Pagtuman sang Inyo Sinumpaan sa Kasal!

ANG adlaw sang kasal isa ka malipayon nga adlaw. Isa man ini ka serioso kaayo nga okasyon. Ang nobya kag nobyo nagahimo sing balaan nga panumpa nga magaapektar sang ila bug-os nga pagkabuhi. Ang mga nagatambong sa kasal subong dinapit nga mga bisita mga saksi sa sining balaan nga panumpa, apang si Jehova nga Dios amo ang panguna nga Saksi.

Ang Biblia wala nagapatuman sing espesipiko nga mga pamaagi ukon pinasahi nga sahi sang seremonya sa kasal. Apang sa pagkilala sang diosnon nga ginhalinan sini, kinaandan nga ginahiwat ang kasal paagi sa paggamit sing mga panumpa sa kasal sa tion sang relihioso nga seremonya. Sa sulod sang mga tinuig ginagamit sang mga Saksi ni Jehova ang masunod nga panumpa sa kasal: “Ako —⁠— nagakuha sa imo —⁠— nga mangin akon ginpakas-lan nga (asawa/bana), agod higugmaon kag palanggaon (Nobya: kag hanuot nga tahuron) suno sa kasuguan sang Dios nga nahamtang sa Balaan nga Kasulatan para sa Cristianong (mga asawa/mga bana), tubtob nga kita lunsay nagakabuhi nga magkaupod sa duta suno sa kahimusan sang Dios sa pag-asawahay.”a

Butang nga Dapat Hunahunaon

Kon nagaplano ka sa pagpakasal, importante kaayo nga binagbinagon ang tuhoy sa kadalumon kag kahulugan sining panumpa antes ang adlaw sang kasal. Si Solomon nagsiling: “Dili ka magdasudaso sang imo baba; kag ang imo tagipusuon indi magmadagmit sa pagmitlang sing bisan ano nga butang sa atubangan sang matuod nga Dios.” (Manugwali 5:⁠2) Kamusta kon nakasal ka na? Nian magabenepisyo ka gikan sa pagpamalandong sa pagkaimportante sang balaan nga saad nga imo ginhimo sa atubangan ni Jehova. Ginatuman mo bala ini? Ginakabig sang mga Cristiano ang ila mga saad sing serioso. Si Solomon nagpadayon: “Bayari ang imo ginasaad. Maayo pa nga indi ka magsaad sangsa magsaad ka nga indi magbayad. Dili pagtuguti ang imo baba sa pagpakasala sang imo unod, kag indi ka magsiling sa atubangan sang manugtunda nga sayop ini.”​—⁠Manugwali 5:​4-6.

Ang pagbinagbinag sa tagsa ka prase sang sinumpaan sa kasal walay duhaduha nga magapauswag sang inyo paghangop sining balaan nga saad.

“Ako ​—⁠​—​ nagakuha sa imo”: Amo ini ang nagabukas nga mga pulong sang panumpa. Ginapadaku sini nga kabigon mo nga personal nga salabton ang imo desisyon sa pagpakasal.

Sa idalom sang Cristianong kahimusan, wala sing Makasulatanhon nga obligasyon sa pagminyo. Si Jesus mismo nagpabilin nga walay asawa kag nagpanugyan sing pagkadiminyo sa sadtong “makasarang sa pagbaton sini.” (Mateo 19:​10-12) Sa pihak nga bahin, kalabanan sang mga apostoles ni Jesus mga minyo. (Lucas 4:38; 1 Corinto 9:⁠5) Maathag nga ang desisyon sa pagminyo isa ka personal nga butang. Wala sing tawo nga may Makasulatanhon nga autoridad sa pagpilit sa isa pa nga magminyo.

Hanti, salabton mo ang magpili sa pagminyo. Ayhan, ginpili mo ang isa nga imo pakaslan. Sang ginahimo mo ang panumpa sa kasal, sa pagsiling, ‘Ginakuha ko ikaw ​—​—,’ ginakuha mo ukon ginabaton ina nga tawo upod ang iya mga kaayo​—⁠subong man ang iya mga kasawayan.

Sa ulihi ayhan matukiban mo ang mga kinaiya nga wala mo masap-ungan sa personalidad sang imo tiayon. May mga kalugaw-an kon kaisa. Ang Biblia nagasiling nga “ang tanan nagpakasala kag nawad-an sang himaya sang Dios.” (Roma 3:23) Busa ayhan nagakinahanglan nga maghimo ka sing mga pagpasibu agod mabaton mo ang imo tiayon. Mahimo nga mabudlay ini, kag kon kaisa daw luyag mo na mag-untat. Apang dumduma, ang panumpa sa kasal ginhimo sa presensia ni Jehova. Mabuligan niya ikaw nga magmadinalag-on.

“Nga mangin akon ginpakaslan nga (asawa/bana)”: Sa nahauna gid nga kasal, sang ginpakasal si Eva kay Adan, nagsiling si Jehova nga Dios nga “sila mangin isa ka unod.” (Genesis 2:24; Mateo 19:​4-6) Busa ang pag-asawahay amo ang pinakasuod nga kaangtanan nga mahimo magluntad sa ulot sang duha ka tawo. Ang pag-asawahay nagadala sa imo sa isa ka bag-o nga kaangtanan. Ginabaton mo ang isa nga mangin imo “ginpakaslan nga asawa” ukon “ginpakaslan nga bana.” Tuhay ini sa bisan anong iban pa nga kaangtanan. Ang mga buhat nga makatuga sing diutay nga halit sa iban nga mga kaangtanan mahimo nga magtuga sing tudok nga kasakit sa sulod sang pag-asawahay nga kahimusan.

Binagbinaga, halimbawa, ang Makasulatanhon nga laygay nga makita sa Efeso 4:26. Diri nagasiling ang Biblia: “Magpangakig, apang dili magpakasala; dili pagpatunuri sing adlaw ang inyo kaakig.” Ayhan indi mo pirme mahusay sa gilayon ang imo mga problema sa mga himata kag mga abyan subong nagakadapat. Apang ang imo tiayon mas suod sangsa kay bisan sin-o nga himata ukon abyan. Ang kapaslawan sa paghusay sa gilayon sing mga problema upod sa imo tiayon mahimo nga makatalagam sa pinasahi nga kaangtanan sa ulot ninyo.

Ginatugutan mo bala ang dipag-ugyunay sa tunga nimo kag sang imo tiayon nga mangin isa ka nagapadayon nga ginatunaan sang kaugot ukon kasakit? Ang mga dipaghangpanay kag makaulugot nga mga kahimtangan nagalawig bala sing madamong inadlaw? Agod matuman ang inyo sinumpaan, kon mag-utwas ang mga problema indi pagtuguti nga maglipas ang isa ka adlaw nga indi makapakighidait sa imo tiayon. Nagakahulugan ini sang pagpatawad kag paglimot subong man sang pagbaton sang imo mga kasawayan kag mga kasaypanan.​—⁠Salmo 51:5; Lucas 17:​3, 4.

“Agod higugmaon”: Ang mangin bana nagapanumpa ‘nga higugmaon kag palanggaon’ ang iya mangin asawa. Ining gugma nagalakip sa romantiko nga gugma nga naghiusa sa ila. Apang ang romantiko nga gugma indi tuman na. Ang gugma nga ginapanumpa sang isa ka Cristiano sa iya tiayon mas tudok kag mas masangkad.

Ang Efeso 5:25 nagasiling: “Mga bana, higugmaa ang inyo mga asawa, subong nga si Cristo man naghigugma sang kongregasyon.” Ang gugma ni Jesus sa kongregasyon indi gid kaangay sa romantiko nga gugma sa ulot sang magkatuhay nga sekso. Ang mga tinaga nga “higugmaa” kag “naghigugma” nga gingamit sa sining kasulatan naghalin sa tinaga nga a·ga΄pe, nga nagapatuhoy sa gugma nga ginagamhan sang prinsipio. Ginasugo diri sang Biblia ang mga bana sa pagpadayag sing padayon, malig-on, dalayon nga gugma sa ila mga asawa.

Indi ini lamang isa ka “ginahigugma ko ikaw bangod ginahigugma mo ako” nga sahi sang emosyon. Ginapangita sang bana ang kaayuhan sang iya asawa sing una pa gani sa iya kaugalingon, kag ang asawa nagahigugma sa iya bana sa amo man nga paagi. (Filipos 2:⁠4) Ang pagpalambo sing tudok nga gugma sa imo tiayon magabulig sa imo sa pagtuman sang inyo sinumpaan sa kasal.

“Agod palanggaon”: Suno sa isa ka diksionaryo, ang ‘pagpalangga’ nagakahulugan sang ‘pagpakamahal, pagbatyag ukon pagpakita sing gugma.’ Dapat mo ipabutyag ang imo gugma sa mga pulong kag mga buhat! Labi na nga nagakinahanglan ang asawa sing padayon nga pagpadayag sing gugma sang iya bana. Mahimo nga atipanon sang iya bana ang iya pisikal nga mga kinahanglanon, apang indi pa ini tuman. May mga asawa nga may bastante nga pagkaon kag isa ka komportable nga puluy-an apang indi gid malipayon bangod ginpabay-an kag ginpasapayanan sila sang ila bana.

Sa pihak nga bahin, ang isa ka asawa nga nakahibalo nga ginahigugma sia kag ginapalangga may rason gid sa pagkalipay. Sa pagkamatuod, matuod man ini sa mga bana. Ang matuod nga gugma mapalambo sing daku paagi sa hanuot nga pagpabutyag sing pagpalangga. Sa Ambahanon ni Solomon, ang manugbantay nga kahagugma nagtuaw: “Daw ano kagayon sang imo gugma, utod ko, kahagugma ko! Daw ano kaayo pa sang imo gugma sangsa alak kag ang kaamyon sang imo mga lana sangsa tanan nga bagay sang mga pahumot!”​—⁠Ambahanon ni Solomon 4:⁠10.

“Kag hanuot nga tahuron”: Sa sulod sang mga siniglo, may mga lalaki nga nagaabuso kag nagapakanubo sa mga babayi . Bisan karon, suno sa World Health nga magasin, “ang kasingki batok sa mga babayi nagakatabo sa kada pungsod kag sa tagsa ka sahi sang katilingban kag ekonomiya. Sa madamong kultura, ang pagsakit sa asawa ginakabig nga kinamatarong sang lalaki.” Kalabanan sang mga lalaki mahimo nga indi makasala bangod sinang buhat. Sa gihapon, madamong lalaki ang daw napaslawan sa pagpakita sing hanuot nga interes sa mga hulusayon nahanungod sa mga babayi. Subong resulta, madamong babayi ang nagpalambo sing negatibo nga panimuot sa mga lalaki. Ang pila ka mga asawa mabatian nga nagasiling: “Ginahigugma ko ang akon bana, apang indi ko gid sia matahod!”

Apang, si Jehova nga Dios, nagapabalor sa babayi nga nagatinguha sa pagtahod sang iya bana​—⁠bisan pa kon indi niya malab-ot ang ginapaabot kon kaisa. Ginakilala niya nga may yara sia hatag-Dios nga katungdanan, ukon palangakuan. (1 Corinto 11:3; Efeso 5:23) Nian ang hanuot nga pagtahod sa iya bana bahin sang iya pagsimba kag pagkamatinumanon kay Jehova. Wala ginapasapayanan sang Dios ang pagkamatinumanon sang diosnon nga mga babayi.​—⁠Efeso 5:33; 1 Pedro 3:​1-6; ipaanggid ang Hebreo 6:⁠10.

Kinahanglan ang pareho nga pagtahod sa pag-asawahay, kag dapat ini tigayunon sa baylo nga paabuton lamang ukon pangayuon. Halimbawa, ang mayubiton ukon makapaakig nga mga pulong wala sing duog sa kahimusan sang pag-asawahay. Indi mahigugmaon ukon matinahuron ang nagapakanubo nga mga komento tuhoy sa imo bana ukon asawa. Wala gid sing kaayuhan ang pagbuyagyag sing mga kakulangan sang imo tiayon sa iban ukon ang paghambal tuhoy sini sa publiko. Bisan sa paglinahugay ang isa makapakita sing daku nga kakulang sang pagtahod. Ang mga pulong sa Efeso 4:​29, 32 napadapat lunsay sa bana kag asawa. Diri nagasiling ang Biblia: “Dili pagpaguwaa sa inyo baba ang malain nga pulong, kundi ang maayo sa pagpalig-on suno sa kinahanglan . . . Mangin mainayuhon kamo sa isa kag isa, malulo nga mahinuklugon.”

“Suno sa kasuguan sang Dios nga nahamtang sa Balaan nga Kasulatan”: Luyag sang Dios nga matigayon naton ang kahilwayan sa pagpili kag pagbuhat. Wala niya kita ginapabug-atan sang makalalapyo nga listahan sang mga pagsulundan nga nagakontrol sing kabuhi sang mag-asawa. Apang, nagpahamtang sia sing mga panuytoy para sa aton kaayuhan.

Sa karon may madamong nagkalainlain nga balasahon tuhoy sa pag-asawahay, kag madamong tawo ang may ila kaugalingon nga mga pilosopiya. Apang maghalong! Sa tema sang pag-asawahay, ang kalabanan sang mga impormasyon nga lapnag nagasumpakil sa Biblia.

Hibalua man nga ang mga kahimtangan nagalainlain gikan sa magkatuhay nga magtiayon. Sa isa ka paagi, ang mga mag-asawa kaangay sa mga tipik sang yelo; daw magkaangay ini tulukon gikan sa malayo, apang sa katunayan ang kada isa pinasahi, tuhay gikan sa iban pa. Ang kombinasyon sang imo personalidad kag sang imo tiayon indi maparehuan ni bisan sin-o pa nga mag-asawa sa kalibutan. Gani indi mag­padalidali sa pagbaton sing personal nga mga pagtamod sang iban. Wala sing himo-tawo nga pormula nga mapadapat sa tanan nga pag-asawahay!

Sa kabaliskaran, ang tanan nga sugo sang Biblia matuod kag nagakaigo. Si apostol Pablo nagsulat: “Ang bug-os nga Kasulatan inspirado sang Dios kag mapuslanon sa pagtudlo, sa pagsabdong, sa pagtadlong sa mga butang.” (2 Timoteo 3:16; Salmo 119:151) Kon ginabasa mo ang Biblia kag ginabaton ang mga panudlo sini subong panuytoy sa imo adlaw-adlaw nga pagkabuhi, mahimo mo matuman ang imo sinumpaan sa kasal.​—⁠Salmo 119:105.

“Tubtob nga kita lunsay nagakabuhi nga magkaupod sa duta”: Nagapatuhoy ini sa malawig nga pag-updanay. Nagasugo ang Dios nga “bayaan sang lalaki ang iya amay kag ang iya iloy kag maghiusa sia sa iya asawa.” (Genesis 2:24) Luyag ni Jehova nga magkaupod kamo. Magkaupod nga nagaalagad sa Dios. Magkaupod nga nagatuon sang iya Pulong. Nagalakatlakat nga magkaupod, nagalingkod nga magkaupod, nagakaon nga magkaupod. Magkaupod nga nagakalipay sa kabuhi!

Ang pila ka mag-asawa nagapanikasog nga magpain sing tion kada adlaw agod lamang makasugilanon sa isa kag isa. Bisan sa tapos sang madamong tinuig sang pag-asawahay, ining pag-upod importante para sa kalipay sang mag­asawa.

“Suno sa kahimusan sang Dios sa pag-asawahay”: Ang pag-asawahay isa ka dulot halin kay Jehova nga Dios, nga nagpatok sing kahimusan sa pag-asawahay. (Hulubaton 19:14) Ang indi pagsunod sa iya kahimusan magabutang sa katalagman indi lamang sang kalipay sang inyo pag-asawahay kundi sang inyo man kaangtanan sa Manunuga. Sa pihak nga bahin, kon ang bana kag asawa nagapalambo sing isa ka maayo nga kaangtanan kay Jehova, nga ginapakita paagi sa pagtuman sang iya mga kahimusan, matigayon nila ang mahidaiton nga mga kaangtanan upod sa iban, lakip na sa isa kag isa.​—⁠Hulubaton 16:⁠7.

Dili pagkalimte nga si Jehova amo ang panguna nga Saksi sang inyo sinumpaan sa kasal. Padayon nga tumana ining balaan nga saad, kag ang inyo pag-asawahay mangin tuburan sang pagdayaw kag himaya kay Jehova nga Dios!

[Footnote]

[Blurb sa pahina 22]

Sa isa ka paagi, ang mga mag-asawa kaangay sa mga tipik sang yelo. Tanan sila daw magkaangay tulukon gikan sa malayo, apang sa katunayan ang tagsa ka mag-asawa pinasahi nga magkatuhay

[Credit Line]

Snow Crystal/Dover