Biktima ka Bala sang Pagdampigdampig?

SA ANO magkaanggid ang etniko nga kasingki, rasismo, diskriminasyon, pagbinahinbahin, kag pagpapas sa rasa? Resulta sila tanan sang lapnag tawhanon nga huyog​—⁠pagdampigdampig!

Ano ang pagdampigdampig? Ginahatagan ini sing kahulugan sang isa ka insiklopedia subong “isa ka padasudaso nga opinyon ukon wala nagahinguyang sang tion ukon nagahalong sa paghukom sing makatarunganon.” Subong dihimpit nga mga tawo, may huyog kita nga magmadinampigon sa pila ka kasangkaron. Ayhan madumduman mo ang pila ka situwasyon nga naghukom ikaw bisan wala sing tanan nga katunayan. Ginapatuhay sang Biblia inang madampigon nga mga huyog sa paagi sang mga paghukom ni Jehova. Ini nagasiling: “Ang Dios nagatan-aw indi subong sang pagtan-aw sang tawo, kay ang tawo nagatulok sa guwa nga dagway; apang si Jehova, nagatulok sa tagipusuon.”​—⁠1 Samuel 16:⁠7.

Ang Pagdampigdampig Makahalit

Walay duhaduha nga ang tanan nakaagi nga ginhukman sang isa sa pila ka tion. (Ipaanggid ang Manugwali 7:​21, 22.) Sa kabilugan, kita tanan mga biktima sang pagdampigdampig. Apang, kon matapna sa gilayon, ang madampigon nga mga panghunahuna mahimo nga indi makatuga sing halit. Ang pagpalambo sinang panghunahuna amo ang makatuga sing halit. Madayaan kita sini nga patihan ang isa ka binutig. Halimbawa, bangod sang impluwensia sang pagdampigdampig, ang pila ka tawo nagapati gid nga ang isa ka tawo makagod, matamad, balingag, ukon bugalon bangod lamang katapo sia sang isa ka relihioso, etniko, ukon pungsudnon nga grupo.

Sa madamong kaso ina nga sahi sang sayop nga paghukom nagadul-ong sa dimakatarunganon, nagaabuso, ukon masingki pa gani nga pagtratar sa iban. Minilyon ka tawo ang napatay sa mga mas­sa­cre, pagpapas sa rasa, etniko nga pagpamatay, kag iban pa nga porma sang sobra nga pagdampigdampig.

Sa bug-os nga kalibutan, ginaaway sang mga panguluhan ang pagdampigdampig paagi sa legal nga paggarantiya sing dimalapas nga kinamatarong sa kahilwayan, kalig-unan, kag pagkaalalangay. Kon basahon mo ang konstitusyon ukon ang pangunang bahin sang mga kasuguan sang imo pungsod, pat-od nga masapwan mo ang isa ka dinalan ukon pagligwat nga gindesinyo sa pag-amlig sa mga kinamatarong sang tanan nga banwahanon, walay sapayan sang ila rasa, sekso, ukon relihion. Apang, ang pagdampigdampig kag diskriminasyon lapnag sa bug-os nga kalibutan.

Biktima ka bala sang pag-ihig-ihig? Ginkabig ka bala nga makagod, matamad, balingag, ukon bugalon bangod lamang sang imo rasa, edad, sekso, nasyonalidad, ukon relihiosong mga pagtuluuhan? Gindingutan ka bala sing mga kahigayunan para sa nagakaigo nga edukasyon, trabaho, puluy-an, ukon mga serbisyo-sosyal bangod sang pagdampigdampig? Kon huo, paano mo malandas ini?

[Retrato sa pahina 3]

Ang pagpalambo sing pagdampigdampig nagapatubo sing pagdumot sa rasa

[Credit Line]

Nina Berman/Sipa Press