Pagbulig sa Iban nga Matun-an ang mga Ginapatuman sang Dios
“Ang kinahanglanon gintugyan sa akon. Tunay gid, kailo ako kon indi ko pag-iwali ang maayong balita!”—1 CORINTO 9:16.
1, 2. (a) Sa anong duha sing katuyuan nga hilikuton kita ginasugo ni Jehova nga makigbahin? (b) Ano ang dapat matun-an sang mga bunayag-sing-tagipusuon nga katawhan agod mangin mga sakop sang Ginharian sang Dios?
MAY maayong balita si Jehova para sa katawhan. May Ginharian sia, kag luyag niya nga mabatian ini sang mga tawo bisan diin! Sa tion nga matun-an naton ining maayong balita, ginapaabot sang Dios nga ipaambit naton ini sa iban. Isa ini ka hilikuton nga may duha ka katuyuan. Una, dapat naton ibantala ang maayong balita sang Ginharian sang Dios. Sa iya tagna nahanungod “sa katapusan sang sistema sang mga butang,” si Jesus nagsiling: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.”—Mateo 24:3, 14.
2 Ang ikaduha nga bahin sining hilikuton nagahilabot sa pagtudlo sa mga nagapamati sa pagwali sang Ginharian. Pagkatapos sang iya pagkabanhaw, nagsiling si Jesus sa daku nga grupo sang iya mga disipulo: “Busa lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila nga tumanon ang tanan nga butang nga ginsugo ko sa inyo. Kag, yari karon! ako kaupod ninyo sa tanan nga adlaw tubtob sa katapusan sang sistema sang mga butang.” (Mateo 28:19, 20) Ang ‘mga butang nga ginsugo ni Cristo’ wala maghalin sa iya; gintudluan niya ang iban nga tumanon ang mga sugo, ukon mga ginapatuman, sang Dios. (Juan 14:23, 24; 15:10) Busa, ang pagtudlo sa iban nga ‘tumanon ang mga butang nga ginsugo ni Cristo’ nagalakip sang pagbulig sa ila nga matun-an ang mga ginapatuman sang Dios. Dapat tumanon sang mga tawo nga bunayag sing tagipusuon ang mga ginapatuman sang Dios agod mangin mga sakop sang iya Ginharian.
3. Ano ang Ginharian sang Dios, kag ano ang mahimo sini agod ang mensahe sang Ginharian mangin maayong balita?
3 Ano ang Ginharian sang Dios? Kag ano ang himuon sini sa bagay nga ang mensahe sang Ginharian nangin maayong balita? Ang Ginharian sang Dios isa ka langitnon nga Ginharian. Hamili gid ini kay Jehova, kay amo ini ang paagi nga pakabalaanon niya ang iya ngalan, ginatinluan ini sang tanan nga pasipala. Ang Ginharian amo ang instrumento nga gamiton ni Jehova agod himuon ang iya kabubut-on sa duta subong man sa langit. Amo sina kon ngaa gintudluan kita ni Jesus nga ipangamuyo ang pagkari sang Ginharian sang Dios kag unahon ini sa aton kabuhi. (Mateo 6:9, 10, 33) Nahangpan bala ninyo kon ngaa importante gid para kay Jehova nga tudluan naton ang iban nahanungod sa iya Ginharian?
Isa ka Hangkat Apang Indi Mabug-at
4. Paano mailustrar nga ang aton obligasyon nga magbantala sing maayong balita indi mabug-at?
4 Mabug-at bala ibantala ining maayong balita? Indi gid! Sa pag-ilustrar: Obligasyon sang isa ka amay nga mag-aman sing materyal sa iya pamilya. Ang indi paghimo sa sini mangin katumbas sang pagsikway sa Cristianong pagtuluuhan. Si apostol Pablo nagsulat: “Kon ang bisan sin-o wala nagaaman para sa ila nga yara sa iya, kag ilabi na para sa mga katapo sang iya panimalay, napanghiwala na niya ang pagtuo kag malain pa sa tawo nga wala sing pagtuo.” (1 Timoteo 5:8) Apang ina bala nga obligasyon mabug-at para sa isa ka Cristianong lalaki? Indi kon ginahigugma niya ang iya pamilya, kay sa sina nga bahin luyag niya nga mag-aman para sa ila.
5. Bisan pa nga ang pagbantala kag paghimo-disipulo nga hilikuton isa ka obligasyon, ngaa dapat kita malipay nga makigbahin sa sini?
5 Sa kaanggid, ang hilikuton nga pagbantala kag paghimo-disipulo isa ka obligasyon, isa ka tulumanon, nga sa sini nasandig ang aton mismo nga kabuhi. Amo sini ang ginsiling ni Pablo: “Ang kinahanglanon gintugyan sa akon. Tunay gid, kailo ako kon indi ko pag-iwali ang maayong balita!” (1 Corinto 9:16; ipaanggid ang Ezequiel 33:7-9.) Apang, ang aton motibo sa pagbantala amo ang gugma, indi katungdanan lamang. Una, ginahigugma naton ang Dios, apang ginahigugma man naton ang aton mga isigkatawo, kag nakahibalo kita kon daw ano ka importante nga mabatian nila ang maayong balita. (Mateo 22:37-39) Nagahatag ini sa ila sing paglaum sa palaabuton. Sa indi madugay tadlungon sang Ginharian sang Dios ang mga inhustisya, dulaon ang tanan nga pagpamigos, kag ipasag-uli ang paghidait kag paghiusa—ang tanan sa dayon nga kabulahanan sang mga nagapasakop sa matarong nga paggahom sini. Wala bala kita nalipay, huo nakunyag, nga ipaambit inang maayong balita sa iban?—Salmo 110:3.
6. Ngaa ang pagbantala kag paghimo-disipulo nga hilikuton isa gid ka hangkat?
6 Sa amo man nga tion, ining pagbantala kag paghimo-disipulo nga hilikuton isa gid ka daku nga hangkat. Ang mga tawo nagalainlain. Indi palareho ang mga luyag ukon mga ikasarang sang tanan. Ang iban madamo sing tinun-an, samtang ang iban diutay lamang. Ang pagbasa—nga sang una isa lamang ka paborito nga pangpalipas sang oras—masunson na karon nga ginakabig subong mabudlay nga trabaho. Ang Ingles nga tinaga nga aliteracy, nga ginahatagan sing kahulugan subong “ang kalidad ukon kahimtangan nga makahibalo magbasa apang indi interesado sa paghimo sini,” isa ka nagalala nga problema, bisan sa mga pungsod nga nagapabugal sing daku nga kataason sang mga makahibalo magbasa kag magsulat. Paano, nian, naton mabuligan ang mga tawo nga may lainlain nga ginhalinan kag naluyagan nga matun-an ang ginapatuman sang Dios?—Ipaanggid ang 1 Corinto 9:20-23.
Nasangkapan sing Nagakaigo sa Pagbulig sa Iban
7. Paano kita ginasangkapan sang “matutom kag mainandamon nga ulipon” sa pagbulig sa iban nga matun-an ang mga ginapatuman sang Dios?
7 Ang isa ka makahalangkat nga hilikuton mas mahapos himuon kon may nagakaigo ikaw nga galamiton ukon kasangkapan. Ang isa ka galamiton nga nagakaigo karon para sa isa ka partikular nga trabaho mahimo nga bag-uhon ukon buslan pa gani buwas bangod sang nagabalhin nga mga kinahanglanon. Kaanggid man ini sa aton hilikuton nga pagbantala sing mensahe nahanungod sa Ginharian sang Dios. Sa mga tinuig na, ang “matutom kag mainandamon nga ulipon” nag-aman sa aton sing nagakaigo gid nga galamiton, mga publikasyon nga gindesinyo labi na para magamit sa pagdumala sing mga pagtuon sang Biblia sa puluy-an. (Mateo 24:45) Busa nasangkapan kita agod buligan ang katawhan sang “tanan nga kapungsuran kag tribo kag . . . hambal” sa pagtuon sang ginapatuman sang Dios. (Bugna 7:9) Sa tion kag tion, ginaaman ang bag-ong mga instrumento agod makadungan sa nagabalhin nga mga kinahanglanon sa latagon sang kalibutan. Binagbinagon naton ang pila ka halimbawa.
8. (a) Ano nga bahin ang nahimo sang “Pakamatuora Ang Dios” sa pagpauswag sang edukasyon sa Biblia? (b) Anong instrumento para sa pagtuon sa Biblia nga hilikuton ang gin-aman sang 1968, kag paano ini ilabi na nga gindesinyo? (c) Paano ang Kamatuoran nga libro nakabulig sa paghimo-disipulo nga hilikuton?
8 Kutob sang 1946 tubtob 1968, ang libro nga “Pakamatuora Ang Dios” gingamit subong isa ka epektibo nga instrumento sa pagtudlo sa Biblia, kag mga 19,250,000 ka kopya ang ginbalhag sa 54 ka hambal. Ginpaguwa sang 1968, ang libro nga Ang Kamatuoran nga Nagadul-ong sa Kabuhi nga Dayon gingamit sing epektibo sa sulod sang madamong tinuig sa pagtuon sang Biblia upod sa mga interesado. Sang nagligad, kinaandan na para sa iban nga magtuon upod sa mga Saksi ni Jehova sa sulod sang madamong tinuig nga wala nagapabawtismo. Apang ining instrumento gindesinyo agod ilakip ang estudyante, nagapalig-on sa iya nga iaplikar ang iya ginatun-an. Ang resulta? Ang libro nga Jehovah’s Witnesses—Proclaimers of God’s Kingdom nagasiling: “Sa tatlo ka tuig sang pag-alagad sugod sang Septiembre 1, 1968, kag natapos sang Agosto 31, 1971, isa ka kabug-usan nga 434,906 ka tawo ang nabawtismuhan—sobra sa pilo sang kadamuon sang nabawtismuhan sang nagligad nga tatlo ka tuig sang pag-alagad!” Kutob sang ginpaguwa ini, ang Kamatuoran nga libro nakatigayon sing tumalagsahon nga sirkulasyon—sing kapin sa 107,000,000 sa 117 ka hambal.
9. Ano ang pinasahi nga bahin sang Mabuhi sing Dayon nga libro, kag ano ang epekto sini sa mga hubon sang mga manugbantala sang Ginharian?
9 Sang 1982 ang libro nga Mahimu Ka Mabuhi sing Dayon sa Paraiso sa Duta nangin ang pangunang libro nga ginagamit sa pagdumala sing mga pagtuon sa Biblia. Ining galamiton may kapin sa 150 ka laragway, ang tagsa may makahulugan nga mga kapsion nga nagapatalupangod sing malip-ot sang punto nga ginatudlo sang mga laragway. Ang Oktubre 1982 nga guwa sang Ang Aton Ministeryo sa Ginharian nagsiling: “Sa sulod sang mga 20 ka tuig nga ang ‘Pakamatuora Ang Dios’ amo ang aton pangunang ginatun-an nga libro (halin sang 1946 tubtob sang tunga-tunga sang dekada 1960) kapin sa 1,000,000 ka bag-ong manugbantala sang Ginharian ang gindugang sa aton organisasyon. Nian 1,000,000 pa ka manugbantala ang gindugang sang Ang Kamatuoran nga Nagadul-ong sa Kabuhi nga Dayon nangin ang pangunang ginatun-an nga libro sa tapos ini ginpaguwa sang 1968. Paagi sa paggamit sa aton bag-ong ginatun-an nga libro, Mahimu Ka Mabuhi sing Dayon sa Paraiso sa Duta, makita bala naton ang kaanggid nga pagdugang sa hubon sang mga manugbantala sang Ginharian? Pat-od gid, kon kabubut-on ini ni Jehova!” Maathag gid nga kabubut-on ini ni Jehova, bangod kutob sang 1982 tubtob 1995, kapin sa 2,700,000 ang gindugang sa mga hubon sang mga manugbantala sang Ginharian!
10. Anong bag-ong galamiton ang gin-aman sang 1995, kag ngaa makabulig ini sa mga estudyante sang Biblia sa pag-uswag sing madasig sa espirituwal?
10 “Ang alanyon daku, apang ang mga manugpangabudlay diutay,” siling ni Jesus. (Mateo 9:37) Ang alanyon daku, sa pagkamatuod. Madamo pa sing dapat himuon. Sa iban nga kadutaan ang mga tawo dapat maghulat agod makatuon sa Biblia. Gani sa tuyo nga mapalapnag sing mas madasig ang ihibalo sang Dios, sang 1995 ang “matutom kag mainandamon nga ulipon” nag-aman sing bag-ong galamiton, ang 192-pahina nga libro nga natig-uluhan sing Ang Ihibalo nga Nagadul-ong sa Kabuhi nga Walay Katapusan. Ining hamili nga instrumento wala nagahugod sa butig nga mga doktrina. Ginapresentar sini ang mga kamatuoran sang Biblia sa positibo nga paagi. Ginalauman nga magabulig ini sa mga estudyante sang Biblia nga mag-uswag sing madasig sa espirituwal. Ang Ihibalo nga libro may epekto na sa latagon sang kalibutan bangod sang 45,500,000 ka kopya nga naimprinta sa 125 ka hambal kag ginabadbad sa dugang pa nga 21 ka hambal.
11. Anong epektibo nga galamiton ang gin-aman agod buligan nga matudluan ang mga indi makahibalo magbasa kag magsulat ukon ang mga mapigaw magbasa, kag paano ini may talalupangdon nga bahin sa aton tugob-globo nga programa sa pagtudlo?
11 Sa pulupanag-on, ang ‘matutom nga ulipon’ nagaaman sing mga galamiton nga ginadesinyo para sa isa ka espisipiko, ukon limitado, nga kadam-an. Halimbawa, kamusta ang mga tawo nga ayhan nagakinahanglan sing pinasahi nga bulig bangod sang ila ginhalinan nga kultura ukon relihion? Paano naton sila buligan nga makatuon sang mga ginapatuman sang Dios? Sang 1982 nabaton naton kon ano gid ang ginakinahanglan naton—ang 32-pahina nga brosyur nga Agoma ang Kabuhi sa Duta sing Dayon! Ining madamo sing laragway nga publikasyon nangin epektibo nga galamiton sa pagtudlo sa mga indi makahibalo magbasa kag magsulat ukon sa mga mapigaw magbasa. Nagaunod ini sing tuman ka simple kag mahapos-mahangpan nga presentasyon sang sadsaran nga mga panudlo sang Kasulatan. Kutob sang ginpaguwa ini, ang Agoma ang Kabuhi nga brosyur nakaamot sing daku sa aton tugob-globo nga programa sang pagtudlo. Kapin sa 105,100,000 ka kopya ang gin-imprinta sa 239 ka hambal, nagahimo sa sini subong ang may pinakamadamo sing badbad nga publikasyon nga naimprinta sang Watch Tower Society!
12, 13. (a) Kutob sang 1990, anong bag-ong paagi ang gin-aman sang ‘matutom nga ulipon’ agod malab-ot ang madamo nga katawhan? (b) Paano naton mahimo magamit ang mga video sang Sosiedad sa aton ministeryo sa latagon? (c) Anong bag-ong galamiton ang gin-aman sining karon lang agod makabulig sa aton paghimo-disipulo nga hilikuton?
12 Dugang sa naimprinta nga mga publikasyon, sugod sang 1990 ang ‘matutom nga ulipon’ nag-aman sa aton sing isa ka paagi sang pagtudlo nga nagahatag sing bag-ong pamaagi sa paglab-ot sa madamo nga katawhan—ang mga videocassette. Sang Oktubre sadto nga tuig, ang 55-minutos nga video nga Jehovah’s Witnesses—The Organization Behind the Name ginpaguwa—ang nahaunang video nga ginhimo sang Watch Tower Society. Ginapakita sang matahom, impormatibo nga presentasyon, nga matigayon sa 35 ka hambal, ang bug-os kalibutan nga organisasyon sang debotado nga katawhan ni Jehova nga nagatuman sang sugo ni Jesus nga ibantala ang maayong balita sa bug-os nga duta. Ang video gindesinyo ilabi na sa pagbulig sa aton paghimo-disipulo nga hilikuton. Gingamit gilayon sang mga manugbantala sang Ginharian ining bag-ong galamiton sa ministeryo sa latagon. Gindala ini sang iban sa ila mga bag sang libro, pirme handa nga ipakita ukon ipahulam ini sa mga interesado. Wala madugay sa tapos ini ginpaguwa, ang isa ka nagalakbay nga manugtatap nagsulat: “Ang mga video nangin ang ika-21 nga siglo nga paagi agod malab-ot ang hunahuna kag tagipusuon sang minilyon ka tawo, gani ginalauman namon nga ining video mangin ang nahauna lamang sa madamong video nga pagagamiton sang Sosiedad sa pagpauswag sang bug-os kalibutan nga hilikuton sang Ginharian.” Sa pagkamatuod, madamo pa nga video ang gin-aman, lakip na ang tatlo-sing-bahin nga serye sang The Bible—A Book of Fact and Prophecy kag ang Jehovah’s Witnesses Stand Firm Against Nazi Assault. Kon ang mga video sang Sosiedad matigayon sa inyo pinulungan, gingamit bala ninyo ini sa inyo ministeryo sa latagon?a
13 Sining karon lang isa ka bag-ong galamiton, ang brosyur nga Ano ang Ginapatuman sang Dios sa Aton?, ang gin-aman agod makabulig sa aton paghimo-disipulo nga hilikuton. Ngaa ginbalhag ini? Paano ini gamiton?
Pag-usisa sa Bag-ong Galamiton
14, 15. Para kay sin-o gindesinyo ang Ginapatuman nga brosyur, kag ano ang ginaunod sini?
14 Ang bag-ong publikasyon nga Ano ang Ginapatuman sang Dios sa Aton? gindesinyo para sa mga tawo nga nagapati na sa Dios kag nagatahod sa Biblia. Ang nagalakbay nga mga manugtatap subong man ang nahanas-sa-Gilead nga mga misyonero nga may madamong tinuig nga eksperiensia sa imol nga mga pungsod nagbulig sa paghanda sa sining brosyur. Nagaunod ini sing maid-id nga kurso sa pagtuon, nga nagatuptop sang sadsaran nga mga panudlo sang Biblia. Ang mga tinaga mahapos, simple, kag direkta. Subong man, ang materyal indi naman sobra ka simple. Indi lamang “gatas” ang ginapresentar sini kundi “matig-a nga pagkaon” man gikan sa Pulong sang Dios sa paagi nga sarang mahangpan sang kalabanan nga tawo.—Hebreo 5:12-14.
15 Sining ulihi nga tinuig ang mga manugbantala sang Ginharian sa nanuhaytuhay nga kadutaan nangabay sing amo gid sini nga publikasyon. Halimbawa, ang sanga sang Watch Tower Society sa Papua New Guinea nagsulat: “Ang mga tawo ginaligban sang nagasumpakilay nga mga panudlo sang relihion. Kinahanglan nila ang malip-ot nga mga pinamulong sang kamatuoran, nga ginasakdag sang madamong teksto sa Biblia nga sarang nila mausisa sa ila kaugalingon nga mga Biblia. Kinahanglan nila ang maathag kag espesipiko nga presentasyon sang kon ano ang ginapatuman sang Dios sa matuod nga mga Cristiano kag kon diin nga mga kinabatasan kag mga bisyo ang dikalahamut-an sa iya.” Ang Ginapatuman nga brosyur amo gid ang kinahanglan naton agod buligan sila nga matun-an ang mga ginapatuman sang Dios.
16. (a) Sin-o ang labi na nga makabenepisyo gikan sa simple nga mga paathag sa bag-ong brosyur? (b) Paano mahimo nga makabenepisyo gikan sa Ginapatuman nga brosyur ang mga yara sa inyo teritoryo?
16 Paano ninyo gamiton ining bag-o nga instrumento? Una, sarang ini magamit sa pagtuon upod sa mga tawo nga may problema sa pagbasa ukon ayhan indi mahuyugon magbasa.b Ina nga mga indibiduwal mahimo makabenepisyo gikan sa simple nga mga paathag sa brosyur. Sa tapos marepaso ang abanse nga kopya sini nga publikasyon, ang mga sanga sang Watch Tower nagsulat sang masunod: “Ang brosyur mangin tuman ka mapuslanon sa madamong bahin sang pungsod diin ang mga tawo wala sing huyog sa pagbasa sing maid-id.” (Brazil) “May pila ka imigrante nga indi makabasa sang ila tumandok nga pinulungan kag nabudlayan pa gihapon sa pagbasa sing Pranses. Ining brosyur mahimo magamit subong bulig sa pagtuon upod sa ila.” (Pransia) May madumduman ka bala nga mga tawo sa inyo teritoryo nga mahimo makabenepisyo gikan sa Ginapatuman nga brosyur?
17. Sa anong paagi mahimo nga mapuslanon ang bag-ong brosyur sa madamong kadutaan, kag ngaa?
17 Ikaduha, sa madamong kadutaan ang brosyur mahimo magamit sa pagsugod sing mga pagtuon sa Biblia upod sa mahinadlukon sa Dios nga mga tawo walay sapayan kon daw ano man sila ka edukado. Sa pagkamatuod, dapat panikasugan nga makasugod sing pagtuon sa libro nga Ang Ihibalo nga Nagadul-ong sa Kabuhi nga Walay Katapusan. Apang sa pila ka hitabo mas mahapos makasugod sing pagtuon sa brosyur. Nian sa nagakaigo nga tion, ang pagtuon dapat iliton sa Ihibalo nga libro, ang aton panguna kag ginapakamaayo nga bulig sa pagtuon. Nahanungod sa sining paggamit sa Ginapatuman nga brosyur, ang mga sanga sang Watch Tower nagsulat: “Ang pagsugod sing mga pagtuon sa Biblia mabudlay, kag ang mga kahigayunan nga makasugod sing pagtuon daw mas maayo kon ang mga manugbantala magasugod paagi sa brosyur.” (Alemanya) “Ini nga sahi sang brosyur mangin labing epektibo sa pagsugod sing bag-ong mga pagtuon sa Biblia, nga mahimo nian mapadayon sa Ihibalo nga libro.” (Italya) “Bisan pa nga ang mga Hapones may mataas nga edukasyon, ang kalabanan may tuman ka limitado nga ihibalo sa Biblia kag sa sadsaran nga mga panudlo sini. Ang brosyur isa gid ka maayo nga panugod pakadto sa Ihibalo nga libro.”—Japan.
18. Ano ang dapat naton dumdumon nahanungod sa pagsunod sa mga ginapatuman sang Dios?
18 Ginpangabay sang mga sanga sang Sosiedad sa bug-os nga kalibutan ini nga brosyur, kag ginhatag ang pahanugot nga badbaron ini sa 221 ka pinulungan. Kabay nga ining bag-ong publikasyon mangin tuman ka mapuslanon sa pagbulig sa aton nga buligan ang iban nga matun-an ang mga ginapatuman sang Dios sa ila. Para sa aton bahin, dumdumon naton nga ang pagsunod sa mga ginapatuman sang Dios, lakip na ang sugo nga magbantala kag maghimo sing mga disipulo, nagahatag sa aton sing hamili nga kahigayunan agod mapakita kay Jehova kon daw ano ka daku ang paghigugma naton sa iya. Huo, ang ginapatuman sang Dios sa aton indi mabug-at. Amo ini ang labing maayo nga paagi agod mabuhi!—Salmo 19:7-11.
[Mga footnote]
a Ang libro nga Jehovah’s Witnesses—Proclaimers of God’s Kingdom nagasiling: “Wala ginabuslan sang mga videocassette ang naimprinta nga pahina ukon personal nga pagpanaksi. Ang mga publikasyon sang Sosiedad padayon nga may importante nga papel sa pagpalapnag sing maayong balita. Ang pamalaybalay nga hilikuton sang mga Saksi ni Jehova nagapabilin subong napasad sing malig-on nga Makasulatanhon nga bahin sang ila ministeryo. Apang, ang mga videocassette nagatimbang karon sa sini subong hamili nga mga galamiton sa pagpalambo sing pagtuo sa hamili nga mga saad ni Jehova kag sa pagpapagsik sing apresasyon sa kon ano ang ginahimo niya sa duta sa aton adlaw.”
b Para sa paathag sa kon paano dumalahan ang isa ka pagtuon sa Ginapatuman nga brosyur, tan-awa ang artikulo nga “Isa ka Bag-ong Galamiton sa Pagbulig sa mga Tawo nga Matun-an ang mga Ginapatuman sang Dios,” sa pahina 16-17.
Mapaathag Mo Bala?
◻ Sa anong duha-sing-katuyuan nga hilikuton ginasugo ni Jehova nga makigbahin ang iya mga alagad?
◻ Ngaa ang aton obligasyon nga magbantala kag maghimo sing disipulo indi mabug-at para sa aton?
◻ Anong mga galamiton ang gin-aman sang “matutom kag mainandamon nga ulipon” para magamit naton sa aton pagbantala kag paghimo-disipulo nga hilikuton?
◻ Para kay sin-o gindesinyo ang Ginapatuman nga brosyur, kag paano naton ini mahimo magamit sa aton ministeryo?
[Kapsion sa pahina 24]
Ang aton pagbantala kag paghimo-disipulo nga hilikuton indi mabug-at
[Kapsion sa pahina 26]
“Pakamatuora Ang Dios” (1946, ginrebisar 1952): 19,250,000 sa 54 ka hambal
[Kapsion sa pahina 26]
“Ang Kamatuoran nga Nagadul-ong sa Kabuhi nga Dayon” (1968): 107,000,000 sa 117 ka hambal (Pranses ang ginapakita)
[Kapsion sa pahina 26]
“Mahimu Ka Mabuhi sing Dayon sa Paraiso sa Duta” (1982): 80,900,000 sa 130 ka hambal (Ruso ang ginapakita)
[Kapsion sa pahina 26]
“Ang Ihibalo nga Nagadul-ong sa Kabuhi nga Walay Katapusan” (1995): 45,500,000 sa 125 ka hambal (Aleman ang ginapakita)