Mas Maayo nga Kabuhi—Sa Indi Madugay!
HANDURAWA ang isa ka manugpakot sang panahon nga ang iya mga pakot pirme nagamatuod. Kon magapakot sia sa balita sa gab-i nga magaulan buwas, indi ka magapangalag-ag sa pagdala sang imo payong paghalin mo sa balay pagkaaga. Makasalig ka sa iya bangod sang iya nagligad nga rekord. Nagapanghikot ka sa kon ano ang iya ginasiling.
Karon, daw ano ka masaligan ang saad ni Jehova tuhoy sa isa ka mas maayo nga kabuhi sa paraiso nga duta? Ti, ano ang ginapakita sang iya nagligad nga rekord? Ang katumanan sang mga tagna sang Biblia maathag nga nagapamatuod sang rekord ni Jehova. Isa sia ka Dios nga pirme husto kag matinuuron. (Josue 23:14; Isaias 55:11) Masaligan gid ang mga saad ni Jehova nga Dios nga kon kaisa aktuwal sia nga nagapamulong tuhoy sa ginsaad nga palaabuton nga mga hitabo nga daw natabo na. Halimbawa, pagkatapos nga ginsaad niya ang bag-ong kalibutan diin wala na sing kamatayon kag kasubo, aton mabasa: “Ini [ang ginsaad nga mga pagpakamaayo] natuman na!” Sa iban nga hambal, “Matuod ini!”—Bugna 21:5, 6, footnote.
Huo, ang katumanan sang nagligad nga mga saad ni Jehova nagahatag sa aton sing pagsalig nga ang iya saad tuhoy sa mas maayo nga kabuhi para sa katawhan matuman. Apang san-o magakari ining mas maayo nga kabuhi?
Mas Maayo nga Kabuhi—San-o?
Ang mas maayo gid nga kabuhi magakari sa dili madugay! Makapat-od kita sa sina bangod ang Biblia nagasiling nga madamong malain nga mga butang ang mahanabo sa duta antes gid lamang dalhon sang Paraiso ang mas maayo nga kabuhi. Yadtong malain nga mga butang nagakatabo na karon.
Halimbawa, si Jesucristo nagtagna nga may dalagkung mga inaway. Sia nagsiling: “Ang pungsod magatindog batok sa pungsod kag ang ginharian batok sa ginharian.” (Mateo 24:7) Ining tagna natuman. Sang mga tuig 1914 tubtob 1945, may duha ka inaway kalibutanon, kag ginsundan ini sang madamo pa nga inaway nga gin-away sang mga pungsod. “Sa promedyo kada tuig, ang kadamuon sang mga napatay sa inaway sa sining dag-on [sugod sang Inaway Kalibutanon II] nagsobra sa pilo sangsa mga napatay sang ika-19 nga siglo kag pito ka pilo nga mas mataas sangsa ika-18 nga siglo.”—World Military and Social Expenditures 1993.
Ang paglapnag sang balatian isa pa ka pamatuod nga malapit na ang mas maayo nga kabuhi sa Paraiso. Si Jesus nagtagna nga may ‘kamatay sa nagakalainlain nga duog.’ (Lucas 21:11) Natuman bala ining tagna? Huo. Pagkatapos sang nahaunang inaway kalibutanon, kapin sa 20 milyones ka tawo ang napatay sa trangkaso Espanyol. Sugod sadto, minilyon ka tawo ang napatay sa kanser, balatian sa tagipusuon, malaria, AIDS, kag iban pa nga balatian. Sa nagauswag nga mga pungsod, minilyon ka kabuhi kada tuig ang napatay sa mga balatian nga resulta sang mahigko nga tubig (lakip ang lupot kag impeksion sa tinai nga tuga sang lugay).
Si Jesus nagsiling man: “May mga kakulang sing pagkaon.” (Mateo 24:7) Subong sang nabasa sa naunang artikulo, ang mga imol sang kalibutan wala sing bastante nga makaon. Isa pa ini ka bahin sang pamatuod nga ang mas maayo gid nga kabuhi sa Paraiso magakari sa dili madugay.
“May dalagkung mga linog,” siling ni Jesus. (Lucas 21:11) Natuman man ini sa tion naton. Sugod sang 1914 ginatos ka libo ka kabuhi ang napatay bangod sang pagpanglaglag sang makahalapay nga mga linog.
Ang Biblia nagasiling sing dugang nga ang “katapusan nga mga adlaw” pagatandaan sing pagbalhin sa katawhan. Mangin “mga mahigugmaon [sila] sang ila kaugalingon” kag “mga mahigugmaon sang kuwarta,” kag ang mga kabataan mangin “dimatinumanon sa mga ginikanan.” Ang katawhan sa kabilugan mangin “mga mahigugmaon sang kalipayan sangsa mga mahigugmaon sa Dios.” (2 Timoteo 3:1-5) Wala ka bala nagaugyon nga madamo ang nagahisanto sa sining paglaragway?
Bangod dugang kag dugang nga mga tawo ang nagahimo sing malain nga mga butang, ang paglapas nagadugang. Gintagna man ini. Suno sa Mateo 24:12, si Jesus nagpamulong tuhoy sa “pagdugang sang pagkamalinapason.” Ayhan magaugyon ka nga ang krimen mas malala karon sangsa nagligad nga mga tinuig. Ang mga tawo bisan diin nagakahadlok nga makawatan sila, madaya, ukon mahalitan sa pila ka paagi.
Mga inaway, lapnag nga balatian, mga kakulang sang pagkaon, mga linog, nagadugang nga krimen, kag paglain sang tawhanon nga mga kaangtanan—ini tanan makita karon, subong sang gintagna sang Biblia. ‘Apang indi bala nga nahanabo na ining mga butang sa bug-os nga maragtas sang tawo?’ mahimo nga ipamangkot mo. ‘Ano ang kinatuhayan sa aton adlaw?’
May importante gid katama nga mga bahin sa kon ano ang nagakatabo karon. Ang Biblia wala nagasiling nga ang bisan diin nga bahin, subong sang kakulang sang pagkaon, mangin pamatuod sa iya kaugalingon nga yari na kita sa tion sang katapusan kag nga ang mas maayo nga kabuhi malapit na. Ang mga tagna sang Biblia nahanungod sa tion sang katapusan matuman sa isa ka walay dios nga kaliwatan.—Mateo 24:34-39; Lucas 17:26, 27.
Dugang pa, daw makatilingala nga ang pila ka bahin sang tagna ni Jesus—ilabi na yadtong nahanungod sa mga kakulang sang pagkaon kag lapnag nga balatian—matuman karon. Ngaa? Bangod ang sientipikong mga hinimuan mas daku katama karon. Ang ihibalo sa medisina kag mga dagway sang pagbulong mas abanse ukon lapnag sa karon. Ang Dios lamang ang makatagna sa iya Pulong, ang Biblia, nga sa sina nga tion, ang balatian kag tiggulutom magalala, indi magaayo.
Sanglit ang tanan nga tagna sang Biblia nahanungod sa tion sang katapusan, ukon “katapusan nga mga adlaw,” nagakatuman, ano ang mahinakop naton? Nga ang mas maayo nga kabuhi malapit na! Apang paano ini magakari?
Mas Maayo nga Kabuhi—Paano?
Nagahunahuna ka bala nga mapaluntad sang mga tawo ang Paraiso? Sa bug-os nga maragtas tubtob karon nga adlaw, may madamo na nga sahi sang tawhanon nga gobierno. Ginpanikasugan gid sang iban nga paayawan ang mga kinahanglanon sang tawo. Apang, madamong problema ang nagalala. Lunsay sa manggaranon kag imol nga kapungsuran, ang gobierno nagapakigsumpong sa abuso sa droga, mapigaw nga balay, kaimulon, krimen, pagkawalay palamugnan, kag inaway.
Bisan pa malubad sang mga gobierno ang pila sining mga problema, indi sila makaaman sing bug-os nga kahilwayan gikan sa balatian; indi nila madula ang katigulangon kag kamatayon. Sing maathag, ang mga tawo indi gid makapaluntad sang Paraiso sa sining duta.
Ang Biblia maalamon nga nagasiling: “Dili kamo magsalig sa mga dungganon, ukon sa anak sang tawo, nga sa iya wala sing kaluwasan.” Kay sin-o, nian, kita makasalig? Ang Biblia nagasabat: “Malipayon ang isa nga ang iya kabulig amo ang Dios ni Jacob, nga ang iya paglaum yara kay Jehova nga iya Dios.” (Salmo 146:3, 5) Kon maglaum kita kay Jehova nga Dios, indi gid kita mapaslawan.
Pat-od gid nga mahimo man sang Isa nga may kaalam kag gahom sa pagtuga sang duta, adlaw, kag mga bituon ang duta nga isa ka paraiso. Sarang niya mahatag sa mga tawo ang isa ka mas maayo nga kabuhi. Ano man ang gintuyo ni Jehova nga Dios nga himuon, tumanon kag pagatumanon niya. Ang iya Pulong nagasiling: “Sa Dios walay bisan ano nga indi mahimo.” (Lucas 1:37) Apang paano paluntaron sang Dios ang mas maayo nga kabuhi?
Si Jehova magahatag sa katawhan sing mas maayo gid nga kabuhi paagi sa iya Ginharian. Kag ano ang Ginharian sang Dios? Isa ini ka matuod nga gobierno nga may gintangdo sang Dios nga Gumalahom, si Jesucristo. Ang Ginharian sang Dios nahamtang sa langit, apang sa dili madugay igahatag sini ang makatilingala nga mga pagpakamaayo kag ang mas maayo nga kabuhi sa mga pumuluyo sang Paraiso nga duta.—Isaias 9:6, 7.
Ayhan pamilyar ka na sa modelo nga pangamuyo ni Jesus, nga masapwan sa Biblia sa Mateo 6:9-13. Ang bahin sina nga pangamuyo sa Dios nagasiling: “Magkari ang imo ginharian. Pagahimuon ang imo kabubut-on, kon ano sa langit, amo man sa duta.” Nahisuno sa sina nga pangamuyo, ang Ginharian sang Dios ‘magakari’ sa pagtuman sang katuyuan ni Jehova nga Dios para sa duta. Kag tuyo niya nga ang duta mangin isa ka paraiso.
Ang isa ka katapusan nga pamangkot nagautwas: Ano ang dapat mo himuon agod maagom ang mas maayo nga kabuhi sa nagapakari nga Paraiso?
Kon Ano ang Kinahanglan Mo nga Himuon
Si Jehova nga Dios mahigugmaon nga nagahatag sang paglaum nga mas maayo nga kabuhi sa Paraiso sa tanan nga nagahimo sang iya kabubut-on. Ang Biblia nagasugid sa aton: “Ang mga matarong magapanubli sang duta, kag magapuyo sa sini sing dayon.” (Salmo 37:29) Apang ano ang nagahimo sa isa ka tawo nga matarong sa mga mata sang Dios?
Agod mapahamut-an si Jehova kinahanglan nga matun-an naton sing dugang pa ang nahanungod sa kon ano ang luyag niya nga himuon naton. Kon magkuha kita sing ihibalo sang Dios kag iaplikar ini sa aton kabuhi, mahimo kita mabuhi sing dayon. Sa isa ka pangamuyo sa Dios, si Jesus nagsiling: “Ini nagakahulugan sang kabuhi nga walay katapusan, ang pagkuha nila sing ihibalo sa imo, ang lamang matuod nga Dios, kag sa isa nga imo ginpadala, si Jesucristo.”—Juan 17:3.
Ang tulun-an nga nagasugid sa aton nahanungod kay Jehova nga Dios kag kay Jesucristo amo ang Pulong sang Dios, ang Biblia. Isa ini sang labing hamili nga mga dulot ni Jehova. Ang Biblia kaangay sang isa ka sulat sang isa ka mahigugmaon nga amay sa iya mga anak. Nagasugid ini sa aton nahanungod sa saad sang Dios nga paluntaron ang mas maayo nga kabuhi para sa aton kag nagapakita sa aton kon paano naton ini matigayon. Ginasugid sa aton sang Biblia kon ano ang ginhimo sang Dios sang nagligad kag kon ano ang pagahimuon niya sa palaabuton. Nagahatag man ini sa aton sing praktikal nga laygay sa kon paano naton malubad sing madinalag-on ang aton mga problema karon. Sa pagkamatuod, ang Pulong sang Dios nagatudlo sa aton kon paano makasapo sing daku nga kalipay bisan sa sining magamo nga kalibutan.—2 Timoteo 3:16, 17.
Ang mga Saksi ni Jehova malipay maghimos sang isa ka walay bayad nga pagtuon sa Biblia sa puluy-an para sa imo. Magtuon kon paano ka makatigayon sing mas malipayon nga pagkabuhi karon, nga may paglaum tuhoy sa mas maayo gid nga kabuhi sa malapit nga palaabuton.
[Retrato sa pahina 5]
Ginapakita sang mga tagna sang Biblia nga ang mas maayo nga kabuhi malapit na?
[Retrato sa pahina 7]
Ang Ginharian sang Dios magadala sang mas maayo nga kabuhi para sa katawhan