Mga Pamangkot Gikan sa mga Bumalasa
Mabatian naton kon kaisa ang mga utod nga nagahambal ukon nagapangamuyo nga magkari ang Ginharian sang Dios sa duta. Husto bala ini nga ekspresyon?
Sa estrikto nga hambal, indi ini Makasulatanhon nga paagi sa pagpaathag kon paano ang ginharian magakari. Ang Ginharian sang Dios langitnon. Busa, si apostol Pablo nagsulat: “Ang Ginuo magatabang sa akon sa tagsa ka malaut nga buhat kag magaluwas sa akon tungod sa iya ginharian nga langitnon. Sa iya ang himaya sa katuigan kag katuigan. Kabay pa.”—2 Timoteo 4:18; Mateo 13:44; 1 Corinto 15:50.
Gintukod ang Ginharian sa langit sang 1914, kag indi ini mahimo ibalhin sa napasag-uli dutan-on nga Paraiso ukon sa iban nga duog. Si Jesucristo amo ang Hari sang Ginharian. Subong Hari, si Jesus may awtoridad sa mga anghel. Gani, ang nagakaigo niya nga duog sang pagginahom amo ang sa tuo nga kamot sang Dios sa langit. Ang ginhaplasan nga mga Cristiano nagpakig-upod sa iya subong mga hari kag mga saserdote sa langit.—Efeso 1:19-21; Bugna 5:9, 10; 20:6.
Nian, nagakahulugan bala ini nga indi na naton ipabutyag sa Dios ang pangalaba nga makita sa bahin sang Pangamuyo sang Ginuo nga nagasiling: “Magkari ang imo ginharian. Matuman ang imo kabubut-on, kon paano sa langit, amo man sa duta”? (Mateo 6:10) Sa kabaliskaran, inang pangamuyo nagakaigo kag puno gihapon sing kahulugan.
Pagapamatbatan sing makatarunganon sang Ginharian sang Dios ining duta, kag amo ini ang yara sa aton hunahuna kon nagapangamuyo kita kag nagagamit sing mga ekspresyon kaangay man sa mga tinaga sang Pangamuyo sang Ginuo. Halimbawa, ang Daniel 2:44 nagatagna nga ang Ginharian ‘magakari’ agod laglagon ang tanan nga mga pungsod kag buslan ang pagginahom sining duta. Ang Bugna 21:2 nagahambal tuhoy sa Bag-ong Jerusalem nga magapanaug gikan sa langit. Ang Bag-ong Jerusalem ginahuman sing 144,000 ka hinaplas nga mga Cristiano nga mangin nobya ni Cristo. Kaupod man sila nga mga manunubli ni Cristo sa Ginharian. Busa ang Bugna 21:2 nagalaragway sang ila pagliso sang ila igtalupangod sa duta, upod ang daku nga pagpakamaayo sa matutom nga katawhan.—Bugna 21:3, 4.
Tubtob nga indi pa matuman ini kag ang iban pa makahalawhaw nga mga tagna, nagakaigo gihapon ang magpangamuyo kay Jehova nga Dios nahisuno sa ginsiling ni Jesus nga “Magkari ang imo Ginharian.” Apang dapat naton dumdumon nga ang Ginharian indi magakari sa planeta nga Duta sing literal. Ang panguluhan sang Ginharian didto nahamtang sa langit, indi sa duta.
[Credit Line sang retrato sa pahina 31]
Duta: Ginpasad sa laragway sang NASA