Magsalig kay Jehova kag sa Iya Pulong
“Ang mga nakakilala sang imo ngalan magasalig sa imo.”—SALMO 9:10.
1. Ngaa makasalig kita gihapon kay Jehova kag sa iya Pulong sa aton modernong mga adlaw?
SA SINING moderno nga kalibutan, ang pangagda sa pagsalig sa Dios kag sa iya Pulong, ang Biblia, daw indi praktikal kag realistiko. Apang, ang kaalam sang Dios madugay na napamatud-an nga maminatud-on kag praktikal. Ang Manunuga sang lalaki kag babayi amo ang Tagsugod sang pag-asawahay kag pamilya, kag nahibaluan niya ang aton mga kinahanglanon labaw sangsa kay bisan sin-o. Subong nga wala magbag-o ang sadsaran nga mga kinahanglanon sang tawo, amo man ang sadsaran nga mga paagi sa pagpuno sining mga kinahanglanon. Ang maalamon nga laygay sang Biblia, walay sapayan nga ginsulat siniglo na ang nakaligad, nagahatag gihapon sing pinakamaayo nga panuytoy para sa kadalag-an sa kabuhi kag sa paglubad sa mga problema. Ang pagpamati sa sini nagaresulta sa daku nga kalipay—bisan sa moderno, sientipiko nga kalibutan nga aton ginapuy-an!
2. (a) Anong maayong mga bunga ang ginpatubas sa kabuhi sang katawhan ni Jehova bangod sang pagsunod sa mga kasuguan sang Dios? (b) Ano ang dugang nga ginasaad ni Jehova sa sadtong matinumanon sa iya kag sa iya Pulong?
2 Ang pagsalig kay Jehova kag ang pag-aplikar sa mga prinsipio sang Biblia nagadala sing praktikal nga mga benepisyo sa adlaw-adlaw. Ang mga pamatuod sini makita sa kabuhi sang minilyon ka mga Saksi ni Jehova sa bug-os nga kalibutan nga may daku nga pagtuo kag kaisog sa pag-aplikar sa laygay sang Biblia. Para sa ila, ang pagsalig sa Manunuga kag sa iya Pulong napamatud-an nga mabuligon. (Salmo 9:9, 10) Ang pagsunod sa mga kasuguan sang Dios naghimo sa ila nga mas maayo nga mga tawo kon tuhoy sa katinlo, pagkabunayag, kapisan, pagtahod sa kabuhi kag pagkabutang sang iban, kag pagkahaganhagan sa pagkaon kag pag-inom. Nagdul-ong ini sa nagakaigo nga gugma kag paghanas sa sulod sang pamilya—pagkamaabiabihon, pagkamapailubon, pagkamaluluy-on, kag pagkamapinatawaron—kag sa madamo iban pa nga butang. Sa daku nga kasangkaron nalikawan nila ang malain nga bunga sang kaugot, pagdumot, pagpatay, kahisa, kahadlok, katamad, bugal, pagbinutig, pagpasipala, kaulag, kag imoralidad. (Salmo 32:10) Apang kapin pa ang ginahimo sang Dios sangsa pagsaad sang isa ka maayo nga resulta sa pagsunod sang iya mga kasuguan. Si Jesus nagsiling nga yadtong nagasunod sa Cristianong dalanon magabaton sing “isa ka gatos ka pilo sa karon nga tion, . . . mga iloy kag kabataan kag latagon, upod sang mga paghingabot, kag sa palaabuton nga sistema sang mga butang kabuhi nga walay katapusan.”—Marcos 10:29, 30.
Likawi ang Pagsalig sa Kalibutanon nga Kaalam
3. Bangod sang padayon nga pagsalig kay Jehova kag sa iya Pulong, anong mga problema ang ginaatubang kon kaisa sang mga Cristiano?
3 Ang problema sa dihimpit nga mga tawo amo nga may huyog sila nga pasapayanan ukon kalipatan ang mga ginapatuman sang Dios. Nagahunahuna sila nga mas labi ang ila nahibaluan ukon ang kaalam gikan sa mga maalamon sining kalibutan mas labaw sangsa iya sang Dios, nga mas sibu ini sa tion. Mahimo man mapalambo sang mga alagad sang Dios ini nga panimuot, subong nagakabuhi sa tunga sining kalibutan. Busa, sa pagpalapnag sa mahigugmaon nga pangagda sa pagpamati sang iya laygay, ang aton langitnon nga Amay nagalakip man sing nagakaigo nga mga paandam: “Anak ko, indi pagkalimti ang akon kasuguan, kundi magbantay ang imo tagipusuon sang akon mga sugo, kay ang kalawigon sang mga adlaw kag ang katuigan sang kabuhi kag ang paghidait idugang nila sa imo. Magsalig kay Jehova sa bug-os mo nga tagipusuon kag indi magsandig sa imo kaugalingon nga paghangop. Sa tanan mo nga dalanon kilalaha sia, kag magatuytoy sia sa imo mga banas. Indi ka magpakaalam sa imo kaugalingon nga mga mata. Kahadluki si Jehova kag talikod sa malaut.”—Hulubaton 3:1, 2, 5-7.
4. Daw ano kalapnag ang “kaalam sining kalibutan,” kag ngaa “kabuangan ini sa Dios”?
4 Ang kaalam sining kalibutan matigayon sing bugana kag gikan sa madamo nga ginahalinan. May madamo nga institusyon sa pagtuon, kag “wala sing katapusan ang paghimo sang madamo nga tulun-an.” (Manugwali 12:12) Sa karon ang ginatawag nga information superhighway sang kalibutan sang kompyuter nagasaad sa pag-aman sing walay latid nga impormasyon sa halos tanan nga topiko. Apang ang pagtigayon sining tanan nga impormasyon wala nagahimo sa kalibutan nga mas maalam ukon malubad ang mga problema sini. Sa baylo, ang kahimtangan sang kalibutan labi nga nagalain sa adlaw-adlaw. Sing halangpunon, ang Biblia nagasugid sa aton nga “ang kaalam sining kalibutan kabuangan sa Dios.”—1 Corinto 3:19, 20.
5. Anong mga paandam ang ginahatag sang Biblia kon tuhoy sa “kaalam sining kalibutan”?
5 Sa hingapusan nga bahin sang katapusan nga mga adlaw, nagakaigo lamang paabuton nga ang punong manuglimbong, si Satanas nga Yawa, magapabaha sing mga kabutigan sa panikasog nga paluyahon ang pagsalig sa pagkamaminatud-on sang Biblia. Ang mga higher critic nagpatubas sing nagahaumhaum nga mga libro nga nagahangkat sa pagkamaminatud-on kag pagkamasaligan sang Biblia. Ginpaandaman ni Pablo ang iya mga masigka-Cristiano: “O Timoteo, bantayi ang natugyan sa imo, likawi ang dibalaan nga mga pagwakal kag mga pagsumpong sang ‘ihibalo’ nga dimatuod. Kay ang iban nga nagapamatuod sini nagtalang nahanungod sa pagtuo.” (1 Timoteo 6:20, 21) Ang Biblia dugang nga nagapaandam: “Andam kamo nga walay maglimbong sa inyo paagi sa pilosopiya kag daya nga walay pulos suno sa tawhanon nga pinalatunlaton nga sugid, suno sa nahauna gid nga pagtulun-an sang kalibutan kag indi suno kay Cristo.”—Colosas 2:8.
Batui ang Huyog nga Magpangduhaduha
6. Ngaa kinahanglanon ang pagkamabinantayon agod tapnaon ang pagtubo sing mga pagpangduhaduha sa tagipusuon?
6 Ang isa pa ka malimbungon nga taktika sang Yawa amo ang pagsab-ug sing mga pagpangduhaduha sa hunahuna. Alisto gid sia sa pagtan-aw sing pila ka kaluyahon sa pagtuo kag ginahingalitan ini. Dapat dumdumon sang bisan sin-o nga nagapangduhaduha nga ang isa sa likod sinang mga pagpangduhaduha amo ang isa nga nagsiling kay Eva: “Ginsiling gid bala sang Dios nga indi kamo magkaon sang bisan ano nga kahoy sang katamnan?” Pagkatapos matanom sang Manunulay ang pangduhaduha sa iya hunahuna, ginsugiran niya sia sing isa ka kabutigan, nga ginpatihan niya. (Genesis 3:1, 4, 5) Agod malikawan nga maguba ang aton pagtuo sang pagpangduhaduha subong sang natabo kay Eva, dapat kita magmabinantayon. Kon may bisan anong diutay nga pagpangduhaduha tuhoy kay Jehova, sa iya Pulong, ukon sa iya organisasyon nga nagsulod sa imo tagipusuon, maghimo sing maabtik nga mga tikang sa pagdula sini bag-o ini magtubo padulong sa isa ka butang nga makaguba sang imo pagtuo.—Ipaanggid ang 1 Corinto 10:12.
7. Ano ang sarang mahimo sa pagdula sing mga pagpangduhaduha?
7 Ano ang sarang mahimo? Sa liwat, ang sabat amo ang magsalig kay Jehova kag sa iya Pulong. “Kon may yara sa inyo nga nakulangan sing kaalam, papangayua sia sa Dios nga nagahatag sing maalwan sa tanan nga tawo kag wala nagabasol; kag hatagan sia sini. Apang papangayua sia nga may pagtuo, sa walay pangduhaduha, kay ang nagaduhaduha kaangay sang balod sang dagat nga ginapalid kag ginatumbo sang hangin.” (Santiago 1:5, 6; 2 Pedro 3:17, 18) Gani ang una nga tikang amo ang hanuot nga pagpangamuyo kay Jehova. (Salmo 62:8) Nian, indi magpangalag-ag sa pagpangayo sing bulig gikan sa isa ka mahigugmaon nga manugtatap sa kongregasyon. (Binuhatan 20:28; Santiago 5:14, 15; Judas 22) Buligan nila ikaw sa pagsumay sa ginhalinan sang inyo mga pagpangduhaduha, nga mahimo bangod sang bugal ukon sang pila ka sayop nga panghunahuna.
8. Paano sa masami nagasugod ang apostata nga panghunahuna, kag ano ang solusyon?
8 Ang pagbasa ukon pagpamati bala sa apostata nga mga ideya ukon kalibutanon nga pilosopiya nagadala sing makahililo nga mga pagpangduhaduha? Sing maalamon, ang Biblia nagalaygay: “Magtinguha sing maayo gid sa pagpakita sang imo kaugalingon sa Dios subong nga pinakamaayo, manugpangabudlay nga indi kinahanglan magkahuya, nga nagagamit sing matadlong sang pulong sang kamatuoran. Apang likawi ang dibalaan nga mga pagwakal; kay ini magdala sang mga tawo sa pagkadidiosnon pa gid, kag ang ila pulong magaab-ab subong sang kalamayo.” (2 Timoteo 2:15-17) Talalupangdon nga madamo sang nabiktima sang apostasya ang nagsugod sa sayop nga direksion una paagi sa pagreklamo nahanungod sa ila nabatyagan tuhoy sa paagi sang pagtratar sa ila sang organisasyon ni Jehova. (Judas 16) Ulihi na lang ang pagpangita sing mga sayop sa mga pagpati. Subong nga gilayon nga ginakuha sang manugbulong ang kalamayo, dulaa gilayon sa hunahuna ang bisan anong huyog sa pagreklamo, ang indi pag-ugyon sa mga butang nga ginahimo sa Cristianong kongregasyon. (Colosas 3:13, 14) Kuhaa ang bisan ano nga nagapadaku sinang mga pagpangduhaduha.—Marcos 9:43.
9. Paano ang isa ka maayo nga teokratikong rutina nagabulig sa aton nga mahuptan ang mapagros nga pagtuo?
9 Magpabilin sing suod kay Jehova kag sa iya organisasyon. Iluga sing matutom si Pedro, nga malig-on nga nagsiling: “Ginuo, kay sin-o bala kami makadto? Ikaw may mga pulong sang kabuhi nga walay katapusan.” (Juan 6:52, 60, 66-68) Magtigayon sing maayong programa sang pagtuon sang Pulong ni Jehova agod mahuptan nga malig-on ang imo pagtuo, kaangay sang isa ka daku nga taming, nga makasarang “sa pagpalong sang tanan nga nagadabadaba nga baslay sang malauton.” (Efeso 6:16) Magpabilin nga aktibo sa Cristianong ministeryo, ipaambit sing mahigugmaon ang mensahe sang Ginharian sa iban. Sa adlaw-adlaw, pamalandungi sing mapinasalamaton kon paano ikaw ginpakamaayo ni Jehova. Magpasalamat nga natigayon mo ang ihibalo sang kamatuoran. Ang paghimo sining tanan sa isa ka maayo nga Cristianong rutina makabulig sa imo nga malipay, sa pagbatas, kag sa pagpabilin nga hilway sa mga pagpangduhaduha.—Salmo 40:4; Filipos 3:15, 16; Hebreo 6:10-12.
Pagsunod sa Panuytoy ni Jehova sa Pag-asawahay
10. Ngaa importante gid ang magpalapit kay Jehova para sa panuytoy tuhoy sa Cristianong pag-asawahay?
10 Sang ginhimo ang kahimusan nga magpuyo ang lalaki kag babayi subong magtiayon, wala lamang gintuyo ni Jehova nga pun-on ang duta kundi agod padakuon man ang ila kalipay. Apang, ang sala kag ang pagkadihimpit nagdala sing serioso nga mga problema sa kaangtanan sang pag-asawahay. Nalakip man sa sini ang mga Cristiano sanglit sila man indi himpit kag apektado sa mga pag-ipit sang modernong-adlaw nga pagkabuhi. Apang, kon nagasalig sila kay Jehova kag sa iya Pulong, ang mga Cristiano sarang magmadinalag-on sa ila pag-asawahay kag sa pagpadaku sang ila kabataan. Wala sing duog sa Cristianong pag-asawahay ang kalibutanon nga mga buhat kag panimuot. Ang Pulong sang Dios nagalaygay sa aton: “Paghuptan sing dungganon sang tanan ang pag-asawahay kag ang higdaan sang pagkasal dipagdagtaan, kay hukman sang Dios ang mga makihilawason kag mga makihilahion.”—Hebreo 13:4.
11. Sa paglubad sa mga problema sa pag-asawahay, ano ang dapat kilalahon sang duha ka magtiayon?
11 Ang pag-asawahay nga ginpahisuno sa laygay sang Biblia may espiritu sang gugma, obligasyon, kag kalig-unan. Pareho nga nahangpan kag ginatahod sang bana kag asawa ang prinsipio sang pagkaulo. Kon may nagautwas nga mga kabudlayan, sa masami bangod ini sang pagpabaya nga iaplikar ang laygay sang Biblia. Sa paglubad sang nagadugay nga problema, importante nga usisason sing bunayag sang magtiayon kon ano gid bala ang problema kag lubaron ang mga kabangdanan sa baylo sang mga sintoma. Kon ang ulihi nga mga paghambalanay nagdul-ong sa dipag-ugyunay, ang magtiayon mahimo makapangayo sing pila ka bulig gikan sa isa ka mahigugmaon nga manugtatap.
12. (a) Sa anong kinaandan nga mga problema sa pag-asawahay nagahatag sing laygay ang Biblia? (b) Ngaa kinahanglanon sa bahin sang magtiayon nga himuon ang mga butang sa paagi ni Jehova?
12 Ang problema bala nagadalahig sing komunikasyon, pagtahod sa balatyagon sang isa kag isa, pagtahod sa pagkaulo, ukon kon paano himuon ang mga desisyon? May kahilabtanan bala ini sa pagpadaku sa kabataan, ukon ang pagkabalanse sang seksuwal nga mga kinahanglanon? Ukon tuhoy bala ini sa badyet sang pamilya, pagliwaliwa, kaupdanan, kon bala magatrabaho ang asawa, ukon diin kamo magapuyo? Ano man ang problema, ang Biblia nagahatag sing praktikal nga laygay sing direkta paagi sa mga kasuguan ukon sing indi direkta paagi sa mga prinsipio. (Mateo 19:4, 5, 9; 1 Corinto 7:1-40; Efeso 5:21-23, 28-33; 6:1-4; Colosas 3:18-21; Tito 2:4, 5; 1 Pedro 3:1-7) Kon untatan sang magtiayon ang makagod nga mga pagreklamo kag tugutan ang gugma nga mapabutyag sing lubos sa ila pag-asawahay, magaresulta ini sa daku nga kalipay. Kinahanglan ang daku nga handum sa bahin sang magtiayon sa paghimo sang kinahanglanon nga mga pagbag-o, sa paghimo sang mga butang sa paagi ni Jehova. “Ang nagatalupangod sa pulong makakita sing kaayuhan, kag ang bisan sin-o nga nagasalig kay Jehova malipayon sia.”—Hulubaton 16:20.
Mga Pamatan-on—Pamatii ang Pulong sang Dios
13. Ngaa indi mahapos para sa Cristianong mga pamatan-on nga magdaku nga may mabaskog nga pagtuo kay Jehova kag sa iya Pulong?
13 Indi mahapos para sa Cristianong mga pamatan-on ang magtubo nga may malig-on nga pagtuo sa palibot sang malauton nga kalibutan. Ang isa ka rason amo nga “ang bug-os nga kalibutan yara sa gahom sang isa nga malauton,” si Satanas nga Yawa. (1 Juan 5:19) Ang mga pamatan-on ginasalakay sining mapintas nga kaaway nga makahimo sing malain nga maayo kon tulukon. Ang ako-anay nga panimuot, ang makagod nga mga ambisyon, ang paghandum sa kon ano ang imoral kag mapintas, kag ang dikinaandan nga paghingamo sing mga kalipayan—ini tanan natingob sa isa ka kinaandan, mabaskog nga sulundan sang panghunahuna nga ginlaragway sa Biblia subong “ang espiritu nga nagapanghikot karon sa mga anak sang pagkamalinapason.” (Efeso 2:1-3) Malalangon nga ginpasanyog ni Satanas ining “espiritu” sa mga tulun-an nga libro sa eskwelahan, sa madamo nga mga musika, sa isport, kag sa iban pa nga porma sang kalingawan. Ang mga ginikanan kinahanglan nga mangin alisto sa pagpauntat sina nga impluwensia paagi sa pagbulig sa ila kabataan nga magdaku nga nagasalig kay Jehova kag sa iya Pulong.
14. Paano ang mga pamatan-on “makapalagyo gikan sa kailigbon nga pinamatan-on”?
14 Ginhatagan ni Pablo sing amaynon nga laygay ang iya pamatan-on nga kaupod nga si Timoteo: “Palagyo ka sa mga kailigbon nga pinamatan-on kag tuyua ang pagkamatarong, pagtuo, gugma, paghidait, kaupod sa mga nagapanawag sa Ginuo gikan sa tagipusuon nga putli.” (2 Timoteo 2:22) Samtang indi tanan nga “mga kailigbon nga pinamatan-on” ang malain, dapat ‘malagyo’ sa sini ang mga pamatan-on agod indi mawili sa sining mga butang, nagabilin sing diutay, kon may yara gid man, sing tion para sa diosnon nga mga panikasog. Ang bodybuilding, isport, musika, kalingawan, mga hobby, kag pagbiyahe, samtang indi gid man malain, mahimo mangin siod kon mangin daku ini nga mga butang sa kabuhi. Likawi sing bug-os ang walay pulos nga pagsugilanon, sa pag-uluistambay, kag ang dinagakaigo nga interes sa sekso, ang pagpulupamuyuko kag ginatak-an, kag ang pagreklamo nga wala mahangpan sang imo mga ginikanan.
15. Anong mga butang ang mahimo matabo sa sulod sang puluy-an nga makaamot sa pagdul-ong sa mga pamatan-on nga magkabuhi sing doble-kara?
15 Bisan sa sulod mismo sang puluy-an, ang katalagman mahimo nga nagatiid sa mga pamatan-on. Kon ang ginatan-aw amo ang imoral ukon masingki nga mga palaguwaon sa telebisyon kag sa video, mahimo magatubo ang handum sa paghimo sing malain nga mga butang. (Santiago 1:14, 15) Ang Biblia nagalaygay: “O kamo nga nagahigugma kay Jehova, dumti ang malaut.” (Salmo 97:10; 115:11) Nahibaluan ni Jehova kon ang isa nagakabuhi sing doble-kara. (Hulubaton 15:3) Mga Cristianong pamatan-on, maghulonghulong sa imo kuwarto. Ginapatapik mo bala sa dingding ang mga larawan sang imoral nga mga artista sa kalibutan sang isport ukon musika, ukon ginapatapik mo bala ang mabuligon nga mga butang nga maayo nga mga pahanumdon? (Salmo 101:3) Sa inyo kabinet, maugdang bala ang imo panapton, ukon ang iban bala sang imo panapton nagapakita sang sobra nga estilo sing pamayo sining kalibutan? Sa malalangon nga mga paagi sarang ikaw masiod sang Yawa kon magpadaug ikaw sa pagsulay nga tilawan kon ano ang malaut. Ang Biblia nagalaygay sing maalamon: “Magbut-anan kamo, magmabinantayon. Ang inyo kaaway, ang Yawa, subong sang nagangurob nga leon nagaluyong, nga nagapangita sang iya tulukbon.”—1 Pedro 5:8.
16. Paano ang laygay sa Biblia makabulig sa pamatan-on nga ipabugal sia sang tanan?
16 Ginasilingan kamo sang Biblia nga bantayan ang inyo pagpakig-upod. (1 Corinto 15:33) Ang inyo mga kaupod amo dapat yadtong nagakahadlok kay Jehova. Indi magpadaug sa pag-ipit sang mga katubotubo. (Salmo 56:11; Hulubaton 29:25) Magmatinumanon sa inyo mahinadlukon sa Dios nga mga ginikanan. (Hulubaton 6:20-22; Efeso 6:1-3) Magpalapit sa mga gulang para sa panuytoy kag pagpalig-on. (Isaias 32:1, 2) Ituon ang imo hunahuna kag mga mata sa espirituwal nga mga kabilihanan kag mga tulumuron. Magpangita sing mga kahigayunan sa paghimo sing espirituwal nga mga pag-uswag kag sa pagpakigbahin sa mga hilikuton sang kongregasyon. Tun-i nga himuon ang mga butang sing kinaugalingon. Magtubo nga malig-on kag mapagros sa pagtuo, kag nian mapamatud-an mo nga isa ikaw ka importante nga tawo—isa nga takus sing kabuhi sa bag-ong kalibutan ni Jehova! Ipabugal ikaw sang aton langitnon nga Amay, malipay sa imo ang imo undanon nga mga ginikanan, kag mapalig-on mo ang imo mga Crisitianong kauturan nga lalaki kag babayi. Amo ina ang importante!—Hulubaton 4:1, 2, 7, 8.
17. Anong mga benepisyo ang matigayon sang mga nagasalig kay Jehova kag sa iya Pulong?
17 Sa mabinalaybayon nga mga dinalan ang salmista gin-inspirar sa pagsulat: “Walay maayo nga butang nga idumili ni Jehova sa mga nagagawi sing matadlong. O Jehova sang mga kasoldadusan, malipayon ang tawo nga nagasalig sa imo.” (Salmo 84:11, 12) Huo, ang kalipay kag kadalag-an, indi ang kalisod kag kapaslawan, amo ang matigayon sang tanan nga nagasalig kay Jehova kag sa iya Pulong, ang Biblia.—2 Timoteo 3:14, 16, 17.
Paano Mo Sabton?
◻ Ngaa indi dapat ibutang sang mga Cristiano ang ila pagsalig sa “kaalam sining kalibutan”?
◻ Ano ang himuon kon ang isa may pagpangduhaduha?
◻ Paano ang paghimo sing mga butang sa paagi ni Jehova nagadala sing kadalag-an kag kalipay sa pag-asawahay?
◻ Paano ginabuligan sang Biblia ang mga pamatan-on sa “pagpalagyo gikan sa kailigbon nga pinamatan-on”?
[Retrato sa pahina 23]
Ang mga pamatan-on nagaliso kay Jehova kag sa iya Pulong, samtang ginasikway subong kabuangan “ang kaalam sining kalibutan”
[Retrato sa pahina 25]
Ang mga pamilya nga nagasalig kay Jehova kag sa iya Pulong mangin madinalag-on kag malipayon