Ang Mas Maayo nga Kabuhi Ginasaad
LUYAG mo bala mahilway sa mga problema nga nagapabudlay sang kabuhi? Luyag mo bala magpuyo sa isa ka kalibutan diin ang kabuhi makalilipay kaangay sang danyag nga ginlaragway sa atubang kag likod nga mga panghapin sining magasin? Tan-awa sing maayo ang larawan. Ang mga tawo madamo sing makaon. Maluyagan gid nila inang manamit nga pagkaon. Ang tanan malipayon. Ang lainlain sing rasa nga katawhan nagahidaitay. Bisan ang mga sapat may paghidait! Wala sing nagainaway. Wala sing imol. Wala sing nagamasakit. May matahom nga mga palibot, matahom nga mga kahoy, kag putli, matinlo nga tubig. Daw ano katahom nga talan-awon!
Mangin amo gid bala sina ining duta? Huo, mangin isa ini ka paraiso. (Lucas 23:43) Gintuyo sang Dios, nga nagtuga sang duta, nga ang katawhan magaagom sing mas maayo nga kabuhi sa paraiso nga duta. Kag mahimo ka makapuyo didto!
Diin nga Kabuhi ang Imo Pilion?
Paano ang palaabuton nga Paraiso nga duta mangin tuhay sa kalibutan nga ginapuy-an naton karon? Sa karon, kapin sa isa ka bilyon ka tawo ang ginagutom kada adlaw. Apang sa Paraiso nga gintuyo sang Dios para sa duta, ang tanan may madamo sing makaon. Ang Biblia nagasaad: “Si Jehova sang mga kasuldadusan magahimo sa tanan nga katawhan sing piesta sa matambok nga mga butang, piesta sa mga alak nga labud.” (Isaias 25:6) Wala sing kakulang sang pagkaon, kay ang Biblia nagasiling: “May bugana nga uyas sa duta; sa putukputukan sang kabukiran magahapayhapay ini.”—Salmo 72:16.
Sa karon, madamo ang nagapuyo sa mga payagpayag kag sa mga iskwater, ukon nagahimakas sila sa pagbayad sang ila arkila. Ang iban wala sing puluy-an kag nagatulog sa dalan. Suno sa World Health Organization, mga 100 milyones ka kabataan sa kalibutan ang wala sing puluy-an. Apang sa magakari nga Paraiso, ang tanan may puluy-an nga matawag niya nga iya kaugalingon. Ang Pulong sang Dios nagasiling: “Magapatindog sila sing mga balay kag puy-an sila; kag magatanom sila sing mga ulubasan kag magakaon sang bunga nila.”—Isaias 65:21.
Madamo ang nagahimo sang mga trabaho nga wala nila maluyagan. Sa masami madamong inoras sila nga nagatrabaho sing lakas kada adlaw apang nagabaton sing manubo katama nga suweldo. Mga 1 sa kada 5 ka tawo sa kalibutan ang nagakabuhi sa suweldo nga kubos sa $500 kada tuig. Apang, sa nagapakari nga Paraiso, ang mga tawo magakalipay sa ila trabaho kag makita ang maayong mga resulta gikan sini. Ang Dios nagasaad: “Ang akon mga pinili magakalipay sing malawig sa binuhatan sang ila mga kamot. Indi sila magpangabudlay sa walay pulos.”—Isaias 65:22, 23.
Karon ang masakit kag balatian yara bisan diin. Madamo ang bulag. Ang iban bungol. Ang iban indi makalakat. Apang sa Paraiso, ang tawo pagahilwayon sa masakit kag balatian. Si Jehova nagasiling: “Wala sing pumuluyo ang magasiling: ‘Nagamasakit ako.’ ” (Isaias 33:24) Tuhoy sa mga may sablag, ang makalilipay nga saad amo: “Sa sina nga tion ang mga mata sang mga bulag pamuklaton, kag ang mga igdulungog sang mga bungol mabuksan. Sa sina nga tion ang piang magalumpat subong sang usa [nga lalaki], kag ang dila sang apa magaamba.”—Isaias 35:5, 6.
Sa karon, may pag-antos kag kasakit, kasubo kag kamatayon. Apang sa Paraiso sa duta, ining tanan nga butang madula na. Huo, bisan ang kamatayon madula! Ang Biblia nagasiling: “Ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisud ukon paghibi ukon kasakit pa. Ang nahaunang mga butang nagtaliwan.”—Bugna 21:3, 4.
Sing maathag, nian, ang ginsaad ni Jehova nga Paraiso nga duta magakahulugan sing mas maayo nga kabuhi para sa katawhan. Apang paano kita makapat-od nga magakari ini? San-o ini magakari, kag paano? Ano ang dapat mo himuon agod mangin didto ka?