Ginhimo Nila ang Kabubut-on ni Jehova
Pagpamati sa Nagapaalam nga mga Pulong ni Jesus
SANG gab-i sang Nisan 14, 33 C.E., si Jesucristo kag ang iya 11 ka matutom nga mga apostoles nagasandiay sa isa ka latok sa naibabaw nga hulot sa Jerusalem. Nakahibalo sang iya nagahilapit nga kamatayon, nagsiling sia sa ila: “Sa diutay pa nga tion kaupod ako ninyo.” (Juan 13:33) Sa katunayan, si Judas Iscariote nakalakat na agod makighimbon sa malaut nga mga tawo nga buot magpatay kay Jesus.
Wala sing isa sa sadtong naibabaw nga hulot ang nakamutik sang pagkahilingagawon sang kahimtangan luwas kay Jesus. Nakahibalo gid sia nga magaantos sia. Nakahibalo man si Jesus nga ang iya mga apostoles magabiya sa iya sa sina gid nga gab-i. (Mateo 26:31; Zacarias 13:7) Sanglit amo ini ang katapusan nga kahigayunan ni Jesus antes sia mapatay sa pagpakighambal sa iya mga apostoles, makapat-od kita nga ang iya nagapaalam nga mga pulong nasentro sa mga butang nga importante gid katama.
“Padayon Ninyo Ini nga Himuon sa Handumanan Nakon”
Kaupod sang iya matutom nga mga apostoles, ginsugdan ni Jesus ang isa ka bag-ong selebrasyon nga magabulos sa Judiyong Paskua. Gintawag ini ni apostol Pablo nga “ang panihapon sang Ginuo.” (1 Corinto 11:20) Nagkuha sing tinapay nga walay tapay, si Jesus nagbungat sing pangamuyo. Nian gintipiktipik niya ang tinapay kag ginhatag ini sa iya mga apostoles. “Kuha kamo, kaon kamo. Nagakahulugan ini sang akon lawas,” siling niya. Nian nagkuha sia sang tagayan sang alak, nagdulot sing isa ka pangamuyo sang pagpasalamat kag ginhatag ini sa mga apostoles, nga nagasiling: “Inom kamo tanan sini; kay nagakahulugan ini sang akon ‘dugo sang katipan,’ nga ginaula tungod sa madamo sa kapatawaran sang mga sala.”—Mateo 26:26-28.
Ano ang kahulugan sini nga okasyon? Subong sang ginpakita ni Jesus, ang tinapay nagarepresentar sa iya wala sing sala nga lawas. (Hebreo 7:26; 1 Pedro 2:22, 24) Ang alak nagasimbulo sa ginpatulo nga dugo ni Jesus, nga nagapaposible sang kapatawaran sang mga sala. Ang iya mahalaron nga dugo magapalig-on man sang bag-ong katipan sa ulot ni Jehova nga Dios kag sang 144,000 ka tawo, nga magagahom sa ulihi kaupod ni Jesus sa langit. (Hebreo 9:14; 12:22-24; Bugna 14:1) Paagi sa pag-agda sa iya mga apostoles sa pagpakigbahin sa sining panihapon, ginpakita ni Jesus nga magapakig-ambit sila upod sa iya sa langitnon nga Ginharian.
Nahanungod sa sining pagasaulugon nga panihapon, si Jesus nagsugo: “Padayon ninyo nga himuon ini sa handumanan nakon.” (Lucas 22:19) Huo, ang Panihapon sang Ginuo mangin isa ka tuigan nga okasyon, kaangay sang Paskua. Samtang ang Paskua naghinumdom sang pagluwas sa mga Israelinhon gikan sa kahiulipnan sa Egipto, ang Panihapon sang Ginuo magahugod sa mas daku pa nga kaluwasan—ang iya sang tulubson nga katawhan gikan sa pagkaulipon sa sala kag kamatayon. (1 Corinto 5:7; Efeso 1:7) Dugang pa, ang mga nagapakig-ambit sa tinapay kag alak nga mga emblema pagapahanumdumon sang ila palaabuton nga mga pribilehiyo subong mga hari kag mga saserdote sa langitnon nga Ginharian sang Dios.—Bugna 20:6.
Ang kamatayon ni Jesucristo amo gid ang labing importante nga hitabo sa maragtas sang tawo. Ang mga nagaapresyar sa ginhimo ni Jesus nagatuman sang iya sugo nahanungod sa Panihapon sang Ginuo: “Padayon ninyo nga himuon ini sa handumanan nakon.” Ang mga Saksi ni Jehova nagasaulog sang kamatayon ni Jesus kada tuig sa petsa nga katumbas sang Nisan 14. Sa 1996 ining petsa amo ang Abril 2, pagtunod sang adlaw. Mainit kamo nga ginaagda sa pagtambong sa Kingdom Hall sa inyo lugar.
“Ako Nagahatag sa Inyo sing Bag-ong Sugo”
Luwas sang pagsugod sing Panihapon sang Ginuo, si Jesus may yara nagapaalam nga laygay para sa iya mga apostoles. Walay sapayan sang maayo nga paghanas sa ila, ining mga lalaki madamo pa sing dapat tun-an. Wala nila mahantop sing bug-os ang katuyuan sang Dios para kay Jesus, para sa ila, ukon para sa palaabuton. Apang wala gintinguhaan ni Jesus nga ipaathag ining tanan nga butang sa sini nga tion. (Juan 14:26; 16:12, 13) Sa baylo, nagpamulong sia nahanungod sa butang nga may daku nga importansia. “Ako nagahatag sa inyo sing bag-ong sugo,” siling niya, “nga maghigugmaanay kamo; subong nga ako naghigugma sa inyo, nga kamo man maghigugmaanay.” Nian si Jesus nagdugang: “Paagi sa sini ang tanan nga tawo makahibalo nga kamo mga disipulo ko, kon maghigugmaanay kamo.”—Juan 13:34, 35.
Sa anong paagi nga isa ini ka “bag-ong sugo?” Ti, ang Mosaikong Kasuguan nagsugo: “Dapat mo higugmaon ang imo isigkatawo subong sang imo kaugalingon.” (Levitico 19:18) Apang, ginsugo ni Jesus ang iya mga sumulunod nga magpakita sing nagasakripisyo sa kaugalingon nga gugma nga magalab-ot tubtob sa punto nga ihatag ang iya kabuhi tungod sa mga masigka-Cristiano. Sa pagkamatuod, ang ‘kasuguan sang gugma’ maaplikar man sa kubos ka makahalanguyos nga mga sirkunstansia. Sa tanan nga kahimtangan ang isa ka sumulunod ni Jesucristo dapat magmatumato sa pagpakita sing gugma paagi sa pagbulig sa iban sa espirituwal kag sa iban pa nga butang.—Galacia 6:10.
Sa sining katapusan nga gab-i sang dutan-on nga pagkabuhi ni Jesus, ginpahulag si Jesus sang gugma nga mangamuyo kay Jehova nga Dios tungod sa iya mga disipulo. Sing bahin, nangamuyo sia: “Yara sila sa kalibutan kag ako nagakari sa imo. Amay nga Balaan, bantayi sila bangod sang imo kaugalingon nga ngalan nga ginhatag mo sa akon, agod mangin isa sila kaangay naton.” (Juan 17:11) Talalupangdon nga sa sining pangabay sa iya Amay, ginpangamuyo ni Jesus ang tungod sa mahigugmaon nga paghiusa sang iya mga sumulunod. (Juan 17:20-23) Dapat sila ‘maghigugmaanay sa isa kag isa subong nga si Jesus naghigugma sa ila.’—Juan 15:12.
Ginpamatian sang matutom nga mga apostoles ang nagapaalam nga mga pulong ni Jesus. Dapat man naton sundon ang iya mga sugo. Sa sining makahalanguyos nga “katapusan nga mga adlaw,” ang gugma kag paghiusa sa tunga sang matuod nga mga sumilimba labi gid ka importante sangsa nagligad. (2 Timoteo 3:1) Sa pagkamatuod, ginatuman sang matuod nga mga Cristiano ang mga sugo ni Jesus kag nagapakita sing utudnon nga gugma. Nagalakip ini sang pagtuman sa iya sugo nga saulugon ang Panihapon sang Ginuo.