Nagahimo sing “mga Milagro” ang Pulong sang Dios

PANUGIRON NI THÉRÈSE HÉON

Isa ka adlaw sang 1965, nagsulod ako sa isa ka establisimiento sang patikang kag nagtanyag sing mga kopya sang Lalantawan kag Magmata! nga mga magasin sa mga negosyante. Sang manughalin na ako, nakabati ako sing lupok. Isa ka bala ang nag-igo sa salog nga malapit sa akon mga tiil. “Amo sina ang pagpakig-angot sa mga Saksi ni Jehova,” yaguta sang isa sang mga negosyante.

HINADLUKAN ako sadtong eksperiensia​—⁠apang indi tuman agod biyaan ko ang bug-os tion nga ministeryo. Tuman ka bilidhon ang natun-an ko nga mga kamatuoran sa Biblia agod tugutan ang bisan anong butang nga magpabiya sa akon sa akon ministeryo. Tuguti ako sa pagpaathag kon ngaa nasiling ko ini.

Sa tapos nga natawo ako sang Hulyo 1918, nagpuyo ang akon mga ginikanan sa Cap-de-la-Madeleine, isa ka magamay nga minuro sa Que­bec, Can­a­da, nga kilala subong Ang Duog sang mga Milagro. Nagadugok ang mga dumuluaw diri agod magsimba sa altar ni Birhen Maria. Walay sapayan nga ang ginasugid nga mga milagro ni Maria indi mapamatud-an, ang Pulong sang Dios nagahimo sing daw milagro sa kabuhi sang madamo nga tawo samtang ang minuro nangin isa ka banwa sang kapin sa 30,000 ka pumuluyo.

Sang mga 20 anyos na ako, nakita sang akon amay ang akon interes sa relihioso nga mga butang kag ginhatag niya sa akon ang iya Biblia. Sang ginbasa ko ini, nakibot ako sa paghibalo gikan sa Exodo kapitulo 20 nga ang pagsimba sa imahen maathag nga ginapakamalaut. Gilayon nga nadulaan ako sing pagsalig sa mga panudlo sang Katoliko nga Simbahan kag nag-untat sa pagtambong sa Misa. Indi ko luyag magsimba sa mga rebulto. Madumduman ko pa si Tatay nga nagasiling, “Thérèse, indi ka bala magsimba?” “Indi,” sabat ko, “nagabasa ako sing Biblia.”

Ang pagbasa sing Biblia padayon nga nangin bahin sang akon kabuhi bisan pa nakapamana na ako sang Septiembre 1938. Sanglit ang akon bana, nga si Ro­saire, masami nagatrabaho sa gab-i nangin batasan ko nga basahon ang Biblia samtang didto sia sa iya trabaho. Wala magdugay naghinakop ako nga dapat ang Dios may isa ka katawhan, kag ginsugdan ko ang pagpangita sa ila.

Ang Akon Pagpangita sa Katawhan sang Dios

Bangod sang akon natun-an sa simbahan, sang bataon pa ako, nakulbaan ako magtulog bangod sang kahadlok nga makabugtaw sa impierno. Agod matapna yadto nga kahadlok, ginasilingan ko pirme ang akon kaugalingon nga ang Dios sang gugma indi magtugot nga matabo inang makakulugmat nga butang. Sing masinaligon, padayon ko nga ginbasa ang Biblia, nga nagapangita sing kamatuoran. Kaangay ako sa taga-Etiopia nga eunoco nga nagbasa apang wala makahangop.​—⁠Binuhatan 8:​26-39.

Ang akon utod nga si André kag ang iya asawa, nga nagapuyo sa idalom nga panalgan sang amon apartment, nagsugod sa pagtuon sing Biblia upod sa mga Saksi ni Jehova sang mga 1957. Ginsilingan ko ang akon bayaw nga paandaman ako paagi sa pagpanuktok sa kisame kon mag-abot ang mga Saksi sa pagbantala sa tinukod. Sa sinang paagi mahibaluan ko nga indi ako magsabat. Sang isa ka adlaw nalipat sia sa pagpahibalo sa akon.

Sadto nga adlaw ginbuksan ko ang puwertahan kag nakilala si Kay Mun­day, isa ka payunir, subong amo ang pagtawag sa bug-os tion nga mga ministro sang mga Saksi ni Jehova. Ginsugiran niya ako tuhoy sa ngalan sang Dios, ginapaathag nga ang Dios may personal nga ngalan, nga Jehova. Sang paghalin niya, gin-usisa ko ang akon Biblia agod pat-uron nga ang iya ginhambal ginasakdag gid sang mga teksto sa Biblia. Ang akon pagpanalawsaw nagpahalipay gid sa akon.​—⁠Exodo 6:​3, Douay Version, foot­note; Mateo 6:​9, 10; Juan 17:⁠6.

Sang nagduaw liwat si Kay, ginhambalan namon ang doktrina sang Katoliko tuhoy sa Trinidad, nga nagapangangkon nga ang Dios tatlo ka persona sa isa ka Dios. Sang ulihi gin-usisa ko sing maid-id ang akon mismo Biblia agod kumbinsihon ang akon kaugalingon nga wala ini nagatudlo sing Trinidad. (Binuhatan 17:11) Ginpamatud-an sang akon pagtuon nga si Jesus indi tupong sa Dios. Gintuga sia. May ginsuguran sia, samtang si Jehova wala. (Salmo 90:​1, 2; Juan 14:28; Colosas 1:​15-17; Bugna 3:14) Nakumbinsi sang akon natun-an, malipayon ko nga ginpadayon ang paghambalanay tuhoy sa Biblia.

Isa ka adlaw sang 1958, sang Nobiembre nga nagbagyo sing nieve, gin-agda ako ni Kay nga magtambong sa isa ka sirkito nga asambleya nga ginhiwat sadto nga gab-i mismo sa gin-arkilahan nga duog-tilipunan. Ginbaton ko ang pangagda kag nalipay sa programa. Pagkatapos sadto, sa isa ka paghambalanay upod sa isa ka Saksi nga nagpalapit sa akon, namangkot ako, “Dapat bala nga ang isa ka matuod nga Cristiano magpamalaybalay sa pagbantala?”

“Huo,” siling niya, “dapat ibantala ang maayong balita, kag ginapakita sang Biblia nga ang pagduaw sa mga tawo sa ila mga puluy-an isa ka importante nga paagi sang pagbantala.”​—⁠Binuhatan 20:⁠20.

Nalipay gid ako sa iya sabat! Ginkumbinsi ako sini nga nasalapuan ko ang katawhan sang Dios. Kon nagsiling sia, “Indi, indi ina kinahanglanon,” nagduhaduha kuntani ako nga nasalapuan ko ang kamatuoran, kay nahibaluan ko ang ginsiling sang Biblia tuhoy sa pamalaybalay nga pagbantala. Kutob sadto, nagdasig ang akon pag-uswag sa espirituwal.

Pagkatapos sadtong sirkito nga asambleya, ginsugdan ko ang pagtambong sa mga miting sang mga Saksi ni Jehova nga ginhiwat sa kaiping nga banwa sang ­Trois-­Rivières. Si Kay kag ang iya kaupod, si Flor­ence Bow­man, amo lamang sadto ang mga Saksi nga nagapuyo sa Cap-de-la-Madeleine. Isa ka adlaw nagsiling ako, “Maupod ako buwas sa inyo sa pagbantala.” Nalipay sila nga nagaupod ako sa ila.

Pagbantala sa Akon Napuy-an nga Duog

Ginhunahuna ko nga ang tanan magabaton sing mensahe sang Biblia, apang natalupangdan ko sa gilayon nga indi subong sini. Sang gin-asayn sanday Kay kag Flor­ence sa iban nga duog, isa na lang ako sa banwa nga nagabantala sing mga kamatuoran sang Biblia sa pamalaybalay. Sing maisugon, nagpadayon ako sa pagbantala sing isahanon sa sulod sang mga duha ka tuig tubtob sa akon pagpabawtismo sang Hunyo 8, 1963. Sadto mismo nga adlaw nagpalista ako sa ginatawag anay nga bakasyon payunir nga pag-alagad.

Nagpadayon ako subong bakasyon payunir sa sulod sang isa ka tuig. Nian, si Delvina ­Saint-­Laurent nangako nga makari sia sa Cap-de-la-Madeleine kag buligan ako sing kis-a kada semana kon magregular payunir ako. Gani ginsulatan ko ang akon aplikasyon para sa pagpayunir. Apang, sing makapasubo, duha ka semana lamang antes ako magsugod sa bug-os tion nga ministeryo, napatay si Delvina. Ano ang himuon ko? Ti, nasulatan ko na ang aplikasyon kag indi ko luyag mag-isol. Gani sang Oktubre 1964, ginsugdan ko ang akon karera sa bug-os tion nga ministeryo. Sa sulod sang masunod nga apat ka tuig, nagpamalaybalay ako sing isahanon.

Ang debotado nga mga Katoliko sa Cap-de-la-Madeleine masami nga dimainabyanon. Ang iban nagatawag sing pulis sa pagtinguha nga pauntaton ako sa pagbantala. Isa ka adlaw, subong sa ginsiling ko sa panugod, isa ka negosyante ang nagtinguha nga pahugon ako paagi sa pagtiro sa akon mga tiil. Ti, ginbangdan ini sang kinagula sa banwa. Gintawag ini sang isa ka lokal nga estasyunan sang telebisyon nga isa ka kampanya batok sa mga Saksi ni Jehova. Ang bug-os nga hitabo nagresulta sa isa ka maayo nga pagpanaksi. Sing wala ginapaabot, napulo ka tuig sang ulihi, ang isa ka paryente sang negosyante nga nagtiro sa akon nangin isa ka Saksi mismo.

“Mga Milagro” nga Ginahimo sang Pulong sang Dios

Sa sulod sang mga tinuig, nakita ko ang pader sang pagpamatok sa mga kamatuoran sang Biblia nga nagakapukan sing amat-amat sa Cap-de-la-Madeleine. Sang mga 1968, ang iban nga mga Saksi nagsaylo diri, kag ang lokal nga mga pumuluyo nagsugod sa pagbaton sing kamatuoran sang Biblia. Subong resulta, sang maaga nga bahin sang katuigan 1970, may daku nga pag-uswag sa kadamuon sang pagtuon sa Biblia. Naglab-ot ini tubtob sa tion nga ginpangabay ko ang iban pa nga mga Saksi nga buslan ako sa akon madamo nga ginadumalahan nga mga pagtuon sa Biblia agod makapakigbahin man ako sa pamalaybalay nga ministeryo.

Isa ka adlaw isa ka lamharon nga babayi ang nagbaton gikan sa akon sing bulig sa pagtuon sa Biblia nga Ang Kamatuoran nga Nagadul-ong sa Kabuhi nga Dayon. Kaupod niya sadto ang isa ka lamharon nga lalaki nga si An­dré, isa ka barahubal nga kriminal nga nagbuylog sa paghambalanay. Ang pagpakighambal kay An­dré nagpukaw sang iya interes, kag nasugdan ang isa ka pagtuon sa Biblia. Wala madugay pagkatapos sadto ginsugid niya sa iya mga abyan ang tuhoy sa iya natun-an.

Sa sulod sang isa ka tion, nagatuon ako sa Biblia upod sa apat ka hurong, ang isa sa ila mahipuson apang palapamati. Sia si ­Pierre. Sang isa ka kaagahon sang mga alas dos, nakabati kami sang akon bana sing panuktok sa puwertahan. Handurawa ining danyag: Apat ka hurong ang nagatindog didto nga may ipamangkot sa akon. Maayo lang, si Ro­saire wala gid magreklamo sa sadtong alang-alang nga tion sang mga pagduaw.

Sang primero ang apat ka lalaki nagtambong sa mga miting. Apang, sanday André kag ­Pierre lamang ang nagpadayon. Ginpahisuno nila ang ila kabuhi sa mga talaksan sang Dios kag nagpabawtismo. Sa sulod sang kapin sa 20 ka tuig na karon, ining duha ka lalaki matutom nga nagaalagad kay Jehova. Sang magsugod sila sa pagtuon, bantog sila nga mga kriminal kag ginabantayan sang mga pulis. Kon kaisa nagaabot ang mga pulis sa pagpangita sa ila pagkatapos sang isa sang amon mga pagtuon sa Biblia ukon sa tion sang miting sa kongregasyon. Nalipay ako nga nakabantala ako sa “tanan nga sahi sang tawo,” kag busa nakita ko mismo kon paano ang Pulong sang Dios nagapabag-o nga daw milagro gid.​—⁠1 Timoteo 2:⁠4.

Kon sa pamuno sang akon ministeryo ginsilingan ako nga sa ulihi magatindog ang isa ka Kingdom Hall sa Cap-de-la-Madeleine kag nga mapuno ini sang katawhan ni Jehova, ayhan indi ako magpati. Nalipay ako nga ang isa ka magamay nga kongregasyon sa malapit nga siudad sang ­Trois-­Rivières nagtubo sa anom ka mauswagon nga kongregasyon nga nagatipon sa tatlo ka Kingdom Hall, lakip ang isa sa Cap-de-la-Madeleine.

Nalipay gid ako nga nabuligan ang mga 30 ka tawo nga magdedikar kag magpabawtismo. Karon, sa pangidaron nga 78 anyos, masiling ko gid nga nalipay ako nga gindedikar ko ang akon kabuhi kay Jehova. Apang, ginabaton ko, nga may mga tion nga nagaluya ang akon buot. Agod malandas inang mga tion, pirme ko ginabuksan ang akon Biblia kag nagabasa sing pila ka teksto nga nagapaumpaw sa akon sing daku. Imposible para sa akon nga palipason ang isa ka adlaw nga indi mabasa ang Pulong sang Dios. Makapalig-on gid ang Juan 15:​7, nga nagasiling: “Kon magpabilin kamo nga nahiusa sa akon kag ang akon mga pulong magpabilin sa inyo, pangayo kamo sing bisan ano nga luyag ninyo kag mahanabo ini sa inyo.”

Nagalaum ako nga makita si Ro­saire sa bag-ong kalibutan nga malapit na gid. (2 Pedro 3:13; Bugna 21:​3, 4) Antes sia mapatay sang 1975, nagauswag sia sing maayo padulong sa pagbawtismo. Sa karon, determinado ako nga magpadayon sa bug-os tion nga ministeryo kag padayon nga magkalipay sa hilikuton ni Jehova.