Kinahanglan Naton ang Matuod nga mga Abyan
SI Jenny kag si Sue masadya nga nagahambalanay. Ang nagakawas nga mga yuhum, nagasiga nga mga mata—ang tanan nga ginahimo nila nagapakita sing daku nga interes sa kon ano ang isiling sang isa. Walay sapayan nga magkatuhay sing ginhalinan, magkapareho sila sa madamo nga butang kag ginatahod gid nila ang isa kag isa.
Sa iban nga duog, si Eric kag si Dennis magkaupod nga nagapangabudlay sa isa ka proyekto, isa sa madamo nga nahimo na nila sa sulod sang madamo nga tinuig. Relaks sila, kag madali nga nagatuhaw ang kinadlawanay. Kon mangin serioso ang ila hambalanay, bunayag sila nga nagabayluhanay sing mga opinyon. Ginatahod nila ang isa kag isa. Kaangay nanday Jenny kag Sue, si Eric kag si Dennis matuod nga mag-abyan.
Ining mga paglaragway mahimo nga magapahalipay sang imo tagipusuon, nagapahunahuna sa imo tuhoy sa imo kaugalingon nga mga abyan. Sa pihak nga bahin, nagatiklod ini sa imo nga handumon ang subong sina nga pagpakig-abyan. Mahimo mo man ini matigayon!
Kon Ngaa Kinahanglan Naton ang Matuod nga mga Abyan
Ang maayo nga pag-abyanay kinahanglanon para sa aton kaayuhan sa hunahuna kag pisikal. Apang, kon nagapangasubo, wala ini nagakahulugan nga may sayop sa aton. Ang pila ka mananalawsaw nagasiling nga ang kasubo isa ka pagkagutom, isa ka kinaugali nga patimaan nga nagakinahanglan kita sing kaupod. Ti, kon paano nga ang pagkaon nagapakanay ukon nagadula sang pagkagutom, ang husto nga sahi sang pagpakig-abyan nagabuhin sang kasubo ukon nagadula pa gani sini. Dugang pa, ang pagtigayon sing maayong mga abyan nga nagapabalor sa aton indi imposible.
Ang mga tawo gintuga upod ang pagkinahanglan sing pagpakig-upod. (Genesis 2:18) Ang Biblia nagasiling nga ang isa ka matuod nga abyan, ukon kaupod, “natawo tungod sa kapiutan.” (Hulubaton 17:17) Hanti, ang matuod nga mag-abyan sarang makapangayo sing bulig sa isa kag isa kon kinahanglanon. Apang ang pagpakig-abyan indi lamang ang pagtigayon sing isa nga mapangayuan sing bulig ukon makaupod sa trabaho ukon hampang. Ang maayong mga abyan nagapalambo sang labing maayo nga mga kinaiya sa isa kag isa. Ang Hulubaton 27:17 nagasiling: “Ang salsalon nagapatalom sang salsalon. Sa amo ang tawo nagapatalom sang nawong sang iban.” Subong nga ang isa ka salsalon mahimo magamit sa pagpatalom sa sulab nga human sang amo man nga metal, ang isa ka abyan mahimo magmadinalag-on sa pagpatalom sa intelektuwal kag espirituwal nga kahimtangan sang iban. Kon ang mga kabang-awan nagapung-aw sa aton, ang mahinuklugon nga pagtulok sang isa ka abyan kag ang Makasulatanhon nga pagpalig-on makapapagsik gid.
Sa Biblia, ang pagpakig-abyan ginabuylog sa gugma, pagkapamilyar, pagkakompidensial, kag pagpakig-upod. Ang mga pagpakig-abyan mahimo nga magalakip sa mga kaingod, mga kaupod sa trabaho, kag iban pa. Ginakabig man sang iban ang pila ka himata subong ila pinakasuod nga mga abyan. Apang, para sa madamo karon, ang matuod nga mga abyan mabudlay makita kag mahuptan. Ngaa amo sini? Matigayon bala ninyo ang matuod kag dayon nga mga pag-abyanay?