Kon Ano ang Matudlo sang “Duna nga Maalamon” nga mga Tinuga sa Aton

ANG air-conditioner, anti­freeze, pagkuha sang alat ilabi na sa tubig sa dagat, kag sonar mga imbento nga nakilal-an sing lapnag sa katawhan sang ika-20 nga siglo. Apang, nagluntad na ini sa kalibutan sang kasapatan linibo na ka tuig ang nakaligad. Huo, ang katawhan nakabenepisyo paagi sa pagtuon sa sining “duna nga maalamon” nga mga tinuga. (Hulubaton 30:​24-28; Job 12:​7-9) Ang pila ka mga sapat, daw subong bala, nga nangin wala nagahambal nga mga manunudlo sang katawhan, kag mawili gid kita sa pag-usisa sini.

Makabenepisyo bala kita sa pagbinagbinag sa mga kinaugali sang pila ka mga sapat? Ti, ginpaanggid ni Jesucristo ang iya mga sumulunod sa mga karnero, mga man-ug, mga salampati, kag bisan sa mga apan. Ano ang ginahunahuna niya sang ginpaanggid niya ang iya mga sumulunod sa sining mga tinuga? Tan-awon naton.

“Ang Akon mga Karnero Magapamati sang Akon Tingog”

Ang karnero ginahinambitan sa Biblia sing kapin sa 200 ka beses. Subong sang ginapaathag sang Smith’s Bible Dictionary, “ang karnero isa ka simbulo sang pagkahagop, pagpailob, kag pagpasakop.” Sa Isaias kapitulo 53, si Jesus mismo matagnaon nga ginpaanggid sa isa ka karnero. Daw ano ka nagakaigo nga dapat niya ipaanggid ang iya mga sumulunod sa amo man nga sapat! Apang anong partikular nga mga kinaiya sang karnero ang ginahunahuna ni Jesus?

“Ang akon mga karnero nagapamati sang akon tingog, kag nakilala ko sila, kag nagasunod sila sa akon,” siling ni Jesus. (Juan 10:27) Sa amo ginpadaku ni Jesus ang kahagop sang iya mga disipulo kag ang ila kalangkag sa pagsunod sa iya. Ang literal nga mga karnero nagapamati sa ila manugbantay kag kinabubut-on nga nagasunod sa iya. Ang manugbantay may suod man nga kaangtanan sa panong.

Ang panong mahimo nga nagalinapta sa halalban kon nagahalab, apang ang tagsa ka karnero nagapakig-angot sa grupo sa kabilugan. Sa amo, kon ang mga sapat nagabatyag nga wala sing kalig-unan ukon hinadlukan, “dalidali sila nga makatipon sing tingob,” siling sang libro nga Alles für das Schaf (Ang Tanan nga Butang Para sa mga Karnero). Kon ang mga karnero hinali nga magdalagan sa paglikaw sa katalagman, ginahimo nila ini subong isa ka panong, nagadulog kon kaisa sa pagtulutimbang sa sitwasyon. “Ang pagpalagyo sa pulupanag-on nagatugot sa mga kordero kag sa mas maluya nga mga sapat sa paglagas. Ang panong nagahatag pa gani sa ila sing pinasahi nga pangamlig.” Ano ang matun-an naton gikan sa sining batasan?

Ang matuod nga mga Cristiano karon wala nagalapta sa tunga sang mga denominasyon kag mga sekta sang Cristiandad. Sa baylo, ginatipon sila sa isa ka panong. Ang tagsa ka Cristiano nagabatyag sing personal nga kaangtanan sa sining panong sang Dios, kag nagaamot ini sa paghiusa sang organisasyon sang mga Saksi ni Jehova. Kon may krisis nga mahanabo​—⁠ini man malubha nga balatian, inaway, ukon kinaugali nga kalamidad​—⁠diin ang tagsa ka sumilimba nagapangita sing panuytoy kag pangamlig? Sa organisasyon ni Jehova, nga nagahatag sing espirituwal nga kalig-unan.

Paano matigayon ang laygay sang Biblia? Paagi sa mga publikasyon subong sang Ang Lalantawan kag sang kaupod nga balasahon sini, ang Magmata! Ining mga magasin kag Cristianong mga miting nagahatag pa gani sing pinasahi nga bulig sa mga nagakinahanglan sing dugang pa nga pag-atipan, kaangay sang mga kordero kag mas maluya nga mga karnero sa panong. Halimbawa, ang igtalupangod ginahatag sa isa ka nagaisahanon nga mga ginikanan kag sa mga ginapung-awan. Daw ano ka maalamon, busa, nga basahon ang tagsa ka magasin, tambungan ang tanan nga miting sang kongregasyon, kag iaplikar ang natun-an naton! Sa sina nga paagi ginapakita naton ang ­kahagop kag mabakod nga kaangtanan sa panong sang Dios.​—⁠1 Pedro 5:⁠2.

“Mainandamon Subong sang mga Man-ug Apang Inosente Subong sang mga Salampati”

Ang Smith’s Bible Dictionary nagasiling: “Sa bug-os nga Sidlangan ang man-ug gingamit subong simbulo sang malaut nga prinsipio, sang espiritu sang pagkadimatinumanon.” Sa pihak nga bahin, ang “akon salampati” isa ka termino sang pagpalangga. (Ambahanon ni Solomon 5:⁠2) Ano ang ginahunahuna ni Jesus, nian, sang ginpalig-on niya ang iya mga sumulunod nga magmangin “mainandamon subong sang mga man-ug apang inosente subong sang mga salampati”?​—⁠Mateo 10:⁠16.

Si Jesus naghatag sing mga instruksion para sa pagbantala kag sa pagpanudlo. Ang iya mga disipulo makapaabot sing salakot nga pagbaton. Ang pila magapakita sing interes, samtang ang iban magasikway sang maayong balita. Ang iban magahingabot pa gani sa sining matuod nga mga alagad sang Dios. (Mateo 10:​17-23) Ano ang reaksion sang mga disipulo sa paghingabot?

Sa Das Evangelium des Matthäus (Ang Ebanghelyo ni Mateo), si Fritz Rie­necker nagasiling nahanungod sa Mateo 10:16: “Ang pagkamaalamon . . . dapat updan sang integridad, sinseridad, kag pagkaprangka, agod wala sing makatarunganon nga rason ang mga kaaway sa pagreklamo. Ang mga embahador ni Jesus yara sa tunga sang mapintas nga mga kasumpong, nga wala nagapakita sing patugsiling kag nagasalakay sa mga apostoles sing wala kaluoy kag sa labing diutay nga kahigayunan. Hanti, kinahanglanon​—⁠kaangay gid sang isa ka man-ug​—⁠nga pirme bantayan sing maayo ang mga kasumpong, kag repasuhon ang sitwasyon nga alisto ang mga mata kag igbalatyag; nga kontrolon ang sitwasyon nga wala nagatiplang ukon nagadaya, nga mangin putli kag matuod sa hambal kag buhat kag busa pamatud-an ang kaugalingon nga kaangay sang salampati.”

Ano ang matun-an sang modernong-adlaw nga mga alagad sang Dios gikan sa pinamulong ni Jesus nga masapwan sa Mateo 10:16? Sa karon, ang reaksion sang mga tawo sa maayong balita pareho gid sa ginhimo nila sadtong nahaunang siglo. Kon nagaatubang sing paghingabot, dapat updan sang matuod nga mga Cristiano ang pagkamaalamon sang man-ug sing pagkaputli sang salampati. Ang mga Cristiano wala gid nagagamit sing daya ukon pagkadibunayag kundi indi garuk, matuod, kag bunayag sa pagpahayag sang mensahe sang Ginharian sa iban.

Sa pag-ilustrar: Ang mga kaupdanan sa ulubrahan, mga pamatan-on sa eskwelahan, ukon bisan ang mga katapo sang imo kaugalingon nga pamilya mahimo magkomento sing masakit nahanungod sa imo pagtuluuhan subong isa ka Saksi ni Jehova. Ang gilayon nga reaksion mahimo nga amo ang pagbalos sa kaanggid nga paagi sa kalalangan sang pagpakalain man sa ila pagtuluuhan. Apang inosente bala ina? Indi gid. Kon ginapakita mo sa imo mga kritiko nga ang ila mga komento wala sing epekto sa imo maayo nga pamatasan, mahimo sila mag-untat sa pagkomento sing masakit. Nian nangin maalamon kag di-salawayon ikaw​—⁠‘mainandamon subong sang man-ug, apang inosente subong sang salampati.’

“Ang mga Apan Kaangay sang mga Kabayo nga Nahanda sa Inaway”

Ang magasin nga GEO nagareport nga sang 1784, ang Bagatnan nga Aprika ginhalitan sing malaglagon sang “pinakadaku nga panong [sang mga apan] nga nasulat sa narekord nga maragtas.” Ginsalakay sang panong ang isa ka lugar nga may singko mil dos sientos kilometros kuwadrados, nga mga lima ka pilo sang kadakuon sang Hong Kong. Ang Smith’s Bible Dictionary nagasiling nga ang apan “nakahimo sing daku nga halit sa talamnan sa mga pungsod nga ginaduaw sini.”

Sa iya ginhatag sang Dios nga pagpahayag tuhoy sa mga butang nga mahanabo sa tion sang “adlaw sang Ginuo,” gingamit ni Jesus ang palanan-awon tuhoy sa isa ka panong sang mga apan. Nahanungod sa ila ini ginsiling: “Ang mga apan kaangay sang mga kabayo nga nahanda sa inaway.” (Bugna 1:​1, 10; 9:​3-7) Ano ang kahulugan sining simbulismo?

Madugay na nahangpan sang mga Saksi ni Jehova nga ang mga apan sa Bugna kapitulo 9 nagalaragway sa hinaplas nga mga alagad sang Dios sa duta sining siglo.⁠a Ining mga Cristiano ginhatagan sing isa ka partikular nga hilikuton​—⁠ang pagbantala sang mensahe sang Ginharian sa bug-os nga duta kag ang paghimo sing mga disipulo. (Mateo 24:14; 28:​19, 20) Nagakinahanglan ini nga daugon nila ang mga sablag kag magpabilin sila sa ila hilikuton. Ano ang maayo pa nga makailustrar sini sangsa di-malandas nga apan?

Walay sapayan nga sulusobra lamang sa lima ka sentimetros ang kalabaon, ang apan kinaandan na nga nagalakbay sa ulot sang 100 kag 200 kilometros kada adlaw. Ang apan sa desyerto mahimo pa gani nga maglabaw sa sini tubtob sa 1,000 kilometros. Ang GEO nagapaathag nga “ang mga pakpak sini nagakapakapa sing 18 ka beses kada segundo kag tubtob sa 17 ka oras sa isa ka adlaw​—⁠butang nga wala sing iban pa nga insekto ang makasarang sa paghimo.” Daw ano ka daku nga hilikuton para sa sining diutay nga tinuga!

Subong isa ka grupo, ang mga Saksi ni Jehova di-mationg sa pagpalapnag sang maayong balita sang Ginharian. Nagabantala sila karon sa kapin sa 230 ka kadutaan. Ginalandas sining mga alagad sang Dios ang madamong kabudlayan agod makapakigbahin sa pagtuman sa hilikuton. Anong sahi sang mga problema ang ginaatubang nila? Ang pagdampigdampig, legal nga mga pagdumili, balatian, pagluya sang buot, kag pagpamatok gikan sa mga himata amo ang pila lamang. Apang wala sing ­nakapauntat sa ila pag-uswag. Nagapabilin sila sa ila hatag-sang-Dios nga hilikuton.

Padayon sa Pagpakita sang Cristianong mga Kinaiya

Huo, ginpaanggid ni Jesus ang iya mga sumulunod sa mga karnero, man-ug, salampati, kag apan. Nagakaigo gid ini para sa aton adlaw. Ngaa? Bangod ang katapusan sining sistema sang mga butang malapit na, kag ang mga problema labi pa gid nga nagahuol sangsa nagligad.

Nagahinumdom sang malaragwayon nga mga pinamulong ni Jesus, ang matuod nga mga Cristiano nagapabilin sing suod sa panong sang Dios kag mahagop nga nagabaton sang laygay gikan sa organisasyon ni Jehova. Padayon sila nga nagabantay kag alisto sa mga sitwasyon nga makabalabag sa ila Cristianong mga hilikuton, samtang nagapabilin sila nga di-salawayon sa tanan nga butang. Dugang pa, nagapadayon sila sa paghimo sang kabubut-on sang Dios walay sapayan sang mga sablag. Kag padayon sila nga nagatuon gikan sa pila ka “duna nga maalamon” nga mga tinuga.

[Footnote]