Kon Ngaa ang Matuod nga Pagsimba Nagabaton sing Pagpakamaayo sang Dios
“Dayawa ninyo si Jah! Ang kaluwasan kag ang himaya kag ang gahom iya sang aton Dios, kay ang iya mga paghukom matuod kag matarong.”—BUGNA 19:1, 2.
1. Paano ang Babilonia nga Daku magadangat sa iya katapusan?
ANG “Babilonia nga Daku” napukan sa itululok sang Dios kag nagaatubang karon sing kalaglagan. Ginapakita sang tagna sang Biblia nga ining bug-os kalibutan nga relihiosong makihilawason pagalaglagon sa dili madugay sang iya politikal nga mga kahagugma; ang iya kalaglagan mangin hinali kag madasig. Ang bugna ni Jesus kay Juan nagaunod sining matagnaon nga mga pulong: “Ang anghel nga gamhanan nagkuha sing bato nga kaangay sa dakung bato sang galingan kag gintagbong ini sa dagat, nga nagasiling: ‘Sa amo ang Babilonia nga dakung siudad itagbong sing hinali, kag indi na gid makita.’ ”—Bugna 18:2, 21.
2. Ano ang reaksion sang mga alagad ni Jehova sa kalaglagan sang Babilonia?
2 Ang kalaglagan sang Babilonia nga Daku pagatangisan sang pila ka elemento sang kalibutan ni Satanas apang pat-od gid nga indi sang mga alagad sang Dios, langitnon man ukon dutan-on. Ang ila mangin malipayon nga singgit sa Dios amo ang: “Dayawa ninyo si Jah! Ang kaluwasan kag ang himaya kag ang gahom iya sang aton Dios, kay ang iya mga paghukom matuod kag matarong. Kay ginhukman niya ang dakung makihilawason nga babayi nga nagdagta sang duta sang iya pagkamakihilawason, kag gintimalos niya ang dugo sang iya mga ulipon sa iya kamot.”—Bugna 18:9, 10; 19:1, 2.
Anong Bunga ang Dapat Ipatubas sang Matuod nga Relihion?
3. Anong mga pamangkot ang nagakinahanglan sing sabat?
3 Sanglit ang butig nga relihion pagadulaon sa duta, ano nga sahi sang pagsimba ang magapabilin? Paano naton mahibaluan sa karon kon anong relihioso nga grupo ang makalampuwas sa kalaglagan sang bug-os kalibutan nga emperyo sang butig nga relihion ni Satanas? Anong matarong nga bunga ang dapat ipatubas sining grupo? Sa dimagkubos may yara napulo ka tanda nga nagapakilala sang matuod nga pagsimba ni Jehova.—Malaquias 3:18; Mateo 13:43.
4. Ano ang nahaunang kinahanglanon para sa matuod nga pagsimba, kag paano nagpahamtang sing halimbawa si Jesus sa sini nga bahin?
4 Una sa tanan, dapat sakdagon sang matuod nga mga Cristiano ang pagkasoberano nga tungod sini napatay si Jesus—ang pagkasoberano sang iya Amay. Wala ginhatag ni Jesus ang iya kabuhi tungod sa bisan anong katuyuan sa politika, tribo, etniko, ukon katilingban. Gin-una niya ang Ginharian sang iya Amay sa tanan nga Judiyong mga panikasog sa politika ukon pagbag-o. Ginsabat niya ang pagtanyag ni Satanas sing bug-os kalibutan nga kagamhanan paagi sa mga pulong: “Palayo ka Satanas! Kay nasulat na, ‘Si Jehova nga imo Dios ang simbahon mo, kag sa iya lamang maghimo ka sing sagrado nga pag-alagad.’ ” Nahibaluan niya gikan sa Hebreong Kasulatan nga si Jehova amo ang matuod nga Soberano sa bug-os nga duta. Diin nga relihiosong grupo ang maathag nga nagsakdag sang pagginahom ni Jehova sa baylo sang politikal nga mga sistema sining kalibutan?—Mateo 4:10; Salmo 83:18.
5. (a) Paano dapat tamdon sang matuod nga mga sumilimba ang ngalan sang Dios? (b) Ano ang nagapakita nga ginapadunggan sang mga Saksi ni Jehova ina nga ngalan?
5 Ang ikaduha nga kinahanglanon amo nga ang matuod nga pagsimba nagapadaku kag nagapakabalaan sang ngalan sang Dios. Ginsugid na sang Labing Gamhanan ang iya ngalan, Jehova (ginbadbad nga Yahweh sa pila ka bersion sang Biblia), sa iya katawhan nga Israel, kag ginagamit ini linibo ka beses sa Hebreong Kasulatan. Bisan antes sina, nahibaluan ni Adan, ni Eva, kag sang iban pa ang ngalan, walay sapayan nga wala nila ini pirme gintahod. (Genesis 4:1; 9:26; 22:14; Exodo 6:2) Walay sapayan nga masunson nga ginlaktawan sang mga manugbadbad sang Cristiandad kag Judiyo ang balaan nga ngalan gikan sa ila mga Biblia, ginhatagan sang mga Saksi ni Jehova ina nga ngalan sing nagakaigo nga duog kag pagtahod sa New World Translation of the Holy Scriptures. Ginapadunggan nila ina nga ngalan, subong sang ginhimo sang unang mga Cristiano. Si Santiago nagpamatuod: “Ginsugid sing bug-os ni Simeon kon paano nga ang Dios sa una nga tion nagliso sang iya igtalupangod sa mga pungsod sa pagkuha gikan sa ila sing katawhan para sa iya ngalan. Kag sa sini nagsinanto ang mga pulong sang mga Manalagna, . . . ‘agod yadtong mga nagkalabilin sa mga tawo hanuot nga magapangita kay Jehova, upod sang mga tawo sa tanan nga pungsod, mga tawo nga gintawag sa iya ngalan, siling ni Jehova, nga nagahimo sining mga butang.’ ”—Binuhatan 15:14-17; Amos 9:11, 12.
6. (a) Ano ang ikatlo nga kinahanglanon para sa matuod nga pagsimba? (b) Paano ginpadaku nanday Jesus kag Daniel ang pagginahom sang Ginharian? (Lucas 17:20, 21)
6 Ang ikatlo nga kinahanglanon para sa matuod nga pagsimba amo nga dapat sini pakataason ang Ginharian sang Dios subong ang lamang makatarunganon kag madinalag-on nga solusyon sa mga problema sang katawhan tuhoy sa pagginahom. Maathag nga gintudluan ni Jesus ang iya mga sumulunod nga ipangamuyo ang pagkari sina nga Ginharian, ang pagkontrol sang pagginahom sang Dios sa duta. Si Daniel gin-inspirar sa pagtagna nahanungod sa katapusan nga mga adlaw: “Ang Dios sang langit magapatindog sing ginharian nga dili gid malaglag. . . . Dugmukon kag tapuson sini ining tanan nga [kalibutanon, politikal] nga mga ginharian, kag magapadayon ini tubtob sa tion nga dinapat-od.” Sin-o ang nagpakita paagi sa ila dalanon sang pagginawi sa sining ika-20 nga siglo nga nagahatag sila sing bug-os nga pagsakdag sa sina nga Ginharian—ang mga relihion bala sang Babilonia nga Daku ukon ang mga Saksi ni Jehova?—Daniel 2:44; Mateo 6:10; 24:14.
7. Paano ginatamod sang matuod nga mga sumilimba ang Biblia?
7 Ang ikap-at nga kinahanglanon para kahamut-an sang Dios amo nga dapat sakdagon sang matuod nga mga alagad sang Dios ang Biblia subong gin-inspirar nga Pulong sang Dios. Busa indi sila mangin biktima sang higher criticism, nga nagapanikasog nga pakanubuon ang Biblia nga mangin isa lamang ka sinulatan sang tawo upod ang tanan nga mga kakulangan nga ginapakita sini. Ang mga Saksi ni Jehova nagapati sa Biblia subong ang gin-inspirar nga Pulong sang Dios, subong gid sang ginsiling ni Pablo kay Timoteo: “Ang bug-os nga Kasulatan gin-inspirar sang Dios kag mapuslanon sa pagpanudlo, sa pagsabdong, sa pagsaway, kag sa paghanas sa pagkamatarong, agod nga ang tawo sang Dios mahimpit, nga masangkapan sing bug-os nga sa tagsa ka maayong buhat.”a Busa, ginahimo sang mga Saksi ni Jehova ang Biblia subong ang ila giya, ang ila sulundan para sa adlaw-adlaw nga pagkabuhi, kag ang ila tuburan sang paglaum para sa palaabuton.—2 Timoteo 3:16, 17.
Ang Relihion sang Gugma, Indi sang Dumot
8. Ano ang ikalima nga kinahanglanon para sa matuod nga pagsimba?
8 Paano ginpakilala ni Jesus ang iya matuod nga mga sumulunod? Ang iya sabat nagadala sa aton sa kinahanglanon gid nga ikalima nga tanda nga nagapakilala sa matuod nga pagsimba. Si Jesus nagsiling: “Ako nagahatag sa inyo sing bag-ong sugo, nga maghigugmaanay kamo; subong nga ako naghigugma sa inyo, nga kamo man maghigugmaanay. Sa sini ang tanan nga tawo makahibalo nga kamo mga disipulo ko, kon maghigugmaanay kamo.” (Juan 13:34, 35) Paano ginpakita ni Jesus ang iya gugma? Paagi sa paghatag sang iya kabuhi subong halad nga gawad. (Mateo 20:28; Juan 3:16) Ngaa ang matuod nga gugma kinahanglanon nga kinaiya para sa matuod nga mga Cristiano? Si Juan nagpaathag: “Mga hinigugma, maghigugmaanay kita, kay ang gugma gikan sa Dios . . . Sia nga wala nagahigugma wala makakilala sa Dios, kay ang Dios gugma.”—1 Juan 4:7, 8.
9. Sin-o ang nagpakita sing matuod nga gugma, kag paano?
9 Sin-o sa tion naton ang nagpakita sini nga sahi sang gugma, bisan sa atubang sang pagdumot sa rasa, pungsod, ukon etniko? Sin-o ang nakapasar sa supremo nga pagtilaw, bisan tubtob sa kamatayon, agod nga ang ila gugma dapat mangibabaw? Makasiling bala kita nga ang Katolikong mga pari kag mga madre nga nagbaton nga may pila ka salabton sa pagpapas sa rasa nga natabo sa Rwanda sang 1994? Ang Ortodokso bala sang Serbia ukon ang mga Katoliko sang Croatia nga nakigbahin sa “etniko nga pagpapas” kag sa iban pa dicristiano nga mga buhat sa sadtong inaway sibil sa mga Balkan? Ukon ang Katoliko bala ukon Protestante nga klero nga nagsugyot sang pag-ihig-ihig kag pagdumot sa Naaminhan nga Ireland sang nagligad nga pila ka dekada? Ang mga Saksi ni Jehova indi gid mahimo masumbong nga nakigbahin sa bisan anong kinagamo. Nag-antos sila sa mga bilangguan kag mga kampo konsentrasyon, bisan tubtob sa kamatayon, sa baylo nga luiban ang ila Cristianong gugma.—Juan 15:17.
10. Ngaa ang matuod nga mga Cristiano nagapabilin nga neutral?
10 Ang ikan-om nga kinahanglanon para sa pagsimba nga kalahamut-an sa Dios amo ang pagkaneutral nahanungod sa politikal nga mga hilikuton sining kalibutan. Ngaa dapat magpabilin nga neutral sa politika ang mga Cristiano? Si Pablo, si Santiago, kag si Juan nagahatag sa aton sing malig-on nga rason para sa sinang panindugan. Si apostol Pablo nagsulat nga si Satanas amo “ang dios sining sistema sang mga butang,” nga nagabulag sang painoino sang mga ditumuluo sa tanan posible nga mga paagi, lakip ang nagatuga sing pagbinahinbahin nga politika. Si disipulo Santiago nagsiling nga “ang pagpakig-abyan sa kalibutan pagpakig-away sa Dios,” kag si apostol Juan nagsiling nga “ang bug-os nga kalibutan yara sa gahom sang malauton.” Busa, ang matuod nga Cristiano wala nagakompromiso sang iya debosyon sa Dios paagi sa pagpakigbahin sa malauton nga kalibutan sang politika kag gahom ni Satanas.—2 Corinto 4:4; Santiago 4:4; 1 Juan 5:19.
11. (a) Paano ginatamod sang mga Cristiano ang inaway? (b) Ano ang Makasulatanhon nga sadsaran para sa sining panindugan? (2 Corinto 10:3-5)
11 May kaangtanan sa naunang duha ka kinahanglanon, ang ikapito nangin maathag, nga amo, nga ang matuod nga Cristianong sumilimba indi dapat makigbahin sa mga inaway. Sanglit ang matuod nga relihion isa ka bug-os kalibutan nga paghiliutod nga napasad sa gugma, nian wala sing butang nga makabahinbahin ukon makapukan sinang “bug-os nga paghiliupod sang . . . mga kauturan sa kalibutan.” Si Jesus nagtudlo sing gugma, indi sing dumot; paghidait, indi inaway. (1 Pedro 5:9; Mateo 26:51, 52) Ang amo gihapon nga “malaut,” nga si Satanas, nga naghaylo kay Cain nga patyon si Abel padayon nga nagasab-ug sing pagdumot sa tunga sang katawhan kag sa pagpukaw sang mga pagbinangig kag pagpatulo sing dugo bangod sang politikal, relihioso, kag etniko nga mga pagbinahinbahin. Ang matuod nga mga Cristiano ‘wala na nagatuon sang inaway,’ walay sapayan sang bili nga igabayad. Sing malaragwayon, ‘ginsalsal [na nila] ang ila mga espada nga mga punta sang arado kag ang ila mga bangkaw nga mga galab nga inughagbas.’ Ginapatubas nila ang mahidaiton nga bunga sang espiritu sang Dios.—1 Juan 3:10-12; Isaias 2:2-4; Galacia 5:22, 23.
Ginapakamaayo sang Dios ang Pagkaputli sang Pagginawi kag mga Panudlo
12. (a) Ano ang ikawalo nga kinahanglanon, apang anong relihioso nga mga pagbinahinbahin ang mahinambitan ninyo? (b) Paano ginpadaku ni Pablo ining ikawalo nga kinahanglanon?
12 Ang Cristianong paghiusa amo ang ikawalo nga kinahanglanon sang matuod nga pagsimba. Apang, ang nagatuga sing pagbinahinbahin nga mga relihion sang Cristiandad wala nakabulig sa sining katuyuan. Madamo sang ginatawag nga nagapanguna nga mga denominasyon ang nagsipak sa nanuhaytuhay nga mga sekta, kag ang resulta amo ang kagumon. Binagbinaga, halimbawa, ang Baptist nga relihion sa Estados Unidos, nga nagsipak sa ulot sang Naaminhan nga mga Baptist (Amerikanong Baptist nga mga Simbahan sa E.U.A.) kag Nabagatnan nga mga Baptist (Kombension sang Nabagatnan nga mga Baptist), subong man ang madamo iban pa nga Baptist nga mga grupo nga nagresulta gikan sa pagsipakay. (World Christian Encyclopedia, pahina 714) Madamong pagbinahinbahin ang naggikan sa mga kinatuhayan sang doktrina ukon gobierno sang iglesia (halimbawa, Presbyteriano, Episcopalian, Congregational). Ang mga pagbinahinbahin sang Cristiandad nagaanggid sa iya sang mga relihion sa guwa sang Cristiandad—Budhismo man, Islam, ukon Hinduismo. Ano ang ginlaygay ni apostol Pablo sa unang mga Cristiano? “Karon ginapakiluoy ko sa inyo, mga kauturan, paagi sa ngalan sang aton Ginuong Jesucristo nga dapat kamo tanan maghambal nga may paghilisugot, kag dapat nga walay pagbinahinbahin sa tunga ninyo, kundi mag-isa kamo ka painoino kag kaisipan.”—1 Corinto 1:10; 2 Corinto 13:11.
13, 14. (a) Ano ang kahulugan sang ‘mangin balaan’? (b) Paano ginahuptan nga matinlo ang matuod nga pagsimba?
13 Ano ang ikasiam nga kinahanglanon para sa relihion nga ginakahamut-an sang Dios? Ang prinsipio sang Biblia ginpabutyag sa Levitico 11:45: “Dapat ninyo pamatud-an ang inyo kaugalingon nga balaan, bangod ako balaan.” Ginsulit ni apostol Pedro ini nga kinahanglanon sang nagsulat sia: “Subong nga ang nagtawag sa inyo Isa nga Balaan, magpakabalaan man kamo sa inyo tanan nga pagginawi.”—1 Pedro 1:15.
14 Ano ang ginapakita sining kinahanglanon nga mangin balaan? Nga ang mga sumilimba ni Jehova dapat mangin matinlo sa espirituwal kag moral. (2 Pedro 3:14) Wala sing duog para sa dimahinulsulon, hungod nga mga makasasala, nga paagi sa ila pagginawi ginapakita nila ang ila pagtamay sa halad nga gawad ni Cristo. (Hebreo 6:4-6) Ginapatuman ni Jehova nga ang Cristianong kongregasyon dapat huptan nga matinlo kag balaan. Paano ina ginahimo? Sing bahin paagi sa hudisyal nga proseso sang pag-disfellowship sa mga nagadagta sang kongregasyon.—1 Corinto 5:9-13.
15, 16. Anong mga pagbalhin ang ginhimo sang madamong Cristiano sa ila kabuhi?
15 Antes mahibaluan ang Cristianong kamatuoran, madamo ang nagkabuhi sing mapinatuyangon, nga nagahunahuna lamang sang paglipaylipay kag sang kaugalingon. Apang ang pulong nahanungod kay Cristo nagpabag-o sa ila, kag natigayon nila ang kapatawaran sang ila mga kasal-anan. Ginpabutyag ini sing makusog ni Pablo sang nagsulat sia: “Ano! Wala bala kamo makahibalo nga ang mga dimatarong indi makapanubli sang ginharian sang Dios? Dili kamo magtalang. Bisan ang mga makihilawason, ukon mga diwatahan, ukon mga makihilahion, ukon babayinhon, ukon mga sodomanhon, ukon mga makawat, ukon mga mahamkunon, ukon mga palahubog, ukon mga mapasipalahon, ukon mga malugos indi makapanubli sang ginharian sang Dios. Kag ang iban sa inyo subong anay sina. Apang ginhugasan kamo.”—1 Corinto 6:9-11.
16 Maathag gid nga si Jehova nahamuot sa mga naghinulsol sa ila dimakasulatanhon nga pagginawi, nagliso, kag nangin matuod nga mga sumulunod ni Cristo kag sang iya mga panudlo. Ginahigugma nila sing tunay ang ila mga isigkatawo subong sang ila kaugalingon kag ginapakita ini sa madamong paagi, subong sang pagpadayon sa ministeryo nga nagatanyag sing mensahe sang kabuhi sa tanan nga magapamati.—2 Timoteo 4:5.
“Ang Kamatuoran Magahilway sa Inyo”
17. Ano ang ikanapulo nga kinahanglanon para sa matuod nga pagsimba? Maghatag sing mga halimbawa.
17 May ikapulo nga kinahanglanon si Jehova para sa mga nagasimba sa iya sa espiritu kag kamatuoran—putli nga pagpanudlo. (Juan 4:23, 24) Si Jesus nagsiling sa iya mga sumulunod: “Mahibaluan ninyo ang kamatuoran, kag ang kamatuoran magahilway sa inyo.” (Juan 8:32) Ang kamatuoran sang Biblia nagahilway sa aton gikan sa mga doktrina nga wala nagapadungog sa Dios, subong sang dimamalatyon nga kalag, kalayuhon nga impierno, kag purgatoryo. (Manugwali 9:5, 6, 10; Ezequiel 18:4, 20) Nagahilway ini sa aton gikan sa Babilonianhon nga misteryo sang “Labing Balaan nga Trinidad” sang Cristiandad. (Deuteronomio 4:35; 6:4; 1 Corinto 15:27, 28) Ang pagtuman sa kamatuoran sang Biblia nagaresulta sa mahigugmaon, mainulikdon, mainayuhon, maluluy-on nga katawhan. Ang matuod nga Cristianismo wala gid nagapalig-on sang matimaluson, panatiko nga mga inkisidor, subong ni Tomás de Torquemada, ukon sang madinumtanon nga mga manugpaaway, subong sang mga manugpasanyog sang mga Krusada nga mga papa. Apang, ang Babilonia nga Daku nagpatubas sini nga sahi sang bunga sa bug-os nga maragtas, sing dimagkubos kutob sang panahon ni Nimrod tubtob karon.—Genesis 10:8, 9.
Ang Ngalan nga Pinasahi
18. (a) Sin-o ang nagasunod sang napulo ka kinahanglanon para sa matuod nga pagsimba kag paano? (b) Ano ang dapat naton himuon sing indibiduwal agod mapanubli ang pagpakamaayo nga yara sa unahan naton?
18 Sin-o sa karon ang tunay nga nagatuman sining napulo ka kinahanglanon sang matuod nga pagsimba? Sin-o ang nakilal-an kag ginakilala sang iban tungod sang ila rekord sang integridad kag pagkamahidaiton? Sa bug-os nga globo ang mga Saksi ni Jehova nakilal-an tungod “indi [sila] bahin sang kalibutan.” (Juan 15:19; 17:14, 16; 18:36) Kadungganan sang katawhan ni Jehova nga dalhon ang iya ngalan kag mangin mga Saksi niya, subong nga si Jesucristo isa ka matutom nga saksi sang iya Amay. Ginadala naton inang balaan nga ngalan, nakahibalo sang aton salabton nga magkabuhi nahisanto sa ginatiglawas sini. Kag, subong mga Saksi niya, daw ano ka mahimayaon nga palaabuton ang yara sa unahan naton! Ini amo ang mangin bahin sang matinumanon, nahiusa tawhanon nga pamilya, nagasimba sa Soberano sa Bug-os Uniberso sa napasag-uli nga paraiso diri sa duta. Agod mabaton ina nga pagpakamaayo, padayon kita nga magpakilala sang aton kaugalingon sing maathag kaupod sang matuod nga pagsimba kag dalhon ang ngalan nga mga Saksi ni Jehova sing may pagpabugal “bangod ang iya mga paghukom matuod kag matarong”!—Bugna 19:2; Isaias 43:10-12; Ezequiel 3:11.
[Footnote]
a Ang mga badbad mismo sang Biblia wala gin-inspirar sang Dios. Ang mga badbad, sa ila gid nga kinaugali, mahimo magapabanaag sing nanuhaytuhay nga paghangop sa orihinal nga mga hambal nga sa sini ginrekord ang Biblia.
Paano Ninyo Sabton?
◻ Paano ginatamod sang mga alagad ni Jehova ang kalaglagan sang Babilonia nga Daku?
◻ Ano ang yabi nga mga kinahanglanon para sa matuod nga pagsimba?
◻ Paano ang kamatuoran nagahilway sa inyo?
◻ Ano ang aton pinasahi nga kadungganan subong mga Saksi ni Jehova?
[Retrato sa pahina 17]
Ang mga Saksi ni Jehova nagabantala kag nagatudlo sang maayong balita sang Ginharian sang Dios
[Retrato sa pahina 18]
Ang matuod nga mga Cristiano pirme nagpabilin nga neutral kon tuhoy sa kalibutanon nga politika kag mga inaway
[Credit Line]
Eroplano: Sa maayong kabubut-on sang Ministry of Defense, London