Sin-o ang Matuod nga mga Mensahero sang Paghidait?
SANG Mayo 31, 1996, ginpahibalo sang mga balita ang daw mensahe sang paghidait. Sang masunod nga adlaw, ginpaguwa ang opisyal nga pinamulong nga nagapamatuod nga si Benjamin Netanyahu, nga mangin primer ministro sang Israel, “nanaad sing tudok nga padayunon ang negosasyon sa paghidait, ang paghidait nga may kalig-unan, sa ulot sang estado sang Israel kag sang tanan nga mga kaingod sini, lakip na ang mga taga-Palestina.”
Ang ginhatagan sing daku nga publisidad nga pagpili kay Netanyahu nagpalibog sa madamo kon bala ang paghidait sa Natung-an nga Sidlangan indi mangin isa ka damgo lamang. Kon indi, magailog man bala ang iban nga mga pungsod, nagalimot sang ila mga pagbinangig?
Sa pagkamatuod, mas mahapos ang magpanaad sing paghidait sangsa magtigayon sini. Bangod sini, madamo ang nagapangduhaduha. Subong sang ginsiling sang dyurnalista nga si Hemi Shalev, “katunga sang katawhan sa Israel ang nagalakat karon nga may balatyagon nga ang pagtubos malapit na, kag katunga pa ang nagapati nga nasiod ini sa impierno sa duta.” Sa pagsumaryo, sia nagsiling: “Ang pila nagakasadya; ang iban nagatangis.”
Amo ini ang kahimtangan sa mga panikasog sang tawo nga paluntaron ang paghidait. Ang kadalag-an sang isa ka lider kag sang iya mga sumalakdag nagakahulugan sing kapierdehan para sa pihak nga grupo. Ang di-kaayawan nagadul-ong sa kabang-awan, kag ang kabang-awan, masami nga nagadul-ong sa pagrebelde. Sa Natung-an nga Sidlangan, Latin Amerika, Nasidlangan nga Europa, ukon bisan diin man—ang mga panikasog sang tawo nga matigayon ang paghidait wala gid sing pulos.
Ang Matuod nga Paghidait Malapit Na!
Sadto anay sang ang paghidait sa Natung-an nga Sidlangan isa ka mainit nga balita, isa pa ka mensahe sang paghidait ang nabatian. Indi ini isa ka nabantala nga pamulongpulong sa politika; ukon isa ini ka kasugtanan sa paghidait sa tunga sang mga pungsod. Sa baylo, ginpahibalo sini nga mensahe ang paghidait nga magaabot paagi lamang sa Ginharian sang Dios. Diin nabatian ini nga mensahe? Sa kapin sa 1,900 ka “Mga Mensahero sang Diosnon nga Paghidait” nga Distrito nga mga Kombension nga ginhiwat sang mga Saksi ni Jehova sa bug-os nga kalibutan sang 1996/97.
Gin-athag sa sining mga kombension nga wala sing tawhanon nga gobierno ang makapaluntad sing matuod nga paghidait kag kalig-unan. Ngaa? Bangod nagakinahanglan ini sang pagdula sa mga butang nga nagakuha sing paghidait sa aton adlaw-adlaw. Ang matuod nga paghidait nagakahulugan sing pagbugtaw kada aga nga wala na ang pamahog sang inaway ukon kasingki. Nagakahulugan ini nga wala na sing krimen, wala na sing kandado sa aton mga ganhaan, wala na sing kahadlok sa paglakat sa mga dalan, wala na sing mga pamilya nga nagakaguba. Ano nga gobierno sa duta ang makahimo sina tanan? Sa pagkamatuod, anong gobierno sa duta ang mangahas pa gani nga manaad sini?
Apang, sarang mapaluntad sang Ginharian sang Dios ini nga mga butang. Ang Biblia nagasaad: “Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” (Bugna 21:3, 4) Daw ano nga kaumpawan ang mahatag sina sa nagaantos nga katawhan!
Ang saad ni Jehova nga Dios indi wala sing pulos. Ang Biblia nagapasalig sa aton: “Ang Dios indi tawo nga magbutig sia, ukon anak sang tawo nga maghinulsol sia. Nasiling bala niya ini kag indi niya paghimuon, kag napamulong bala niya kag indi niya pagtumanon?” (Numeros 23:19) Huo, ang ginsaad sang Dios matuman—sa kabulahanan sang tanan nga nagadampig sa iya.
Mga Mensahero sang Paghidait sang Dios
Ang mga Saksi ni Jehova nakilal-an tungod sang ila makugi nga pagbantala nahanungod sa Ginharian sang Dios. Kada tuig, nagahinguyang sila sing tingob sing kapin sa isa ka bilyon ka oras sa pagbantala sang makalilipay nga mensahe sang Biblia sa iban. Katumanan ini sang pinamulong ni Jesus: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:14) Ang mensahe nga ginadala sang mga Saksi “maayong balita” sa pagkamatuod, kay ginabantala sini ang langitnon nga Ginharian sang Dios subong ang lamang nga paglaum para sa katawhan. Kag daw ano gid kalig-on ini nga paglaum para sa palaabuton!
Bisan karon ang Ginharian sang Dios nagapatubas sa mga sakop sini sing isa ka matuod nga higot sang paghidait kag utudnon nga gugma. Si Jesus nagsiling: “Sa sini ang tanan makahibalo nga kamo mga disipulo ko, kon maghigugmaanay kamo.” (Juan 13:35) Ang mga Saksi ni Jehova nagapanikasog nga tumanon ining sadsaran nga ginapatuman sang matuod nga Cristianismo. Subong resulta, may makatilingala sila nga paghiliutod nga nagahiusa sa mga Judiyo kag mga Arabo, sa mga taga-Croatia kag mga Serb, sa mga Hutu kag Tutsi. Ining paghidait nga ginadamgo lamang sang kalabanan nga katawhan ginapanag-iyahan karon sang minilyon ka Saksi ni Jehova sa bug-os nga kalibutan.
Ang pagpalig-on nga padayunon ang pagkabuhi suno sa mga prinsipio sang Biblia kag ang pagbantala sang maayong balita sang Ginharian ginpadaku sa programa sang “Mga Mensahero sang Diosnon nga Paghidait” nga Distrito nga Kombension. Ginaagda namon kamo nga basahon ang masunod nga report tuhoy sa makapulukaw nga tatlo-ka-adlaw nga kombension nga gintambungan sang minilyon.