Ikaw Bala May Diosnon nga Pagtamod sa Alkoholiko nga mga Ilimnon?

MGA 20 ka tuig na ang nakaligad, ang mga arkeologo nakakutkot sing isa ka sinadto nga tinukod nga human sa tisa nga lunang, malapit sa banwa sang Urmia, Iran. Nakita nila sa sini ang isa ka seramiko nga tibod nga, suno sa mga sientipiko, mga linibo ka tuig ang edad, napetsahan sadto pa sang gintukod ang pila ka nauna gid nga puluy-anan sang tawo. Sining karon lang, gingamit ang pinakaulihi nga teknolohiya sa pag-usisa sa tibod. Nakibot ang mga sientipiko nga makita sa sulod sini ang pinakadumaan nga kemikal nga ebidensia sang paghimo sing alak.

Maathag man nga ginasugid sang Biblia nga kutob sang dumaan nga mga tion ang alak, serbesa, kag iban pa nga alkoholiko nga mga ilimnon ginainom. (Genesis 27:​25; Manugwali 9:​7; Nahum 1:10) Kaangay sang iban pa nga pagkaon, si Jehova nagahatag sa aton subong mga indibiduwal sing pililian​—⁠ang mag-inom sing alkoholiko nga mga ilimnon ukon indi. Si Jesus masunson nga nag-inom sing alak sa iya pagkaon. Si Juan Bautista naglihi sa alkohol.​—⁠Mateo 11:​18, 19.

Ang Biblia nagadumili sang sobra nga pagpatuyang sa pag-inom. Ang pagpahubog kasal-anan batok sa Dios. (1 Corinto 6:​9-11) Nahisanto sa sini, wala ginatugot sang mga Saksi ni Jehova ang bisan sin-o nga nangin dimahinulsulon nga mga palahubog nga magpabilin sa Cristianong kongregasyon. Ang mga sa kongregasyon nga namat-od sa pag-inom sing alkoholiko nga ilimnon dapat maghimo sini sing haganhagan.​—⁠Tito 2:​2, 3.

Ang Didiosnon nga Pagtamod

Madamong tawo sa karon ang wala sing diosnon nga pagtamod sa alkoholiko nga mga ilimnon. Mahapos makita nga ginapasanyog ni Satanas ang sayop nga paggamit sa sining dumaan nga produkto. Halimbawa, sa pila ka pulo sang Bagatnan nga Pasipiko, kinabatasan na para sa mga lalaki ang magtipontipon agod mag-inom sing madamong hinimo-sa-balay nga ginpaaslom nga ilimnon. Ini nga pagtinipon mahimo nga nagalawig sing madamo nga inoras kag ginahimo sing masunson​—⁠madamong lalaki ang nagahimo sini adlaw-adlaw. Ginakabig ini sang iban subong bahin lamang sang kultura. Kon kaisa serbesa kag alak ang ginainom sa baylo sang​—⁠ukon dugang sa​—⁠lokal nga hinimo-sa-balay nga ilimnon. Kahulugbon ang masami nga resulta.

Sa isa pa ka pungsod sa Pasipiko, ang haganhagan nga pag-inom sing alkohol sang mga lalaki halos indi mabalitaan. Sa masami, kon mag-inom sila nagainom sila agod mahubog. Sa kinaandan, kon adlaw sang suweldo ang isa ka grupo sang mga lalaki nagatipon kag nagabakal sing pila ka kaha sang serbesa, ang tagsa nagaunod sing 24 ka botelya. Nagauntat lamang sila sa pag-inom kon maubos na ang serbesa. Subong resulta, ang kitaon nga pagpahubog kinaandan na katama.

Ang ginpaaslom nga mga ilimnon, subong sang tuba kag iban pa lokal nga ilimnon, kinaandan na nga ginagamit sa Aprikanong kapungsuran. Ginadikta sang tradisyon sa pila ka komunidad nga dapat iserbe ang alkohol kon nagaabiabi sa mga bisita. Ang maabiabihon nga tagbalay kinabatasan na nga nagahanda sing kapin pa sa mainom sang iya bisita. Sa isa ka lugar ang kinabatasan amo ang pagbutang sing 12 ka botelya sang serbesa sa atubangan sang tagsa ka bisita.

Madamong kompanya sa Hapon ang nagaorganisar sing mga paglakbay sa bus para sa ila mga empleyado. Madamong alkoholiko nga ilimnon ang ginadala, kag ang kahulugbon ginatugot. Ang pila sining mga pagliwaliwa sang kompanya nagalawig sing duha ukon tatlo ka adlaw. Suno sa magasin nga Asiaweek sa Japan, “halin sa mga mangunguma sang humay pakadto sa manggaranon nga mga politiko, ang pagkalalaki kinaandan nga ginatakus sa kadamuon sang alak nga mainom niya.” Makita man ang kaanggid nga huyog sa iban pa nga mga pungsod sa Asia. Ang Asiaweek nagasiling nga “ang mga taga-South Korea nagainom karon sing mas madamong alkoholiko nga ilimnon kada tawo sangsa mainom sang mga manginginom sa bisan diin sa kalibutan.”

Ang mapatuyangon nga pag-inom nangin lapnag nga batasan sa mga kampus sang kolehiyo sa Estados Unidos. Suno sa The Journal of the American Medical Association, “ang kalabanan sang mapatuyangon nga mga manginginom wala nagakabig sang ila kaugalingon subong problema nga mga manginginom.”⁠a Indi ini dapat makapakibot bangod sa madamong pungsod ginapasanyog sang media ang pag-inom subong mapasimpalaron, binag-o, kag madayaw nga buhat. Sa masami ilabi na nga ginapuntariya sining propaganda ang mga pamatan-on.

Sa Britanya, ang ginainom nga serbesa nagpilo sa sulod sang 20 ka tuig nga panag-on, kag ang pag-inom sang maisog nga alak nagtatlo ka pilo. Ang mga manginginom nagasugod sing mas bata pa, kag mas madamo nga babayi ang nagainom. Ang kaanggid nga huyog makita man sa mga pungsod sa Nasidlangan nga Europa kag Latin Amerika. Ginapadaku ini sang nagadamo man nga kataason sang alkoholismo kag may kaangtanan sa alkohol nga mga aksidente sa trapiko. Maathag gid nga nagadugang ang pag-abuso sa alkohol sa bug-os nga kalibutan.

Daw Ano Kadamo ang Sobra Kadamo?

Ang panghunahuna sang Biblia tuhoy sa alkoholiko nga ilimnon timbang. Sa isa ka bahin, ang Kasulatan nagasiling nga ang alak isa ka dulot gikan kay Jehova nga Dios nga “nagapahalipay sa tagipusuon sang mamalatyon nga tawo.” (Salmo 104:​1, 15) Sa pihak nga bahin, sa pagtagudili sang sobra nga pagpatuyang ang Biblia nagagamit sing mga ekspresyon nga “lakas nga pag-inom,” “pagpatuyang sa alak, magansal nga kinalipay, paghinubog,” ‘mahuyugon sa madamo nga alak,’ kag ‘naulipon sa madamo nga alak.’ (Lucas 21:​34; 1 Pedro 4:​3; 1 Timoteo 3:​8; Tito 2:3) Apang daw ano kadamo ang “madamo nga alak”? Paano mahibaluan sang Cristiano kon ano ang ginalakip sa diosnon nga pagtamod sa alkoholiko nga mga ilimnon?

Indi mabudlay makilala ang kahulugbon. Ang mga resulta sini ginalaragway sa Biblia paagi sa mga tinaga: “Sin-o bala ang may kailo? Sin-o bala ang may kabalaka? Sin-o bala ang may kasuayon? Sin-o bala ang may kasubo? Sin-o bala ang may mga pilas sa walay kabangdanan? Sin-o bala ang may nagapalamula nga mga mata? Ang mga nagapabilin sing malawig nga tion sa alak, ang mga nagakadto sa pagpangita sing alak nga sinimbog. . . . Ang imo mga mata makakita sing makatilingala nga mga butang, kag ang imo tagipusuon magamitlang sing balingag nga mga butang.”​—⁠Hulubaton 23:​29-33.

Ang sobra nga alkohol makatuga sing kagumon, mga handurawan, pagkalipong, kag iban pa nga mga halit sa hunahuna kag lawas. Sa idalom sang impluwensia sang alkohol, mahimo nga indi mapunggan sang isa ka tawo ang iya ginahimo, nagatuga sing kahalitan sa iya kaugalingon ukon sa iban. Ang mga palahubog nakilal-an na nga nagahimo sing binuang, makaulugot, ukon imoral nga buhat.

Ang pag-inom tubtob mahubog, upod ang nasambit sa ibabaw nga mga resulta sini, pat-od gid nga lakas nga pag-inom. Apang, ang isa ka tawo mahimo magpadayag sing pagkadimahaganhaganon nga wala nagapakita sang tanan kinaandan nga tanda sang kahulugbon. Gani, ang pamangkot sa kon bala ang isa nakainom sing sobra masunson nga ginabaisan. Ano ang kinatuhayan sa tunga sang paghaganhagan kag sobra nga pagpatuyang?

Amligi ang Imo Ikasarang sa Paghunahuna

Ang Biblia wala nagapahamtang sing limitasyon paagi sa paghatag sing talaksan kon pila ka porsiento sang alkohol ang makita sa dugo ukon sing iban pa nga talaksan. Ang ikasarang nga indi dayon mahubog sang alkohol nagakatuhay sa mga tawo. Apang, ang mga prinsipio sang Biblia naaplikar sa tanan nga Cristiano kag makabulig sa aton sa pagpalambo sing diosnon nga pagtamod sa alkoholiko nga mga ilimnon.

Ang nahaunang sugo, siling ni Jesus, amo ang ‘higugmaon si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ (Mateo 22:​37, 38) Ang alkohol may direkta nga epekto sa hunahuna, kag ang sobra nga pagpatuyang nagaupang sa pagtuman mo sa sining labing daku sa tanan nga sugo. Makaupang gid ini sa maayong pagdesisyon, sa ikasarang sa paglubad sang mga problema, sa pagpakita sing pagpugong sa kaugalingon, kag sa iban pa importante nga mga pagpanghikot sang hunahuna. Ang Kasulatan nagalaygay sa aton: “Bantayi ang praktikal nga kaalam kag ang ikasarang sa paghunahuna, kag ini mangin kabuhi sa imo kalag kag pangganyat sa imo tutunlan.”​—⁠Hulubaton 3:​21, 22.

Si apostol Pablo nagpakiluoy sa mga Cristiano: “Idulot ninyo ang inyo mga lawas nga isa ka halad nga buhi, balaan, kalahamut-an sa Dios, isa ka sagrado nga pag-alagad lakip ang inyo ikasarang sa pagpangatarungan.” (Roma 12:1) Ang isa bala ka Cristiano mangin “kalahamut-an sa Dios” kon nagainom sia sing alkohol tubtob sa punto nga madula ang iya “ikasarang sa pagpangatarungan”? Sa masami, ang dimahaganhaganon nga manginginom amat-amat nga nangin indi na madali mahubog sa alkohol. Mahimo sia magbatyag nga ang iya lakas nga pag-inom​—⁠para sa iya​—⁠manubo sa talaksan sang kahulugbon. Apang, mahimo nga nagapalambo sia sing dimakapapagros nga pagsandig sa alkohol. Mahimo bala madulot sini nga tawo ang iya lawas subong “isa ka halad nga buhi, balaan”?

Ang bisan ano nga kadamuon sang alkohol nga nagahalit sang imo “praktikal nga kaalam kag ikasarang sa paghunahuna” subong isa ka Cristiano sobra nga alkohol para sa imo.

Ano ang Nagadihon sang Imo Pagtamod sa Alkohol?

Dapat binagbinagon sang isa ka Cristiano kon bala ang iya panimuot sa pag-inom ginaimpluwensiahan sang karon nga mga huyog ukon mga tradisyon. Kon nahanungod sa alkoholiko nga mga ilimnon, pat-od gid nga indi mo luyag nga ipasad ang imo mga pagpili sa mga huyog sa kultura ukon sa propaganda sang media. Sa pagbinagbinag sang imo kaugalingon nga panimuot, pamangkuta ang imo kaugalingon, ‘Naimpluwensiahan bala ini sang kon ano ang kalahamut-an sa komunidad? Ukon ang akon bala pag-inom nahisuno sa mga prinsipio sang Biblia?’

Bisan pa nga ang mga Saksi ni Jehova wala nagapamatok sa kultura, nakahibalo sila nga ginadumtan ni Jehova ang madamong buhat nga ginabaton sing lapnag karon. Ginabaton sang pila ka komunidad ang aborsion, pagtayon sing dugo, homoseksuwalidad, ukon poligamya. Apang, ang mga Cristiano nagapanghikot suno sa pagtamod sang Dios nahanungod sini nga mga butang. Huo, ang diosnon nga pagtamod magapahulag sa isa ka Cristiano nga dumtan ining mga buhat walay sapayan sa kon bala ginabaton ini ukon wala sang kultura.​—⁠Salmo 97:⁠10.

Ang Biblia nagahinambit sang “kabubut-on sang mga pungsod,” nga nagalakip sang “pagpatuyang sa alak” kag “pag-ininom.” Ang termino nga “pag-ininom” nagapaalinton sing ideya sang pagtililipon nga ginhimos ilabi na sa tuyo nga mag-inom sing madamo nga alkohol. Daw subong bala nga sang panahon sang Biblia ang pila nga nagapabugal sang ila ikasarang sa pag-inom nga indi mahubog nagapanikasog nga malupig ang iban, ukon nagapanikasog nga makita kon sin-o ang pinakamadamo nga mainom. Ginapatuhuyan ni apostol Pedro ining sahi sang paggawi subong “malaut nga pagpatuyang” nga sa sini wala na nagapakigbahin ang mahinulsulon nga mga Cristiano.​—⁠1 Pedro 4:​3, 4.

Makatarunganon bala para sa isa ka Cristiano nga batunon ang pagtamod nga tubtob wala sia nagakahubog, indi gid man importante kon diin, san-o, ukon daw ano kadamo ang mainom niya? Mahimo kita mamangkot, Diosnon nga pagtamod bala ina? Ang Biblia nagasiling: “Gani, bisan nagakaon kamo ukon nagainom ukon bisan ano ang inyo ginahimo, himua ang tanan nga butang sa kahimayaan sang Dios.” (1 Corinto 10:31) Ang isa ka grupo sang mga lalaki nga nagatipon agod mag-inom sing madamo nga alkohol sa publiko mahimo nga indi tanan mahubog, apang ang ila bala pagginawi magadala sing kahimayaan kay Jehova? Ang Biblia nagalaygay: “Kag dili kamo magpauyon sa sining sistema sang mga butang, kundi magbalhin kamo paagi sa pagbag-o sang inyo painuino, agod nga inyo mapamatud-an ang maayo kag kalahamut-an kag himpit nga kabubut-on sang Dios.”​—⁠Roma 12:2.

Likawi ang Pagsandad sa Iban

Sing makawiwili, sa masami ang kultura mismo nga nagatugot sang sobra nga pagpatuyang wala mahamuot sa sini kon ang lakas nga manginginom magapangangkon nga isa ka tawo sang Dios. Sa isa ka magamay nga komunidad sa Bagatnan nga Pasipiko, ang isa ka tagpanilag nagsiling: “Nagadayaw ako sa inyo. Nagatudlo kamo sang kamatuoran. Apang ang problema nga nakita namon amo nga ang inyo mga kalalakin-an nagainom sing sobra nga grog.” Ginareport nga ang mga indibiduwal wala nagakahubog, apang ina nga katunayan indi makita sang madamo sa komunidad. Mahapos maghinakop ang mga tagpanilag nga kaangay sang kalabanan iban pa nga mga lalaki nga nagainom, ang mga Saksi nagakahubog man. Mahuptan bala sang isa ka Cristianong ministro nga nagapakigbahin sa malawig nga pag-inom ang maayong reputasyon kag matuman ang iya publiko nga ministeryo nga may kahilwayan sa paghambal?​—⁠Binuhatan 28:⁠31.

Ang isa ka report gikan sa isa ka pungsod sa Europa nagapakita nga kon kaisa ang pila ka utod nga lalaki kag babayi nagaabot sa Kingdom Hall nga may maisog nga baho sang alkohol sa ila ginhawa. Nagtublag ini sa konsiensia sang iban. Ang Biblia nagalaygay: “Maayo nga indi magkaon sing unod ukon mag-inom sing alak ukon maghimo sing bisan ano nga butang nga nagapasandad sa imo utod.” (Roma 14:21) Ang diosnon nga pagtamod sa alkoholiko nga mga ilimnon magapahulag sa isa ka hamtong nga Cristiano nga mangin sensitibo sa konsiensia sang iban, bisan pa nga nagakahulugan ini sang paglihi sa alkohol sa idalom sang pila ka sirkunstansia.

Ang mga Cristiano Tuhay Gid

Sing makapasubo, daku gid ang nahimo sining kalibutan sa pagpaakig kay Jehova paagi sa sayop nga paggamit sang maayong mga butang nga ginhatag niya sa katawhan, lakip na ang alkoholiko nga mga ilimnon. Ang tagsa ka dedikado nga Cristiano dapat manikasog nga likawan ang lapnag nga didiosnon nga mga pagtamod. Sa amo “makita [sang mga tawo] ang kinatuhayan sa ulot sang isa nga matarong kag sang isa nga malauton, sa ulot sang isa nga nagaalagad sa Dios kag sang isa nga wala nagaalagad sa iya.”​—⁠Malaquias 3:18.

Kon nahanungod sa alkoholiko nga mga ilimnon, ang “kinatuhayan” sa ulot sang mga Saksi ni Jehova kag sang kalibutan dapat gid makita. Ang pag-inom sing alkoholiko nga mga ilimnon indi amo ang pinakaimportante nga bahin sa kabuhi sang matuod nga mga Cristiano. Wala sila nagatilawtilaw kon tubtob diin ang masarangan nila nga mainom, nga makatalagam nga nagadangat sa haluson nga pagkahubog; ukon ginatugutan nila ang alkoholiko nga mga ilimnon nga maghalit ukon sa bisan anong paagi mag-upang sa pag-alagad nila sa Dios sa bug-os nila nga kalag kag sa maathag nga panghunahuna.

Subong grupo, ang mga Saksi ni Jehova may diosnon nga pagtamod sa alkoholiko nga mga ilimnon. Kamusta ka? Sarang maisip sang tagsatagsa sa aton ang mga pagpakamaayo ni Jehova samtang ginasunod naton ang instruksion sang Biblia nga “sikwayon ang pagkadidiosnon kag kalibutanon nga mga handum kag magkabuhi nga may kaligdong sa hunahuna kag pagkamatarong kag diosnon nga debosyon sa tunga sining karon nga sistema sang mga butang.”​—⁠Tito 2:⁠12.

[Footnote]

[Kahon/Retrato sa pahina 28]

Mamati sa Imo mga Hinigugma

Ang dimahaganhaganon nga manginginom masunson nga amo ang katapusan nga makahibalo nga may problema sia. Ang mga himata, mga abyan, kag Cristianong mga gulang indi dapat matahap sa paghatag sing bulig sa mga hinigugma nga nakulangan sing pagkamahaganhaganon. Sa pihak nga bahin, kon ang mga hinigugma nagapabutyag sing kasaw-a sa imo batasan sa pag-inom sing alkohol, mahimo nga may maayong rason sila sa sini. Binagbinaga ang ila ginasiling.​—⁠Hulubaton 19:​20; 27:⁠6.