Mga Pamangkot Gikan sa mga Bumalasa
Ang 1 Juan 4:18 nagasugid sa aton: “Sa gugma walay kahadlok, apang ang himpit nga gugma nagasubol sang kahadlok.” Apang si Pedro nagsulat: “Higugmaa ang bug-os nga paghiliutod, kahadluki ang Dios.” (1 Pedro 2:17) Paano naton mapahisanto ining duha ka bersikulo?
Sanday Pedro kag Juan mga apostoles nga nakatuon sing direkta gikan kay Jesuscristo mismo. Busa makasalig gid kita nga ang ila ginsulat nagahisantuanay. Tuhoy sa mga bersikulo nga ginbalikwat sa ibabaw, ang rason amo nga ang duha ka apostoles nagahambal tuhoy sa magkatuhay nga sahi sang kahadlok.
Binagbinagon naton anay ang laygay ni Pedro. Subong ginapakita sang konteksto, ginahatagan ni Pedro ang iya mga masigka-Cristiano sing inspirado nga laygay tuhoy sa ila panimuot sa mga may awtoridad. Sa aton pa, nagahambal sia tuhoy sa nagakaigo nga pagtamod sa pagpasakop sa pila ka bahin. Gani, ginlaygayan niya ang mga Cristiano nga magpasakop sa mga tawo nga may awtoridad sa tawhanon nga mga panguluhan, subong sang mga hari ukon mga gobernador. (1 Pedro 2:13, 14) Sa pagpadayon, si Pedro nagsulat: “Tahura ang tanan nga tawo, higugmaa ang bug-os nga paghiliutod, kahadluki ang Dios, tahura ang hari.”—1 Pedro 2:17.
Pasad sa konteksto, maathag nga sang magsiling si Pedro nga ang mga Cristiano dapat ‘magkahadlok sa Dios,’ buot niya silingon nga dapat kita magpakita sing hanuot, masimbahon nga pagtahod sa Dios, ang kahadlok nga dimapahamut-an ang pinakamataas nga awtoridad—Ipaanggid ang Hebreo 11:7.
Kamusta naman ang komento ni apostol Juan? Sa una nga bahin sang 1 Juan kapitulo 4, ginpakita sang apostol ang kinahanglanon nga tilawan ang “inspirado nga mga ekspresyon” nga naghalin sa butig nga mga manalagna. Yadtong ekspresyon sing pat-od wala nagahalin kay Jehova nga Dios; nagahalin ini ukon nagapabanaag sang malauton nga kalibutan.
Sa kabaliskaran, ang hinaplas nga mga Cristiano “iya sang Dios.” (1 Juan 4:1-6) Gani, si Juan nagpanugda: “Mga hinigugma, maghigugmaanay kita sa isa kag isa, kay ang gugma gikan sa Dios.” Ang Dios ang naghimo sing una nga tikang sa pagpakita sing gugma—“ginpadala [niya] ang iya Anak subong katumbas nga halad sang aton mga sala.” (1 Juan 4:7-10) Ano dapat ang aton reaksion?
Sing maathag, dapat kita magpabilin nga nahiusa upod sa aton mahigugmaon nga Dios. Indi kita dapat makugmat sa iya ukon magkurog sa pagpalapit sa iya sa pangamuyo. Antes sini si Juan naglaygay: “Kon ang aton tagipusuon wala nagatagudili sa aton, may pagsalig kita sa atubangan sang Dios; kay ang bisan ano nga ginapangayo ta mabaton ta sa iya, kay ginabantayan ta ang iya mga sugo.” (1 Juan 3:21, 22) Huo, ang maayo nga konsiensia nagahatag sa aton sing kahilwayan sa pagpalapit sa Dios nga wala sang nagapugong ukon nagapangalag-ag nga kahadlok. Tungod sang gugma, nagabatyag kita nga hilway sa pagpanawag, ukon pagpalapit, kay Jehova sa pangamuyo. Tungod sini, “sa gugma walay kahadlok.”
Busa, tingubon naton ang ideya tuhoy sa duha ka sahi sang kahadlok. Ang Cristiano dapat pirme magpakita sing masimbahon nga kahadlok kay Jehova, bangod sang hanuot nga pagtahod sa iya posisyon, gahom, kag hustisya. Apang ginahigugma man naton ang Dios subong aton Amay kag nagabatyag sing kasuod sa iya kag kahilwayan sa pagpalapit sa iya. Sa baylo nga mangalag-ag bangod sang kahadlok sa iya, nagasalig kita nga makapalapit kita sa iya, subong sang isa ka bata nga hilway sa pagpalapit sa iya mahigumaon nga ginikanan.—Santiago 4:8.