapsag nga nagatinguha sa pagtindog kag nagahimo sang iya una nga mga pagtakangtakang. Indi kinaandan para sa isa ka bata nga makatuon sa pagtindog kag makalakat dayon sing diretso sa isa lamang ka adlaw. Subong mga lapsag, kita tanan ayhan nagtinguha kag napaslawan sing madamong beses antes kita sang ulihi nagmadinalag-on sa paglakat. Ano ayhan ang natabo kon sa una nga pagkatumba, namat-od kita nga mag-untat sa pagtinguha? Ayhan nagakamang pa kita gihapon! Ang pagkamapinadayunon kinahanglanon sa paglab-ot sa importante nga mga tulumuron kag pagtigayon sing katumbas nga pagdugang sang kalantip kag pagtahod sa kaugalingon. Subong ginasiling sang isa ka bantog nga hambalanon, “Ang mga nagadaug wala nagauntat, kag ang mga nagauntat wala nagadaug.”

Narealisar sang madugay na nga mga payunir nga ang kadalag-an wala nasandig sa pinasahi nga mga ikasarang ukon mga kinaadman. Nagakinahanglan ini sing kalig-on, isa ka determinasyon sa paghimo sang kabubut-on ni Jehova sing bug-os, kag kaisog sa atubang sang temporaryo nga mga kapaslawan, bisan pa gani sang kapung-aw. Ang tulumuron nga makig-ambit sing dayon sa mga pagpakamaayo sang Dios dapat huptan sing maathag.

Huo, tanan kita nga nagatinguha sing kahamuot ni Jehova kag nagatinguha nga magdaug sa dalaganon sang kabuhi nagakinahanglan sing pagkamapinadayunon, kalig-on, kag pagbatas. Kon wala ining mga kinaiya, ayhan mawasi naton ang kahamuot ni Jehova kag ang padya nga matuod nga kabuhi.​—⁠Salmo 18:​20; Mateo 24:​13; 1 Timoteo 6:​18, 19.

Masami nga mas mabudlay para sa isa ka Cristiano nga mangin mapinadayunon sa iya espirituwal nga mga hilikuton sangsa iban niya nga mga obligasyon. Mahimo nga ang isa ka tawo magpadayon sa pagpangabudlay sing lakas sa sekular nga trabaho agod atipanon ang pisikal nga mga kinahanglanon sang iya pamilya, apang mahimo nga sia ‘kapoy kaayo’ sa pagdumala sing regular nga pagtuon sa Biblia upod sa iya asawa kag mga anak. Anong mga butang ang nagapabudlay sa madamo nga magpadayon sa Cristianong mga hilikuton?

Ang isa ka butang amo ang pagluya sang buot, nga nagahalin mismo sa aton kaugalingon nga mga kakulangan kag mga kaluyahon. Kon pirme naton ginahunahuna ang aton mga sayop, mahimo kita maluyahan kag mag-untat, nagabatyag nga si Jehova indi gid magapatawad sa aton sang tanan naton nga sala.

Ang isa pa ka butang amo ang kalibutanon nga impluwensia sang imoralidad, kagarukan, kag dumot. (1 Juan 2:​15, 16) Ang isa sang “maayong pamatasan” nga sarang madunot ukon maguba sang kalibutanon nga impluwensia amo ang Cristianong pagkamapinadayunon.​—⁠1 Corinto 15:⁠33.

Ang aton pagkamapinadayunon sa pagbantala nga hilikuton sarang mapaluya sang mga pagpamatok sang publiko ukon pagpasapayan sa aton balaan nga pag-alagad. Bangod sang kalugaw-an, mahimo kita maghinakop nga ang mga tawo sa aton teritoryo indi luyag sa kamatuoran. Makadul-ong ini sa aton sa pagpamangkot, ‘Para ano pa?’ kag talikdan ang aton pinasahi nga pribilehiyo sang pag-alagad sa ministeryo.

Sarang man kita maimpluwensiahan sang pagpatuyang sa kaugalingon nga espiritu sang kalibutan. Ngaa dapat kita maghimakas kag magsakripisyo sing tuman samtang ang tagsatagsa naman daw nagakalipay sa ila kaugalingon ukon nagapahapos lang?​—⁠Ipaanggid ang Mateo 16:​23, 24.

Agod makapadayon sa paghimo sing kabubut-on ni Jehova, kinahanglan nga magsul-ob kita sing Cristianong personalidad kag magkabuhi suno sa espiritu, indi sa unod. (Roma 8:​4-8; Colosas 3:​10, 12, 14) Ang pagtigayon sing pagtamod ni Jehova sa mga butang magabulig sa aton sa pagpadayon sa aton importante espirituwal nga mga hilikuton.​—⁠1 Corinto 16:⁠13.

Mga Halimbawa sang Pagkamapinadayunon

Nagaaman sa aton si Jehova sang madamo makapapagsik nga halimbawa sang mga alagad nga nagpabilin nga mainunungon kag matutom sa iya sa idalom sang madamo grabe nga mga pagtilaw. Paagi sa pagbinagbinag sini, makita naton kon paano kita makapalambo kag makapakita sing Cristianong pagkamapinadayunon kag kon ngaa importante gid ini.

Ang pinakadaku nga halimbawa amo si Jesus, nga nag-antos sing tuman agod mahimaya ang ngalan ni Jehova. Ginapalig-on kita sang Biblia nga tun-an sing maid-id ang iya mga buhat sang mapinadayunon nga debosyon: “Busa, nian, sanglit ginalibutan kita sing tama ka daku nga panganod sang mga saksi, isikway ta man ang tagsa ka kabug-atan kag ang sala nga nagatapik gid, kag magdalagan kita nga may pagbatas sang dalaganon nga ginabutang sa aton atubang, nga nagatulok sa Pangulong Ahente kag Manughimpit sang aton pagtuo, si Jesus. Bangod sa kalipay nga ginbutang sa iya atubang nagbatas sia sa usok sang pag-antos, nagatamay sang kahuluy-an, kag nagalingkod sa tuo sang trono sang Dios. Sa pagkamatuod, talupangda ang isa nga nagbatas sang amo nga pagsumpong sang mga makasasala batok sa ila kaugalingon, agod nga indi kamo paglapyuon kag pagpunawon sa inyo mga kalag.”​—⁠Hebreo 12:​1-3.

Ang dalaganon sang kabuhi isa ka malawig nga distansia, indi isa ka malip-ot nga palumba sa dalagan. Amo sina kon ngaa kinahanglan naton ang katulad-Cristo nga pagkamapinadayunon. Ang tulumuron, ang inangan, mahimo nga indi kitaon sa daku nga bahin sang palumba. Dapat nga mangin maathag ang tulumuron sa aton hunahuna agod nga sarang naton mahanduraw ini sa bug-os nga dalaganon. Si Jesus may subong sina nga imahinasyon sa iya atubang, nga amo, “ang kalipay nga ginbutang sa iya atubang.”

Ano ang ginalakip sa sining kalipay para sa mga Cristiano sa karon? Isa sini, amo ang padya sang dimamalatyon nga kabuhi sa langit para sa pila kag walay katapusan nga kabuhi sa duta para sa madamo. Subong man, ang balatyagon sang pagkanaayawan nga nagagikan sa paghibalo nga ang isa nakadala sing kalipay sa tagipusuon ni Jehova kag nakapakigbahin sa pagbindikar sa ngalan sang Dios.​—⁠Hulubaton 27:​11; Juan 17:⁠4.

Nalakip sa sining kalipay amo ang suod, makalilipay nga kaangtanan kay Jehova. (Salmo 40:​8; Juan 4:34) Ina nga kaangtanan makapapagsik kag makasakdag sing kabuhi, nagahatag sa isa sing kusog sa pagdalagan sa dalaganon nga may pagbatas kag indi mag-untat. Dugang pa, ginapakamaayo ni Jehova ina nga kaangtanan paagi sa pagbubo sang iya balaan nga espiritu sa iya mga alagad, nga nagaresulta sa dugang nga kalipay kag makalilipay nga hilikuton.​—⁠Roma 12:​11; Galacia 5:⁠22.

Ang pagbinagbinag sa halimbawa ni Job sang mapinadayunon nga katutom mapuslanon. Dihimpit sia kag may limitado nga ihibalo tuhoy sa iya kahimtangan. Gani kon kaisa, nabuyo sia sa pagpakamatarong sang iya kaugalingon kag nalisdan. Apang, padayon sia nga nagpakita sing malig-on nga determinasyon agod huptan ang iya integridad kay Jehova kag wala gid magsikway sa Iya. (Job 1:​20-22; 2:​9, 10; 27:​2-6) Gin­padyaan ni Jehova si Job bangod sang iya mapinadayunon nga debosyon, ginhatagan sia sing espirituwal kag materyal nga mga pagpakamaayo kag sing paglaum nga kabuhi nga walay katapusan. (Job 42:​10-17; Santiago 5:​10, 11) Kaangay ni Job, mahimo nga makaeksperiensia kita sing tuman nga pag-antos kag kadulaan sa aton karon pagkabuhi, apang sarang man kita makasalig sang pagpakamaayo ni Jehova sa aton matutom nga pagbatas.​—⁠Hebreo 6:​10-12.

Sa modernong mga tion, ang mga Saksi ni Jehova sa kabilugan nagapadayag sing Cristianong pagkamapinadayunon sa paghimo sing kabubut-on ni Jehova. Halimbawa, ang ila padayon nga pamalaybalay nga hilikuton kag iban pa nga pagbantala sa publiko naghimo sa ila kag sa ila mensahe nga matalupangdan sa bug-os kalibutan. Madamo nga beses nga ginpatuhuyan sang media ang ila kakugi kag determinasyon sa pagbantala sing maayong balita walay sapayan sang pagpamatok kag mga pagtilaw. Ang isa sini nagpaguwa pa gani sing dinalan nga “Wala sing bisan sin-o nga makalikaw sa mga Saksi ni Jehova!”​—⁠Mateo 5:⁠16.

Ginpakamaayo ni Jehova ang padayon nga mga panikasog sang iya mga Saksi paagi sa nagadugang nga mga bunga sang pagministeryo. Talupangda ang eksperiensia sang pila ka mapahituon nga mga Saksi sa Italya sang katuigan 1960 sang may mga 10,000 ka Saksi nga nagabantala sa isa ka pungsod nga may kapin sa 53,000,000 ka tawo. Sa isa ka banwa nga may 6,000 ka pumuluyo, wala sing mga Saksi. Ang nagaduaw nga mga kauturan nakabaton sing dimaabiabihon nga reaksion sa ila ministeryo.

Sa tagsa ka tion nga nagakadto ang mga utod didto sa pagbantala, madamo sang mga babayi, kag bisan pa mga lalaki, sang banwa ang nagatipon sing kabataan nga mga lalaki, ginapalig-on sila nga sundan ang mga Saksi kag pituhan sila kag maghimo sing tuman nga gahod. Pagkatapos sang malip-ot nga tion sini, napilitan ang mga kauturan nga magbiya kag magkadto sa lain nga banwa. Sa panikasog nga makahatag sa dimagkubos sing isa ka bug-os nga pagpanaksi sa tanan nga pumuluyo sini nga banwa, nagpamat-od ang mga kauturan sa pagbantala didto sa tion lamang sing tuman nga tig-ululan, nagalaum nga indi sila madisturbo sang pamatan-on nga mga lalaki. Natalupangdan nila nga ang mga tawo sa banwa indi luyag nga mabasa agod lamang magdisturbo sa mga manugbantala. Sa sining paagi nahatag ang maayo nga pagpanaksi. Nasapwan ang interesado nga mga tawo. Nasugdan ang bag-o nga mga pagtuon sa Biblia. Subong resulta, wala lamang matukod ang isa ka mauswagon nga kongregasyon sa sadtong magamay nga banwa kundi nasugdan ang pagbantala nga hilikuton bisan sa tingadlaw. Padayon nga ginapakamaayo ni Jehova ang pagkamapinadayunon sang iya mga Saksi sa sadtong duog kag sa bug-os nga Italya. May kapin sa 200,000 ka mga Saksi ni Jehova na karon sa sina nga pungsod.

Daku ang mga padya sang pagkamapinadayunon sa paghimo kon ano ang husto. Paagi sa gahom sang espiritu sang Dios, nahimo sang mga Saksi ni Jehova ang isa ka buhat nga dimatupungan sa maragtas sang tawo, nga amo ang pagbantala sing maayong balita sang Ginharian, sa mga ganhaan kag subong man, sa minilyon ka tawo. (Zacarias 4:6) Makalilipay nga nakita nila ang nagakatuman nga tagna sang Biblia sa makatilingala nga pag-uswag kag pagkaaktibo sang dutan-on nga organisasyon ni Jehova. (Isaias 54:​2; 60:22) May matinlo sila nga konsiensia sa atubangan sang Dios, kag nagakalipay sila sa paglaum nga kabuhi nga walay katapusan. Labaw sa tanan, natigayon nila ang suod nga kaangtanan sa Manunuga, si Jehova nga Dios.​—⁠Salmo 11:⁠7.

[Mga retrato sa pahina 25]

Ginpadyaan ni Jesus ang mapainubuson nga pagkamapinadayunon sining Griegong babayi

[Retrato sa pahina 26]

Ang kabuhi sa Paraiso nalakip sa kalipay nga ginabutang sa atubang sang mga Cristiano karon