Pagsalig sa Dihimpit nga Kalibutan

“ANG maayo nga luyag ko wala ko ginahimo, apang ang malaut nga indi ko luyag amo ang ginahimo ko.” Matuod bala ini sa imo? Mapalig-on ikaw sa paghibalo nga si apostol Pablo may amo man nga problema; apang isa sia ka tawo nga may talalupangdon nga Cristianong integridad. Wala bala ini nagasumpakilay? Sa iya sulat sa mga Cristiano sa Roma, ginbinagbinag ni Pablo ang problema: “Karon, kon ang indi ko luyag ginahimo ko, indi na ako ang nagahimo sini, kundi ang sala nga nagapuyo sa akon.” Ano nga sala ang iya ginapatuhuyan, kag paano niya ini nalandas agod mangin isa ka tawo sang integridad?​—⁠Roma 7:​19, 20.

Sa una nga bahin sang iya sulat, nagsiling si Pablo: “Paagi sa isa ka tawo nagsulod ang sala sa kalibutan kag paagi sa sala ang kamatayon, kag gani ang kamatayon naglaton sa tanan nga tawo bangod sila tanan nakasala.” Ang “isa ka tawo” amo si Adan. (Roma 5:​12, 14) Ang Adamiko nga sala​—⁠ang sala sang una nga tawo nga si Adan​—⁠amo ang kabangdanan sang napanubli nga mga dikahimpitan sang tawhanon nga rasa kag amo ang isa ka daku nga rason kon ngaa ang paghupot sing integridad isa gid ka hangkat.

Ang pagtamod ni Pablo sa “orihinal nga sala,” subong amo ang pagtawag sini anay, wala ginabaton sang madamo karon bangod ginsikway sa patag sang teolohiya ang rekord sang Biblia sa pagpanuga kabaylo sa mga teoriya sang ebolusyon. “Ginsikway sang mga iskolar ang bug-os nga bahin sang sinulatan” siling sang isa ka moderno nga komentaryo tuhoy sa Roma 5:​12-14. Apang, sang nagligad nga isa ka gatos ka tuig, nagahilisanto nga ginpaathag sang mga komentaryo sa Biblia nga “sang nagpakasala si Adan . . . nahigkuan sia sang amo nga sala kag subong mga resulta sini nahigkuan ang tanan niya nga kaliwat.”a

Ang Una nga Pagkadula sang Integridad

Subong nga ginapanghiwala sang madamo karon ang pagluntad sang una nga tawo nga si Adan, ginapanghiwala man nila si Satanas nga Yawa, nga subong isa lamang sia ka mito.b Apang ginasugiran kita sang daku nga awtoridad nga si Jesucristo nga ining isa “wala nagatindog sa kamatuoran,” sa iban nga pulong, indi sia masaligan. (Juan 8:44) Kag bangod yadto sang pagsugyot ni Satanas nga nagrebelde si Adan kag ang iya asawa nga si Eva batok kay Jehova kag ginguba ang ila integridad sa idalom sang pagtilaw.​—⁠Genesis 3:​1-​19.

Bangod naghalin kita tanan kay Adan, napanubli naton tanan ang huyog sa pagpakasala. Ang maalam nga tawo nga si Solomon nagsiling: “Wala sing tawo nga matarong sa duta nga nagahimo sing maayo kag wala nagapakasala.” (Manugwali 7:20) Sa gihapon, ang bisan sin-o nga tawo mahimo masaligan. Paano ini posible? Bangod indi kinahanglan ang isa ka himpit nga tawo agod mahuptan ang integridad.

Ang Sadsaran sang Integridad

Nakasala sing madamo si Hari David sang Israel, lakip ang nasulat nga pamatuod sang iya pagpakighilahi upod kay Batseba. (2 Samuel 11:​1-​27) Ginpadaku sang madamo nga sala ni David nga indi sia himpit. Apang, ano ang nakita ni Jehova sa iya? Ginapatuhuyan ang anak ni David nga si Solomon, si Jehova nagsiling: “Maglakat sa atubangan nakon, subong sang paglakat ni David nga imo amay, nga may integridad sa tagipusuon kag may pagkatarong.” (1 Hari 9:⁠4) Walay sapayan sang iya madamo nga sala, ginkilala ni Jehova ang pagkamasaligan ni David. Ngaa?

Ginhatag ni David ang sabat sang ginsilingan niya si Solomon: ‘Ginausisa ni Jehova ang tanan nga tagipusuon, kag ang tanan nga huyog sang panghunahuna iya ginahantop.” (1 Cronica 28:⁠9) Nakasala si David, apang mapainubuson sia, kag luyag niya himuon ang matarong. Padayon nga ginbaton niya ang pagsabdong kag pagtadlong​—⁠sa pagkamatuod, ginpangabay niya ini. ‘Usisaa ako O Jehova, kag tilawi ako; putlia ang akon mga batobato kag ang akon tagipusuon’ amo ang iya pangabay. (Salmo 26:⁠2) Kag ginputli matuod si David. Halimbawa, ang mga kabudlayan nga resulta sang iya pagpakasala upod kay Batseba, naglawig tubtob mapatay sia. Apang, wala gid nangatarungan si David tuhoy sa iya sayop. (2 Samuel 12:​1-​12) Sing labi pa ka importante, wala gid sia magliso gikan sa matuod nga pagsimba. Bangod sini, kag bangod sang matuod, tinagipusuon nga paghinulsol ni David, handa si Jehova magpatawad sang iya mga sala kag ginbaton sia subong tawo nga may integridad.​—⁠Tan-awa man ang Salmo 51.

Masaligan sa Idalom sang Pagtilaw

Gintilawan anay ni Satanas nga Yawa si Jesus sa tuyo nga gub-on ang iya integridad. Dapat niya huptan ang iya integridad sa idalom sang mga kabudlayan kag pag-antos, kabaliskaran sang kay Adan, nga ang pagkamatinumanon subong isa ka himpit nga tawo gintilawan lamang paagi sa pagpatuman sa iya sa isa ka kasuguan sang Dios. Dugang pa, nahibaluan ni Jesus nga ang pagtubos sa tawhanon nga pamilya nasandig sa iya integridad.​—⁠Hebreo 5:​8, 9.

Determinado si Satanas nga gub-on ang integridad ni Jesus, ginpalapitan niya sia sang si Jesus yara sa maluya nga kahimtangan​—⁠sa tapos makahinguyang sing 40 ka adlaw nga pagpamalandong kag pagpuasa sa kahanayakan. Ginsulay niya si Jesus sing tatlo ka beses​—⁠himuon nga tinapay ang mga bato; maglukso gikan sa pamakod sa atop sang templo, nagalaum nga luwason sia sang anghel kag sa amo magahatag sing milagruso nga tanda agod pamatud-an ang iya pagka-Mesias; kag batunon ang pagginahom sang tanan nga ginharian sining kalibutan kabaylo sang isa lamang ka “buhat sang pagsimba” kay Satanas. Apang ginpamatukan ni Jesus ang tagsa ka pagsulay, ginhuptan ang iya integridad kay Jehova.​—⁠Mateo 4:​1-​11; Lucas 4:​1-​13.

Ang Integridad ni Job

Ang panindugan ni Job, nga naghupot sang iya integridad sa idalom sang pagtilaw, bantog gid. Makawiwili, wala mahangpan ni Job kon ngaa natabo sa iya ang kalalat-an. Wala niya mahibal-an nga ginbutangbutangan sia ni Satanas sing sayop nga motibo, nagasiling nga nagaalagad lamang si Job sa Dios bangod sang kakagod kag nangangkon nga agod luwason ang iya kaugalingon, kinabubut-on nga gub-on ni Job ang iya integridad. Ginpahanugutan sang Dios nga mapaidalom si Job sa pila ka mabudlay kaayo nga mga kahimtangan agod ipakita nga sayop si Satanas.​—⁠Job 1:​6-​12; 2:​1-8.

Tatlo ka butig nga abyan ang nagsulod sa danyag. Hungod nila nga ginlaragway sing sayop ang mga talaksan kag mga katuyuan sang Dios. Bisan gani ang asawa ni Job, nga wala man makahangop sa hulusayon, napaslawan sa pagpalig-on sa iya bana sa tion sang iya daku nga pagkinahanglan. (Job 2:​9-​13) Apang malig-on nga nanindugan si Job. ‘Tubtob nga mapatay ako indi ko pag-isikway ang akon integridad! Kaptan ko sing malig-on ang akon pagkamatarong, kag indi ko ini pagbuhian; ang akon tagipusuon indi magpakahuya sa akon tubtob nagakabuhi ako.’​—⁠Job 27:​5, 6.

Ginpamatud-an sang dalayawon nga halimbawa ni Job, lakip ang integridad sang madamo iban pa nga matutom nga lalaki kag babayi, subong narekord sa Biblia, nga butigon si Satanas.

Integridad kag ang Cristianong Ministeryo

Ang integridad bala isa ka kinaiya nga ginapakabahandi ni Jehova para lamang sa iya kaayawan? Indi. Ang integridad may daku nga kabilihanan para sa aton nga mga tawo. Para sa aton kaayuhan nga ginsugo kita ni Jesus nga ‘higugmaon si Jehova nga aton Dios sa bug-os naton nga tagipusuon kag sa bug-os naton nga kalag kag sa bug-os naton nga hunahuna.’ Sa pagkamatuod, amo ini ang “labing daku kag nahauna nga sugo,” kag kinahanglan ang isa ka lalaki, babayi ukon bata nga may integridad sa pagtuman sini. (Mateo 22:​36-​38) Ano ang nadalahig, kag ano ang mga padya?

Ang tawo nga may integridad sarang masaligan, indi lamang sang iya isigkatawo kundi, ilabi na gid, sang Dios. Ang kaputli sang iya tagipusuon makita sa iya mga buhat; indi sia salimpapaw. Indi sia malimbungon ukon magarok. Amo sini ang siling ni apostol Pablo: “Nasikway namon ang natago nga mga butang nga makahuluya, wala nagalakat sa pagdaya, ukon sa pagsimbog sa pulong sang Dios, apang paagi sa pagpahayag sang kamatuoran nagapakilala kami sang amon kaugalingon sa konsiensia sang kada tawo sa atubangan sang Dios.”​—⁠2 Corinto 4:​2.

Talupangda nga ginahinambitan ni Pablo ang mga panimuot nga nagalakip sa Cristianong ministeryo. Paano ang isa ka Cristianong ministro makaalagad sa iban kon ang iya mga binuhatan dimatarong, kon wala sia sing integridad? Ang pangulo sang isa ka relihioso nga grupo sa Ireland nga naghalin sining karon lang maathag nga nagailustrar sini. Gin-ako niya nga iya “gintugutan ang isa ka pedophile nga pari nga magtrabaho upod sa kabataan tubtob nga naburuka ang iya pagpang-abuso sa kabataan,” suno sa The Independent nga pamantalaan. Ginpaathag sang report nga ang pag-abuso naglawig sing kapin sa 24 ka tuig. Nabilanggo ang pari sa sulod sang apat ka tuig, apang dumduma lamang ang pag-antos sang kabataan nga iya gin-abusuhan sadtong mga tinuig bangod ang iya manugtatap wala sing integridad sa moral agod maghimo sing aksion!

Integridad​—⁠Ang mga Padya

Si apostol Juan isa anay ka maisog nga tawo. Bangod sang ila mainit nga entusiasmo, gintawag sia ni Jesus kag ang iya utod nga si Santiago nga “Mga Anak sang Daguob.” (Marcos 3:​17) Subong isa ka tawo nga may talalupangdon nga integridad, ginpaathag ni Juan, upod kay Pedro, sa Judiyong mga manuggahom nga indi sia ‘makauntat sa paghambal’ tuhoy sa mga butang nga iya nakita kag nabatian sang kaupod niya si Jesus. Si Juan isa man sang mga apostoles nga nagsiling: “Dapat namon tumanon ang Dios subong manuggahom sa baylo sang mga tawo.”​—⁠Binuhatan 4:​19, 20; 5:​27-32.

Masiling nga sang sobra na 90 anyos si Juan, gintapok sia sa Isla sang Patmos “bangod sa paghambal nahanungod sa Dios kag sa pagpanaksi tuhoy kay Jesus.” (Bugna 1:⁠9) Sa iya edad, ayhan naghunahuna sia nga natapos na ang iya ministeryo. Apang ang tawo lamang nga may integridad kaangay sa iya ang mahimo masaligan sa pagsulat sing makakulunyag nga palanan-awon sa Bugna. Sa paghimo sini masaligan gid si Juan. Daw ano nga pribilehiyo yadto para sa iya! Kag may dugang pa nga magaabot. Sang ulihi, maathag nga sa palibot nayon sang Efeso, ginsulat niya ang iya Ebanghelyo kag ang tatlo ka sulat. Daku gid nga mga pribilehiyo sa paghinakop sa iya 70 ka tuig sang matutom, masaligan nga pag-alagad!

Ang mangin isa ka masaligan nga tawo nagahatag sing daku nga kaayawan. Ang pagkamasaligan sa panulok sang Dios nagahatag sing walay katapusan nga mga padya. Sa karon, “isa ka dakung kadam-an” sang matuod nga mga sumilimba ang nakahanda sa pagsulod sa bag-ong kalibutan sang paghidait kag paghiusa, upod ang paglaum nga kabuhi nga walay katapusan. (Bugna 7:⁠9) Dapat huptan ang integridad sa importante nga mga butang tuhoy sa moralidad kag pagsimba, walay sapayan sang mga pagtilaw sining sistema sang mga butang kag sang madamo nga kabudlayan nga mahimo dalhon ni Satanas. Magsalig nga paagi sa gahom nga ginahatag ni Jehova, sarang ikaw magamadinalag-on!​—⁠Filipos 4:​13.

Nagahambal tuhoy sa presente kag sa palaabuton, ginapasalig kita tanan sang salmista nga si David sang magsiling sia, sa isa ka pangamuyo sang pagpasalamat kay Jehova: ‘Tuhoy sa akon, bangod sang akon integridad ginsakdag mo ako, kag ipahamtang mo ako sa atubangan sang imo nawong tubtob sa tion nga dinapat-od. Pakamaayuhon si Jehova . . . Kabay pa kag Kabay pa.’​—⁠Salmo 41:​12, 13.

[Mga footnote]

[Kapsion sa pahina 4]

Walay sapayan sang iya mga sayop, ginpamatud-an ni David nga masaligan sia

[Kapsion sa pahina 5]

Nagbilin si Jesus sa aton sing labing maayo nga huwaran sa pagkamasaligan

[Kapsion sa pahina 7]

Ang pagkamasaligan nagahatag sing daku nga kaayawan