“Higugmaa ang Kamatuoran kag Paghidait”!
“Ang pulong ni Jehova sang kasoldadusan padayon nga nag-abot sa akon, nga nagasiling: ‘. . . Higugmaa ang kamatuoran kag paghidait.’ ”—ZACARIAS 8:18, 19.
1, 2. (a) Ano ang rekord sang katawhan kon tuhoy sa paghidait? (b) Ngaa wala gid makakita sing paghidait ining karon nga kalibutan?
“ANG kalibutan wala gid makatigayon sing paghidait. Sa isa ka duog—kag sa masami sing dulungan sa madamo nga duog—may yara pirme inaway.” Amo ini ang ginsiling ni Propesor Milton Mayer sang University of Massachusets, E.U.A. Daw ano kasubo nga komentaryo para sa katawhan! Matuod, luyag sang katawhan ang paghidait. Gintilawan sang mga politiko ang tanan nga sahi sang paagi agod mahuptan ini, kutob sa Pax Romana” sang panahon sang Roma tubtob sa kasugtanan sang “Mutually Assured Destruction” sa tion sang Cold War. Apang, napaslawan ang tanan nila nga panikasog. Subong sang ginsiling ni Isaias madamong siglo na ang nagligad, ‘ang mga embahador sang paghidait nagahibi sing mapait.’ (Isaias 33:7) Ngaa amo sini?
2 Ini bangod ang dayon nga paghidait magaluntad kon madula na ang pagdumot kag kakagod; dapat nga napasad ini sa kamatuoran. Ang paghidait indi dapat mapasad sa mga kabutigan. Amo sina nga sang nagasaad sing pagpasag-uli sang paghidait para sa dumaan nga Israel si Jehova nagsiling: “Yari karon palambuton ko sa iya ang paghidait subong sang suba kag ang himaya sang mga pungsod kaangay sang nagaawas nga ilig.” (Isaias 66:12) Ang dios sining sistema sang mga butang, si Satanas nga Yawa, isa ka “manugpatay,” kag “isa ka butigon kag amay sang kabutigan.” (Juan 8:44; 2 Corinto 4:4) Paano makatigayon sing paghidait ang kalibutan nga may amo sina nga sahi sang dios?
3. Anong talalupangdon nga dulot ang ginhatag ni Jehova sa iya katawhan, walay sapayan nga nagakabuhi sila sa magamo nga kalibutan?
3 Apang, sing talalupangdon, ginahatagan ni Jehova sing paghidait ang iya katawhan walay sapayan nga nagakabuhi sila sa puno sing inaway nga kalibutan ni Satanas. (Juan 17:16) Sang ikan-um nga siglo B.C.E., gintuman niya ang iya saad paagi kay Jeremias kag ginhatagan sing “paghidait kag kamatuoran” ang iya pinasahi nga pungsod sang ginpasag-uli niya sila sa ila dutang tinubuan. (Jeremias 33:6) Kag sa sining katapusan nga mga adlaw, ginhatagan niya sing “paghidait kag kamatuoran” ang iya katawhan sa ila “duta,” ukon dutan-on espirituwal nga kahimtangan, bisan pa nga nagakabuhi sila sa pinakamabudlay nga mga tion sang kagamo nga nasaksihan sining kalibutan tubtob sa karon. (Isaias 66:8; Mateo 24:7-13; Bugna 6:1-8) Samtang padayon naton nga ginahinun-anunan ang kapitulo 8 sang Zacarias, maapresyar naton sing mas madalom ining hatag-Dios nga paghidait kag kamatuoran kag makita naton kon ano ang aton himuon agod mahuptan ang aton bahin sa sini.
‘Pabaskuga ang Inyo mga Kamot’
4. Paano ginpalig-on ni Zacarias ang Israel nga magpanghikot kon luyag nila nga maeksperiensiahan ang paghidait?
4 Sa ikan-um nga tion sa kapitulo 8 sang Zacarias, mabatian naton ang makakulunyag nga pahibalo gikan kay Jehova: “Amo ini ang ginsiling ni Jehova sang mga kasoldadusan: ‘Pabaskuga ang inyo mga kamot, kamo nga nagapamati sining mga adlaw sining mga pulong sa baba sang mga manalagna, kutob sang adlaw nga ginbutang ang sadsaran sang balay ni Jehova sang mga kasoldadusan, agod nga mapatindog ang templo. Kay sa wala pa yadtong mga adlaw walay suhol sa tawo; kag hinakay sa sapat; kag walay paghidait sa nagaguwa ukon sa nagasulod bangod sa kasumpong, kay ginpahamtang ko ang tagsatagsa ka tawo batok sa iya isigkatawo.’ ”—Zacarias 8:9, 10.
5, 6. (a) Bangod sang pagluya sing buot sang mga Israelinhon, ano ang nangin kahimtangan sang Israel? (b) Anong pagbag-o ang ginsaad ni Jehova sa Israel kon unahon niya ang pagsimba sa iya?
5 Ginpamulong ni Zacarias ini nga mga tinaga samtang ginapatindog liwat ang templo sa Jerusalem. Sang nagligad, ang mga Israelinhon nga nagbalik gikan sa Babilonia ginluyahan sing buot kag gin-untatan ang hilikuton sang pagtukod sang templo. Bangod gintuon nila ang ila igtalupangod sa ila kaugalingon nga kaayuhan, wala sila sing pagpakamaayo kag paghidait gikan kay Jehova. Bisan nga ginpangumhan nila ang ila kadutaan kag gintatap ang ila mga ubasan, wala sila mag-ayuhan. (Hageo 1:3-6) Kasubong nga nagapangabudlay sila nga “wala sing suhol.”
6 Karon nga natukod liwat ang templo, ginpalig-on ni Zacarias ang mga Judiyo nga “magpakalig-on,” unahon ang pagsimba kay Jehova sing maisugon. Ano ang natabo sang ginhimo nila ini? “ ‘Apang karon sa mga nabilin sining katawhan indi na ako magsubong sangsa mga adlaw nga una,’ nagasiling si Jehova sang mga kasoldadusan. ‘Kay mangin may binhi sang paghidait kag katin-aran; ang ubas magahatag sang iya bunga, kag ang duta magahatag sang iya patubas, kag ang mga langit magahatag sang ila tun-og; kag papanublion ko ang nabilin sining katawhan sini nga butang. Kag subong nga nangin pagpakamalaut kamo sa mga pungsod, O panimalay sang Juda kag panimalay sang Israel, amo man luwason ko kamo, kag mangin pagpakamaayo kamo. Dili magkahadlok, kundi pabaskuga ang inyo mga kamot.’ ” (Zacarias 8:11-13) Kon determinado nga magpanghikot ang Israel, magabugana sia. Sang primero, kon ang mga pungsod nagahatag sing halimbawa sang pagpakamalaut, ginatudlo nila ang Israel. Karon ang Israel mangin isa ka halimbawa sang pagpakamaayo. Daw ano ka ekselente nga rason nga ‘pabaskugon nila ang ila mga kamot’!
7. (a) Anong makakulunyag nga mga pagbag-o ang naeksperiensiahan sang katawhan ni Jehova tubtob sang 1995 nga tuig sang pag-alagad? (b) Ginatan-aw ang tuigan nga report, anong mga pungsod ang nakita mo nga may talalupangdon nga rekord sang mga manugbantala, payunir, promedyo nga oras?
7 Kamusta sa karon? Ti, sang mga tuig antes sang 1919, ang katawhan ni Jehova daw nakulangan sing kakugi. Wala sila magtindog sing bug-os subong neutral sa unang inaway kalibutanon, kag may huyog sila sa pagsunod sa tawo sa baylo sa ila Hari, si Jesucristo. Subong resulta, ang iban ginluyahan sing buot bangod sang pag-ipit gikan sa sulod kag sa guwa sang organisasyon. Nian sang 1919, sa bulig ni Jehova ginpabaskog nila ang ila mga kamot. (Zacarias 4:6) Ginhatagan sila ni Jehova sing paghidait, kag nagbugana sila sing daku. Makita ini sa ila rekord sang nagligad nga 75 ka tuig, tubtob sang 1995 nga tuig sang pag-alagad. Subong katawhan, ginsikway sang mga Saksi ni Jehova ang nasyonalismo, tribalismo, pagdampigdampig, kag tanan iban pa nga ginahalinan sang pagdumot. (1 Juan 3:14-18) Ginaalagad nila si Jehova nga may tunay nga kakugi sa iya espirituwal nga templo. (Hebreo 13:15; Bugna 7:15) Sang nagligad lamang nga tuig, naghinguyang sila sing kapin sa isa ka bilyon ka oras sa pagpakighambal sa iban tuhoy sa ila langitnon nga Amay! Kada bulan, nagadumala sila sing 4,865,060 ka pagtuon sa Biblia. May promedyo nga 663,521 ang nakigbahin sa payunir nga pag-alagad kada bulan. Kon ang mga ministro sang Cristiandad nagahatag sing halimbawa sang mga tawo nga matuod nga mainit sa ila pagsimba, ginapatuhuyan nila kon kaisa ang mga Saksi ni Jehova.
8. Paano ang tagsa ka indibiduwal nga Cristiano makabenepisyo gikan sa “binhi sang paghidait”?
8 Bangod sang ila kakugi, ginahatagan ni Jehova ang iya katawhan sing “binhi sang paghidait.” Ang kada indibiduwal nga nagapalambo sina nga binhi makakita sing pagtubo sang paghidait sa iya tagipusuon kag sa iya kabuhi. Ang tagsa ka nagatuo nga Cristiano nga nagapakighidait kay Jehova kag sa iya masigka-Cristiano nagaambit sa kamatuoran kag paghidait sang katawhan ni Jehova. (1 Pedro 3:11; ipaanggid ang Santiago 3:18.) Makadalayaw ini indi bala?
“Indi Magkahadlok”
9. Anong pagbag-o sa iya mga pagpakig-angot sa iya katawhan ang ginsaad ni Jehova?
9 Karon mabasa naton ang ikapito nga pahibalo ni Jehova. Ano ini? “Amo ini ang ginasiling ni Jehova sang mga kasoldadusan, ‘Subong nga naghunahuna ako sa paghimo sing malaut sa inyo, sang ginpasingkal ako sang inyo mga ginikanan,’ nagasiling si Jehova sang kasoldadusan, ‘kag wala ako magkalisod, sa amo liwat naghunahuna ako sa sining mga adlaw sa paghimo sing maayo sa Jerusalem kag sa panimalay sang Juda. Dili kamo magkahadlok.’ ”—Zacarias 8:14, 15.
10. Anong rekord tuhoy sa mga Saksi ni Jehova ang nagapakita nga wala sila magkahadlok?
10 Walay sapayan nga nag-alaplaag ang katawhan ni Jehova sa espirituwal nga kahulugan sadtong unang inaway kalibutanon, sa ila mga tagipusuon luyag nila himuon kon ano ang matarong. Busa, pagkatapos ginpadapat ang pila ka pagdisiplina, ginbag-o ni Jehova ang iya paagi sa pagpakig-angot sa ila. (Malaquias 3:2-4) Sa karon, ginabalikid naton kag ginapasalamatan sia sing lubos bangod sang iya ginhimo. Matuod, ‘gindumtan kita sang tanan nga pungsod.’ (Mateo 24:9) Madamo ang ginbilanggo, kag ang iban napatay pa gani bangod sang ila pagtuo. Masami kita nagaatubang sa dipagsapak ukon kapintas. Apang wala kita nagakahadlok. Nahibaluan naton nga si Jehova mas makusog bisan sa anong pagpamatok, makita man ukon indi makita. (Isaias 40:15; Efeso 6:10-13) Indi kita mag-untat sa pagsunod sa mga pinamulong: “Magsalig kay Jehova; magpakabakod kag magpakaisog ang imo tagipusuon.”—Salmo 27:14.
“Magpamulong sing Kamatuoran sa Isa kag Isa”
11, 12. Anong dapat naton dumdumon subong mga indibiduwal kon luyag naton makaambit sing bug-os sa mga pagpakamaayo nga ginahatag ni Jehova sa iya katawhan?
11 Agod makaambit sing lubos sa mga pagpakamaayo ni Jehova, may mga butang nga dapat naton dumdumon. Si Zacarias nagasiling: “ ‘Ini amo ang mga butang nga inyo himuon: Magpamulong ang tagsa ka tawo sing kamatuoran sa iya isigkatawo. Hikuta ang mga paghukom sang kamatuoran kag paghidait sa inyo mga gawang. Kag dili magpadugi sing malaut sa inyo mga tagipusuon batok sa iya isigkatawo, kag dili maghigugma sing dimatuod nga sumpa; kay ini tanan nga mga butang akon ginadumtan,’ nagasiling si Jehova.”—Zacarias 8:16, 17.
12 Ginasugo kita ni Jehova nga maghambal sing matuod. (Efeso 4:15, 25) Wala niya ginapamatian ang mga pangamuyo sadtong nagapadihot sing makahalalit nga mga butang, nagatago sing kamatuoran bangod sang personal nga mga interes, ukon nagasumpa sing butig. (Hulubaton 28:9) Bangod ginadumtan niya ang apostasya, luyag niya nga magpabilin kita sa kamatuoran sang Biblia. (Salmo 25:5; 2 Juan 9-11) Dugang pa, kaangay sang tigulang nga mga lalaki sa gawang sang siudad sa Israel, dapat nga ipasad sang mga gulang nga nagauyat sing hudisyal nga mga kaso ang ila laygay kag mga desisyon sa kamatuoran sang Biblia, indi sa personal nga opinyon. (Juan 17:17) Luyag ni Jehova nga pangitaon nila ang “hukom sang paghidait” nagatinguha, subong Cristianong mga manugbantay, nga ipasag-uli ang paghidait sa tunga sang nagainaway nga mga bahin kag buligan ang mahinulsulon nga mga makasasala nga matigayon liwat ang paghidait upod sa Dios. (Santiago 5:14, 15; Judas 23) Sa amo man nga tion, ginahuptan nila ang paghidait sang kongregasyon, ginasikway sing maisugon yadtong nagatublag sinang paghidait paagi sa hungod nga paghimo sing sala.—1 Corinto 6:9, 10.
“Pagkalipay kag Pagkasadya”
13. (a) Anong pagbag-o tuhoy sa pagpuasa ang gintagna ni Zacarias? (b) Anong puasa ang ginsaulog anay sa Israel?
13 Karon, pamatian naton ang ikawalo nga solemne nga pahibalo: “Amo ini ang ginasiling ni Jehova sang mga kasoldadusan, ‘Ang puasa sang ikaapat nga bulan, kag ang puasa sang ikalima, kag ang puasa sang ikapito, kag ang puasa sang ikapulo mangin kalipay kag kasadya kag malipayon nga mga piesta sa panimalay sang Juda. Busa higugmaa ang kamatuoran kag paghidait.’ ” (Zacarias 8:19) Sa idalom sang Mosaikong Kasuguan, ang mga Israelinhon nagapuasa sa Adlaw sang Katumbasan agod ipabutyag ang kasubo para sa ila mga sala. (Levitico 16:29-31) Ang apat ka puasa nga ginsambit ni Zacarias maathag nga ginsaulog agod lalawan ang mga hitabo may kaangtanan sa pagsakop kag pagkalaglag sang Jerusalem. (2 Hari 25:1-4, 8, 9, 22-26) Apang, karon, napatindog liwat ang templo kag napuy-an na liwat ang Jerusalem. Ang paglalaw ginbuslan sang kinasadya, kag ang mga pagpuasa mangin mga tion sang kapiestahan.
14, 15. (a) Paano ang pagsaulog sang Memoryal isa ka daku nga rason sang pagkalipay, kag ano ang ginapahanumdom sini sa aton? (b) Subong sang makita sa tuigan nga report, anong mga kadutaan ang may talalupangdon nga mga tumalambong sa Memoryal?
14 Sa karon, wala na naton ginasaulog ang mga puasa nga ginsambit ni Zacarias ukon ang puasa nga ginpatuman sang Kasuguan. Sanglit ginhalad ni Jesus ang iya kabuhi para sa aton mga sala, ginaagom naton ang mga pagpakamaayo sang mas dakung Adlaw sang Katumbasan. Ginatabunan ang aton mga sala, indi lamang sa bahin, kundi sing bug-os. (Hebreo 9:6-14) Ginatuman ang sugo sang langitnon nga Mataas nga Saserdote, si Jesucristo, ginasaulog naton ang Memoryal sang iya kamatayon subong ang lamang solemne nga pagsaulog sa Cristianong kalendaryo. (Lucas 22:19, 20) Wala bala naton naeksperiensiahan ang “kalipay kag kasadya” samtang nagatipon kita sing tingob kada tuig para sa sinang selebrasyon?
15 Sang nagligad nga tuig, 13,147,201 ang nagtipon agod saulugon ang Memoryal, kapin sa 858,284 sangsa 1994. Daw ano nga kadam-an! Handurawa ang kinalipay sa 78,620 ka kongregasyon sang mga Saksi ni Jehova samtang ang dikinaandan nga kadamuon nagdugok sa ila mga Kingdom Hall para sa pagsaulog. Sa pagkamatuod, ang tanan nga nagtambong napahulag sa “paghigugma sa kamatuoran kag sa paghidait” samtang ginhinumdom nila ang kamatayon sang Isa nga amo “ang dalan kag ang kamatuoran kag ang kabuhi” kag nagagahom karon subong ang dakung “Prinsipe sang Paghidait” ni Jehova! (Juan 14:6; Isaias 9:6) Ina nga selebrasyon may pinasahi nga kahulugan para sa mga nagtambong sa mga duog nga gin-uyog sang kinagamo kag inaway. Ang pila sang aton mga kauturan nakasaksi sang indi malaragway nga mga hitabo sadtong 1995. Sa gihapon, ‘ang paghidait sang Dios nga nagalabaw sa tanan nga panghunahuna nagbantay sang ila mga tagipusuon kag sang ila ikasarang sa paghunahuna paagi kay Cristo Jesus.’—Filipos 4:7.
‘Magpakiluoy Kita sa Kahamuot ni Jehova’
16, 17. Paano ‘mapakiluuyan sang mga tawo sang mga pungsod ang kahamuot ni Jehova’?
16 Apang, diin maghalin yadtong tanan nga minilyon nga nagtambong sa Memoryal? Ang ikasiam nga pinamulong ni Jehova nagapaathag: “Amo ini ang ginsiling ni Jehova sang mga kasoldadusan, ‘May magaabot pa nga mga katawhan bisan ang mga pumuluyo sang madamong kabanwahanan; kag ang mga pumuluyo sang isa ka banwa magakadto sa isa, nga nagasiling: “Magkadto kita sing madali sa pagpakiluoy sang kahamuot ni Jehova kag sa pagpangita kay Jehova sang mga kasoldadusan. Ako magakadto man.” Kag madamo nga katawhan kag makusog nga mga pungsod ang magaabot sa pagpangita kay Jehova sang mga kasoldadusan sa Jerusalem, kag sa pagpakiluoy sang kahamuot ni Jehova.’ ”—Zacarias 8:20-22.
17 Ang mga tawo nga nagtambong sa Memoryal luyag “magpangita kay Jehova sang mga kasoldadusan.” Madamo sa ila amo ang iya dedikado, bawtismado nga mga alagad. Minilyon sa iban pa nga nagtambong ang wala pa sa sina nga kahimtangan. Sa pila ka kadutaan ang nagtambong sa Memoryal nagdamo sing apat ukon lima ka pilo sangsa mga manugbantala sang Ginharian. Ining madamong interesado nga mga tawo nagakinahanglan sing bulig sa pagpadayon sa pag-uswag. Tudluan naton sila sa pagkalipay sa ihibalo nga napatay si Jesus tungod sa aton mga kasal-anan kag nagagahom na karon sa Ginharian sang Dios. (1 Corinto 5:7, 8; Bugna 11:15) Kag palig-unon naton sila sa pagdedikar sang ila kaugalingon kay Jehova nga Dios kag magpasakop sa iya gintangdo nga Hari. Sa sini nga paagi ‘mapakiluuyan nila ang kahamuot ni Jehova.’—Salmo 116:18, 19; Filipos 2:12, 13.
“Napulo ka Tawo Gikan sa Tanan nga Hambal sang mga Pungsod”
18, 19. (a) Sa katumanan sang Zacarias 8:23, sin-o sa karon ang “isa ka Judiyo”? (b) Sin-o sa karon ang “napulo ka lalaki” nga “nagabuyot sa sidsid sang isa ka Judiyo?”
18 Sa katapusan sa ikawalo nga kapitulo sang Zacarias, aton mabasa: “Amo ini ang ginsiling ni Jehova sang mga kasoldadusan.” Ano ang katapusan nga pahibalo ni Jehova? “Sa sadtong mga adlaw ang napulo ka tawo gikan sa tanan nga hambal sang mga pungsod magabuyot sang sidsid sang isa ka Judiyo, nga nagasiling, ‘Magaupod kami sa inyo, kay nabatian namon nga ang Dios nagaupod sa inyo.’ ” (Zacarias 8:23) Sang mga adlaw ni Zacarias, ang kinaugali nga Israel amo ang pinili nga pungsod sang Dios. Apang, sang unang siglo, ginsikway sang Israel ang Mesias ni Jehova. Busa, ginpili sang aton Dios “ang isa ka Judiyo”—ang bag-ong Israel—subong iya pinasahi nga katawhan, “ang Israel sang Dios” nga ginhuman sang espirituwal nga mga Judiyo. (Galacia 6:16; Juan 1:11; Roma 2:28, 29) Ang kabug-usan nga kadamuon sini 144,000, nga ginpili gikan sa tunga sang katawhan sa paggahom kaupod ni Jesus sa iya langitnon nga Ginharian.—Bugna 14:1, 4.
19 Ang kalabanan sining 144,000 napatay na nga matutom kag nagkadto sa ila langitnon nga padya. (1 Corinto 15:51, 52; Bugna 6:9-11) Ang pila yari pa sa duta kag nagakalipay sila nga makita nga ang “napulo ka tawo” nga namat-od sa pag-upod sa “Judiyo” isa gid ka “dakung kadam-an . . . gikan sa tanan nga kapungsuran kag tribo kag katawhan kag hambal.”—Bugna 7:9; Isaias 2:2, 3; 60:4-10, 22.
20, 21. Samtang nagahilapit ang katapusan sining kalibutan, paano kita makapabilin sa paghidait upod kay Jehova?
20 Samtang nagahilapit ang katapusan sining kalibutan, ang Cristiandad kaangay sang Jerusalem sang mga adlaw ni Jeremias: “Nagahulat kamo sing paghidait, apang walay kaayuhan nga nag-abot; sang tion sang pag-ayo, apang yari karon! kahangawa!” (Jeremias 14:19) Ina nga kahangawa magadangat sa talipuspusan kon balikdon sang mga pungsod ang butig nga relihion kag laglagon ini. Indi madugay pagkatapos, ang mga pungsod makaeksperiensia mismo sing kalaglagan sa katapusan nga inaway sang Dios, ang Armagedon. (Mateo 24:29, 30; Bugna 16:14, 16; 17:16-18; 19:11-21) Daw ano ka malaglagon nga tion ini!
21 Walay sapayan sang tanan, amligan ni Jehova yadtong nagahigugma sa kamatuoran kag nagapalambo sing “binhi sang paghidait.” (Zacarias 8:12; Sofonias 2:3) Busa, magpabilin kita nga hilway sa duta sang iya katawhan, makugi nga ginadayaw sia sing dayag kag ginabuligan ang madamo sa ‘pagpakiluoy sa kahamuot ni Jehova.’ Kon himuon naton ini, matigayon naton pirme ang paghidait ni Jehova. Huo, “si Jehova magahatag gid sang kusog sa iya katawhan. Pakamaayuhon ni Jehova ang iya katawhan sing paghidait!—Salmo 29:11.
Mapaathag Mo Bala?
◻ Paano ginpabakod sang katawhan sang Dios ang ila mga kamot sang mga adlaw ni Zacarias? Sa karon?
◻ Paano kita dapat maghulag sa paghingabot, kapintas, kag dipagsapak?
◻ Ano ang nadalahig sa aton ‘paghambal sing kamatuoran sa isa kag isa’?
◻ Paano ang isa “makapakiluoy sa kahamuot ni Jehova”?
◻ Anong dakung rason sang pagkalipay ang makit-an sa katumanan sang Zacarias 8:23?
[Retrato sa pahina 18]
Sang nagligad nga tuig, ang mga Saksi ni Jehova nakahinguyang sing 1,150,353,444 ka oras sa pagpakighambal sa mga tawo tuhoy sa Ginharian sang Dios