Report sang mga Manugbantala sang Ginharian

Ginabantala Gihapon sa Ireland ang mga Kamatuoran sang Biblia

SINING karon nga tinuig ang matahom nga pungsod sang Ireland nangin duog sang daku nga kagamo. Sa amo man nga tion, ginabaton na sang mga Irlandes ang mensahe sang Biblia tuhoy sa paglaum nga ginadala sa ila sang mga Saksi ni Jehova. Ginapamatud-an ini sang masunod nga mga eksperiensia gikan sa Ireland.

◼ Sa Dublin ang isa sang mga Saksi ni Jehova kag ang iya bata pa nga anak nga babayi nagapakigbahin sa pagbantala sa mga pamalay. Nasalapuan nila ang isa ka babayi nga si ­Cathy nga masako gid sa iya madamo nga kabataan. Namangkot ang Saksi kon bala mahimo nga ang iya anak nga babayi, nga nagatuon pa lang sa pagbantala, makapaambit sa iya sing isa ka malip-ot lamang nga mensahe. Nagsugot si ­Cathy, kag ginhatag sang bata nga babayi ang isa ka maathag, matahom gid nga presentasyon. Natandog si ­Cathy sang maathag nga pagkasinsero kag pagkamatinahuron sang bata nga babayi, kag ginbaton niya ang ginatanyag nga ­tract tuhoy sa Biblia.

Ginpamensar sang ulihi ni ­Cathy ang maayong paghanda kag pamatasan sang bata nga nagduaw sa iya. “Nagdayaw ako nga ang isa ka gamay pa nga bata nga babayi nakapaambit sing makawiwili gid nga mensahe nga wala nagatawag sing igtalupangod sa iya kaugalingon,” siling niya. “Namat-od ako nga sa masunod nga pagduaw sang mga Saksi ni Jehova, mamati ako sa ila.”

Samtang wala pa makaduaw ang mga Saksi nagsaylo si ­Cathy sa isa ka gamay nga banwa sa bagatnan-katundan sang Ire­land malapit sa dulunan sang coun­ty Cork kag Ker­ry. Wala magdugay ginduaw sia sang mga Saksi ni Jehova, kag ginpasulod niya sila sa iya balay. Ginbaton niya ang isa ka regular nga pagtuon sa Biblia kag nagatambong na karon sa mga miting sang kongregasyon upod sa pila niya ka kabataan. Ginapasalamatan gid ni ­Cathy ang sinsero nga handum sang gamay nga bata nga babayi nga ipaambit sa iya ang maayong balita.

◼ Sa duog sang Tullamore, pito ka tuig na nga ang mga Saksi nagapakighambal sa isa ka babayi nga si Jean tuhoy sa Biblia. Kon kaisa nagapakita sia sing interes kag nagabaton sing literatura, apang kon kaisa naman ang iya interes nagaugdaw. Isa ka adlaw, sang magduaw kay ­Jean ang Saksi nga si Fran­ces kag ang iya kaupod, naabtan nila sia nga mainit ang ulo. “Bisan ano pa ang amon ihambal,” report sang Saksi, “tapat pa sia nga naakig. Sang ulihi, ginpalayas niya kami kag ginpalagabong ang puwertahan.”

Nagpalibog si Frances kon bala amo gihapon ang ipakita sa ila kon magduaw pa sila liwat. ‘Ayhan wala na sing pulos nga duawon pa sia liwat kon indi gid sia interesado sa mensahe,’ hunahuna ni Frances. Apang sang ginsugid niya ini kay Thom­as nga bana niya, malaumon gihapon sia. Sang masunod nga tion nga nagkadto sila sa sadto nga duog, ginduaw nila liwat si Jean. Mainabyanon sia kag ginbaton niya ang mga kopya sang Lalantawan kag Magmata! nga mga magasin. Nangin maayo man ang dugang pa nga mga pagduaw, kag ginsugdan nanday Thom­as kag Frances ang regular nga pagtuon sa Biblia upod sa iya.

Ano ang ginbangdan sang pagbag-o? Nagpaathag si Jean nga sadtong tion nga malain ang ginpakita niya sa mga Saksi, wala pa lang sia madugay magbata kag bag-o lang gid magguwa sa ospital. Bangod nagapasuso sia sa iya bag-o mabun-ag nga bata kag ginahungitan pa niya ang iya isa pa ka bata, isa ka oras kag tunga lamang ang tulog niya kada gab-i. “Wala gid ako sadto sing interes nga hambalan ang relihion,” siling ni Jean.

Wala pa duha ka bulan si Jean nagsugod sa pagtambong sa tanan nga miting sang kongregasyon, kag wala pa apat ka bulan nagpakigbahin sia sa pagministeryo sa latagon. Wala pa napulo ka bulan sugod sang tion nga nagtuon sia sa Biblia, ginbawtismuhan sia. Karon ang eksperiensia mismo ni Jean nagabulig sa iya sa ministeryo. Nagsiling sia: “Kon may masalapuan ako nga indi gid maayo ang batasan, ginatinguhaan ko nga mangin kapin ka mahinangpanon. Ginatandaan ko ini pirme. Ayhan magabag-o ang kahimtangan sa pagbalik ko liwat; ayhan mas maayo na ang pamatyag sang tawo kag magabaton na sia.”