Magahiwat ang mga Saksi ni Jehova sing Internasyonal nga mga Kombension

Ang Nagadumala nga Hubon sang mga Saksi ni Jehova nagaplano sa paghiwat sing internasyonal nga mga kombension sa 1998. Makunyagon nga ginbaton ining pahibalo sa tuigan nga miting sang Watch Tower Bible and Tract Society of Pennsylvania, nga ginhiwat sa Jersey City Assembly Hall sang Sabado, Oktubre 5, 1996.

Dungan sa kinaandan nga distrito nga mga kombension, may pila ka internasyonal nga kombension nga pagahiwaton sa Aminhan nga Amerika sa tungatunga sang 1998. Ginapaabot nga ining mga pagtinipon magatingob sa ginatos ka libo nga mga Saksi gikan sa madamo nga bahin sang duta. Agod may tiglawas ang madamo nga pungsod, ang tagsa sang kapin sa 100 ka sanga talatapan sang Watch Tower Society pangabayon nga magpadala sing limitado nga mga delegado para sa isa ka partikular nga siudad sang internasyonal nga kombension sa Aminhan nga Amerika.

Maathag nga indi makalakbay ang tanan nga maluyag magkadto sa Aminhan nga Amerika. Apang, mahimo nga linibo ang makatambong sa isa ka internasyonal nga kombension nga pinakamalapit sa ila pungsod. Ginahimo ang mga kahimusan agod mahiwatan sing internasyonal nga mga kombension ang duha ukon tatlo ka pungsod sa Europa kag ang iban pa sa Aprika, Asia, Latin Amerika, Bagatnan nga Pasipiko, kag sa Caribbean.

Sa nagakaigo nga tion, pahibaluon sang mga sanga talatapan sang Sosiedad ang mga kongregasyon sa ila mga teritoryo nahanungod sa siudad ukon mga siudad sang kombension nga ginaagda sila. May impormasyon nga ihatag tuhoy sa mga petsa sang kombension kag sa mga kahimusan para sa pagpili sing mga delegado. Ang mga luyag mag-aplay para sa pilion nga mga delegado mahimo magsupotsupot na karon para sa sining pinasahi nga mga okasyon.

Ang tanan nga Saksi ni Jehova sa bug-os nga kalibutan makapaabot sa sining internasyonal nga mga pagtinipon sa 1998. Pareho nga programa ang ipresentar sa distrito nga mga kombension sa tanan nga pungsod.