Ang Mas Daku nga Himaya sang Balay ni Jehova

“‘Pun-on ko ini nga balay sing himaya,’ siling ni Jehova sang mga kasuldadusan.”—HAGEO 2:7.

1. Ano ang kaangtanan sang balaan nga espiritu sa pagtuo kag binuhatan?

SAMTANG nagabantala sa balay-balay, nasugata sang isa sang mga Saksi ni Jehova ang isa ka Pentecostal nga babayi nga nagkomento, ‘Kami ang may balaan nga espiritu, apang kamo ang nagahimo sang hilikuton.’ Sing mataktikanhon, ginpaathag sa iya nga ang isa nga may balaan nga espiritu, kinaugali nga dapat mapahulag nga himuon ang hilikuton sang Dios. Ang Santiago 2:17 nagasiling: “Ang pagtuo, kon wala sing mga binuhatan, patay.” Sa bulig sang espiritu ni Jehova, ang iya mga Saksi nakapalambo sing mabakod nga pagtuo, kag iya ‘ginpuno ang iya balay sing himaya’ paagi sa pagpahulag sa ila nga himuon ang matarong nga mga buhat—una ‘ang pagbantala sining maayong balita sang Ginharian sa bug-os napuy-an nga duta subong panaksi sa tanan nga kapungsuran.’ Kon matapos na ining hilikuton sa kaayawan ni Jehova, “nian magaabot ang katapusan.”—Mateo 24:14.

2. (a) Ang paghugod sang aton kaugalingon sa hilikuton ni Jehova magadala sing anong mga pagpakamaayo? (b) Ngaa dapat kita malipay sa daw isa ka “pagkalantang”?

2 Gikan sa sining mga pinamulong ni Jesus, nagahinakop kita nga ang aton karon hilikuton dapat nga nasentro sa pagbantala sa iban sang “mahimayaon nga maayong balita sang malipayon nga Dios,” nga ginsalig sa aton. (1 Timoteo 1:11) Sa dugang nga ginahugod naton sing malipayon ang aton kaugalingon sa pag-alagad kay Jehova, mangin mas madasig ang pag-abot sang katapusan. Sa Habacuc 2:2, 3, mabasa naton ang mga pinamulong ni Jehova: “Isulat ang mga palanan-awon, ipaathag ini sa mga tapitapi, agod mangin matanlas ang nagabasa sing mabaskog gikan sa sini. Kay ang palanan-awon naigo sa gintalana nga tion, kag padayon ini nga nagadalidali padulong sa katapusan, kag indi ini magabutig. Bisan kon magpalantang ini, hulata ini; kay sa pagkamatuod magaabot ini. Indi ini magpalantang.” Huo, “ang palanan-awon” matuman “bisan kon mapalantang ini.” Sanglit yari na kita sa ika-83 nga tuig sang paggahom ni Jesus sa Ginharian, ang iban mahimo magbatyag nga yari kita karon sa tion sang pagkalantang. Apang, indi bala dapat nga malipay kita nga wala pa mag-abot ang katapusan? Sa sining dekada sang 1990, ang mga pagdumili sa pagbantala sing maayong balita, daw makatalanhaga ini nga ginkuha sa Sidlangan nga Europa, mga bahin sang Aprika, kag iban pa nga kadutaan. Ang daw isa ka “pagpalantang” nagahatag sing tion para sa madamo pa nga “mga karnero” nga matipon gikan sa sining mga teritoryo nga nabuksan sining karon lang.—Juan 10:16.

3. Ngaa ang aton bag-o nga paghangop sa “sining kaliwatan” nagapahulag sa aton nga himuon ang hilikuton sang Dios sing hilingagawon?

3 “Indi ini magpalantang,” siling sang manalagna. Si Jesus nagsiling nga ang karon nga malauton nga kaliwatan indi magataliwan tubtob nga “mahanabo ining tanan nga mga butang.” (Mateo 24:34) Ang aton bala bag-o nga paghangop sa iya mga pinamulong nagakahulugan nga ang aton pagbantala nga hilikuton indi tuman ka hilingagawon?a Ginapakita sang mga katunayan nga indi! Ang aton karon kaliwatan nahulog sa malaut kag garok nga kahimtangan kaangay sa tanan nagligad nga maragtas. (Ipaanggid ang Binuhatan 2:40.) Dapat kita magpanghikot sing hilingagawon. (2 Timoteo 4:2) Ang tanan nga tagna tuhoy sa tion sang dakung kapipit-an nagapakita nga magaabot ini sing hinali, sa gilayon, sing kibot—kaangay sang makawat. (1 Tesalonica 5:1-4; Bugna 3:3; 16:15) “Bangod sini maghanda man kamo, kay sa takna nga wala ninyo ginapaabot, magakari ang Anak sang tawo.” (Mateo 24:44) Samtang ining didiosnon nga kaliwatan sang katawhan nagapadulong sa bibi sang kalaglagan, sa pagkamatuod indi naton luyag nga ihaboy ang aton hamili nga paglaum sa kabuhi nga walay katapusan paagi sa pagbalik sa “pagtubog sa lunang” sang kalibutanon nga mga tublag!—2 Pedro 2:22; 3:10; Lucas 21:32-36.

4. Anong kahimtangan ang nagakinahanglan sing dugang nga mga suplay sang “pagkaon sa nagakaigo nga tion,” kag paano napun-an ini nga kinahanglanon?

4 Bilang katumanan sang tagna ni Jesus, sang 1914 “nagsugod ang kasakit” sang magsulod ang katawhan sa “katapusan sang sistema sang mga butang.” Ang mga kalisod, makahalapay nga mga hitabo, kag pagkamalinapason nagmuad tubtob karon nga adlaw. (Mateo 24:3-8, 12) Sa amo man nga tion, ginsugo ni Jehova ang hinaplas matutom kag mainandamon nga ulipon nga klase sa pag-aman sing espirituwal nga “pagkaon sa nagakaigo nga tion” para sa panimalay sang ila Agalon, si Cristo. (Mateo 24:45-47) Gikan sa iya trono sa kalangitan, ginadumalahan karon sining Mesianikong Hari ang dalayawon espirituwal nga programa sa pagpakaon sa bug-os nga duta.

Bugana nga “Suplay sang Pagkaon”

5. Ang panguna nga “pagkaon” nagabaton sing ano nga igtalupangod?

5 Binagbinaga ang paghanda sang “mga suplay sang pagkaon.” (Lucas 12:42) Ang pangunang bahin sa Cristianong pagkaon amo ang Pulong sang Dios, ang Biblia. Agod matudlo ang Biblia sing epektibo, ang madali mahangpan, sibu nga pagbadbad amo ang pangunang kinahanglanon. Sa sulod sang mga tinuig progresibo nga naaman ini nga kinahanglanon, ilabi na kutob sang 1950 sang ginpaguwa sa Ingles ang New World Translation of the Christian Greek Scriptures. Sang 1961 ang New World Translation sang bug-os nga Biblia sarang na matigayon, kag ang mga edisyon nagguwa sang ulihi sa iban pa panguna nga mga lenguahe. Ang 3 ka tomo nga ginpaguwa sang 1996 nga tuig sang pag-alagad naglab-ot sa kadamuon nga 27, kag 14 sini ang kompleto nga Biblia. Agod maatipan ining hilikuton sa Biblia, subong man sa mga bulig sa Biblia, mga 1,174 ka dedikado nga mga Cristiano ang nagapangabudlay karon sing bug-os tion sa pagbadbad sa 77 ka pungsod.

6. Paano nahatag sang Sosiedad ang ginakinahanglan nga mga publikasyon sa Biblia?

6 Subong pagsakdag sa hilikuton sining madamong manugbadbad, ang 24 ka nagaimprinta nga mga sanga sang Watch Tower Society nagapatubas sing mas madamo nga tomo sang mga publikasyon. Sa sining katuyuan, dugang nga mga high-speed rotary nga makina sa imprinta ang padayon nga ginainstalar sa pangunang mga sanga. Ang pagpatubas sing Lalantawan kag Magmata! nga mga magasin nagadugang kada bulan, nga nagdangat sa tingob nga kadamuon nga 943,892,500 ka kopya, isa ka 13.4-porsiento nga pag-uswag sa isa ka tuig. Ang kabug-usan nga kadamuon sang Biblia kag matig-a sing panghapin nga mga libro nga napatubas sa Estados Unidos, Brazil, Finland, Alemanya, Italya, Japan, Korea, kag Mexico lamang nagdugang sing 40 porsiento kutob sang 1995 tubtob sa 76,760,098 ka kopya sang 1996. Ang iban nga mga sanga nakaamot man sing daku sa kabug-usan nga pag-uswag sa pagpatubas sing literatura.

7. Paano ang Isaias 54:2 labi nga nangin hilingagawon karon?

7 Ang kalabanan nga pag-uswag nangin kinahanglanon gid sang katuigan 1990 sang ginkuha ang mga pagdumili sa mga Saksi ni Jehova sa Nasidlangan nga Europa kag Aprika. Ang kagutom sa espirituwal nga pagkaon daku sa sining mga duog. Busa ang panawagan nagalanog sing labi ka hilingagawon: “Palapara ang duog sang imo layanglayang. Kag ipahitad sa ila ang mga kumbong sang imo dakung tabernakulo. Indi magpangalag-ag. Palabaa ang imo mga banting, kag palig-una ang imo mga palpal.”—Isaias 54:2.

8. Anong maalwan nga sabat ang nagabulig sa paghatag sing pinansial nga suporta?

8 Busa, kinahanglan pasangkaron ang mga pasilidad sa kalabanan sang 104 ka sanga sang Sosiedad. Bangod sang puraot nga kahimtangan sa ekonomiya sang kalabanan bag-o nabuksan nga mga teritoryo, ang daku nga bahin sang kagastuhanan sa sining mga pagpasangkad ginabayaran sang mga kontribusyon sa bug-os kalibutan nga hilikuton gikan sa mas maarang-arang nga mga pungsod. Sing makalilipay, ang mga kongregasyon kag mga indibiduwal nagahulag sing bug-os tagipusuon, suno sa espiritu sang Exodo 35:21: “Kag nag-abot sila, ang tagsa nga ginpahulag sang ila tagipusuon, kag nagdala ang tagsatagsa nga ginpahulag sang iya espiritu, sing kontribusyon kay Jehova para sa hilikuton.” Ginahimuslan namon ining kahigayunan agod pasalamatan ang tanan nga nagapakigbahin sa sining maalwan nga paghatag.—2 Corinto 9:11.

9. Paano ang Roma 10:13, 18 nagakatuman sa karon?

9 Sang 1996 ang mga publikasyon sang Watch Tower Society matuod nga naghimaya sa ngalan kag mga katuyuan ni Jehova sa mga ukbong sang duta. Kaangay gid ini sang gintagna ni apostol Pablo. Ginakutlo ang tagna ni Joel kag sang ika-19 nga Salmo, sia nagsulat: “ ‘Ang bisan sin-o nga nagatawag sa ngalan ni Jehova maluwas.’ Apang mamangkot ako, nakabati sila, indi bala? Huo, kay sa pagkamatuod, ‘ang ila tingog naglapnag sa bug-os nga duta, kag ang ila mga pulong sa mga ukbong sang duta.’ ” (Roma 10:13, 18) Busa paagi sa pagpakataas sang hamili nga ngalan nga Jehova, ang iya katawhan may importante nga bahin sa pagpuno sang iya balay sang pagsimba sing himaya. Paano, nian, nag-uswag ining pahibalo sing espisipiko sang 1996? Usisaa palihug ang masunod nga tsart sa pahina 18 tubtob 21.

Pag-ani sa Bug-os nga Kalibutan

10. Anong talalupangdon nga mga bahin ang imo natalupangdan sa hilikuton sang katawhan ni Jehova, subong ginsumaryo sa tsart sa pahina 18 tubtob 21?

10 Wala pa gid anay makatigayon sing daku nga puwersa ang pinamulong ni Jesus nga masapwan sa Lucas 10:2: “Sa pagkamatuod ang alanyon, daku, apang diutay ang mga manugpangabudlay. Busa pangabaya ninyo ang agalon sing alanyon sa pagpadala sing mga manugpangabudlay sa iya alanyon.” Nagasabat ka bala sa sining panawagan? Minilyon sa bug-os nga kalibutan ang nagasabat sa sini. Ginapamatud-an ini sang bag-ong kataason nga 5,413,769 ka manugbantala sang Ginharian nga nagreport sing pag-alagad sa latagon sang 1996. Dugang pa, 366,579 ka bag-o nga mga utod nga lalaki kag utod nga babayi ang nabawtismuhan. Daw ano gid ang aton pagpabili sa sining “bilidhon nga mga butang sang mga pungsod,” nga nagapakigbahin karon sa ‘pagpuno sang balay ni Jehova sing himaya’!—Hageo 2:7.

11. Ngaa may rason kita tanan sa pagkalipay sing daku?

11 Ang mga report tuhoy sa pag-uswag sa bag-o nabuksan nga mga latagon indi katingalahan. Nahisa bala ang iban sa aton sa sadtong nakatigayon sing amo nga pag-uswag? Sa kabaliskaran, nagakalipay kita upod sa ila. Ang tanan nga pungsod nagsugod sa diutay. Ang kaupod nga manalagna ni Hageo nga si Zacarias, nagsulat: “Sin-o bala ang nagtamay sang adlaw sang diutay nga mga butang?” (Zacarias 4:10) Nalipay kita nga sa mga duta diin malig-on ang hilikuton sang mga Saksi ni Jehova, minilyon na karon ang mga manugbantala sang Ginharian, kag ang mga teritoryo masunson nga ginatuptupan, kada semana pa gani sa madamong dalagku nga mga siudad. May rason bala kita nga maghinay samtang ginapasangkad karon ni Jehova ang kahigayunan sang kaluwasan sa ginadilian anay nga mga pungsod? Wala gid! “Ang latagon amo ang kalibutan,” siling ni Jesus. (Mateo 13:38) Dapat padayunon ang maid-id nga pagpanaksi, subong nga ang unang mga disipulo nagpanaksi sing maid-id sadtong katapusan sang Judiyong sistema sang mga butang.—Binuhatan 2:40; 10:42; 20:24; 28:23.

Padayon nga Nagaabante

12. Ano ang aton rason sa “pag-abante” sing padayon? (Tan-awa man ang kahon, “Pag-ani ‘Gikan sa Ukbong sang Duta.’ ”)

12 Huo, dapat kita magdungan, padayon nga “mag-abante” upod sa pagtuytoy sang langitnon nga kangga ni Jehova. (Ezequiel 1:12) Madumduman naton ang mga pinamulong ni Pedro: “Si Jehova indi mahinay kon tuhoy sa iya saad, subong sang pagkabig sang iban nga tawo nga mahinayon sia, apang mapinaumuron sia sa inyo bangod indi niya luyag nga malaglag ang bisan sin-o kundi maluyag nga ang tanan maghinulsol.” (2 Pedro 3:9) Kabay nga ang pinasahi nga kakugi sang aton mga kauturan sa imol nga mga pungsod makapapagsik sa aton. Ang bisan anong paglantang sang pag-abot sang Armagedon nagatugot sa ginatos ka libo sa sini nga mga pungsod nga matipon kag subong man sa madamo sa masami ginapangabudlayan nga mga teritoryo. Indi magsayop sa sini: “Ang dakung adlaw ni Jehova malapit na. Malapit na ini, kag nagadalidali sing tuman.” (Sofonias 1:14) Dapat man kita magdalidali sa paghatag sing maid-id katapusan nga pagpanaksi!

13, 14. (a) Ano ang masiling sa napahamtang nga mga publikasyon sang 1996? (b) Anong pinasahi nga mga plano ang mahimo sang mga kongregasyon kada tuig, kag ano ang plano mo agod makapakigbahin?

13 Bisan pa wala ginapakita ang mga detalye sa tsart sang pag-alagad, may talalupangdon nga pag-uswag sa napahamtang nga mga Biblia, libro, kag mga magasin sang nagligad nga tuig. Halimbawa, ang napahamtang nga magasin sa bug-os nga kalibutan nagpakita sing 19-porsiento nga pag-uswag, nga may kabug-usan nga 543,667,923 ka kopya ang napahamtang. Ang aton mga magasin nagahimo sing maayo nga panaksi—sa mga dalan, sa mga parke, sa mga paradahan sang bus, sa mga duog sang negosyo. Ginapakita sang mga report nga sa pila ka teritoryo nga pirme ginatuptupan sing pagbantala sang Ginharian, ang propesyonal nga mga tawo nagdayaw sa kalidad sang aton mga magasin kag nagabaton sang mga pagtuon sa Biblia.

14 Kada tuig sa bulan sang Abril, ang mga kongregasyon masami nagaorganisar sing pinasahi nga hilikuton sa magasin, nga nagahimo sing bug-os-adlaw nga kampanya sa balay-balay kag sa publiko nga mga duog. Magapakigbahin bala sa sini ang inyo kongregasyon sa Abril 1997? Ginhanda ang maayo nga mga guwa sang Abril nga Lalantawan kag Magmata!, kag ining dulungan nga pagtanyag sa bug-os nga kalibutan pat-od nga mangin dalayawon gid! Sa isla sang Cipre, ang mga kongregasyon, nga naggamit sing eslogan nga “lab-uton ang tanan sang mensahe sang Ginharian,” naghimo pa gani sina kada bulan paagi sa naiskedyul nga hilikuton sa magasin, kag nakatigayon sing bag-ong kataason nga 275,359 nga napahamtang sa amo nga tuig, isa ka 54-porsiento nga pag-uswag.

Ang Katapusan nga mga Mensahe ni Hageo

15. (a) Ngaa nagpadala si Jehova sing dugang nga mga mensahe kay Hageo? (b) Anong leksion ang ginahatag sa aton sang ikatlo nga mensahe ni Hageo?

15 Ginpadala ni Jehova si Hageo, 63 ka adlaw sa tapos nga mapaalinton niya ang iya ikaduha nga mensahe, upod ang ikatlo nga pahibalo nga masunod naton sing maayo karon. Naghambal si Hageo nga subong bala ang mga Judiyo nagapasad sadto sing pundasyon sang templo, nga sa pagkamatuod napasad nila 17 ka tuig na ang nakaligad. Sa liwat nakita ni Jehova nga kinahanglanon ang pagtinlo. Ang mga saserdote kag katawhan nangin mapatumbayaon kag sa amo, nangin dimatinlo sila sa mga mata ni Jehova. Mahimo man bala nga ang iban sang katawhan ni Jehova nangin mahinay man karon, nagapaduyog pa gani sa matinuguton materyalistiko nga mga paagi sang kalibutan? Hilingagawon nga isentro naton tanan ang aton tagipusuon “kutob karon nga adlaw kag padayon” sa paghatag sing himaya sa ngalan ni Jehova, nga may pagsalig sa iya saad: “Kutob karon ihatag ko ang pagpakamaayo.” —Hageo 2:10-19; Hebreo 6:11, 12.

16. Anong “pag-uyog” ang malapit na, kag sa anong resulta?

16 Sadto man mismo nga adlaw, ang pulong ni “Jehova sang mga kasuldadusan” nag-abot kay Hageo sa ikaapat kag katapusan nga tion. Ginpahibalo niya kon ano ang nadalahig sa Iya “pag-uyog sa mga langit kag duta,” nga nagasiling: “Pukanon ko ang mga trono sang mga ginharian kag laglagon ko ang kusog sang mga ginharian sang mga pungsod; kag wagwagon ko ang mga kangga kag ang mga nagasakay sa ila, kag ang mga kabayo kag ang mga nagasakay sa ila pat-od nga mahulog, ang tagsatagsa paagi sa espada sang iya utod.” (Hageo 2:6, 21, 22) Ang “pag-uyog” makadangat sa iya talipuspusan kon matinluan na sing bug-os ni Jehova ang duta sa Armagedon. Nian “ang bilidhon nga mga butang sang tanan nga pungsod” magaabot, agod maghuman sing isa ka bag-ong katilingban sang tawo para sa bag-ong kalibutan. Daw ano nga mga rason sa pagkalipay kag paghatag sing kadayawan kay Jehova!—Hageo 2:7; Bugna 19:6, 7; 21:1-4.

17. Paano ginbutang si Jesus subong “singsing nga inugpat-in”?

17 Nagatapos sang iya tagna, si Hageo nagasulat: “ ‘Sa sadtong mga adlaw,’ nagasiling si Jehova sang mga kasuldadusan, ‘kuhaon ko ikaw, O Zorobabel . . . , kag himuon ko ikaw subong singsing nga inugpat-in, kay ginpili ko ikaw, nagasiling si Jehova sang mga kasuldadusan.” (Hageo 2:23) Si Cristo Jesus amo karon ang antitipiko nga Mesianikong Hari kag Mataas nga Saserdote ni Jehova, nga nagatingob sa langit sang posisyon nanday Gobernador Zorobabel kag Mataas nga Saserdote nga si Josue sa dutan-on nga Jerusalem. Kaangay sa opisyal nga singsing nga inugpat-in sa tuo nga kamot ni Jehova, si Jesus amo ang isa nga nangin “Huo” subong instrumento ni Jehova sa pagtuman sa madamong “saad sang Dios.” (2 Corinto 1:20; Efeso 3:10, 11; Bugna 19:10) Ang bug-os matagnaon nga mensahe sang Biblia nasentro sa pag-aman ni Jehova kay Jesucristo subong Hari kag saserdotenhon nga Manunubos.—Juan 18:37; 1 Pedro 1:18, 19.

18. Paano ang katapusan nga “ginsiling ni Jehova sang mga kasuldadusan” makatigayon sing makapaumpaw nga katumanan?

18 Sa pagkamatuod sa aton mga adlaw, ang pinakadakung himaya masapwan sa masanag espirituwal nga templo ni Jehova! Kag sa indi madugay, sa tapos malaglag ni Jehova ang bug-os nga sistema ni Satanas, ang Hageo 2:9 makatigayon sing makadalayaw nga katumanan: “ ‘Ihatag ko ang paghidait sa sini nga duog,’ nagasiling si Jehova sang mga kasuldadusan.” Paghidait sa katapusan!—isa ka nagadugay, bug-os uniberso nga paghidait, nga ginagarantiyahan sang “singsing nga inugpat-in ni Jehova,” si Cristo Jesus, ang “Prinsipe sang Paghidait,” nga tuhoy sa iya nasulat: “Sa kabuganaan sang prinsipenhon nga paggahom kag sa paghidait wala sing katapusan . . . Ang kakugi ni Jehova sang mga kasuldadusan amo ang magahimo sini.” (Isaias 9:6, 7) Sa walay katubtuban ang himaya sang balay ni Jehova magabanaag sa bug-os mahidaiton nga duog sang iya bug-os uniberso nga pagkasoberano. Kabay nga makapabilin kita sa sina nga balay!—Salmo 27:4; 65:4; 84:⁠10.

[Footnote]

Mapaathag Mo Bala?

◻ Paano karon, ‘napuno ang balay ni Jehova sing himaya’?

◻ Ngaa mas hilingagawon karon ang pagbantala sing maayong balita?

◻ Anong pag-uswag sa pagbantala sing hilingagawon ang ginapakita sang 1996 nga Tuig nga Report sang Pag-alagad?

◻ Paano nagaalagad si Cristo subong “singsing nga inugpat-in” ni Jehova?

[Kahon sa pahina 15]

Pag-ani “Gikan sa Ukbong sang Duta”

SA Isaias 43:6, mabasa naton ang sugo ni Jehova: “Dili pagpunggi. Dalha gikan sa malayo ang akon mga anak nga lalaki, kag ang akon mga anak nga babayi sa ukbong sang duta.” Ini nga kasulatan pinasahi nga nagakatuman karon sa Nasidlangan nga Europa. Binagbinaga halimbawa, ang anay Komunista nga pungsod sang Moldova. May mga minuro diri nga halos katunga sang populasyon mga Saksi ni Jehova karon. Nagabiyahe sila sing malayo agod makakita sing teritoryo nga mabantalaan, apang ginapanikasugan nila ini! Madamong manugbantala sa sining mga kongregasyon ang mga kabataan sang mga ginikanan nga gintapok anay sa Siberia sang maaga nga bahin sang katuigan 1950. Karon ang ila mga pamilya amo ang nagapanguna sa pag-ani nga hilikuton. Sa 12,565 ka manugbantala, 1,917 ang nabawtismuhan sining nagligad nga tuig. Kuarentay tres ka kongregasyon ang may mga 150 ka manugbantala ang kada isa, kag ang mga sirkito nagdugang halin sa apat tubtob sa walo sa bag-o nga tuig sang pag-alagad.

Talalupangdon man ang pag-uswag sa Albania. May pila lamang ka matutom nga mga Saksi ang nakabatas sang pinakamapintas nga pagkadiktador sa bug-os nga 50 ka tuig. Madamo sa ila ang ginpamatay. Nagapahanumdom ini sa saad ni Jesus: “Dili pagkahadluki ang madali na lang nimo antuson. Yari karon! Ang Yawa magalupot sang iban sa inyo sa bilangguan agod matilawan kamo sing bug-os . . . Magpakatutom ka tubtob sa kamatayon, kag hatagan ko ikaw sing purongpurong sang kabuhi.” (Bugna 2:10; tan-awa man ang Juan 5:28, 29; 11:24, 25.) Ano ang makit-an naton karon sa Albania? Isa gid ka makapakibot nga katumanan sang saad ni Jehova sa Isaias 60:22: “Ang diutay mangin isa ka libo”! Sang 1990 isa lamang ka manugbantala ang nagreport sing pag-alagad sa Albania. Apang, madamong “manugpangabudlay” gikan sa Italya kag iban pa nga pungsod ang nagsabat sa panawagan ni Jesus: “Busa lakat kamo kag maghimo sing mga disipulo sang katawhan . . . , nagabawtismo sa ila.” (Mateo 28:19; Lucas 10:2) Sang Memoryal sang kamatayon ni Jesus sang 1996, 773 ka manugbantala ang aktibo sa latagon, kag nakatipon sila sing 6,523 ka tawo sa ila Memoryal, kapin sa walo ka pilo sa kadamuon sang mga manugbantala! Makadalayaw nga kadamuon sang mga tumalambong ang ginreport gikan sa naligwin nga mga duog. Bisan nga wala sing lokal nga mga manugbantala, ang mga siudad sang Kukës kag Divjakë may mga tumalambong nga 192 kag 230 ang kada isa. Sa Krujë nga may isa lamang ka manugbantala, may 212 nga nagtambong sa Memoryal. Ang 30 ka manugbantala sa Korçë nag-arkila sing mga pasilidad nga makaakomodar sing mga 300 ka tawo. Pagkatapos nga nabuta sining kadamuon ang awditoryum, ang 200 ka iban pa indi na mapasulod kay wala na gid sing lugar. Sa pagkamatuod isa ka latagon nga luto na agod anihon!

Yari ang report gikan sa Romania: “Samtang nagapamalaybalay kami, nasugata namon ang isa ka tawo nga nagsiling nga isa sia sang mga Saksi ni Jehova kag nagapuyo sa isa ka gamay nga banwa, nga suno sa amon nahibaluan, wala sing mga Saksi didto. Ginsugiran niya kami nga magluwas sa iya may 15 pa ka tawo nga sa sulod sang madamong tinuig nagahiwat sing mga miting kon Huebes kag Domingo kag nagsugod na gani sila sa pagbantala sa balay-balay. Sang masunod nga adlaw ginkadtuan namon ini nga banwa. Ang nagahulat sa amon sa duha ka kuwarto amo ang 15 ka lalaki, babayi, kag kabataan, nga nagbaton sing 20 ka libro kag 20 ka pinakabag-o nga mga magasin. Ginpakita namon sa ila kon paano magdumala sing mga pagtuon sa Biblia. Nagkanta kami sing tingob kag ginsabat ang ila mga pamangkot. Ang nagapanguna sa grupo nagsiling: ‘Sang nagligad nga pila ka adlaw, nangamuyo ako nga nagahibi kay Jehova nga padalhan niya kami sing manugbantay, kag ginsabat ang akon pangamuyo.’ Nalipay gid kami sing daku, kag sang paghalin namon, kaangay sang isa ka ilo nga nasapwan sang ulihi ang iya amay, sia nagsiling: ‘Palihug indi ninyo kami pagkalipati. Baliki ninyo kami liwat!’ Nagbalik kami, kag karon pito ka pagtuon sa Biblia ang ginadumalahan sa sina nga banwa. Sa madamo wala pa mabantalaan nga mga teritoryo, ang ­hilikuton ginasugdan sa makadalayaw nga paagi paagi sa mga literatura sa Biblia, nga ginaapresyar sing daku, kag ginapakita sini nga ang hilikuton iya sang Dios.”

[Tsart sa pahina 18-21]

1996 NGA REPORT SANG PAG-ALAGAD SANG MGA SAKSI NI JEHOVA SA BUG-OS KALIBUTAN

(Tan-awa ang bound volume)

[Kapsion sa pahina 16]

“Ang bilidhon nga butang sang tanan nga pungsod” ginatipon sa mga Isla sang Dagat (1), Bagatnan nga Amerika (2), Aprika (3), Asia (4), Aminhan nga Amerika (5), kag Europa (6)