‘Kinahanglan Naton ang Bunayag nga mga Tawo’

ANG pagkabunayag malaka sa kalibutan karon. Apang, isa ini ka sadsaran nga tulumanon para sa mga Cristiano. Si Pablo nagsulat: “Luyag namon maggawi sing bunayag sa tanan nga butang.” (Hebreo 13:18) Amo sini ang luyag himuon ni Wilma, isa sang mga Saksi ni Jehova sa Faenza, Italya.

Ginasugid sang pamantalaan nga Il Resto del Carlino nga sang nakakita sia sing isa ka kahita nga nagaunod sing daku nga kantidad sang kuwarta sa guwa sang supermarket sa iya ginapuy-an nga siudad, ginhatag niya ini sa pulisiya “nga wala nagapangalag-ag” agod mauli ini sa tag-iya.

Sang nabatian ini sang meyor, nagpadala sia gilayon sing malip-ot nga sulat sa pagpasalamat kay Wilma. “Sa ngalan sang Siudad,” sulat niya, “ginapasalamatan ko ikaw sing tinagipusuon bangod sang imo maayo gid nga ginhimo. Ang aton halangdon nga siudad sang Faenza nagakinahanglan sing maayo kag bunayag nga mga tawo.”

Makilala man ukon indi ang aton maayo nga mga binuhatan, dapat kita manikasog pirme nga mangin bunayag. Subong ginasugo sang Balaan nga Kasulatan, ‘nagatinguha kami nga himuon ang matarong indi lamang sa atubangan sang Dios kundi man sa atubangan sang mga tawo.’​—⁠2 Corinto 8:​21, The Jerusalem Bible.