Nakilal-an Mo Ayhan ang Mesias?
GINHINGUYANG ni Jesucristo ang tatlo ka tuig kag tunga sa pagbantala sang Pulong sang Dios sa tunga sang mga Israelinhon. Apang sang manughingapos na ang iya dutan-on nga ministeryo, ginsikway sia sang kalabanan niya nga katubotubo subong ang Mesias, ukon ang ginsaad sang Dios nga “Isa nga Hinaplas.” Ngaa?
Ang Biblia nagabulig sa aton nga mahibaluan ang madamong rason kon ngaa wala ginkilala sang nahaunang-siglo nga mga Judiyo si Jesus subong ang Mesias. Ang tatlo sa sining rason nagpugong sa madamo nga kilalahon ang karon nga posisyon ni Jesus subong ang nagagahom nga Mesianikong Hari.
“Luyag Namon Makakita sing Isa ka Tanda”
Ang isa ka rason kon ngaa wala makilala sang nahaunang-siglo nga mga Judiyo si Jesus amo ang indi nila pagbaton sa Makasulatanhon nga mga tanda nga nagapakita sang iya pagka-Mesias. Sa tion kag tion, ang mga tawo nga nagapamati kay Jesus nangabay nga maghatag sia sing isa ka tanda nga nagapamatuod nga naghalin sia sa Dios. Pananglitan, ang Mateo 12:38 nagareport nga ang pila sang mga escriba kag mga Fariseo nagsiling: “Manunudlo, luyag namon makakita sing isa ka tanda gikan sa imo.” Wala pa bala nakahatag sing mga tanda si Jesus sa ila? Siempre nakahatag na sia.
Sadto nga tion nakahimo na si Jesus sing madamong milagro. Ginhimo niya ang tubig nga alak, gin-ayo ang nagatagumatayon nga bata nga lalaki, gin-ayo ang nagamasakit nga ugangan nga babayi ni Pedro, gintinluan ang tawo nga aruon, ginpalakat ang tawo nga paralitiko, ginpasag-uli ang kapagros sang isa ka tawo nga nagmasakit sa sulod sang 38 ka tuig, gin-ayo ang naitos nga kamot sang isa ka tawo, gin-ayo ang madamo nga tawo sa ila malubha nga mga balatian, gin-ayo ang ulipon sang opisyal sang hangaway, ginbanhaw ang anak nga lalaki sang isa ka balo nga babayi, kag gin-ayo ang bulag kag ang apa. Ining mga milagro natabo sa Cana, Capernaum, Jerusalem, kag Nain. Dugang pa, ang balita tuhoy sa sining mga milagro naglapnag sa bug-os nga Judea kag sa palibot nga pungsod.—Juan 2:1-12; 4:46-54; Mateo 8:14-17; 8:1-4; 9:1-8; Juan 5:1-9; Mateo 12:9-14; Marcos 3:7-12; Lucas 7:1-10; 7:11-17; Mateo 12:22.
Sing maathag, indi kulang sing mga tanda nga nagapamatuod nga si Jesus amo ang Mesias. Walay sapayan nga nakahimo sia sing madamong tanda sa atubangan sang mga tawo, wala sila magtuo sa iya. Ang mga nakakita sing pamatuod nga si Jesus ginpadala sang Dios apang wala magkilala sa iya subong ang Mesias mga bulag sa espirituwal. Ang ila mga tagipusuon matig-a kag wala maimpluwensiahan sang kamatuoran.—Juan 12:37-41.
Kamusta naman karon? Ang iban nga mga tawo nagasiling, “Mapati lamang ako sa kon ano ang makita sang akon mismo mga mata.” Apang maalamon gid bala ina nga dalanon? Ginapakita sang tagna sang Biblia nga nagalingkod na si Jesus subong langitnon nga Hari sa Mesianikong Ginharian. Bangod indi sia kitaon, kinahanglan naton ang tanda sa pagbulig sa aton nga mahantop ang iya pagginahom, nga nagtanda sang pagsugod sang katapusan nga mga adlaw sining malauton nga sistema sang mga butang. Nakilal-an mo bala ang tanda?—Mateo 24:3.
Suno sa Biblia, ang pagsugod sang paggahom ni Cristo subong Mesianikong Hari pagatandaan sang inaway, linog, kakulang sing pagkaon, kag pamiste sa dimatupungan nga kasangkaron. Sa “katapusan nga mga adlaw,” ang tawhanon nga mga kaangtanan pagatandaan sang kakagod, kahamkon, kag kakulang sing pagpugong. (2 Timoteo 3:1-5; Mateo 24:6, 7; Lucas 21:10, 11) Luwas sa kronolohiko nga pamatuod, kapin sa 20 ka lainlain nga tanda sang katapusan nga mga adlaw ang nagatudlo sa pagsugod sang paghari sang Mesias sang 1914.—Tan-awa Ang Lalantawan sang Marso 1, 1993, pahina 5.
“Mga Mahigugmaon sang Kuwarta”
Ang materyalismo isa pa ka rason kon ngaa ginsikway sang mga Judiyo si Jesus subong ang Mesias. Ang pagpaimportante sing tuman sa manggad nagpugong sa madamo sa pagsunod kay Jesus. Halimbawa, ang mga Fariseo nakilal-an subong “mga mahigugmaon sang kuwarta.” (Lucas 16:14) Binagbinaga ang halimbawa sang isa ka manggaranon nga lamharon nga manugdumala nga nagpalapit kay Jesus kag namangkot kon paano maangkon ang kabuhi nga walay katapusan. “Sunda ang mga sugo sing dalayon,” amo ang sabat ni Jesus. “Gintuman ko na ining tanan; apang ano pa bala ang nakulang sa akon?” pamangkot sang pamatan-on, ayhan nakahangop nga kapin pa ang ginakinahanglan sangsa pagtuman sa pila ka kasuguan. “Ibaligya ang imo mga pagkabutang kag ihatag sa mga imol kag may bahandi ka sa langit, kag mangin sumulunod ko,” siling ni Jesus sa iya. Daw ano gid nga kahigayunan—nga mangin disipulo sang Mesias! Apang ang manugdumala naghalin, sing masinulub-on. Ngaa? Bangod ang bahandi sa duta mas importante sa iya sangsa bahandi sa langit.—Mateo 19:16-22.
Ang kahimtangan wala magbalhin. Ang mangin matuod nga sumulunod sang Mesianikong Hari nagakahulugan sang pag-una sa espirituwal nga mga interes labaw sa tanan, lakip na sa dutan-on nga mga pagkabutang. Para kay bisan sin-o nga materyalistiko sing panan-aw, isa ini ka hangkat. Halimbawa, nasugilanon sang misyonero nga mag-asawa sa isa ka pungsod sa Sidlangan ang isa ka babayi nahanungod sa Biblia. Nagahunahuna nga basi maluyag sia makatuon sing dugang pa nahanungod kay Jehova nga Dios kag sa iya Anak, nga si Jesucristo, gintanyagan sia sang mag-asawa sing Ang Lalantawan kag Magmata! Ano ang reaksion niya? “Mabuligan bala ako sining mga magasin nga makaagom sing mas madamo nga kuwarta?” pamangkot niya. Mas interesado ang babayi sa materyal nga mga butang sangsa espirituwal nga mga butang.
Ini man nga mag-asawa nagtuon sang Biblia upod sa isa ka pamatan-on nga lalaki nga nagsugod sa pagtambong sa mga miting sa Kingdom Hall. “Ginauyangan mo lang ang imo tion,” siling sa iya sang iya mga ginikanan. “Dapat ka mangita sing isa pa ka trabaho sa gab-i kag mag-agom sing mas madamo nga kuwarta.” Daw ano kasubo kon ginapalig-on sang mga ginikanan ang ila kabataan nga unahon ang materyal nga mga butang sangsa pagtuon nahanungod sa Mesianikong Hari! “Sa iya bug-os nga manggad indi mabakal sang gumalahom ang napulo ka libo ka tuig sang kabuhi,” siling sang isa ka Inintsik nga hulubaton.
Madamo karon ang nakahangop nga ang pagtuon kag pagsunod sa Mesianikong Hari wala nagapahanugot sang gugma sa kuwarta. Ang isa ka Saksi ni Jehova nga may kaugalingon anay nga negosyo nga daku sing kita, nagsiling: “Makalilipay ang madamo sing kuwarta apang indi kinahanglanon. Indi kuwarta ang nagapahalipay sa tawo.” Isa na sia karon ka katapo sang pamilya Bethel sa sanga sang Watch Tower Society sa Europa.
“Kahadlok sa mga Judiyo”
Ang kahadlok sa tawo isa pa ka rason kon ngaa wala ginbaton sang mga Judiyo si Jesus subong ang Mesias. Ang pagkilala sing dayag sa iya subong Mesias nagkahulugan nga ginabutang nila sa katalagman ang ila reputasyon. Para sa iban daku gid ina nga bili. Binagbinaga si Nicodemo, nga isa ka katapo sang mataas nga hukmanan sang Judiyo nga ginatawag Sanhedrin. Nagdayaw sa mga tanda kag mga panudlo ni Jesus, sia nagbaton: “Rabbi, nahibaluan namon nga ikaw subong isa ka manunudlo nagkari gikan sa Dios; kay wala sing isa nga makahimo sining mga tanda nga ginahimo mo kon indi ang Dios kaupod niya.” Apang nagkadto si Nicodemo kay Jesus sa kagab-ihon, ayhan agod indi sia makilala sang iban nga mga Judiyo.—Juan 3:1, 2.
Para sa madamo nga nakabati kay Jesus nga nagapamulong, ang kahamuot sang tawo mas importante sangsa kahamuot sang Dios. (Juan 5:44) Sang didto si Jesus sa Jerusalem para sa Kapiestahan sang mga Kayangkayang sang 32 C.E., “may madamong hinuringhuring nahanungod sa iya sa tunga sang kadam-an.” Wala sing isa ang nagpamulong sing dayag nahanungod kay Jesus “tungod sa kahadlok sa mga Judiyo.” (Juan 7:10-13) Bisan ang mga ginikanan sang lalaki nga gin-ayo ni Jesus sa pagkabulag wala magpasat-om nga ginabaton nila ang milagro subong nga naghalin sa tiglawas sang Dios. Sila man “nahadlok sa mga Judiyo.”—Juan 9:13-23.
Karon, nahibaluan sang iban nga si Jesus nagagahom na subong Mesianikong Hari sa langit, apang nahadlok sila sa pagbaton sini sing dayag. Para sa ila tuman ka daku nga bili nga mawasi ang ila panindugan sa iban. Sa Alemanya, halimbawa, nasugilanon tuhoy sa Biblia sang isa ka Saksi ni Jehova ang isa ka tawo nga nagbaton: “Ang ginabantala ninyo nga mga Saksi nahanungod sa Biblia matuod. Apang kon mangin Saksi ako karon, mahibaluan ini sang tanan pagkadason nga adlaw. Ano ang hunahunaon nila sa akon sa ulubrahan, sa kaingod, kag sa katilingban nga natungdan namon sang akon pamilya? Indi ko ina masarangan.”
Ano ang kabangdanan sang kahadlok sa tawo? Bugal, gugma sa popularidad sa tunga sang pamilya kag mga abyan, kahadlok nga yagutaon kag pakanubuon, kabalaka nga mangin tuhay gikan sa kalabanan. Ining mga balatyagon isa gid ka pagtilaw ilabi na sa mga nagasugod sa pagtuon sa Biblia upod sa mga Saksi ni Jehova. Halimbawa, isa ka lamharon nga babayi ang nalipay sa pagtuon nahanungod sa Paraiso nga paluntaron sang Mesianikong Ginharian sa duta sa idalom sang pagginahom ni Jesucristo. Apang mahuyugon sia sa disco, kag ginpunggan sia sang kahadlok sa tawo nga isugid sa iban ang nahanungod sini nga paglaum. Sang ulihi, nakatipon sia sing kaisog agod masugid sing hilway ang nahanungod sa Biblia. Ginsikway sia sang iya mga abyan sa disco, apang ang iya bana kag ang iya mga ginikanan nagpakita sing interes. Sang ulihi ang babayi kag ang iya iloy nabawtismuhan, kag ang iya bana kag ang iya amay nagsugod sa pagtuon sa Biblia. Daw ano nga padya tungod sang paglandas sang kahadlok sa tawo!
Nakilal-an Mo Gid Bala ang Mesias?
Sang nagatagumatayon si Jesus sa usok sang pag-antos, yara ang pila niya ka disipulo. Nakilal-an nila sia subong ang gintagna nga Mesias. Yara man ang Judiyong mga gumalahom, nga, sa malaragwayon nga hambal, nagapangayo gihapon sing tanda. “Luwason niya ang iya kaugalingon, kon sia amo ang Cristo [ang Mesias] sang Dios, ang Isa nga Pinili.” (Lucas 23:35) Indi gid bala sila mag-untat sa pagpangayo sing tanda? Si Jesus naghimo sing madamong milagro. Dugang pa, gintuman sang iya pagkabun-ag, ministeryo, pagtilaw, kamatayon, kag pagkabanhaw ang madamong mga tagna sa Hebreong Kasulatan.—Tan-awa ang “All Scripture Is Inspired of God and Beneficial,” ginbalhag sang Watchtower Bible and Tract Society of New York, Inc., pahina 343-4.
Ginpasipalahan si Jesus sang mga nagalabay, ginsikway ang pamatuod sang iya pagka-Mesias. (Mateo 27:39, 40) Ginbahinbahin sing materyalistiko sang mga soldado ang panapton ni Jesus sa tunga nila, ginpapalaran ang iya nasulod nga panapton. (Juan 19:23, 24) Ang kahadlok sa tawo amo ang rason sa pila ka hitabo. Halimbawa, binagbinaga si Jose nga taga-Arimatea, nga katapo sang Sanhedrin. “Disipulo [sia] ni Jesus apang sa tago tungod sa kahadlok niya sa mga Judiyo.” Pagkatapos napatay ang Mesias, gin-atipan nanday Jose kag Nicodemo ang bangkay ni Jesus. Sa amo nalandas ni Jose ang iya kahadlok sa tawo.—Juan 19:38-40.
Kon nagkabuhi ka sadto sang nahaunang siglo, nakilal-an mo ayhan si Jesus subong ang Mesias? Nagkinahanglan ini nga batunon mo ang Makasulatanhon nga ebidensia, sikwayon ang materyalistiko nga panghunahuna, kag indi magkahadlok sa tawo. Sa sining katapusan nga mga adlaw, dapat pamangkuton sang kada isa sa aton ang iya kaugalingon, ‘Ginakilala ko bala si Jesus karon subong ang langitnon nga Mesianikong Hari?’ Sa dili madugay dumalahan niya ang mga hilikuton sa duta. Kon matabo ina, mangin isa ka bala sadtong tunay nga nakakilala kay Jesucristo subong ang ginsaad nga Mesias?
[Mga retrato sa pahina 28]
Indi gid pagtalikdi ang ebidensia nga si Jesus amo ang Mesianikong Hari
[Retrato sa pahina 31]
Ang pagtuon nahanungod sa Mesias masami nagakahulugan sang paglandas sa kahadlok kon ano ang masiling sang iban