Pag-alagad kay Jehova Subong Nahiusa nga Pamilya

PANUGIRON NI ANTONIO SANTOLERI

Ang akon amay nagaedad sing 17 sang maghalin sia sa Italya sang 1919. Nagsaylo sia sa Bra­zil sa pagpangita sing maayo nga palangabuhian. Sang ulihi, nakapatindog sia sing barberya sa isa ka gamay nga banwa sa suludlon sang estado sang São Paulo.

ISA KA ADLAW sang 1938, sang nagaedad ako sing pito, nakabakal si Tatay sing Bra­si­lei­ra nga bersion sang Biblia sa isa ka lalaki nga nag-agi sa iya barberya. Duha ka tuig sang ulihi nagmasakit sing grabe si Nanay kag nangin inutil tubtob napatay sia. Nagmasakit man si Tatay, gani kami tanan—si Nanay, si Tatay, ang akon utod nga babayi nga si Ana, kag ako—nagpuyo upod sa amon mga paryente sa siudad sang São Paulo.

Sang nagaeskwela ako sa São Paulo, nangin makugi ako nga bumalasa, ilabi na sang mga sinulatan sa maragtas. Nagdayaw ako kay ginasambit kon kaisa sini ang Biblia. Ang isa ka libro sang sugilanon, nga ginhulam ko gikan sa pangpubliko nga librarya sang São Paulo, pila ka beses nga naghinambit sa Sermon sa Bukid. Amo sadto nga namat-od ako nga magbakal sing Biblia agod mabasa ko mismo ina nga sermon. Ginpangita ko ang Biblia nga ginbakal ni Tatay tinuig na ang nagligad kag nakit-an ko ini sang ulihi sa puno sang kahoy, diin nabutang ini didto sa sulod sang pito ka tuig.

Katoliko ang amon pamilya, gani wala gid ako ginpalig-on sa pagbasa sang Biblia. Sing kinaugalingon, natun-an ko ang magbukas sing mga kapitulo kag mga bersikulo. Ginbasa ko nga may dakung kalipay indi lamang ang Sermon sa Bukid kundi ang bug-os nga tulun-an sang Mateo subong man ang iban pa nga tulun-an sa Biblia. Ang nagpadayaw gid sa akon sing labi amo ang maminatud-on nga pagsugid sing mga panudlo kag mga milagro ni Jesus.

Narealisar ang kinatuhayan sang Katolikong relihion gikan sa akon nabasahan sa Biblia, nagtambong ako sa Presbiteryano nga Simbahan, kag nagbuylog sa akon si Ana. Sa gihapon, nagabatyag ako sing pagkawalay unod. Makugi ko nga ginpangita ang Dios sa sulod sang mga tinuig. (Binuhatan 17:27) Sang isa ka gab-i nga madamo sing bituon, sang ginsubuan ako, nagpalibog ako, ‘Ngaa yari ako diri? Ano ang katuyuan sang kabuhi?’ Nagkadto ako sa nabaw-ing nga bahin sa likod-balay, nagluhod, kag nangamuyo, ‘Ginuong Dios! Sin-o ikaw? Paano ko ikaw makilala?’ Ang sabat nag-abot wala madugay pagkatapos sadto.

Pagtuon sa Kamatuoran sang Biblia

Isa ka adlaw sang 1949, isa ka dalagita ang nagpalapit kay Tatay samtang nagapanaug sia sa salakyan. Gintanyagan niya sia sing Lalantawan kag Magmata! nga mga magasin. Nagsuskribe sia sing Lalantawan kag ginpangabay sia nga magduaw sa amon balay, nagapaathag nga may duha sia ka kabataan nga nagatambong sa Presbiteryano nga Simbahan. Sa tion sang pagduaw sang babayi, ginbilin niya ang libro nga Children kay Ana kag nagtuon sing Biblia upod sa iya. Sang ulihi nagbuylog ako sa pagtuon.

Sang Nobiembre 1950 nagtambong kami sa amon unang kombension sang mga Saksi ni Jehova. Ginpaguwa didto ang libro nga “Pakamatuora Ang Dios”, kag ginpadayon namon ang amon pagtuon sa Biblia nga ginagamit yadto nga libro subong amon giya. Wala madugay sang ulihi napamatud-an namon nga nasapwan namon ang kamatuoran, kag sang Abril 1951 ginbawtismuhan kami subong simbolo sang amon pagdedikar kay Jehova. Si Tatay nagdedikar mga pila ka tuig sang ulihi kag napatay nga matutom sa Dios sang 1982.

Malipayon sa Bug-os Tion nga Pag-alagad

Sang Enero 1954, sang nagaedad lamang ako sing 22, ginbaton ako sa pag-alagad sa sanga talatapan sang mga Saksi ni Jehova, nga ginatawag Bethel. Sang pag-abot ko didto, nakibot ako sa paghibalo nga ang lalaki nga duha lamang ka tuig ang kinamagulangan sa akon, si Richard Mu­cha, amo ang manugtatap sang sanga. Sang 1955, sang nag-utwas ang pagkinahanglan sing mga alagad sa sirkito, subong amo anay ang pagtawag sa nagalakbay nga mga manugtatap, isa ako sa lima ka lalaki nga gin-agda sa pagpakigbahin sa sining pag-alagad.

Ang akon asaynment amo ang estado sang Rio Grande do Sul. May 8 lamang ka kongregasyon sang mga Saksi ni Jehova sang magsugod ako, apang sa sulod sang 18 ka bulan 2 ka bag-o nga kongregasyon kag 20 ka nabaw-ing nga mga grupo ang natukod. Sa sini nga duog karon, may 15 ka sirkito sang mga Saksi ni Jehova, ang tagsa may tig-20 ka kongregasyon! Sang talipuspusan sang 1956, ginsugiran ako nga ang akon sirkito gintunga sa apat ka magamay nga sirkito nga pagaalagaran sang apat ka alagad sa sirkito. Sadto nga tion ginpabalik ako sa Bethel para sa bag-o nga asaynment.

Sa akon kakibot kag kalipay, ginpadala ako sa naaminhan nga Bra­zil subong alagad sang distrito, isa ka nagalakbay nga ministro nga nagaalagad sa pila ka sirkito. Sadto nga tion ang Bra­zil may 12,000 ka ministro nga mga Saksi ni Jehova, kag may duha ka distrito sa pungsod. Si Ri­chard Wutt­ke nag-alagad sa bagatnan, kag ako naman sa aminhan. Ginhanas kami sa Bethel sa pagpaandar sang isa ka pro­jec­tor sa pagpasalida sang mga pelikula nga ginhimo sang mga Saksi ni Jehova, ang ­The ­New ­World So­ci­e­ty in Ac­tion kag ang The Hap­pi­ness of the ­New ­World So­ci­e­ty.

Tuhay gid ang pagbiyahe sadtong mga adlaw. Wala sing isa ka Saksi ang may awto, gani nagbiyahe ako sakay sa bangka, row­boat, ox­cart, sa kabayo, kalesa, trak, kag isa ka bes sa eroplano. Makakulunyag ang mag-eroplano sa ibabaw sang kagulangan sang Am­a­zon agod maghugpa sa San­ta­rém, isa ka siudad sa tunga sang Be­lém sa salamputan sang Am­a­zon kag sang Ma­na­us, ang kapital sang Estado sang Am­a­zo­nas. Diutay lang sadto ang sirkito nga mga asambleya nga ginaalagaran sang mga alagad sa distrito, sa amo ginhinguyang ko ang kalabanan ko nga tion sa pagpasalida sang mga pelikula sang Sosiedad. Sa dalagku nga mga siudad, ginatos ang nagtambong.

Ang labi nga nagpadayaw sa akon sa naaminhan nga Bra­zil amo ang rehiyon sang Am­a­zon. Sang nagaalagad ako didto sang Abril 1957, ang Suba sang Am­a­zon kag ang mga sanga sini nag-awas sa ila mga pangpang. Nakatigayon ako sing pribilehiyo sa pagpasalida sang isa sang mga pelikula sa kagulangan, nga gintakod ang himu-himo nga telon sa ulot sang duha ka kahoy. Ang koryente para sa pro­jec­tor naghalin sa isa ka sakayan nga nagdungka sa malapit nga suba. Amo yadto ang una nga pelikula nga una nga nakit-an sang kalabanan sang tumalambong.

Wala madugay sang ulihi nagbalik ako sa pag-alagad sa Bethel, kag sang masunod nga tuig, sang 1958, nakatambong ako sa maragtason nga “Diosnon nga Kabubut-on” Internasyonal nga Asambleya sang mga Saksi ni Jehova, sa ­New ­York Ci­ty. Ang mga delegado halin sa 123 ka kadutaan nalakip sa 253,922 nga nagpuno sa Yan­kee Sta­di­um kag sa malapit nga Po­lo ­Grounds sang katapusan nga adlaw sang walo ka adlaw nga kombension.

Pagtigayon sing mga Pagbag-o sa Akon Kabuhi

Wala madugay pagkatapos sang pagbalik ko sa Bethel, nakilala ko si Cla­ra ­Berndt, kag nagpakasal kami sang Marso 1959. Gin-asayn kami sa sirkito nga hilikuton sa estado sang Ba­hia, diin nag-alagad kami sing halos isa ka tuig. Madumduman pa namon sing malipayon ni Cla­ra ang pagkamapainubuson, pagkamaabiabihon, kakugi, kag gugma sang mga kauturan didto; imol sila sa materyal apang manggaranon sa mga bunga sang Ginharian. Nian ginsaylo kami sa Estado sang São Paulo. Didto nga sang 1960, nagbusong ang akon asawa, kag dapat namon biyaan ang bug-os tion nga ministeryo.

Namat-od kami nga magsaylo sa isa ka duog sa estado sang San­ta Ca­ta­ri­na, nga natawhan sang akon asawa. Ang amon anak nga lalaki nga si Ger­son, amo ang panganay sa lima namon ka kabataan. Ginsundan sia ni Gil­son sang 1962, ni Ta­li­ta sang 1965, ni Tár­cio sang 1969, kag ni Ja­nice sang 1974. Paagi kay Jehova kag sa iya gin-aman nga laygay, naatubang namon ang hangkat sang pagpadaku sa ila sa “disiplina kag panghunahuna ni Jehova.”—Efeso 6:4.

Ginkabig namon ang tagsa sang amon kabataan nga hamili. Ginapabutyag gid sang salmista ang amon nabatyagan: “Yari karon! Ang mga anak palanublion gikan kay Jehova.” (Salmo 127:3) Walay sapayan sang mga problema, gin-atipan namon ang amon kabataan subong sang amon pag-atipan sa bisan anong “palanublion gikan kay Jehova,” ginadumdom ang mga instruksion nga makit-an sa iya Pulong. Madamo ang pagpakamaayo. Nalipay kami sing daku sang sila nga lima sunodsunod, isa-isa, kag sing kinaugalingon nga desisyon nagpabutyag sang ila handum nga magpabawtismo subong simbulo sang ila pagdedikar kay Jehova.—Manugwali 12:1.

Ang Ginpili sang Amon mga Kabataan

Nalipay kami sing daku sang si Ger­son, pagkatapos makagradwar sa da­ta pro­cess­ing, nagsiling nga luyag niya mag-alagad sa Bethel, busa ginpili niya ang bug-os tion nga ministeryo sa baylo sang isa ka propesyonal nga karera. Apang sang primero indi nangin mahapos para kay Ger­son ang kabuhi sa Bethel. Sa tapos namon sia maduaw sang apat pa lamang sia ka bulan sa Bethel, nakibot ako sa kasubo sa iya nawong sang maghalin kami. Sa espiho sang amon salakyan, nakit-an ko sia nga nagatulok sa amon tubtob nga nakaliko kami sa una nga likuan sa dalan. Napuno sing luha ang akon mga mata amo nga nagpundo ako sa higad sang dalan antes magpadayon sa amon 700 kilometros nga paglakbay pauli.

Naluyagan gid man sang ulihi ni Ger­son ang Bethel. Pagkatapos makaalagad didto sing halos anom ka tuig, ginpangasawa niya si Hei­di Bes­ser, kag nag-alagad sila sa Bethel sa sulod sang duha pa ka tuig. Nian nagbusong si Heidi, kag napilitan sila sa pagguwa. Ang ila anak nga babayi nga si Cint­ia, anom na karon ka tuig, nagaupod sa ila sa ila mga hilikuton sa Ginharian.

Wala madugay sang una namon nga ginduaw si Ger­son sa Bethel, si Gil­son, nga bag-o lang makatapos sang iya una nga tuig sa busi­ness ad­min­is­tra­tion, nagsiling nga gusto man niya magpa-Bethel. Plano niya nga padayunon ang iya kurso pagkatapos makaalagad sing isa ka tuig sa Bethel. Apang nagbag-o ang iya mga plano, kag nagpabilin sia sa pag-alagad sa Bethel. Sang 1988 ginpangasawa niya si Vi­vian Gon­çal­ves, isa ka payunir, subong amo ang pagtawag sa bug-os tion nga mga ministro. Sugod sadto, nag-alagad sila sa Bethel.

Nagpadayon ang amon kalipay sang ang ikatlo namon nga bata, si Ta­li­ta, namat-od nga magpayunir sang 1986 pagkatapos makaeskwela sa draft­ing. Tatlo ka tuig sang ulihi gin-agda man sia sa Bethel. Sang 1991 ginpamana niya si Jo­sé Coz­zi, nga napulo ka tuig na nga nagaalagad sa Bethel. Nagapadayon sila didto subong mag-asawa.

Nalipay kami liwat sang akon asawa sang si Tár­cio, ang masunod nga manghod, nagsulit sang pareho nga dinalan nga tatlo ka beses na namon nabatian, “Tay, luyag ko magpa-Bethel.” Nabaton ang iya aplikasyon, kag sang 1991 nagsugod man sia sa pag-alagad sa Bethel, diin nagpabilin sia tubtob sang 1995. Nalipay kami nga ginagamit niya ang iya kusog subong pamatan-on sa pagpasanyog sang mga intereses sang Ginharian ni Jehova sa sini nga paagi sing kapin sa tatlo ka tuig.

Ang amon kinagot, nga si Janice, namat-od nga mag-alagad kay Jehova kag nabawtismuhan sa edad nga 13. Sa tion sang iya pag-eskwela, isa ka tuig sia nga nag-auxiliary payunir. Nian, sang Septiembre 1, 1993, nangin regular payunir sia sa amon kongregasyon diri sa siudad sang Gas­par.

Ang Dalanon sang Kadalag-an

Ano ang sekreto sa paghupot sang isa ka pamilya nga nahiusa sa pagsimba kay Jehova? Wala ako nagapati nga may madyik sa sini. Si Jehova nag-aman sing laygay sa iya Pulong agod sundon sang Cristianong mga ginikanan, gani ang tanan nga kadayawan dapat nga ihatag sa iya bangod sang maayo nga mga resulta nga amon natigayon. Ginsunod lamang namon ang iya mga panuytoy. (Hulubaton 22:6) Ang tanan namon nga kabataan nakapanubli sing Latin nga disposisyon gikan sa akon kag sing praktikal nga espiritu sang mga Aleman gikan sa ila iloy. Apang ang labi ka importante nga butang nga nabaton nila gikan sa amon amo ang espirituwal nga palanublion.

Ang amon kabuhi sa sulod sang puluy-an nasentro sa mga intereses sang Ginharian. Ang pag-una sining mga intereses indi mahapos. Halimbawa, ginbudlayan kami sa paghupot pirme sing isa ka regular nga pangpamilya nga pagtuon sa Biblia, apang wala kami mag-ampo. Kutob sang ila pagkabata, ang tagsa ka bata ginadala sa Cristianong mga miting subong man sa mga asambleya kag mga kombension. Balatian lamang ukon iban pa nga emerhensia ang nagapugong sa amon sa pagtambong. Dugang pa, sa lamharon nga edad, ang kabataan nagaupod sa amon sa Cristianong ministeryo.

Sang nagaedad na sila sing napulo, ang mga kabataan naghatag sing mga pamulongpulong sa Teokratikong Eskwelahan sa Pagministro. Ginbuligan namon sila sa paghanda sang ila una nga mga pamulongpulong, ginapalig-on sila sa paggamit sing balayan sa baylo sing manuskrito. Sang ulihi, ang kada isa nagahanda sang iya kaugalingon nga pamulongpulong. Subong man, sang nagaedad sila sing 10 tubtob 12 anyos, ang kada isa sa ila nakigbahin sing regular sa ministeryo. Amo lamang ini ang paagi sang kabuhi nga ila nahibaluan.

Daku ang nahimo sang akon asawa, si Cla­ra, sa pagpadaku sang amon kabataan. Kada gab-i, sang bataon pa sila kaayo—ang tion nga ginapasulod sang bata sa iya hunahuna ang tanan nga iya natun-an kaangay sa espongha—ginabasahan sila ni Clara sing sugilanon sa Biblia kag nagapangamuyo sa kada isa sa ila. Gingamit niya sing maayo ang mga libro nga Gikan sa Paraiso nga Nadula Tubtub sa Paraiso nga Naangkon-uli, Pagpamati sa Daku nga Manunudlu, kag Ang Akon Libro sang mga Sugilanon sa Biblia.a Sang matigayon na ini, gingamit man namon ang au­dio kag vi­su­al nga mga bulig nga gin-aman sang mga Saksi ni Jehova.

Ginapamatud-an sang amo eksperiensia subong Cristianong mga ginikanan nga ang kabataan nagakinahanglan sing matag-adlaw nga atension. Ang mainit nga gugma, personal nga interes, kag bastante nga tion nalakip sa sadsaran nga mga kinahanglanon sang mga pamatan-on. Wala lamang namon ginatamod ini subong amon katungdanan subong ginikanan agod pun-an ining mga kinahanglanon sa pinakamaayo namon nga masarangan kundi nag-ani man kami sing dakung kalipay sa paghimo sini.

Sa pagkamatuod, makapaayaw gid para sa mga ginikanan nga makita ang katumanan sang mga pinamulong sa Salmo 127:3-5: “Yari karon! Ang mga anak palanublion halin kay Jehova; ang bunga sang taguangkan isa ka padya. Kaangay sang mga baslay sa kamot sang kusganan nga tawo, amo man ang mga anak nga lalaki sang pagkapamatan-on. Malipayon ang tawo nga ang iya baslayan puno sa ila.” Ang pag-alagad kay Jehova subong nahiusa nga pamilya nagpahalipay gid sa amon!

[Footnote]

[Retrato sa pahina 26]

Si Antonio Santoleri upod sa iya pamilya