Report sang mga Manugbantala sang Ginharian
Ang Pagpanaksi Nagapamunga sa Puluy-an kag sa Eskwelahan
ANG kabuhi sang Cristiano nagalakip sang paghimo sing maayo sa iban, paagi ilabi na sa pagpaambit sa ila sing maayong balita sang Ginharian sang Dios. Ang Hulubaton 3:27 nagasiling: “Dili pagpunggi ang maayo gikan sa ila sa diin naigo ini, kon yara ini sa gahom sang imo mga kamot sa paghimo sini.” Sa Argentina ginpaambit sang isa ka pamatan-on nga Saksi nga yara sa ikatlo nga tuig sa hayskul ang maayong balita sang Ginharian sa isa ka abyan sa eskwelahan. Ang iya ginhimo nakatigayon sing daku nga mga resulta.
Isa ka adlaw ginpaambit sang pamatan-on nga Saksi sa iya abyan nga indi tanan nga relihion maayo. Sang magsabat ang pamatan-on nga lalaki nga wala sia sing nahimo nga malain, ang Saksi nagsiling: “Kag wala ka man sing nahimo nga bisan ano para sa Dios.” Nagpahunahuna ini sa pamatan-on. Sang ulihi ginpaathag sang Saksi nga amo na ini ang katapusan nga mga adlaw kag agod mangin kalahamut-an sa Dios, ang isa dapat magkuha sing sibu nga ihibalo sa Biblia kag iaplikar ini. Nag-ugyon ang iya kabutho. Apang tugutan ayhan sia sang iya pamilya sa pagtuon sang Biblia? Agod hatagan ang iya abyan sing isa ka butang nga mahunahuna, ginpangabay sia sang Saksi nga basahon ang libro nga Mahimu Ka Mabuhi sing Dayon sa Paraiso sa Duta.
Nagligad ang mga adlaw, kag nag-untat sa pag-eskwela ang iya abyan. Wala na sing nabatian tuhoy sa iya sa kapin sa isa ka tuig. Nian isa ka adlaw ang pamatan-on nga Saksi nakibot sa pagkabaton sing tawag sa telepono gikan sa iya abyan nga nagasiling nga nakita niya nga ang mga tagna sang Biblia matuod gid nga nagakatuman. Sa gilayon ginhimos sang Saksi ang isa ka pagtuon sa Biblia upod sa iya.
Sang magkadto sia sa balay sang abyan niya anay sa eskwelahan, natalupangdan niya nga ang mga ginikanan sang iya abyan nabalaka gid sa kon ano ang ginsudlan sang ila anak nga lalaki. Bisan gani ang iya manghod nga lalaki naghunahuna nga nagbuang sia. Busa ginpaupod sang mga ginikanan ang manghod nga lalaki sa masunod nga pagtuon. Sang ulihi, upod ang mga luha sa iya mga mata, ginsugiran sining pamatan-on ang iya mga ginikanan nga wala magbuang ang iya magulang, amo kon ngaa ang iloy nagsiling, “Sa baylo nga isa, duha na karon ang akon problema!”
Busa, sang masunod nga pagtuon nagtambong sia mismo kag nag-ugyon nga wala magbuang ang iya mga kabataan. Nian isa ka pagtuon sa Biblia ang ginhimos kaupod niya kag sang iya bana. Wala madugay ang bug-os nga pamilya nagsugod sa pagtambong sa mga miting sang kongregasyon sa Kingdom Hall. Sang ulihi, nagtuon man sa Biblia ang mga ginikanan sang iloy kag nagsugod sa pagtambong sa mga miting. Sugod sadto, ang una nga pamatan-on nga lalaki nabawtismuhan na. Nangasawa sia, kag sila sang iya asawa makugi nga mga manugbantala.
Dugang pa, paagi sa impormal nga pagpanaksi sa eskwelahan, nabuligan sang pamatan-on nga Saksi ang duha pa niya ka kabutho subong man ang iloy kag utod nga babayi sang isa sa ila sa pagsugod sa pagtuon sa Biblia. Sa kabilugan, 11 ka tawo ang nakatuon sing kamatuoran sang Biblia bangod ang pamatan-on nga Saksi wala magpugong sa paghimo sing maayo sa iya mga kabutho. Daw ano ka makalilipay nga resulta! Sa pagkamatuod, “Malipayon ang mga tawo nga ang Dios amo si Jehova!”—Salmo 144:15.