Ginbiyaan ang Daku Bangod sang Mas Daku nga Butang

PANUGIRON NI JULIUS OWO BELLO

Sa sulod sang 32 ka tuig nangin isa ako ka Aladura. Nagpati ako nga malubad sang faith healing ang tanan ko nga problema kag mapaayo ang tanan nga balatian. Wala gid ako sing may nabakal nga bisan ano nga bulong, bisan sing mga pangpadula sing palanakit. Sadtong mga tuig, wala sing isa sa akon pamilya ang naospital. Kon may nagamasakit sa akon mga kabataan, nagapangamuyo ako para sa ila sa adlaw kag gab-i tubtob nga mag-ayo sila. Nagpati ako nga ginasabat sang Dios ang akon mga pangamuyo kag ginapakamaayo ako.

* Gikan sa Yoruba nga tinaga nga nagakahulugan sing “isa nga nagapangamuyo.” Nagapatuhoy ini sa isa ka katapo sang simbahan sa Aprika nga nagahimo sing espirituwal nga pagpamulong.

KATAPO ako sang Egbe Jolly, ang pinakabantog nga sosyal nga club sa Akure, isa ka banwa sa nakatundan nga Nigeria. Ang akon mga abyan amo ang pinakamanggaranon kag labing gamhanan nga mga tawo sa amon komunidad. Pirme nagapamasyar sa akon puluy-an ang Deji, ang hari sang Akure.

Isa man anay ako ka poligamista, may anom ka asawa kag madamo nga kerida. Nag-uswag ang akon negosyo. Maayo ang akon kahimtangan. Apang, kaangay sang nagalakbay nga negosyante sa ilustrasyon ni Jesus tuhoy sa perlas, may nasapwan ako nga butang nga tuman ka hamili amo nga ginbiyaan ko ang lima sa akon mga asawa, ang akon mga kerida, simbahan, sosyal nga club, kag kalibutanon nga kabantugan bangod sini.—Mateo 13:45, 46.

Kon Paano Ako Nangin Isa ka Aladura

Una ko nga nabatian ang mga Aladura sadtong 1936, sang 13 anyos ako. Ginsilingan ako sang akon abyan nga si Gabriel: “Kon magkadto ka sa Christ Apostolic Church, mabatian mo nga nagahambal ang Dios.”

“Paano nagahambal ang Dios?” pamangkot ko sa iya.

Nagsiling sia: “Mag-upod ka sa akon, kag makita mo.”

Luyag ko mabatian ang Dios. Gani sadto nga gab-i, nag-upod ako kay Gabriel sa simbahan. Ang gamay nga tinukod puno sing mga sumilimba. Nagsugod sa pagpangadi ang kongregasyon: “Kari, kamo nga katawhan! Yari diri si Jesus!”

Sa tion sining pagpangadi, may isa nga nagsinggit: “Kari, balaan nga espiritu!” May isa nga nagbagting sing lingganay, kag naghipos ang kongregasyon. Masunod, isa ka babayi ang nagwiriwiri nga indi maintiendihan. Sing hinali nagsinggit sia: “Pamatii ninyo ang mensahe sang Dios, O kamo nga katawhan! Amo ini ang ginasiling sang Dios: ‘Pangamuyo para sa mga mangangayam agod indi sila magpatay sing mga tawo!’ ” Ang palibot napuno sing emosyon.

Nagpati ako nga naghambal ang Dios paagi sa iya, gani sang masunod nga tuig ginbawtismuhan ako subong katapo sang Christ Apostolic Church.

Una nga Pagkakilala sa mga Saksi ni Jehova

Sang 1951, nagkuha ako sing isa ka kopya sang Lalantawan nga magasin gikan sa isa ka Saksi nga si Adedeji Boboye. Interesante gid ang magasin, gani nagsuskriber ako sa sini kag ginbasa ini sing regular. Sang 1952, nagtambong ako sa apat ka adlaw nga distrito nga kombension sang mga Saksi ni Jehova sa Ado Ekiti.

Nagdayaw ako sa akon nakit-an sa kombension. Ginpamensar ko sing maayo kon bala mangin isa ako sang mga Saksi ni Jehova apang ginkalimtan ko ini. Ang akon problema amo nga may tatlo ako sadto ka asawa kag isa ka kerida. Ginhunahuna ko nga indi ako mahimo mabuhi nga may isa lamang ka asawa.

Sang pagpauli ko sa Akure, ginhambalan ko si Adedeji nga untatan ang pagduaw sa akon, kag wala ko na ginpadayon ang akon pagsuskriber sa Lalantawan. Nangin mas aktibo ako sa akon relihion. Kon sa bagay, siling ko, ginpakamaayo ako sang Dios kutob sang magsulod ako sa Christ Apostolic Church. Nakapangasawa ako sing tatlo kag nakatigayon sing madamo nga kabataan. Nakapatindog ako sing akon kaugalingon nga balay. Wala gid ako maospital. Bangod nga daw ginasabat sang Dios ang akon mga pangamuyo, ngaa islan ko pa ang akon relihion?

Nagadugang nga Kabantugan Upod ang Kapaslawan

Nag-amot ako sing daku nga kuwarta sa simbahan. Sang ulihi ginhimo nila ako nga isa ka gulang sang simbahan, isa ka posisyon nga naghimo sa akon nga makita ang nasulod nga mga buhat sang simbahan. Natublag ako sa akon nakit-an. Ang pastor kag ang “mga propeta” mahigugmaon sa kuwarta; nakibot ako sa ila kakagod.

Halimbawa, sang Marso 1967 nangin amay ako sang tatlo ka kabataan sa nanuhaytuhay nga asawa. Kinabatasan sang simbahan nga pabunyagan ang isa ka bata. Gani nagdala ako sing mga halad—isda, lemonada, kag mga softdrink—sa pastor subong paghanda para sa seremonya.

Sang adlaw sang pagsimba, ang pastor nagsiling sa atubangan sang kongregasyon: “Ginkibot ako sang manggaranon nga mga tawo sining simbahan. Luyag nila magpabunyag, kag ang ila gindala mga softdrink lamang kag isda. Wala sing karne! Wala sing kanding! Hunahunaa! Si Cain naghalad sa Dios sing madamo nga utanon, apang wala ini pagbatuna sang Dios bangod wala ini sing dugo. Luyag sang Dios ang butang nga may dugo. Si Abel naghalad sing sapat, kag ginbaton ang iya halad.”

Bangod sadto, nagtindog ako kag nagguwa. Apang, nagatambong gihapon ako sa simbahan. Naghinguyang ako sing mas madamo nga tion sa mga sosyalan kag pagtambong sa mga miting sang amon club. Kon kaisa nagatambong ako sa mga miting sa Kingdom Hall, kag nagsuskriber ako liwat sa Lalantawan. Apang, indi pa gihapon ako handa nga mangin isa sang mga Saksi ni Jehova.

Ang Desisyon nga Alagaron si Jehova

Ang pagbag-o sa akon kabuhi natabo sang 1968. Isa ka adlaw nabasahan ko ang isa ka artikulo sa Ang Lalantawan nga naglaragway sang mapintas nga paghingabot sa mga Saksi ni Jehova sa Malawi. Ginasugid sini ang tuhoy sa 15-anyos nga bata nga babayi nga gingapos sa kahoy kag ginlugos sing anom ka beses bangod nagdumili sia nga ikompromiso ang iya pagtuo. Sa tuman nga kakibot, nabuy-an ko ang magasin, apang padayon ko ini nga ginhunahuna. Narealisar ko nga wala sing isa ka bata nga babayi sa amon simbahan ang may amo nga sahi sang pagtuo. Sang ulihi sadto nga gab-i, ginkuha ko ang magasin kag ginbasa ini liwat.

Gintun-an ko sing serioso ang Biblia. Samtang nagadugang ang akon ihibalo, nakit-an ko nga ginpatalang kami sing daku sang simbahan. Kaangay sang dumaan nga mga tion, ang amon kaparian ‘nagahimo sing lugak nga pagginawi.’ (Oseas 6:9) Ang amo nga mga tawo butig nga mga propeta nga ginpaandaman ni Jesus! (Mateo 24:24) Wala na ako nagatuo sa ila mga palanan-awon kag gamhanan nga mga binuhatan. Namat-od ako nga maghalin sa butig nga relihion kag buligan ang iban nga himuon man ini.

Mga Pagtinguha nga Makapabilin Ako sa Simbahan

Sang marealisar sang mga gulang sang simbahan nga determinado na ako nga maghalin sa simbahan, nagpadala sila sing mga tawo agod kumbinsihon ako. Indi nila luyag nga madulaan sing isa ka daku nga manug-amot sing kuwarta. Gintanyagan nila ako nga himuon nga Baba Egbe, isa ka patron sang isa sang mga simbahan sang Christ Apostolic sa Akure.

Wala ko ini pagbatuna kag ginsugiran ko sila kon ngaa. “Ginabutigan kita sang simbahan,” siling ko. “Nagasiling sila nga ang tanan nga maayo nga tawo makadto sa langit. Apang ginbasa ko ang Biblia, kag kumbinsido ako nga 144,000 lamang ka tawo ang makakadto sa langit. Ang iban matarong nga mga tawo magakabuhi sa paraiso sa duta.”—Mateo 5:5; Bugna 14:1, 3.

Gintinguhaan sang pastor nga pamatukan ako sang akon mga asawa. Ginsilingan niya sila nga indi pagpakadtuon ang mga Saksi ni Jehova sa amon balay. Ginhiluan sang isa sang akon mga asawa ang akon pagkaon. Ginpahog ako sang duha sa ila sang mga palanan-awon nga ila nakit-an sa simbahan. Ginapakita sang palanan-awon nga mapatay ako kon maghalin ako sa simbahan. Walay sapayan sini, padayon ko nga ginpanaksihan ang akon mga asawa, gin-agda sila nga mag-upod sa akon sa mga miting. “Makakita kamo sing lain nga mga bana didto,” siling ko. Apang, wala sing isa sa ila ang interesado, kag padayon nila ako nga ginpalas-ay.

Sang ulihi, sang Pebrero 2, 1970, sang magpauli ako halin sa isa ka biyahe sa kaingod nga banwa, nasapwan ko nga wala sing tawo ang balay. Naglayas ang tanan ko nga asawa upod ang mga kabataan.

Nagpabilin sa Isa ka Asawa

‘Matadlong ko na karon ang akon pagpangasawa,’ siling ko. Gin-agda ko ang akon pinakauna nga asawa nga si Janet nga magbalik sa balay. Nagpasugot sia. Apang, mabaskog sia nga ginpamatukan sang iya pamilya. Sang nahibaluan sang iban ko nga asawa nga ginpangabay ko si Janet nga magbalik, ginkadtuan nila sia sa balay sang iya amay kag ginkastigo. Nian ginpatawag ako sang iya pamilya para sa isa ka miting.

May mga 80 ka tawo nga nagtambong sa miting. Ang tiyo ni Janet nga amo ang ulo sang pamilya nagsiling: “Kon luyag mo liwat pangasaw-on ang amon anak nga babayi, nian dapat mo man pabalikon ang iban nga babayi. Apang kon luyag mo magpadayon sa imo bag-o nga relihion kag magpuyo upod sa isa ka asawa, nian magpangita ka sing lain nga babayi. Kon kuhaon mo liwat si Janet, patyon sia sang iban nimo nga asawa, kag indi namon luyag nga mapatay ang amon anak nga babayi.”

Pagkatapos sang malawig nga paghambalanay, narealisar sang pamilya nga determinado ako nga isa lamang ka asawa ang huptan ko. Sang ulihi nagpasugot sila. Ang tiyo nagsiling: “Indi namon pagkuhaon sa imo ang imo asawa, sarang mo sia madala.”

Sang Mayo 21, 1970, nagpakasal kami sing legal ni Janet. Siam ka adlaw sang ulihi ginbawtismuhan ako subong isa sang mga Saksi ni Jehova. Sang Disiembre sang amo man nga tuig, ginbawtismuhan man si Janet.

Pagtigayon sing Pagpakamaayo ni Jehova

Gintagna sang mga katapo sang amon anay simbahan nga mapatay kami kon mangin Saksi kami. Halos 30 ka tuig na ini nga nakaligad. Bisan kon mapatay ako karon, bangod bala ini nga nangin isa ako sang mga Saksi ni Jehova? Kon mapatay karon ang akon asawa, masiling bala sang bisan sin-o nga bangod ini nga nangin isa sia sang mga Saksi ni Jehova?

Gintinguhaan ko nga ipakita sa akon 17 ka kabataan ang dalanon sang kamatuoran. Walay sapayan nga madamo sa ila ang mga adulto na sang tion nga nangin isa ako ka Saksi, ginpalig-on ko sila nga magtuon sing Biblia kag gindala sila sa mga miting kag sa mga kombension. Nalipay ako nga lima sa ila ang nag-alagad kay Jehova upod sa akon. Ang isa nagaalagad upod sa akon subong isa ka gulang sa kongregasyon. Ang isa naman isa ka ministeryal nga alagad sa kaiping nga kongregasyon. Duha sa akon kabataan ang nagaalagad subong regular payunir.

Kon handurawon ko ang nagligad, ginadayaw ko ang dibagay nga kaluoy ni Jehova sa pagbulig sa akon nga mangin iya alagad. Matuod gid ang pinamulong ni Jesus: “Walay tawo nga makapalapit sa akon magluwas nga ang Amay, nga nagpadala sa akon, magapahulag sa iya”!—Juan 6:44.