Kon Paano Makasapo sing Kalipay sa Paghimo sing Disipulo
ANG isa sang dakung mga kalipay nga maagom sang isa ka tawo amo ang mangin isa ka masigkamanugpangabudlay sang Dios. Sa karon, ang hilikuton sang Dios nagalakip sang pagtipon sa mahuyugon sa matarong nga mga tawo pasulod sa Cristianong kongregasyon kag paghanas sa ila para sa kabuhi subong mga Cristiano karon kag subong man para sa kaluwasan pasulod sa bag-ong kalibutan.—Miqueas 4:1-4; Mateo 28:19, 20; 2 Pedro 3:13.
Tuburan sang daku nga kalipay para sa mga Saksi ni Jehova sa Latin Amerika nga makita ang minilyon ka tawo nga mangin mga disipulo ni Jesucristo sugod sang 1980. Sa sining mabungahon nga latagon, diin madamo ang nagatahod kag nagapati sa Biblia, ang pila ka bug-os tion nga mga ministro nakabulig sa madamo sa pagdedikar sang ila kabuhi kay Jehova. Upod ang madamo nga eksperiensia, ayhan masugiran nila kita nahanungod sa kalipay sa paghimo sing disipulo. Ang pila nila ka panugda mahimo nga makabulig sa inyo nga makasapo sing kalipay sa paghimo sing mga disipulo sa inyo lugar.
Pagkilala sang Posible nga “mga Karnero”
“Sa bisan anong siudad ukon minuro nga sudlan ninyo, pangitaa ninyo kon sin-o didto ang takus,” siling ni Jesus sang ginpalakat niya ang iya mga apostoles sa pagbantala. (Mateo 10:11) Kon nagaduaw kamo sa mga tawo, paano ninyo makilala yadtong sarang mabuligan sa espirituwal? Si Edward, isa ka bug-os tion nga ministro sa kapin sa 50 ka tuig, nagasiling: “Ginapakita nila ini paagi sa ila hanuot nga mga pamangkot kag sa ila kaayawan kon ginahatagan sing mga sabat gikan sa Kasulatan.” Si Carol nagadugang: “Kon ang isa ka tawo magatu-ad sa akon sang isa ka personal nga problema ukon palaligban, isa gid ini ka pagpangabay sing bulig. Ginatinguhaan ko nga makakita sing mabuligon nga impormasyon sa mga publikasyon sang Watch Tower Society. Ining personal nga interes masami nga nagadul-ong sa isa ka pagtuon sa Biblia.” Apang, ang mga sinsero indi pirme madali makilala. Si Luis nagasugid: “Ang iban nga daw interesado katama indi gali interesado, apang ang iban nga daw nagapamatok primero nagbag-o sang nabatian nila kon ano gid ang ginasiling sang Biblia.” Sanglit madamong taga-Latin Amerika ang nagatahod sa Biblia, sia nagadugang, “Makilala ko yadtong mahimo mabuligan sa espirituwal kon ginabaton nila gilayon kon ano ang ginatudlo sang Biblia pagkatapos ko ini mapakita sa ila.” Ang pagbulig sa sining “mga takus” sa pag-uswag sa espirituwal nagadala sing matuod nga kalipay kag kaayawan. Paano ninyo mabuligan ang mga takus?
Pagsugod sing mga Pagtuon sa Biblia
Ang paggamit sa mga bulig sa pagtuon sa Biblia nga ginbalhag sang “matutom kag mainandamon nga ulipon” amo sa masami ang labing maayo nga paagi sa pagbulig sa mga tawo nga mahangpan ang kamatuoran sang Biblia. (Mateo 24:45) Paano ninyo mapasangkad ang pagpabalor sa kabilihanan sining mga bulig sa pagtuon sa Biblia? Si Edward nagasiling: “Sanglit ang mga kahimtangan, mga personalidad, kag mga pagtamod sang mga tawo nagalainlain, ginatinguhaan ko nga mangin mapasibusibuon sa pagsugod sing mga pagtuon.” Indi ninyo mahimo magamit ang pareho nga paagi sa tanan.
Sa iban, ang pila ka dipormal nga mga paghinun-anon sa Kasulatan mahimo nga kinahanglanon antes ipakilala ang isa ka libro nga pagagamiton sa pagtuon sa Biblia. Walay sapayan sina, ang isa ka misyonero nga mag-asawa nagreport: “Masunson namon ginatanyag ang isa ka pagtuon sa nahaunang pagduaw.” Subong man, ang isa ka Saksi nga nakabulig sa 55 ka tawo nga makadedikar nagasiling: “Ang akon pangunang paagi sa pagsugod sing mga pagtuon sa Biblia amo ang pagsugod dayon sa pagbinagbinag sang impormasyon sa libro nga Mahimu Ka Mabuhi sing Dayon sa Paraiso sa Duta.” Walay sapayan nga wala maluyagan sang iban ang ideya tuhoy sa pagtuon sa bisan anong butang, ang iban nalangkag sa pagtuon sa bisan ano nga ginapatihan nila nga makabulig sa ila sa kabuhi. Ang pagtanyag sing walay bayad nga mga pagtuon sa Biblia sa puluy-an masunson nga makagalanyat sa ila. Ginapaathag sang iban nga mga misyonero ini nga tanyag kag nian nagasiling: “Luyag ko ipakita sa imo kon paano namon ini ginahimo. Kon naluyagan mo ini, mahimo ka magpadayon. Kon indi, ikaw ang magdesisyon.” Kon ginatanyag ini sa sinang paagi, ang mga tawo indi mahadlok sa pagbaton.
Ang isa pa ka Saksi, nga nakabulig sa madamo nga may pigado sing pangabuhi kag manubo nga tinun-an, nagasiling: “Natukiban ko nga ang mga tract mabuligon gid sa pagsugod sing mga pagtuon sa Biblia.” Bisan ano man nga publikasyon ang ila ginagamit, ginatinguhaan sang bug-os tion nga mga manunudlo nga hatagan ang Biblia sing pangunang pagpadaku. Si Carola nagasiling: “Sa una nga pagtuon, ginagamit ko lamang ang mga laragway kag mga lima ka kasulatan, agod mapakita ang pangunang mga punto kag ang Biblia daw indi mabudlay tun-an.”
Paghupot sang Interes nga Buhi
Ang mga tawo naluyag sa pagbatyag sing pag-uswag, gani si Jennifer nagarekomendar: “Himua ang pagtuon nga mapagsik. Hupti ang pagtuon nga mainuswagon.” Ang pagdumala sing pagtuon sa Biblia sing regular nga wala sing ginalaktawan nga mga semana nagabulig man sa ila sa pagbatyag nga sila nagauswag. Ang isa ka espesyal payunir nga nagdaku sa uma nagapaathag sang pagkaimportante sang pagpasimple sang mga paathag kag sang pagkonsentrar sa pangunang mga punto, agod yadtong bisan may manubo sing tinun-an magauswag. Sia nagasiling: “Sa akon minuro, dapat namon wisikan sang tubig ang duta sa tapos makasab-ug sing mga binhi. Kon bahaan namon ang mga talamnan, ang duta nagatig-a kag ang nagapanugdo nga binhi indi makapanubo, kag nagakapatay sila. Sa kaanggid, kon bahaan ninyo ang mga bag-ong interesado sing madamong punto, mahimo nga daw mabudlay ini katama kag magauntat sila.” Bisan ang mga tawo nga mausisaon dapat magtuon sa pagkonsentrar sa isa ka tema sa isa ka tion agod magauswag sila sa paghangop. Si Jesus nagsiling sa iya mga apostoles: “May madamo pa ako nga butang nga inugsiling sa inyo, apang indi kamo makadala sa ila karon.”—Juan 16:12.
Ang isa pa ka paagi sa paghupot sang interes nga buhi amo ang pagpalig-on sa mga ginaduaw ninyo nga padayon nga hunahunaon ang Pulong sang Dios paghalin ninyo. Si Yolanda nagarekomendar: “Magbilin sing isa ka pamangkot nga wala masabat. Hatagi sila sing pagahimuon, subong sang pagbasa sang isa ka bahin sang Biblia ukon pag-usisa sang isa ka tema nga nagadalahig sa ila.”
Pagpalambo sing Gugma kay Jehova
Ang inyo kalipay magadugang kon buligan ninyo ang inyo mga estudyante nga mangin “mga manugtuman sang pulong, kag indi mga manugpamati lamang.” (Santiago 1:22) Paano ninyo ina mahimo? Ang matuod nga mga Cristiano ginapahulag sang gugma kay Jehova. Si Pedro, nga taga-Mexico, nagapaathag: “Indi mahimo mahigugma sang mga tawo ang isa ka tawo nga wala nila makilala, gani kutob gid sa panugod sang pagtuon, ginatudluan ko sila sang ngalan sang Dios gikan sa Biblia, kag nagapangita ako sing mga kahigayunan nga mapadaku ang mga kinaiya ni Jehova.” Sa paghambalanay, sarang mo mapalig-on ang apresasyon kay Jehova paagi sa pagpabutyag sang imo mga balatyagon para sa iya. Si Elizabeth nagasiling: “Pirme ko ginatinguhaan nga hinambitan ang pagkaayo ni Jehova. Sa akon mga pagtuon, kon makakita ako sing matahom nga bulak, matahom nga pispis, ukon madugsingon nga kuting, pirme ko ginahinambitan nga binuhatan ini ni Jehova.” “Magpamulong tuhoy sa ginsaad sang Dios nga bag-ong kalibutan subong ang katunayan nga nahibaluan mo,” panugda ni Jennifer. “Pamangkuta sila kon ano ang luyag nila nga himuon sa bag-ong kalibutan.”
Kon ginapamalandungan sing mainapresyahon sang isa ka tawo kon ano ang natun-an niya tuhoy kay Jehova, nagatudok ini sa iya tagipusuon kag nagapahulag sa iya sa pagpanghikot. Apang indi sia makapamalandong kon indi sia makadumdom. Ang malip-ot nga pagrepaso sa tatlo ukon apat ka pangunang mga punto pagkatapos sang tagsa ka pagtuon isa ka bulig sa paghinumdom. Ginapasulat sang madamong manunudlo sang Biblia sa mga bag-uhan ang yabi nga mga kasulatan lakip ang isa ka nota sa likod sang ila Biblia. Ang isa ka misyonero halin sa Inglaterra nagapaathag sang isa pa ka benepisyo sang mga repaso: “Ginapamangkot ko kon paano sia nakabenepisyo sa impormasyon. Nagabulig ini sa ila nga pamalandungan sing mainapresyahon ang mga dalanon kag mga kasuguan ni Jehova.”
Ang isa ka matutom nga Saksi nga naggradwar sa ikatlo nga klase sang Gilead nagasiling: “Dapat kita mangin mapagsik. Dapat mahibaluan sang aton mga estudyante nga nagapati kita sa kon ano ang ginatudlo naton.” Ang pagtuo nga naghimo sa imo nga isa ka malipayon nga “manugtuman sang hilikuton” makalalaton kon ginapabutyag mo ini.—Santiago 1:25.
“Nasapwan ko nga ang mga tawo nagabatyag nga kapin nga nagasuod sa Dios kon ginabuligan ko sila sa pagkilala sang mga sabat sa ila mga pangamuyo,” siling sang isa ka Saksi nga nakabulig sa madamo sa pagsimba kay Jehova. “Ginahatagan ko sila sing mga halimbawa gikan sa akon kaugalingon nga inagihan, kaangay sining isa: Sang nag-abot kami sang akon kaupod sa isa ka bag-ong asaynment subong mga payunir, may diutay lamang kami nga utanon, isa ka pakete sang margarina, kag wala kami sing kuwarta. Naubos namon ang pagkaon sa panihapon kag nagsiling, ‘Karon wala na kita sing makaon buwas.’ Ginpangamuyo namon ini, kag nagtulog. Temprano pa sang masunod nga aga ang isa ka lokal nga Saksi nagduaw kag nagpakilala sang iya kaugalingon, kag nagsiling, ‘Ginpangamuyo ko nga si Jehova magapadala sing mga payunir. Karon maupdan ko na kamo sa halos bug-os nga adlaw, apang bangod nagapuyo ako sa uma, dapat ako manyaga upod sa inyo, gani nagbalon ako sing pagkaon para sa aton tanan.’ Madamo ini nga karne sang baka kag mga utanon. Pirme ko ginasugiran ang akon mga estudyante nga indi gid magabiya si Jehova sa aton kon ginauna naton ang iya Ginharian.”—Mateo 6:33.
Maghatag sing Praktikal nga Bulig
Kapin pa ang nadalahig sa paghimo sing mga disipulo ni Cristo sangsa pagdumala sing isa ka pagtuon sa Biblia. Ang isa ka misyonero nga nag-alagad sa madamong tinuig subong isa ka nagalakbay nga manugtatap nagsiling: “Hatagi sila sing tion. Indi magdali pauli pagkatapos sang pagtuon. Kon nagakaigo, magpabilin kag makigsugilanon sa makadali.” Si Elizabeth nagasiling: “Nagapakita ako sing interes sa ila bangod nadalahig ang kabuhi. Sa madamong beses nagakabalaka ako sa ila subong nga daw mga anak ko sila.” Ang iban nga mga Saksi naghatag sining mga panugda: “Duawa sila kon nagamasakit sila.” “Kon malapit ka sa ila puluy-an, halimbawa sa pag-alagad sa latagon, duawa sila sa makadali agod mapakilala sa ila ang iban nga mga Saksi.” Si Eva nagasiling: “Mamati sing maayo agod mahangpan ang inagihan kag kahimtangan sa kabuhi sang tawo. May epekto ini sa kon ano ang reaksion sang tawo sa kamatuoran kag mahimo nga makaupang sa ila pag-uswag. Makig-abyan sa ila, agod may pagsalig sila sa pagsugid sang ila mga problema.” Si Carol nagadugang: “Ang matuod nga interes sa tawo importante kay ang mga pagbalhin nga pahanabuon sang kamatuoran sa iya kabuhi magakahulugan kon kaisa sang pagkadula sang pamilya kag mga abyan. Sa kabilugan, maayo mahibaluan sang estudyante kon diin kita nagaistar kag makasalig nga makakadto sila sa aton sa bisan ano nga tion.” Buligi sia nga tamdon ang kongregasyon subong ang iya bag-ong pamilya.—Mateo 10:35; Marcos 10:29, 30.
“Mangin alisto sa paghatag sing praktikal nga bulig. Maglingkod upod sa ila sa mga miting, kag buligi sila sa ila mga kabataan,” siling ni Yolanda. Ang pagpakita sa mga bag-uhan kon paano hanason ang ila mga kabataan, pauswagon ang ila talaksan sang pagkatinlo, paghanda sing mga komento para sa mga miting, kag paghatag sing mga pamulongpulong sa Teokratikong Eskwelahan sa Pagministro bahin tanan sang paghimo sing disipulo nga hilikuton. Ang isa pa ka utod nga babayi nagadugang: “Importante nga hanason ang mga bag-uhan para sa ministeryo. Kon ining bahin sang paghanas ginapasapayanan, ang iban nagapabilin nga matinahapon sa pagbantala nga hilikuton, nagadula sang ila kalipay sa pag-alagad kay Jehova, kag mapaslawan sa pagbatas.” Gani maghatag sing maayong paghanas sa pamalaybalay nga hilikuton, sa mga pagduaw liwat, kag sa pagsugod sing mga pagtuon sa Biblia. Daku gid ang imo kalipay kon makita mo ang imo estudyante nga nagauswag paagi sa imo bulig kag panuytoy.
Pabakura Sila sa Pagbatas
“Yara ang huyog nga patumbayaan ang pagtuon sa tion nga nabawtismuhan na ang estudyante,” paandam sang isa ka eksperiensiado nga manughimo sing disipulo. Dapat dumdumon lunsay sang manunudlo kag sang estudyante nga ang bag-ong bawtismado nga Cristiano indi pa hamtong sa espirituwal. Dapat pa sia magtubo sa iya pagtuo, sa iya apresasyon sa kasuguan sang Dios, kag sa iya gugma kay Jehova. Kinahanglan sia nga palig-unon sa pagpalambo sing maayong mga batasan sa personal nga pagtuon agod padayon sia nga magauswag.—1 Timoteo 4:15.
Ang bag-uhan mahimo nga nagakinahanglan sing bulig sa pag-uswag kag mangin isa ka maabiabihon nga katapo sang katilingban sang mga kauturan. Mahimo nga nagakinahanglan sia sing panuytoy sa pagpakig-angot sa mga pagkadihimpit sang mga kauturan samtang kapin sia nga nagasuod sa ila. (Mateo 18:15-35) Mahimo nga nagakinahanglan sia sing bulig agod mangin isa ka lantip nga manunudlo, nga makasarang sa paghimo sang iya kaugalingon nga pagpanalawsaw. Ang isa ka misyonera nagapanaysayon: “Pagkatapos nabawtismuhan ang isa ka estudyante, luyag niya mapauswag ang iya ikasarang subong isa ka manunudlo, gani nagsiling sia sa akon, ‘Magadumala ako sing isa ka bag-ong pagtuon sa masunod nga semana, apang dapat ko liwat panumdumon ang unang mga kapitulo nga natun-an ko. Mahimo mo bala marepaso liwat sa akon ining mga katipulo, sing isa-isa, agod masulat ko ang mga paathag sa mga kasulatan kag mga ilustrasyon, kag nian magamit ko ini kon magadumala ako sang akon pagtuon?’ Nangin isa sia ka maayo gid nga manunudlo, kag apat sang iya mga estudyante ang ginbawtismuhan sa isa ka asambleya.”
Kon Ngaa ang Paghimo sing Disipulo Takus sa Panikasog
“Ang paghimo sing mga disipulo nagakahulugan sing dugang pa nga dumalayaw ni Jehova. Nagakahulugan ini sing kabuhi para sa mga nagabaton sang kamatuoran,” siling ni Pamela. “Luyag ko gid magtudlo sang kamatuoran sa iban—tuman gid ini katahom! Makita sang isa ang mga estudyante nga nagauswag sing amat-amat, nagahimo sing mga pagbalhin sa ila kabuhi kag nagalandas sang mga sablag nga daw indi malandas kon indi bangod sang espiritu ni Jehova. Madamo sadtong naghigugma kay Jehova ang nangin mga pinalangga ko gid nga mga abyan.”
“Kon ginabinagbinag ko ang mga nabuligan ko nga mangin mga disipulo,” panaysayon sang isa ka misyonero gikan sa Alemanya, “makita ko ang pila ka mahuluy-on gid kaayo nga mga tawo nga nag-uswag sing daku subong mga ministro sang Dios sa bagay nga halos indi ako makapati. Makita ko ang mga tawo nga naglandas sang makapaluya nga mga sablag, sing maathag paagi sa bulig ni Jehova. Makita ko ang mga pamilya nga bulagay sadto apang nahiusa na karon—malipayon nga mga kabataan kaupod sang responsable nga mga ginikanan. Makita ko ang mga tawo nga nagakabuhi sing malipayon, nagadayaw kay Jehova. Amo ini ang kalipay sang paghimo sing mga disipulo.”
Huo, ang mangin kaupod nga manugpangabudlay ni Jehova nga Dios sa paghimo-sing-disipulo nga hilikuton isa ka tuburan sang dimatupungan nga kalipay. Ginpamatud-an ini sang mga eksperiensia sang mga misyonero kag mga payunir. Matigayon mo ang amo man nga kalipay kag kaayawan kon ginaaplikar mo ang mga panudlo kag ginagamit ini sing bug-os kalag. Upod ang pagpakamaayo ni Jehova, ang imo kalipay mangin bug-os.—Hulubaton 10:22; 1 Corinto 15:58.