Matuod nga Kalig-unan—Isa ka Maila nga Tulumuron

SI Arnold isa ka bata nga mahuyugon sa iya mulumonyika nga tigre. Bisan diin sia magkadto, ginadala niya ini​—⁠sa halampangan, sa kalan-an, sa iya tululugan. Para sa iya, ang tigre nagahatag sing kasulhay kag kalig-unan. Isa ka adlaw, may problema. Nadula ang tigre!

Samtang nagahibi si Arnold, ginlighot sang iya nanay, tatay, kag tatlo ka magulang nga lalaki ang ila daku nga balay agod pangitaon ang tigre. Sang ulihi nakita ini sang isa sa ila sa hunoshunos. Ayhan ginbutang ini didto ni Arnold kag nalipatan niya. Ang tigre gin-uli, kag ginpahiran ni Arnold ang iya mga luha. Nagbatyag sia liwat sing kalipay kag kalig-unan.

Daw ano kuntani kaayo kon ang tanan nga problema malubad sing amo sina kahapos​—⁠subong lamang sang pagkakita sa hampanganan nga tigre sa hunoshunos! Apang, para sa kalabanan nga tawo, ang mga problema sa kalig-unan mas mabug-at kag masibod sangsa sina. Bisan diin, ang mga tawo nagapamangkot, ‘Mangin biktima bala ayhan ako sang krimen ukon kasingki? Mahimo bala ako madulaan sing trabaho? Nakapat-od bala ang akon pamilya nga may bastante sila nga pagkaon? Likawan bala ako sang iban bangod sang akon relihion ukon sang akon etniko nga ginhalinan?’

Madamo nga tawo ang wala sing kalig-unan. Suno sa Nasyones Unidas, indi lamang nga indi masarangan sang halos tatlo ka bilyon nga ipabulong ang kinaandan nga mga balatian kundi wala man sila sing makuha nga bulong. Kapin sa isa ka bilyon ka tawo ang nagaantos sing daku nga kapurauton. Halos isa ka bilyon, walay sapayan nga makasarang sa pag-obra, ang wala sing obra. Nagadamo ang mga refugee. Sang talipuspusan sang 1994, mga 1 sa kada 115 ka tawo sa duta ang napilitan sa pagpalagyo sa ila mga puluy-an. Minilyon ka kabuhi ang naguba bangod sang $500-bilyones-sa-isa-ka-tuig nga negosyo sa narkotiko nga nagresulta sa dimaisip nga mga krimen kag kasingki. Ginahapay sang inaway ang kabuhi sang minilyon. Sadtong 1993 lamang, 42 ka pungsod ang nakigbahin sa dalagku nga mga inaway, samtang 37 pa ang nakaeksperiensia sing kasingki sa politika.

Ang inaway, kapurauton, krimen, kag iban pa nga pamahog sa tawhanon nga kalig-unan magkaanggid, kag nagadamo ini. Wala sing mahapos nga mga solusyon sa sining mga problema. Sa katunayan, indi gid ini malubad sang mga tawo.

“Dili kamo magsalig sa mga prinsipe, ukon sa anak sang tawo, nga sa iya wala sing bulig,” paandam sang Pulong sang Dios, ang Biblia. Kay sin-o, nian, kita makasalig? Ining kasulatan nagapadayon: “Malipayon sia nga ang iya kabulig amo ang Dios ni Jacob, nga ang iya paglaum yara kay Jehova nga iya Dios, ang Naghimo sang langit kag duta, sang dagat, kag sang tanan nga yara sa ila.”​—⁠Salmo 146:​3-6.

Ngaa makasalig kita nga paluntaron ni Jehova ang kalig-unan sa sining duta? Posible bala matigayon ang malig-on kag malipayon nga pagkabuhi karon? Paano dulaon sang Dios ang mga sablag sa tawhanon nga kalig-unan?